Thursday, July 31, 2014

46 මං නුඹෙ දෝණී

මවුබිමෙන් බැහැරව රැකියාව කරන අසංක ශ්‍රී ලාල් සහෘදයා කලක පටන්ම සිරාගේ කාමරයට යන එන හිතවතෙකි. මාසයේ අවසාන ලිපිය හෙවත් හත්වෙනි ලිපිය වෙනුවෙන් මෙවර ඉඩ කඩ වෙන්වනුයේ ඔහු විසින් නිර්මාණය කර එවන ලද පද්‍ය නිර්මාණ එකතුවක් වෙතටයි. මෙයට පෙර සිරාගෙ කාමරය තුල කාව්‍ය නිර්මාණ පලවී නැති හෙයින්ම මෙය නැවුම් වෙනසක් වනු ඇත.

මෙහි සටහන් වන අවසාන මාතෘකාව අරභයා ඔබේ අදහස් මුසු කර අසංක නැවතූ තැන සිට ඉදිරියට පද ගොතන මෙන් ඔහු මේ සටහන කියවන ඔබෙන් ඉල්ලා සිටියි. ඔබේ වටිනා කාලයෙන් මදක් වැය කර ඒ කාරිය කරන්නට හැකි නම් ඔහුගේ උත්සාහය තව තවත් අලංකාර වනු ඇතැයි මට සිතෙයි.

අහෝ


නියංසායට හසුව වියැකුණ
අරලියා මල් සුවද කෝ අද
ලොවේ නන් දෙස බැලූ බැලූ අත
රජ කරයි හිනැහීහී මල් වද

නොනිමි සුව දී දසත පැතිරුණ
කොහේ සැගවුනි සුමුදු මද නල
දනන් ගත සිත භියෙන් තෙත් කර
හමා යයි රුදු චණ්ඩ සුළි පෙළ

අමා සරයෙන් සවන් මත් කල
කොහේ පාවුනි විහග බිගු නද
වපුරමින් කිළි පවිටු බස් නෙක
ලොවේ රැව් දේ කපුටු ගොර නද

ගිජිදාන


තෙදැති බලැති විකුමැති වන ගිජිදාන
කොහේ රජ කරනු උඹ දැන් නිරිදාන
උඹට හිමි වනෙත් සමුලින් උදුරාන
උඹේ සනුහරෙත් උන් දැන් වනසාන

යදම් කරවට හා දෙපාතර
පටලවා උඹ හිර කරන්
බුදුන් ධාතුන් වඩම්මයි උඹෙ
පිට තැබූ රන් කරඩුවෙන්
උඹේ පිට මත කරඩුවෙන්

උඹේ පැටවුන් උදුරගෙන උන්
ශිල්පයට හුරු කර බලෙන්
උන්ගෙ පැටවුන් ඇසට පෙන්වා
පිනා යයි උන් සන්තොසින්
උන්ගෙ පැටවුන් සන්තොසින්

හිතක් පපුවක් නොමැති උන් අද
වැනසුවත් උඹ අවි බලෙන්
උන්ට දවසක් ඒවි උඹ නැති
අඩුව දැනෙනා සහතිකෙන්
ඒවි දවසක් සහතිකෙන්

අසරණ මල් කැකුළු


වා සිදුරෙන් වැටෙන දියට
තියලා හැලි වළං මුට්ටි
ඒ වතුරෙන් සෝද හරිමු
නෙතින් පනින් කදුළු කුට්ටි

එපා මල්ලි හිනැහෙන්නට
අමතක කර උඹෙ කුසගිනි
එදකින විට උඹ දන්නෑ
හදේ නැගෙන සෝ දුක් ගිණි

චූටි නංගි කිරි ඉල්ලා
අඩන විටදි මගෙ අම්මේ
කිරි එරෙන්නෙ නැත්තේ ඇයි
කියලා පලයන් අම්මේ

අකුරට යන්නට ආසයි
පොත් මිට තුරුලෙන් අල්ලා
ඒත් කෝම මං යන්නද
පැටව් දෙන්නා තනි කරලා

සෙනෙහස් ඔරුවේ යන්නට
හබල් දෙකම අපට නැතේ
අපෙ ජීවන ගංගාවම
උණු කදුලින් පිරී ඇතේ

නික්ම ගියත් උඹ රහසෙම
නෑ තරහක් අපෙ අම්මේ
හීනෙන්වත් ලගට ඇවිත්
හිස අතගාපන් අම්මේ

තාත්තා


හුණු බදාමෙ ඩා කදුලින් දිය                     කරලා
ගඩොලින් ගඩොල බැද අපෙ ලොව   ගොඩනගලා
පිරුවා නේද කුස අපෙ නිති                වෙහෙසීලා
අපටත් හොරා කුසගින්නේ ඔබ                  ඉදලා

වස්තුව ධනය කිසිවිට නෑ             ගොඩගැසුවේ
ඇදිවත කඩමල්ල ගැනවත් නෑ              තැකුවේ
අපේ දියුණුව නේද තුන් තිස් පෑ              හිතුවේ
ඒ දෙස බලා ලොව්තුරු සුව ඔබ            ලැබුවේ

ඔබ ළග තිබෙන උත්තම මනුසත්             ගුණය
මහ බෝ සතුන්ගේ ගුණ කදටත්             වැඩිය
පියතුම ඔබට සම වෙනකෙක් ලොව       නැතිය
මතු මතු භවෙත් ඔබ අපෙ පිය විය           යුතුය


නුඹ පමණයි


ආදර කුසුමන් හද විකසිත වී
පුද දෙනු නොහැකිව හිත ලතැවුන දා
ඇයට හොරා නෙතු තුල හැංගීලා
නුඹ පමණයි මා සමගින් සිටියේ

ආදර කුසුමන් දෝතින් අරගෙන
හසරැල් වපුරා ඇය ළං වූදා
මටත් හොරා නෙතු ලග දැල්වීලා
නුඹ පමණයි මා සමගින් සිටියේ

ආදර කුසුමන් තලා පෙලාදා
පෙම් ලොව ඈ මා මුලා කෙරුවදා
ලොවට හොරා නෙතගින් වැගිරීලා
නුඹ පමණයි මා සමගින් සිටියේ

කඳුලේ....


බලනු මා දෙස


මෙවන් දසුනක් මගේ දෙනෙතට
කිසි ලෙසකවත් රුවා ගන්නට
නොමැත මා පැතුවේ
මගේ ආදර අම්මේ

මියුරු සරයෙන් මා ඇමතූ ඔබ
කිමද අද මේ නිහඩ ස්වරයෙන්
බලා ඉන්නේ මගේ දෙසවන්
හමුවෙනා තුරු ඔබේ වදනක්

නුවන් එළියෙන් මගේ දිවි මග
එකලු කෙරූයේ ඔබමැ පමණයි
විවර කර ඔය නෙතු පියන්පත්
බලනු මා දෙස එක වරක්වත්


ඔබ ඇත්නම්


සිසිවත කුමට ඔබෙ වත මට        පෙනේනම්
නිල්මිණි කුමට ඔබෙ නෙත්මිණි      දිලේනම්
මල්ගොමු කුමට ඔබෙ හසරැලි         පිපේනම්
දියරැලි කුමට ඔබෙ කෙහෙරැලි      සැලේනම්

නා දළු කුමට ඔබෙ තොල් පෙති     නැටේනම්
වෙණ නද කුමට ඔබෙ කට හඩ     ඇසේ නම්
පවනැල් කුමට ඔබෙ සුසුමන්         දැනේනම්
මුලු ලොව කුමට ඔබ මා ලග              හිදීනම්


දෝණියේ


කහට දම් පැහැ පුංචි ගවුමේ
හැඩ බලන මගෙ දෝණියේ
රැලි විදාලා දෑත් නටවා
සිනාසෙන මගෙ දෝණියේ

පුස් කැවුණු පොත් මිටිය තුරුලේ
තියා හිනැහෙන දෝණියේ
කැඩුනු පැන්සල උඹේ සුරතට
රළු නැතිද මගෙ දෝණියේ

උඹට උඹ ගැන දුකක් නැතිදැයි
කියාපන් සුදු දෝණියේ
නෙතට උනනා කදුළු බිදු මට
බර වැඩියි මගෙ දෝණියේ

නැණ පහන්සිළු දල්වලා උඹෙ
අදුර ඉරපන් දෝණියේ
අපිට හිමිනැති සොදුරු ලෝකෙට
පිය නගාපන් දෝණියේ

බිඳුන පැතුම

පැතුවේ නෑ මහ සයුරක්
පැතුවෙ පුංචි දිය දහරක්..
සිහින බිඳී දුටු මෙතුවක්
ලැබුණේ මහ වැලි කතරක්...

පැතුවේ නෑ මල් ගොමුවක්
පැතුවෙ එකම පිපි කුසුමක්..
පුරවා හද තුළ සුසුමක්
ලැබුණේ කටු පිරි ඉත්තක්

පැතුවේ නෑ තරු පොකුරක්
පැතුවෙ එකම තනි තරුවක්..
මුහු කොට නෙතගට කඳුලක්
ලැබුණේ අවපස අහසක්...

පැතුවේ නෑ මිණි කිරණක්
පැතුවෙ ළහිරු අරුණැල්ලක්..
ගෙන දී දිවියට අඳුරක්.
ලැබුණේ මහ ඝන කලුවක්.
මම නුඹේ දෝණි


හසරැල් මැකුණු වත කමලෙනි           සඳ රැජිණී
දුක දැනිලාද හඬලන්නේ                  උල  ලේනී
පෙනුනේ නැතිද බොඳ වූ මා නෙත්        කෙවිණී
අමතකද වීද නුඹෙ හුරතල්                  සුදු දෝණී

උඳුපිය ගොල්ල නිදිබරිතව                  මැලවීලා
ඔබ මා දෙපා සටහන් නැත එහි               රැඳිලා
ගෙයි පිල මත මැවුණු රස බස්           ගොලු වීලා
පාලුව නිබඳ ඇත එහි දැන්                  රජ වීලා

අම්මා අප අතැර ගිය දවසේ                      සිටම
නිබඳව ලදිමි නුඹ දුන් සෙනෙහසෙ           මහිම
අලුතින් මවක් ගෙදරට ආ                     දවසේම
උදුරා දැමුවේද නුඹෙ මුලු               සෙනෙහසම

.....................................................................
.....................................................................
.....................................................................
.....................................................................

මාසයේ අවසාන ලිපිය වෙනුවෙන් සිරාගේ කාමරයට ලියා එව්වේ,
අසංක ශ්‍රී ලාල්


ප.ලි

එක් එක් පද්‍ය රචනාවන් වෙනුවෙන් ඡායාරූප තෝරා එවන ලද්දේද අසංක විසිනි

Monday, July 28, 2014

56 දඹුල්ලේ ටිකට් හොරු සහ තවත් කථා

දඹුල්ල අන්තර්ජාතික ක්‍රිකට් ක්‍රීඩාංගනයේදී තුන්කොන් තරගාවලිය ආරම්භ වූයේ ශ්‍රී ලංකාව සහ ඔස්ට්‍රේලියාව සහභාගි වූ තරගයකිනි. අපේ රට තරග වදින නිසාම අතිමහත් ප්‍රේක්ෂක ජනතාවක් පිටිය කරා පැමිණියෙන් එම තරගයේ ප්‍රවේශ පත්‍ර නිකුත් කරමින් සිටි සිරා කොලුවා ඇතුලු කණ්ඩායම මුහුණ දුන්නේ තරමක අපහසුතාවකට බැව් පෙර ලිපියකදී මම කීවෙමි.



දඹුළු කථා 1 කොටස  2 කොටස  3 කොටස

ප්‍රවේශ පත්‍ර සියල්ලම අළෙවි වී අවසන් වූයේ නැතිනම් ඒවා අළෙවි කිරීම නතර කරන්නේ කොයි වේලාවටද යන තීරණය ගත්තේ අප භාරව සිටි අපගේ නිළදරුවා වූ පෙරේරා මහතා විසිනි. සාමාන්‍යයෙන් අඩු මිළකට නියම වී ඇති ප්‍රවේශ පත්‍ර වේලාසනින් අළෙවි වී අවසන් වීම සාමාන්‍ය ස්වභාවයයි. මේ කියන තරගාවලියේ සිරා කොලුවා සහ මගේ සහායකයා වූ මංජුවා අළෙවි කලේ රු 750/- කට මිළ නියම වී තිබූ ප්‍රවේශ පත්‍රයක් බව මගේ මතකයේ හොදින් සටහන් වී තිබේ.

සෑම තරගයකදීම එකතු වන ටිකට් පත් මුදල් එදිනම ආරක්ෂක සේවයක් යටතේ දඹුල්ලේ සිට කොළඹ යවා බැංකුගත කිරීම සාමාන්‍ය ක්‍රමවේදය විය. ශ්‍රී ලංකා ක්‍රිකට් ආයතනයේ ගණකාධිකාරී වරයෙකු සියල්ල අධීක්ෂණය කර තම අනුමැතිය සටහන් කල පසු පෙරේරා මහතාටද මේ කටයුුතු වලින් නිදහස ලැබේ.

දිවා රාත්‍රී ක්‍රිකට් තරග සවස 2.30 ට ආරම්භ විය. පළමු කණ්ඩායම පන්දුවට පහර දීමෙන් පසුව ලකුණු හඹා යන කණ්ඩායමේ ඉනිම ආරම්භ වී පැයක් පමණ යනතුරු ප්‍රේක්ෂකයෝ පැමිණෙති. එයින් පසු තරගය නැරඹීටම අලුතෙන්ම කෙනෙකු ආවා නම් ඉතාම කළාතුරකිනි.

තමාට නියම වූ ප්‍රවේශ පත්‍ර සියල්ල විකුණා අවසන් කල විටෙක අපට ඇත්තේ තරගය සජීවීව නරඹන්නට ක්‍රීඩා පිටියට යන්නට තදියමකි. ක්‍රීඩා පිටිය දෙසින් වරින් වර නැගෙන ජය ඝෝෂා හඩ ඒ ආශාව තව තවත් වැඩි කරයි. එහෙත් අප අත තිබෙන මුදල් මෙන්ම විකුණා ඇති ටිකට් පත් ප්‍රමාණය ගණනය කර අපෙන් මුදල් භාරගන්නේ ගණකාධිකාරී වරයා එහි පැමිණි පසුවයි. එහෙත් ඔහු පැමිණෙන තෙක්  එහි කල් මරන්නට වුවහොත් අපට ක්‍රිකට් තරගය නරඹන්නට අවස්ථාවක් නොලැබෙයි.

පුතා මැච් එක බලන්න යන්න පුලුවන්. හැබැයි සල්ලි වල වගකීම ඕගොල්ලො අරගන්න ඕනෙ කැමතිද ? පිටියට යන්නට අවසර පැතූ දිනයක පෙරේරා මහතා එසේ පැවසුවේය.

දුරදිග නොබලා වුවද එයට කැමති වී, අප අතේ ඒ අවස්ථාවේ තිබූ ලක්ෂ එක හමාරකට ආසන්න මුදලක් දෙකට බෙදා මාගේ සහ මංජුවාගේ කලිසම් සාක්කු දෙකේ දමාගෙන  හිතේ ගින්දරෙන් වරින් වර සාක්කු අත ගාමින් තරගය නැරඹූ ආකාරය මේ සටහන තබන අවස්ථාවේ මා හට සිහිපත් වෙයි. යම් හෙයකින් එදා එම මුදල් අස්ථානගත වූයේ නම් අපට කුමක් වේදැයි මට මේ මොහොතේ සිතා ගත නොහැකිය.

පැයකට ආසන්න කාලයක් තරගය නරඹා මුදල් භාරදීම පිණිස ප්‍රවේශ පත්‍ර කවුළු වෙත යන විට එහි යම්කිසි පුරස්නයක් පැනනැගී තිබුනි. රවියා අළෙවි කල ටිකට් පත් සංඛ්‍යාව සහ එකතු වී ඇති මුදල අතර විශාල පරස්පරයකි.

කොහොමද පුතා මෙච්චර ගානක් අඩු වෙන්නෙ. ඔයාලා ඉතුරු සල්ලි දෙද්දි වරද්දගත්තද ?

පෙරේරා මහතාද දැඩි සේ කලබල වී සිටියි. රුපියල් 2000 කට වැඩි වටිනාකමක් සහිත ප්‍රවේශ පත්‍රයක් රවී කොලුවා අළෙවි කල අතර ඔහු මෙන්ම ඔහුගේ සහායකයාද සිදුවූයේ කුමක්දැයි සිතාගත නොහැකිව අරමුණක් නැති දෑසින් මුදල් සහ ටිකට් පත් සතපවා තිබූ මේසය දෙස නෙත් යොමා සිටියහ.

ඉතුරු සල්ලි නම් හරියටම දුන්නා. එතන කිසිම වැරැද්දක් වෙන්න විදියක් නෑ. රවියා පවසයි. එහෙත් එතැන තිබූ මුදල් සහ අළෙවි වී අවසන් වූ ටිකට් පොත් සංඛ්‍යාව අතර පෑහීමක් නැත. එක් ටිකට් පොතක ටිකට් පත් 50 ක් අඩංගු වෙයි. ඒ නිසා අළෙවි වී අවසන් වූ පොත් සංඛ්‍යාව 50න් ගුණ කිරීම මගින් සමස්ත ටිකට් පත් වටිනාකම සැණෙකින් ලබා ගත හැක.

පුතා දැන් එකවුන්ටන්ට් ආවම මම මොනවද කියන්නෙ. ඒ මිනිස්සු සැක කරයි අපි මේ සල්ලි හොරකං කලා කියලා. පෙරේරා මහතා දැඩි සේ කලබල වී ඇති සෙයකි.

අපි හැම පොතකම ටිකට් 50 ගානෙ තිබුනද කියලා හොයලා බලමු. 
කවුදෝ කෙනෙක් කල ඒ යෝජනාව ක්‍රියාත්මක කරන්නට වෙනත් සරණක් නැති තැන පෙරේරා මහතා තීරණය කලේය. එයින් පසු අකරතැබ්බයට හේතු සොයාගන්නට වැඩි වේලාවක් ගියේ නැත.

හරිනෙ පුතා. මේ පොතේ එක ටිකට් එකක් අඩුයි. මේකෙ දෙකක් අඩුයි. මෙහෙම ටිකට් අඩුවෙන්න බෑ. හැම එකකම 50 ගානෙ තියෙන්න ඕනෙ.

ටිකට් පතක් ඉරා අවසන් වූ පසු ටිකට් පොතේ ඉතිරි වන කොටස් (Counter File) පරීක්ෂා කිරීමේදී අතුරුදන් වූ ටිකට්පත් වල එම කොටසද ඉවත් කර ඇති බව පැහැදිලි විය.

මෙතන ලොකු වංචාවක් තියෙනවා පුතා. කරුණාකරලා ඕගොල්ලො මේ වැඩේ කලා නම් මට කියන්න. මම මේකට වග කියන්න ඕනෙ.

රවියා සහ උගේ සහායකයා එවැනි කිසිවක් සිදු නොකල බව පුන පුනා කීම නිසා ඉදිරි තරග වලට ඇති ටිකට් පත් වලද මේ ආකාරයෙන් අඩුවක් තිබේද යන්න පරීක්ෂා කර අවසන් නිගමනයකට එන්නට ගණකාධිකාරී තැන සමග පෙරේරා මහතා එකගතාවකට පැමිණියේය.

මේ අනපේක්ෂිත සිදුවීම නිසා අප කණ්ඩායමේ සිත් සතන් වල වූ සතුට යම් තරමකට සේදී ගොස් තිබේ. තමා වංචාවක් කලා යැයි නිලදරුවන් සිතනු ඇතැයි රවියා විස්සෝපයෙනි.

එදින නිවසට ගිය වහාම ඇගපත පිරිසිදු කිරීමකින් හෝ තොරව ඉදිරි තරග වලට නියමිත ප්‍රවේශ පත්‍ර අඩංගු කාඩ්බෝඩ් පෙට්ටි වල ආරක්ෂිත ආවරණ ඉවත් කර ඒවා සාලය මැද පැදුරක් එලා එහි හැලුවේ පෙරේරා මහතා විසිනි.

ඒ ඒ තරග වලට අදාළ සියලුම ප්‍රවේශ පත්‍ර වර්ග දැඩි පරීක්ෂා කිරීමකට ලක් කල අතර ඒ සදහා පැය කීපයක් ගත විය. අවසානයේ අපට සියල්ල නිරාකරණය කරගත හැකි විය.

පුතා ටිකට් අඩු වෙලා තියෙන්නෙ ලංකාව සෙල්ලම් කරන මැච් වල විතරයි. වටිනාකම වැඩි ටිකට් පොත් වලින් තමයි ටිකට් අඩු වෙලා තියෙන්නෙ. මම දැන් මේ අතුරුදහන් වෙලා තියෙන හැම ටිකට් එකකම අංකය අරගන්නවා. එදාට පොලිසිය ඉතුරු ටික බලාගනියි.

පෙරේරා මහතා එතෙක් ඔහු පෙලන ලද ගැටළුවෙන් නිදහස් වී තිබේ.

කවුද එතකොට මේ වැඩේ කරන්න ඇත්තෙ ? රවියා විමසයි

අපි ක්‍රිකට් බෝඩ් එකේ වැඩ ටික ඉවර කරලා දඹුල්ලට මේ ටිකට් ඔක්කොම එවනවා ප්‍රාදේශීය සභාවෙ අනුමැතිය අරගෙන සීල් එකක් ගහන්න. ඒක ගැහුවට පස්සෙ තමයි ආපහු කොළඹට ගෙන්න ගන්නෙ. මට හිතෙන විදියට එතැනදි තමයි මේ වැඩේ වෙලා තියෙන්නෙ.

අපගේ නවාතැන වූ තිලක් අයියාගේ නිවසේදී තරගයක් පැවැත්වූ දිනට පසු දින ඉන්දියානු මාධ්‍යවේදීන් විසින් පැවති තරගයට අදාළව ඔවුන් විසින් ලබාගත් ඡායාරූප පෙන්වීම සිරිත් පරිදි සිදුවීගෙන ගියේය. ඔවුන් ඇත්ත වශයෙන්ම ඒ කාරියට ඉතාම දක්ෂ පිරිසක් වූහ.

දඹුල්ලේදී තරගයක් නැති විවේකී දිනයක් ලැබුන විට ඔවුන්ගේ බිරින්දෑ වරු ලංකාවට ගෙන යන්නට ඔතා දුන් ඉන්දියානු රස කැවිලි අප සමග බෙදා හදාගෙන අනුභව කරන්නටද ඔව්හු අමතක නොකලහ. මේ අය අතර සිටි දැඩි හින්දු භක්තිකයකු වූ තීරු ලිපි රචකයෙකු සිය දියණියගේ විවාහ උත්සවයට සහභාගි වන ලෙසද මා හට ආරාධනය කලේ අප කණ්ඩායමේ අනෙක් අයට වඩා මා ඔහුට හිතවත් වූ හෙයිනි.

ඇතැම් රාත්‍රියක අප ඔවුන් සමගින් කුඩා මේසයකට තට්ටු දමමින් ගීත ගැයුවෙමු. එවන් විටෙක සිරා කොලුවාට අමතරව නැසී ගිය ගායනවේදී කපුගේ ගේ කටහඩට සමාන  හඩක් ඇති මිහිර අයියාද කපුගේ ගැයූ විරහා ගීතයෙන් සභාව පිනවූවේය.

අපගේ ආරාධනයෙන් ඉන්දියානුවන්ද හින්දි ගීතයෙන් සභාව කුල්මත් කලෝය. ඔවුන් අතර ඉතා හොද ගායන හැකියාවක් ඇති මාධ්‍යවේදියකු විය. අප ඔහුගෙන් ඉතාම පැරණි හින්දි ගීත වල නම් පවසා ගායනා කරන ලෙස ඉල්ලා සිටි කලෙක,

සෑහෙන්න පරණ සින්දුවක්නෙ...ඕගොල්ලො මේවා අහලා තියෙනවාද ? යනුවෙන් විශ්මය පලකොට අපේ ඉල්ලීම් ඉටුකලා පමණක් නොව එම ගීත අඩංගු චිත්‍රපටයේ නම පවා පැවසුවේය.

හින්දි නළු නිළියන් පැවැත්වූ මාධ්‍ය සාකච්ඡා වලට සහභාගි වී ඔවුන් ලැබූ අත්දැකීම්ද අප සමග බෙදා ගන්නට තරම් ඔව්හු නිහතමානී වූහ. ඒ කාලයේ සිටි නිළියන් අතරින් Make Up නොමැතිව ඉතාම සුන්දරම තැනැත්තිය ප්‍රීටි සින්ටා බවද ඇය අනෙක් නිළියන්ට වඩා බොහෝ සේ  මිටි බවද, අයිශ්චර්යාගේ දත් අසුන්දර බවද ඔව්හු අපට පැවසූහ.

මෙවැනි අවස්ථාවක් බොහෝ විට තිලක් අයියාගෙන් මුදල් දී ලබා ගන්නා බියර් බෝතලයකින් දෙකකින් හැඩ විය. ඉන්දියානුවන් අතරින් අජිත් සිං පමණක් බියර් පානයට එකතු වූ අතර පෙන නැගී ඇති බියර් වීදුරුව තුලට ඇගිල්ලක් යොමු කර පෙන ස්වල්පයක් තවරා..අප සිටි මේසයේ හතර කොනටම ඒවා විසිකර බියර් පානය කිරීම ඔහුගේ සුවිශේෂී පුරුද්දකි.

මිහිර අයියා කපුගේ ගැයූ විරහා ගිත ගයන්නේ ඉතාම හැගිම්බරවය. ඇතැම් විටෙක ඔහු හට ආදරයේ විරහව පිළිබද පෙර අත්දැකීම් තිබෙන්නට ඇත. මේ ගීත වල අර්ථය පිළිබද විමසන ඉන්දියානුවන් වෙත අප දන්නා ඉංගිරිසියෙන් ඒවා පහදා දෙන්නට මටත් රවියාටත් සිදු විය.

එක් වෙහෙසකර දිනයක අවසානය සනිටුහන් කරමින් නිවෙසට පැමිණ මද වේලාවක් යන්නට ඇත. ඉන්දියානුවන්ද කැමරා ආම්පන්න රැගෙන මහත් සේ වෙහෙසට පත්ව නිවසට ගොඩ වැදුනේ අපටත් පසුවය. තවත් පැය භාගයක පමණ ඇවෑමෙන් එහි පැමිණියේ තුන් රෝද රියකි. ඒ තුලින් මතුවූයේ සුදු ජාතික තරුණියන් දෙදෙනෙකි. ඔවුන් දෙදෙනා දියෙන් ගොඩගත් මාළුවෙකු මෙන් භියෙන් ගැහෙමින් සිටියහ.

තිලක් අයියා....තුන්රෝද රථ රියදුරා ශබ්ද නගා ගෙහිමියාට කථා කරයි.

ඒ හඩ ඇසී තිලක් අයියා ඔවුනට සම්මුඛ වෙයි.

කවුද මල්ලි මේ ?

ටවුමෙ ඔරලෝසු කණුව ලග හිටියෙ යන්න එන්න අතක් නැතුව, මේ ගොල්ලො මැච් එක බලන්න ඇවිල්ලා නතර වෙලා හිටපු තැනින් අයින් වෙලා වෙන කොහේටද යන්න කියලා, ඒ උනාට ඒ ගමන යන්න වෙලා නෑ. නතරවෙන්න තැනක් හොය හොයා මේ මහ රෑ ටවුමෙ ඉන්නවා දැකලා මම මෙහෙට අරගෙන ආවෙ. කාගෙ උනත් දරුවොනෙ..තව ටිකක් වෙලා එතන හිටියා නම් කවුරු හරි උස්සගෙන යනවා. දැන් රෑ 12 ත් පැනලා.

සුරූපී නව යොවුන් තරුණියන් දෙදෙනාට තිලක් අයියා නිවස තුලට පැමිණෙන ලෙස ආරාධනා කලද ඔව්හු එහි පැමිණියේ නැත. නිවස පුරාම සිටින පිරිමි පාර්ශවය දැකීමෙන් ඔව්හු භියෙන් සළිතව සිටිති.

එන්න භය වෙන්න එපා තිලක් අයියාගේ බිරිද පැමිණ ඔවුනට නැවත ආරාධනා කලද ඔව්හු තවමත් භියෙනි.

මේ අය කවුද ? එකියක සැලෙන හඩින් ඇසුවාය.

මේ අය මැච් එකේ ටිකට් වැඩ කරන අය, කොළඹ ඉදන් ඇවිල්ලා තියෙන්නෙ. භය වෙන්න එපා. මමත් මේ ගෙදරම තමයි ඉන්නෙ. තිලක් අයියාගේ බිරිද ඔවුන්ගේ භිය නැති කරන්නට වෑයම් කරන්නීය.

එවිට මා එකියකගෙන් විමසුවේ කුමන රටකින් මෙහි පැමිණියේද කියායි.

ඔස්ට්‍රේලියා යනුවෙන් ඇය ඇසෙන නෑසෙන හඩින් පවසා තිලක් අයියා පෙන්වූ කාමරයට තම මිතුරියද සමග පිවිසුනේ මහත් කලබලයෙනි.

කාමර නෑ මල්ලි දෙන්න. අපේ කාමරේ දීලා දැම්මා. අද ඔය එළියෙන් නිදා ගන්නවා. පව්නෙ ඒ අය... තිලක් අයියා මද සිනහවක් නගයි.

ඉන්දියානු මාධ්‍යවේදීන් අතරින් අප කණ්ඩායම සමග හොද හිතවත් කමක් තිබූ අජිත් සිං නැමති ඡායාරූප ශිල්පියාට සුදු යුවතියන්ගේ ආගමනය අපේ එකෙකු විසින් සැලකර තිබේ. හෙතෙම වහ වහා තම පරිගණකයද රැගෙන එහි පැමිණ යුවතියන් සිටි කාමරය ඉදිරියෙන් පැදුරක් එලා යුවතියන් දැක ගැනීමේ අටියෙන් එහි සිට විවිධ දෑ පරිගණකයෙන් කරමින් සිටියද යුවතියන් දෙදෙනා පසුදින අප රාජකාරිය සදහා නිවසින් පිටවන තුරාවට කාමරයේ දොර විවෘත කලේ නැත.

අද පැවැත්වෙන්නේ ශ්‍රී ලංකාව සහභාගි වන තරගයකි. ප්‍රවේශ පත්‍ර අවුල විසදෙන තුරු අප සීරුවෙන් බලා සිටිමු. අතුරුදහන් වී ඇති ටිකට් පත් වලට අදාළ කාණ්ඩ අංක ඒ වන විටත් ප්‍රධාන පිවිසුමේ රාජකාරියේ නිරතව සිටින පොලිස් නිලධාරින් අතට පත්කොට අවසන්ය.

ඔව්හු පිටියේ ඇති ප්‍රවේශ පත්‍ර කවුළු වලින් මිළදී නොගත් සියලුම ටිකට් පත් දැඩි සේ පරීක්ෂා කළෝය. අවසානයේ අතුරුදහන් වූ ටිකට් පත් සමග පැමිණි අය අපට සොයාගත හැකි විය.

දඹුල්ල ප්‍රදේශයේ ජීවත් වන ඉතාම අහිංසක මිනිසුන් නිරපරාදේ වැරදි කරුවන් වූහ. කුඩා දරුවන් මෙන්ම නිවසේ සකසා ගත් කෑම බීම පවා රැගෙන ඔව්හු තරගය නරඹන්නට ආශාවෙන් පැමිණ සිටියේ දඹුල්ල ප්‍රාදේශීය සභාවේ සේවය කරන හිතවතෙකු මෙම ටිකට්පත් ලබා දුන් බව පවසමිනි. අවසානයේ තරගය නැරඹීම පසෙක තබා පොලිස් ජීප් රථයක නැගී පොලිසිය බලා යන්නට සිදු වීම අප හටද මහත් සංවේගය ඇති කල සිදුවීමක් විය.

දඹුල්ලේ ගතකල මේ කාල සමය ගැන ලියන්නට තවත් කථන්දර ඕනෑ තරම් තිබුනත්...දිගින් දිගටම ඒවා කියවීම නීරස අත්දැකීමක් විය හැකි නිසාම තාවකාලිකව දඹුළු කථා වලට තිත තබමි. ඉදිරි දිනයක නැවත දඹුළු කථා කියවන්නට ඉඩ ලබා දෙමි.


මම කාමරේ අරින සිරා කොලුවා.

Thursday, July 24, 2014

55 නිමල් අයියා (දඹුළු කථා 3 කොටස)

දඹුළු කථා 1 කොටස

දඹුළු කථා 2 කොටස

නිමල් යනු කවරෙක්දැයි සිරා කොලුවා මුලින්ම හදුනාගත්තේ මේතාක් විස්තර කල දඹුළු සංචාරයේදී යැයි කීම අතිශෝක්තියක් නොවේ. ඊට පෙර වතාවලදී මේ පුද්ගලයාව රූපවාහිනියෙන් ක්‍රිකට් තරග නරඹන ඇතැම් දිනෙක දැක ඇතත් ඔහුගේ නම මෙන්ම ශ්‍රී ලංකා ක්‍රිකට් කණ්ඩායම සමග ඔහුට ඇති පයුරු පාසානය කුමක්දැයි මා හට අවබෝධයක් නොවීය.

දකුණු පස බිම ඉදගෙන සිටින්නේ නිමල් අයියාය


දඹුළු සංචාරය පිළිබද ලියවුනු පළමු ලිපියේදී නිමල්ගේ නම කරළියට පැමිණි බව ඔබට මතකය. ඒ කලූ සමග ක්‍රිකට් පුහුණුවේ යෙදී සිටි තැනැත්තා වශයෙනි. හෙතෙම නොහදුනන අය සමග එතරම් සංවාදයට ගියේ නැත. නමුත් තමන්ගේ රාජකාරිය දේවකාරිය මෙන් කරන්නට හැම වෙලේම උත්සාහ ගත් අයෙකු ලෙස ප්‍රකටය.

ශ්‍රී ලංකා ක්‍රිකට් කණ්ඩායමේ ක්‍රීඩකයන්ගේ ක්‍රිකට් ආම්පන්න සහිත බෑගයන් සහ වෙනත් අඩුම කුඩුම ඒවා ප්‍රවාහනය කල යුතු ක්‍රීඩාංගන වෙත ගෙනයාමට අදාළ රථ වාහන වලට පැටවීම සහ බෑම, ක්‍රීඩකයන් වෙත සැපයෙන පානීය ජල බෝතල් සහ පැණි බීම වර්ග කළමණාකරණය, ක්‍රීඩා තරග අතර තුර ඒවා පිටිය තුල සූදානම් කිරීම වැනි වගකීම් ඉටුවුනේ ඔහු අතිනි.

නිමල් අයියා අප හමු වූ මුල් වතාවේම එතරම් සුහද බවක් පල කලේ නැත. ක්‍රිකටර්ස්ලට වඩා ආඩම්බරයිනෙ බං මෙයා යනුවෙන් අපේ එකෙක් දෙන්නෙක් එවැනි විටෙක අදහසක් එකතු කලත්, ඔහුගේ පිටතට නොපෙනෙන මිනිසත්කම සමග දොඩමළු වෙන්නට අපට මේ චාරිකාව තුලදීම අවස්ථාවක් උදා විය.

අප දඹුල්ල ක්‍රීඩා පිටියට පැමිණියේ තුන්කොන් ක්‍රිකට් තරගාවලියක ප්‍රවේශ පත්‍ර නිකුත් කිරීමට බැව් ඔබට මම කීවෙමි. අපගේ ජාතික කණ්ඩායමට අමතරව ඔස්ට්‍රේලියාව සහ බටහිර ඉන්දීය කොදෙව් කණ්ඩායම් මේ තරගාවලියට සහභාගි වූ අනෙක් රටවල් බව නැවතත් මතක් කරමි.

තරගාවලිය ආරම්භ කරමින් පළමු දින දෙක තුල තරග දෙකක් පැවතියත් තෙවැනි දිනය විවේකී දිනයක් විය. විවේකී දිනයේදී අප හට ඉටුකරන්නට රාජකාරියක් නොමැති නිසා අප භාරව සිටි නිළදරුවා වූ පෙරේරා මහතා අපට කැමති අතක යන්නට එන්නට අවසර දුන්නේය. ඒ අවසරයෙන් අපේ පිරිස හැන්දෑ කොරේ ක්‍රිකට් ක්‍රීඩාවේ නිරත වීම සදහා අවශ්‍ය පන්දුවක් සහ පිත්තක් මිළදී ගැනීමට දඹුල්ල නරගය වෙත යන්නට සැලසුම් කොට තිබූ අතර , ඒ ගමන නිම කර නැවත නවාතැන වෙත එන විට ක්‍රීඩා පිටිය තුල ඉදි කර තිබූ තිලක් අයියාගේ පොල්අතු සෙවිළි කල කඩය ආසන්නයේ වූ පුහුණුවීමේ තණතීරු (Factice Net) වෙත පැමිණ ශ්‍රී ලංකා කණ්ඩායමේ ක්‍රීඩකයන් පසුදිනට නියමිත තරගය වෙනුවෙන් පුහුණුවීම් ආරම්භ කොට තිබුනි.

තිලක් අයියාගේ නිවසේ සිටම මේ දර්ශනය දැකීමෙන් ඔද වැඩී ගිය සිරා කොලුවාත්...තවත් දෙතුන් දෙනෙකුත් වහ වහා ක්‍රීඩාංගනය වටා වූ කම්බි වැටේ, කඩය කිට්ටුවෙන් තනා තිබූ කපොල්ලෙන් රිංගූයේ ක්‍රීඩකයන් සිටින තැන ඇති චමත්කාරය අත්විදීමට බව කිය යුතු නොවේ. පසෙකින් ක්‍රීඩකයන් පැමිණි විශාල බස් රථයයි. එකල එහි රියදුරා ලෙස කටයුතු කලේද මගේ ගම්පියසේම සහෝදරයෙකු වීම පුදුම එළවන සුළු සිදුවීමකි. ඔහුගේ දසුන නෙත ගැටෙන තුරාවට මා ඔහු එම කටයුත්තේ නිරත වන බවක් අසා නොතිබුනෙමි. බස් රථයට යාබදව පොලීසියේ පෙර ගමන් රථයකි. ඒ අසලම පුටු දෙකක් තබාගෙන එම රථයේ පැමිණි පොලිස් නිලධාරීන් දෙදෙනෙකු වාඩි වී සිටිති. ඊටත් පිටුපසින් ක්‍රීඩකයන්ගේ ක්‍රිකට් ආම්පන්න රැගෙන පැමිණි ලොරි භාගයකි.

ටොම් මූඩි පුහුණුකරු තම ක්‍රීඩකයන් පුහුණුවීමේ නිරත කරවන අතරේ අපි සෙමින් සෙමින් දැලට කිට්ටු වීමු. අපට යාබදව ඉන්දියානු රූපවාහිනී කණ්ඩායමක්ද එහි වූ දර්ශන රූපගත කරමින් සිටියෝය.

සිරා කොලුවා දැන් සිටගෙන සිටින්නේ තරගයකදී කඩුලු රකින්නා සිටගෙන සිටින ස්ථානයේය. මා ඉදිරිපස ඇති දැල තුල පිතිකරුවෙකු පන්දුවට පහර දෙයි. ලෝක පූජිත මුරලි පන්දු යවයි. කඩුලු රකින්නාගේ ස්ථානයේ සිට ඔහු පන්දු යවන ආකාරය නිරීක්ෂණය කරන්නට ලැබීම සැබවින්ම දුර්ලභ චෑන්ස් එකකි. ඇත්ත වශයෙන්ම මුරලිගේ පන්දු තෝරාබේරාගැනීමට ඇති අපහසුව මම එහිදී හොදින් දුටුවෙමි. ඔහුගේ දූස්රා පන්දුව කිසි ලෙසකින් වේලාසන හදුනාගත නොහැක. වෙනත් පන්දුවක් යවන ආකාරයෙන්ම අත කැරකුනද පන්දුව දග කැවෙන්නේ ප්‍රති විරුද්ධ දෙසටය. පිතිකරු එවන් විටෙක අසරණ වෙයි. තම පන්දුවක් හමුවේ පිතිකරු මුලාවෙන හැම විටකම මුරලි පොඩි දරුවෙකු සේ මහ හඩින් සිනාසෙයි.

මා හොදින් අත්දුටු අනෙක් කාරණය නම් දිල්හාර ප්‍රනාන්දුගේ පන්දු වල පැවති වේගයයි. පන්දුව පතිත වූ සැනින් විදුලි වේගයකින් පිතිකරු සොයා පැමිණෙන එබදු පන්දුවලට පහර දෙන්නේ කෙලෙසදැයි මට එවේලේ සිතාගත නොහැකි විය. දිල්හාරගේ පන්දු වලට මුහුණ දෙමින් සිටි දිල්ෂාන්ගේ අත් ආවරණයේ පන්දුවක් වැදී ඔහු වේදනාවෙන් ඇඹරුන ආකාරය මට තවමත් මතකය. මේ දර්ශන රූගත කරන්නට ඉන්දියානුවන් දැල ආසන්නයටම වීඩියෝ කැමරාවක් ස්ථාන ගත කර තිබූ අතර පන්දුවේ ඇති වේගය නිසාම, නිදැල්ලේ ගිය පන්දුවක් දැල ඉදිරියට තල්ලුකරමින් ගොස් කැමරාවේ ලෙන්සය කඩා බිද දැමූ ආකාරයද සිහිපත් වෙයි.

මේ සිදුවීම් වන අතර තුර මා සිටි දෙසට පැමිණෙමින් සිටියේ නිමල් අයියාය. නිවසින් පිටත් වන විට රැගෙන විත් තිබූ මගේ සමරු පොත ඒ වන විටත් කලිසම් සාක්කුවේ විය.

නිමල් අයියා, මට ක්‍රිකටර්ස්ලාගෙ අත්සන් ටිකක් අරන් දෙනවද මේකට...මම ඔහුට පොත දිගු කලෙමි.

මේ වෙලාවෙ ඕවා කරන්න බෑ. පේනවනෙ හැමෝම ප්‍රැක්ටිස් කරනවා...ඔහු කෝපයෙන් මෙන් පවසා ඉවත යන විට මගේ සගයන් ඔහු දෙස අවඥාවෙන් මෙන් බලා සිටියෝය.

දැල ආසන්නයේ සිට පුහුණූවීම් නරඹමින් සිටින විට කණ්ඩායමේ ජේෂ්ඨ ක්‍රීඩකයෝ තිලක් අයියාගේ කඩේ සේවකයන් සමග දොඩමළු වෙති. තම අතක පැවති ආබාධයක් නිසා පුහුණුවීමේ නිරත නොවූ සනා සුපුරුදු ලෙස ජංගම දුරබණුවක් කනේ තබාගෙන එයට උත්තර දෙමින් අප සිටි ඉසව්වට පැමිණෙමින් සිටියේය.

ඕගොල්ලො අදද කොළඹ ඉදන් ආවෙ....ඔහු දුරකථනයේ අනෙක් පස සිටින තැනැත්තාට එලෙස පැවසුවත්...මා සමග සේවයේ නිරත වූ අහිංසක මංජුවා සිතුවේ ඔහු එය ඔහුගෙන් විමසූ බවකි.

නෑ අයියෙ අපි පෙරේදා ආවෙ...ඒකා ගත් කටටම කීවේ එහෙයිනි.

තම සංවාදය නවතා මංජුවා දෙස උපහාසාත්මකව බැලූ සනා....ඔයාගෙන් නෙමෙයි මල්ලි ඇහුවෙ...යනුවෙන් පවසා ඉවතට යන විට මංජුවාට ඇදිවත උනා දමන්නට සිතෙන්නට ඇත. මේ සිදුවීමෙන් පසු දඹුල්ලෙන් සමුගන්නා තුරාවටම මංජුවාට කදිම නමක්ද පට බැදී තිබුනි.

කම්බි වැටේ කපොල්ලෙන් පැන Fractise Net අසලට පැමිණ පැයකට ආසන්න කාලයක් ගෙවී ගිය තැන අපේ නිළදරුවා වූ පෙරේරා මහතා එහි සැපත් වූවේය. එතුමා කොළඹ SSC ක්‍රීඩා සමාජයේ කළමණාකරුවෙක් වීමත්, නිමල් අයියා එම ක්‍රීඩා සමාජයේ නිත්‍ය සේවකයෙකු වීමත් හේතුවෙන් පෙරේරා මහතා කෙරෙහි මහත් ලෙංගතුකමක් නිමල් කෙරෙන් දිස් විය.

නිමල් කොහොමද ඉතිං.....

අනේ වරදක් නෑ මහත්තයා....වැඩ ටික කරගෙන ඉන්නවා...

අද කීයටද ආපහු යන්නෙ....

තව කොහොමත් පැය දෙක තුනක් ඉන්න වෙයි වගේ...

ආ එහෙමද....මොනවා හරි කරන්න කියලා මම බැලුවෙ

එයට එක්වරම පිළිතුරක් නොදුන් නිමල් අයියා ලැජ්ජා භිය පළමු වරට දැනුන එකෙකු මෙන් දෙපසට ඇඹරුනේය.

අර පේන ගෙදර අපි ඉන්නෙ...බඩු ටික පටවගත්තට පස්සෙ එහෙට එන්න.

ඒ අවසරයෙන් නැවත නිමල් කරා ගිය සිරා කොලුවා...

අප සියල්ලෝම භාරව සිටින්නේ පෙරේරා මහතා යැයි පවසා අත්සන් කීපයක් එකතු කරදෙන ලෙස නැවතත් පැවසුවෙමි.

කලින් කියන්න එපායැ මල්ලි....කවුද දන්නෙ...මේ අපේ මහත්තයගෙ ගෝලයෝ කියලා...

ඔහු මගේ සමරුපොත රැගෙන අඩියට දෙකට නික්මී ගියේය. විනාඩි 10 ක් යන්නට මත්තෙන් නිමල් අයියා නැවතත් මා සොයා පැමිණියේ...

ඔන්න ටීම් එකේ සීනියර්ම 5 දෙනෙක් අත්සන් කලා යැයි කියමිනි.

එහි මුරලි/සනා/වාස්/මහේල/සංගා තම අත්සන් තබා තිබුනි.

තවත් මොහොතක් එතැන ගත කර තිලක් අයියාගේ නිවෙස බලා එන විට අපේ කුස තුල කුසගින්න බුර බුරා නැගෙමින් තිබුනි.

තවත් හෝරාවක දෙකක පමණ කාලයක් ගතවෙන්නට ඇත. ඇලුමිනියම් රැළි බොඩියක් සහිත ලොරි කොටයක් මහත් අසීරුවෙන් තිලක් අයියාගේ ගේට්ටු කණු දෙක අස්සෙන් මිදුලට පැමිණ නතර විය. එයින් බැස නිමල් අයියා මෙන්ම එහි රියදුරු තැනද අප කරා සම්මුඛ වූහ.

මම ඒත් බැලුවා නිමල් ගියාද කියලා....පෙරේරා මහතා එක එල්ලේ ඔහු දෙස බලා නිවස තුලට ගොස් නැවත පැමිණියේ සීල් අරක්කු බෝතලයක්ද සමගිනි.

බොනවද ? බොනවද ? හෙතෙම අපේ උන් එකෙක් නෑර විමසයි. ඒ වෙද්දී සිරා කොලුවා සැර මත්පැන් පානයට අත්පොත් තබා සෑහෙන දොහක් ගතවී තිබුනද, කඩේ මාමාගේ පුත්‍ර රත්නය සිටින තැනක ඒ හැකියාවන් පෙන්වා මේ වග අපේ නිවසට සන්නිවේදනය කරවාගන්නට අවශ්‍යතාවක් නොවූයෙන් මම නොබොන්නෙකු සේ එහි වූ දිගැටි ලෑලි මේසයේ හිදගෙන සිටියෙමි.

නිමල් අයියා අත්සන් රාජකාරිය නිසා දැන් මා හදුනයි.

මල්ලි බියර් එකක් බොනවද ?

බඩු තියෙනවද ? මම ඇසීමි.

තියෙනවා දෙන්නම්.

මේසයෙන් ඉවත්ව ගිය නිමල් අයියා ලොරිය තුල වූ ප්ලාස්ටික් පෙට්ටියක් අප සිටි තැනට ඔසවාගෙන ආවේය. එය වූ කලී ක්‍රිකට් තරග අතරතුර හතර සීමාවට එපිටින් තබාගෙන ක්‍රීඩකයන් වෙත පාන වර්ග ලබාදෙන්නට භාවිතා කරන පෙට්ටිය බව සැනෙන් හදුනාගන්නට මට හැකි විය.

ඔහු එහි පියන විවර කර බියර් කෑනයක් මේසය මත තැබීය. කොකා කෝලා මෙන්ම ස්ප්‍රයිට් කෑන් කීපයක්ද තැබීය.

බොන්න මල්ලි

හෙතෙම මහත් ලෙංගතුකමින් මා හට ආරාධනය කළේය.

කොහෙන්ද බියර් පෙරේරා මහතා නිමල්ගෙන් විමසීය

අස්ගිරියෙ ටෙස්ට් සීරිස් එකට දීපුවායෙ ඉතිරි....

විවිධ මාතෘකා ඔස්සේ කථාව ඇදී යයි. මිහිර, ටිරෝන් යන වැඩිමල් සහෝදරයන් මත්පැනේ පහස සොයද්දී මම රවියා සමග බියර් වීදුරුවක් දෙකක් හිස් කරමින් සිටියෙමි.

එහෙත් මේසය මත ඇත්තේ එකම එක බියර් කෑනයක් නිසා මම බොහෝ කල්වේලා ගෙන එය හිස් කරන අන්දම දුටු නිමල් අයියා...

මල්ලි මොකද...නිකං ගාටන්නෙ. තව බඩු තියෙනවා ඔහු පෙට්ටියේ පියන ඔසවා ඒ තුල තිබූ බඩ කඩිත්තු සියල්ලම මේසය මතට හැලීය. එහි බියර් කෑන් දුසිමකට ආසන්න සංඛ්‍යාවක් මෙන්ම විවිධ පැණි බීම වර්ග බොහොමයක්ද විය. හිස් පෙට්ටිය නැවත ලොරියට දමා නිමල් අයියා අපට සම්මුඛ විය.

නිමල් දැන් හෝටලේටද යන්නෙ...පෙරේරා මහතා විමසයි.

නෑ මහත්තයා මුරලි මහත්තයගෙ ඉරුණු සපත්තුවක් තියෙනවා...ඒක දඹුල්ල ටවුමෙන් මහගෙන එන්න කිව්වා. නිමල් අයියා සපත්තුව අපට පෙන්වයි.

මාවන් මට කියනවා නිමල් මට වඩා මගේ ඩ්‍රයිවර්ට සලකනවා කියලා. ඒ කථාව ඇත්තද ?

පෙරේරා මහතා කෝචොක් එකට මෙන් අසයි.

එහෙම කිව්වද ? පෙරේදා මහත්තයගෙ නෝනා ආවා මැච් එක බලන්න ඩ්‍රයිවර් එක්ක. මිනිහව හෝටලේ මගෙ කාමරේ එක රැයක් තියාගන්න කිව්වා. මම ඉතින් මාවන් මහත්තයට තියෙන ගෞරවේටම මගේ ඇද එයාට දීලා බිම නිදිය ගත්තා රෙද්දක් එලාගෙන.

මාවන්, නිමල්, පෙරේරා...මේ සියල්ලන්ම එකම ක්‍රීඩා සමාජයක අය නිසාම ඇත්තේ පුදුමාකාර හිතවත් කමකි.

මද වේලාවක් ගත වෙද්දී නිමල් අයියා තම හද පතුලේ ඇති දෑ වමාරන තත්වයට උසස් වූවේය.

මාවන් මහත්තයා කියන්නෙ දෙයියෙක් වගේ මනුස්සයෙක්. මේ ෆෝන් එකත් එයා මට අරන් දුන්නෙ. ඒ කාලයේ හැටියට එය කැමරාවක්ද සහිත වටිනා ජංගම දුරබණුවකි.

හැමවෙලේම මම පේන්න නැත්තං මට කථා කරනවා...ඉස්සෙල්ලාම අහන්නෙ කෑවද කියලා...ඊලගට අහන්නෙ අතේ සල්ලි තියෙනවද කියලා....

ඔහු එසේ කියා අවසන් වෙනවාත් සමගම එවකට ශ්‍රී ලංකා ක්‍රිකට් කණ්ඩායමේ නායක මාවන් අතපත්තුගෙන් නිමල්ට ඇමතුමකි. ඔහු කථා කරන දේ පිටතට ඇසෙන සේ (Speaker Phone) සැකසුම් කර අප හට නිහඩ වෙන මෙන් අතින් සංඥා කළේය.

නිමල් කොහෙද ඉන්නෙ...අපි හෝටලේට ඇවිල්ලත් දැන් ගොඩාක් වෙලානෙ.

මම මේ මුරලි මහත්තයගෙ සපත්තුවක් මහගෙන එන්න නතර උනා. ඉක්මනට එන්නම්. තමා ඇත්ත වශයෙන්ම සිටින තැන කියන්නට නිමල් අයියා මැලි වෙයි.

නිමල් දවල්ට කෑවද ? අතේ සල්ලි තියෙනවද ? මාවන්ගේ මනුස්ස කම අප ඉදිරියේ දෝරගලා යයි.

අපේ සාදය තවමත් අහවර නොවූ නමුදු නිමල් අයියා ඉක්මනින් පිටත්ව යන්නට වෙර දරයි. ඒ සමගම මුරලිගෙන් ඇමතුමකි. එයද පෙර පරිදි අපට ශ්‍රවනය වෙයි.

නිමල් මගේ සපත්තුව හැදුවද බං...

තාම හදන තැන මහත්තයා...

ඕක කොහොම හරි හදාගෙන වරෙං.....හෙට මැච් එකට දාන්න එකක් නෑ නැත්තං.

මල්ලිලා අහිතක් හිතන්න එපා මං ගැන. මම අදුනන්නෙ නැති අයට කථා කරන්න හිනාවෙන්න යන්නෙ නෑ. එහෙම කලොත් මගේ ඩියුටිය මට හරියට කරන්න වෙන්නෙ නෑ. මැච් එකක් තියෙන දවසකට පොඩි වතුර බෝතල් 200 මට ලැබෙනවා. ඒක මදි නොවෙන්න මම කොහොමහරි බෙදා දෙන්න ඕනෙ. ඒ වතුර බෝතල් පොලිසියෙ අයත් ඉල්ලනවා. වාහන එලවන ඩ්‍රයිවර්ලත් ඉල්ලනවා..ඉල්ලන හැමෝටම දුන්නම සෙල්ලං කරන අයට කෝ...

මම අයිස් කැට අරගෙන මේ පෙට්ටියට දාලා ඒක ලෑස්ති කරන්න ඕනෙ, බෑග් ටික පැවිලියන් එකට ඇදලා දෙන්න ඕනෙ, ආයෙ පටවන්න ඕනෙ, ඒ අයට ඉන්න හිතවත්ම සේවකයා තමයි මම.

ඔහු ගැට දෙකක්ම ගසා තම අත්ලේ හිරකරගෙන සිටි ලේන්සුවක් මේසය මත තබා දිග හරියි. ඒ තුල ක්‍රීඩකයන්ගේ වටිනා අත් ඔරලෝසු මෙන්ම මංගල මුදුද වූහ.. ක්‍රීඩකයින් පුහුණුවීම් සිදු කරන විට ඒවා ගලවා නිමල් අයියා වෙත භාර දෙති.

කිසිම අකුරක් කොටලා නැති මේ මුද්ද සංගක්කාරගෙ. මේ ඔරලෝසුව මහේලගේ...රොලෙක්ස් ඔරලෝසු කීපය අතරින් ඔහු එකක් පෙන්වයි. නිමල් අයියා තවත් මද වේලාවකට පසු මුරලිගේ සපත්තුව මහන්නට අවැසි බව කියා අපෙන් සමුගෙන ගියේය.

තම රාජකාරිය දේව කාරිය මෙන් ඉටුකල මේ මිනිසා විවේකීව ඉන්නා වේලාවක් ක්‍රීඩා පිටිය තුල අප දැක නැත. කුමක් හෝ රාජකාරියක් නොමැති කලෙක ඔහු අලුත් ක්‍රිකට් පිත්තක් හෝ පදම් කරයි. සාමාන්‍ය මිටියක මෙන් මිට ඇති. මිටියේ යකඩ හිස වෙනුවට ලෙදර් පන්දුවක් සවිකර ඇති උපකරණයක් මේ සදහා භාවිතා වෙයි. ක්‍රිකට් පිත්තකින් හොදින් ලකුණු රැස් කරන්නට නම් ඒවා ඉතා හොදින් පදම් කල යුතුය. ශ්‍රී ලංකා ක්‍රීඩකයන් සදහා මේ කාරිය කර දුන්නේද නිමල් අයියා බව බොහෝ අය නොදන්නා කාරණයකි.

දඹුල්ලේදී තරග නැති විවේකී දිනයක පැවැත්වූ කුඩා පරිමානයේ මධු සාදයෙන් පසු කිසිම කිසි දිනක ඔහු මට වචනයක් දෙකක් දොඩන්නට මුලිච්චි වූයේ නැත. එහෙත් ශ්‍රී ලංකා කණ්ඩායම තරගාවලියක් ජයග්‍රහණය කොට කුසලානයද රැගෙන පිටිය වටා සිටින නරඹන්නන්ට ආචාර කරමින් යන විටෙක නිමල් අයියා එහි පෙරමුණ ගත් ආකාරය මට දැනුදු මැවී පෙනෙයි. එය තමාට ලැබුනු කුසලානයක් මෙන් එවන් අවස්ථාවලදී සතුටෙන් ඔකද වූ ඔහුගේ සිතට දැනෙන්නට ඇත.

ක්‍රීඩකයන්ගේ ක්‍රිකට් ආම්පන්න ප්‍රවාහනය කර දෙන්නට, ජල බෝතල් බෙදා දෙන්නට, පිති පදම් කරන්නට නිමල් නැමති ඒ සුන්දර මිනිසා නැවත එන්නේ නැත. සංසාර ගමනේ එක් නවාතැනකදී අප හමුවූ මේ භවයෙන් නික්මී අලුත් නවාතැනක් සොයා යන්නට දෛවය ඔහුට ඉඩකඩ සැලසූ හෙයින් ඔහුගේ මතකයන් පමණක් මා සතුව ශේෂව පවතී.

රිවිර පුවත් පත ඔහුගේ අභාවය වාර්තා කර තිබූ අයුරු


පුද්ගලික ජීවිතයේදී වැර වෑයමෙන් රැස් කල ධනයෙන් මිළදී ගත් නව නිවසේ පදිංචිය අරඹන්නට දිනකට කලියෙන් ඔහු නොසිතූ ලෙස රිය අනතුරකින් දෙනෙත් පියාගත්තේය.

ඔහුගේ හදිසි අභාවය සැලවූ මොහොතේම චිත්‍රපටයක රූප රාමු මෙන් දඹුල්ලේ සිදුවීම් පෙල මා මතකයට පැමිණි අතර...මේ ලිපි මාලාව මේ ලෙසින් හදිසියේම ලියන්නට සිතක් පහල වූයේද ඒ නිසාමය. වනාතමුල්ලේ, දුක හදුනන කටුක පොළවක ඉපිද, වැර වෑයමෙන් ජයටැඹ සොයා ගොස්, ජයග්‍රහණය පාමුලදී ඔබ නික්ම යාම සැබැවින්ම කණගාටුදායක සිදුවීමකි.

නිමල් අයියේ...ඔබට නිවන් සුව !


මම කාමරේ අරින සිරා කොලුවා.


ප.ලි

හෙතෙම මුලින්ම SSC පිටියෙන් ඉවතට ඇදී ගිය පන්දු අහුලා දුන් කෙනාය. ඉන් අනතුරුව විසි කැත්තක් ආධාරයෙන් මුළු පිට්ටනියේම තණකොළ කැපූ තණකොළ කපන්නාය. එවැනි කටුක අතීතයක් පසුකර ඔහු ජාතික කණ්ඩායම හා සම්බන්ධ වූ අකාරය දැන ගන්නට නිමල් අයියා පිළිබද රිවිර ඉරිදා සංග්‍රහයේ පලවූ ලිපිය මෙතැනින් කියවන්න.

නිමල් නැමති මේ ධෛර්යවන්ත පුංචි මිනිසාගේ වියෝව පිළිබද බ්ලොග් අවකාශයේ ලියවෙන එකම සටහන මෙය විය හැක.

Saturday, July 19, 2014

78 MH 17 ගැන නෙැඇසූ කථා


සිතු දෙය නොම වෙයි නොසිතු දෙයම වෙයි යන වදන් පෙළට අලුත් අර්ථකථනයක් එක් කරමින් මැලේසියානු ගුවන් සේවයේ තවත් යානයක් 2014 වසර තුලදී දෙවන වතාවටත් අනතුරට පත් වී තිබේ. පසුගිය මාර්තු 8 වැනි දින අතුරුදහන් වූ MH 370 යානය නිසාවෙන් කැළඹුන මැලේසියානු ජන ජීවිතය කෙමෙන් කෙමෙන් නිසල වී යන වටපිටාවක සිදු වූ අලුත් ගුවන් අනතුර නිසා එය නැවතත් සසල වී තිබේ. සිරා කොලුවා රැකියාවේ නිරත වන මැලේසියාවේ, කඩ පිලේ, දුම්රියේ, බස් රථයේ මෙන්ම කාර්යාල වලද සාමාන්‍ය කථා බහ වෙනස් වී ඒ තැනට අලුතින් අනතුරට පත් වූ MH 17 යානය මේ වන විට ආදේශ වී තිබේ.

විනාශ වූ ගුවන් යානය ගුවන් ගත වන්නට මොහොතකට කලින්
තමා ගමන් ගන්නා යානය මෙයට පෙර අතුරුදහන් වූ මැලේසියානු යානාව මෙන් අතුරුදහන් වුවහොත් එය මෙන්න මේ වගේ යැයි පවසමින් යානයේ ගමන්ගත් නෙදර්ලන්ත ජාතිකයෙකු විසින් මේ ඡායාරූපය
කවට කමකට මෙන්  ෆේස් බුක් අඩවිය වෙත තම දුරකථනයෙන් එකතු කර තිබේ.


ඡායාරූපය ලබාගත් තැනැත්තා
ගුවන් යානය පිටත් වීමට මොහොතකට පෙර ඇතුලත දර්ශන

MH 370 යානය සෙවීම සදහා සිදුකල මෙහෙයුම් සදහා අති විශාල ධනස්කන්දයක් වැය කිරීමත්, හානියට පත් පාර්ශව වෙත වන්දි මුදල් ලබා දීමත්, එම ගුවන් යානය පිළිබද අභිරහස තවමත් හෙළිදරව් නොවූ පරිසරයක, ඇතැම් මැලේසියානුවන් පවා ඔවුන්ගේ ජාතික ගුවන් සේවයේ ගමන් කිරීම වර්ජනය කරන වට පිටාවක, ලාභ වෙනුවට පාඩු ලබමින් සිටින වේලාවක මැලේසියානු ගුවන් සේවය වෙත එල්ලවූ මරු පහරක් ලෙස MH 17 ගුවන් අනතුර හදුන්වා දෙන්නට හැකිය.සිය දෙවැනි ගුවන් අනතුරෙන් පසු මැලේසියානු ගුවන් සේවයේ කොටස් මිළ 13% කින් පහත වැටී තිබේ. මේ අනතුරේ බලපෑම අනෙකුත් ගුවන් යානා සමාගම් වල කොටස් මිළ පහත හෙලන්නටද හේතු වී තිබේ. මාර්තු මස සිදුවූ MH 370 අනතුරෙන් පසු චීන ජනතාව මැලේසියානු ගුවන් යානා වල ගමන් කිරීම 60% කින් පහත වැටුනු අතර MH 17  ගුවන් අනතුර සිදුවන අවස්ථාව වන විට එය යථා තත්වයට පැමිණෙමින් තිබුනි. පෙරේදා අනතුරට ලක් වූ ගුවන් යානයේ ආසන සංඛ්‍යාවටත් වඩා වැඩි සංඛ්‍යාවක් ප්‍රවේශ පත්‍ර සදහා ඉල්ලුම් කර තිබීම එයට උදාහරණයකි.

2014 වර්ෂය යනු මැලේසියානු ගුවන් සේවය පිට පිටම පාඩු ලබන තෙවන වසරයි. 2014 වර්ෂයේ පළමු කාර්තුව තුල පමණක් රිංගිට් මිලියන 443.4 ක පාඩුවක් මැලේසියානු ගුවන් සේවය ලබා තිබේ. එහි ශ්‍රී ලංකා රුපියල් වටිනාකම ගනන් බැලීමට 40 න් ගුණකර බලන්න. ලෝකයේ මින්පෙර ගුවන්යානා අනතුරකට මුහුණ දුන් කිසිදු ගුවන් සේවයක් කෙටි කාලයක් තුල දෙවැනි අනතුරකට මුහුණ දී නැත. එහෙත් මැලේසියානු ගුවන් සේවයේ අභාග්‍ය මේ යැයි කියමින් එකම වර්ෂයක් තුල දෙවැනි ගුවන් යානයත් අහිමි වන අතරේ අනතුරු ද්විත්වය නිසා මගී ජීවිත 537 අහිමි වී තිබේ. මේ තොරතුරු ඔස්සේ දෙවැනි ගුවන් යානා අනතුර පිළිබද අදහස් දක්වන ක්ෂේත්‍රයේ ප්‍රවීණයන් පවසන්නේ “They were the wrong airline in the wrong place at the wrong time.” යනුවෙනි. මැලේසියානු ගුවන් සේවයටත් වඩා වැඩි වාර ගනනක් අනතුර සිදුවූ ගුවන් කලාපය ඔස්සේ ලොව අංක 1 ගුවන් සේවය වන සිංගප්පූරු ගුවන් සේවය පියාසර කර තිබියදී මැලේසියානු ගුවන් යානයක්ම නැවත වතාවක් අනතුරට පත් වීම එම සමාගමේ නොමද කණස්සල්ලට හේතු වනවාට සැක නැත.



දැවැන්ත පාඩුවක් ලබන අවස්ථාවක...තම ගුවන් සේවයෙන් ඉවතට ඇදෙන මගි ජනතාව යළි ආකර්ශනය කර ගැනීමට වට්ටම් හා දීමනා ලබා දීමට යාමෙන් මැලේසියානු ගුවන් සේවයේ අර්බුදය තව තවත් උග්‍ර වනු ඇත. දෙවැනි අනතුරෙන් පසු බොහෝ අය මැලේසියානු ගුවන් සේවය සමගින් යාමට සැලසුම් කර තිබූ සංචාර මේ වන විටත් අවලංගු කර තිබේ.

අපගේ ජාතික ගුවන් සේවය වන ශ්‍රී ලංකන් ගුවන් සේවයට දිගු දුර ගුමන් ගමන් සදහා සෑහෙන සහයෝගයක් ලබා දෙන ගුවන් සේවයක් ලෙස මැලේසියානු ගුවන් සේවයේ ස්ථාවරත්වය ශ්‍රී ලාංකික ගුවන් මගීන්ටද වැදගත් කාරණයකි. මේ අනතුරු සිදුවීමට කලින් ලොව වඩාත් ආරක්ෂිතම ගුවන් සේවයක් ලෙස මැලේසියානු ගුවන් සේවය සතුව වඩා හොද කීර්තිනාමයක් විය.

බ්‍රහස්පතින්දා දින මැලේසියානු වේලාවෙන් සවස 6.15 ට නෙදර්ලන්තයේ ඇම්ස්ටර්ඩෑම් නුවර ආසන්නයේ ඇති  Schiphol ගුවන් තොටුපලෙන් පිටත් වි මැලේසියාවේ ක්වාලාලම්පූර් ගුවන් තොට වෙත පියාසර කරමින් තිබූ මේ යානයට ගුවන් ගත වී පැය 4 කට පසු  රුසියානු සහ යුක්රේන දේශ සීමාව ආසන්නයේදී එල්ල වූ මිසයිල ප්‍රහාරයක් නිසා මේ විනාශය සිදු වූ බව දැන් තහවුරු වී තිබේ. මැලේසියානු වේලාවෙන් පසුදා උදෑසන 6.10 ට පමණ එය මැලේසියාව ලගා වීමට නියමිත වී තිබුනි.



මිසයිල ප්‍රහාරය නිසා උඩුගුවනේදී පුපුරා ගිය යානය රුසියානු දේශසීමාවේ සිට කිලෝ මීටර් 40 ක පමණ දුරින් පිහිටා තිබෙන Rozsypne නැමති ගම්මානයට පතිත වී තිබේ. මේ ගම්මානය අයත් වන්නේ යුක්රේනයේ Donetsk නම් පළාතටයි. මේ පළාතේ බලය මේ වන විට යුක්රේන සටන් කරුවන් අත තිබේ. MH 17 ගුවන් අනතුර සිදු වූ සැනින් බොහෝ ගුවන් යානා සමාගම් තම යානා යුක්රේන ගුවන් කලාපය මගහැර පියාසර කරවා තිබෙන අතර පැරීසියේ සිට මැලේසියාව බලා එමින් තිබූ මැලේසියානු ගුවන් සේවයටම අයත් MH 21 ගුවන් යානයද එලෙස මාර්ගය වෙනස් කරමින් මැලේසියාවට පියාසර කර තිබේ.

අඩි 33000 ක් ඉහළ අහසේ තිබූ මේ ගුවන් යානාව වෙත ප්‍රහාරය එල්ල කලේ රුසියාවේ පාර්ශවයෙන්ද, නැතිනම් යුක්රේන හමුදා සමග සටන් කරන රුසියානු සහාය ලබන සටන් කාමීන්ද, නැතිනම් යුක්රේන රජයේ හමුදාවද  යන සැකය අනතුර සිදු වූ වහාම පැන නැගුනි. නමුත්  රුසියානු හමුදාව පසුව නිවේදනය කලේ අනතුර සිදු වූ කාල සීමාව තුල කිසිදු ගුවන් යානයක ඉලක්කයක් තම හමුදාව විසින් ගෙන නැති බවයි. 

මෙම ගුවන් යානා අනතුර සිදුවී විනාඩි 37 කට පසු මේ ගුවන් අවකාශයම උපයෝගී කරගනිමින් බ්‍රසීලයේ සිට රුසියාව බලා ගමන් කල රුසියානු ජනාධිපති ව්ලැදිමීර් පූටින් රැගත් යානය විනාශ කර පූටින් ඝාතනය කිරීම පිණිස එවන්නට සූදානම් කර තිබූ මිසයිලයක් අත්වැරදීමක් නිසා රුසියානු ගුවන් යානයේ බාහිර පෙනුමට සමාන මැලේසියානු ගුවන් යානයට එල්ල  කර තිබෙන බවට සැකයක් දැන් ඇති වී තිබේ. පූටින් සහභාගි වූ බ්‍රසීලයේ පැවති බ්‍රික් සමුළුවටම සහභාගි වූ අභිනව ඉන්දීය අගමැතිවරයාද අනතුර සිදු වී පැයකට පමණ පසු මෙම ගුවන් කලාපය ඔස්සේම සිය රට ගොස් තිබේ.



අඩි 30000 හෝ එමෙන් දෙගුණයක් උසින් ගමන් කරනා වස්තුවකට වුවද සාර්ථකව පහර දිය හැකි මේ මිසයිලය රුසියාවේම නිෂ්පාදනයකි. එය Buk යනුවෙන් හැදින්වේ. කිලෝ මීටර් 28 ක් දක්වා ගුවන් ගත කල හැකි, මීටර් 5.5 උස, කිලෝ ග්‍රෑම් 710 ක් බරැති මේ වර්ගයේ මිසයිල රුසියාවේ හමුදාව අත මෙන්ම යුක්රේනයේ සටන්කාමීන් අතද එක සේ තිබෙන බවක් කියවේ. තනි මිසයිලයක් වෙනුවට මිසයිල පද්ධතියක් ලෙස මේවා සැකසී තිබේ. අවශ්‍ය තැනකට පහසුවෙන් ප්‍රවාහනය කල හැකි පරිදි බොහෝ විට වාහනයකට සම්බන්ධ කර මෙම මිසයිල පද්ධති භාවිතා කරයි රුසියානු රජය පවසන්නේ යුක්රේන ගරිල්ලන් අත මෙවැනි පද්ධතියක් තිබෙන්නට හැකියාවක් නැති නමුත් යුක්රේන රජයේ හමුදාව සතුව එවැනි පද්ධතියක් නැගෙනහිර යුක්රේනයේ ස්ථාපනය කර තිබෙන බවකි. මැලේසියානු ගුවන් යානය බිම හෙලුවේ එහි සිට එවන ලද මිසයිලයකින් බව රුසියානු පාර්ශවය චෝදනා කරයි.



යුක්රේනය තුල කැරලි ගසන, රුසියානු භාෂාව කථාකරන රුසියානු සහාය ලබන කැරලි කරුවන් වෙත මෙවැනි මිසයිල පද්ධතියක් පූටිං ජනාධිපතිවරයා විසින් ප්‍රදානය කල බවක් යුක්රේන රජයේ පාර්ශවයෙන් කියවෙයි. ඔවුන් කියන්නේ මේ ප්‍රහාරය සටන් කාමීන් විසින් සිදු කල එකක් බවයි.

රුසියානු ජනාධිපතිවරයා මිනීමරුවෙක් යැයි සදහන් කල පුවරුවක් අතැතිව සිටින කාන්තාවක්


රුසියාව, යුක්රේන සටන් කරුවන්, යුක්රේන රජයේ හමුදා යන මේ පාර්ශව තුන අතරින් කවුුරු හෝ මේ මහපොළොව නුහුලනා අපරාධය සිදු කල බව ඒකාන්තය. මේ යානය රුසියානු ආයුධ ප්‍රවාහනය කරන යානයක් සේ යුක්රේන රජයේ හමුදා  සිතීම, මෙය යුක්රේන හමුදා යානයක් ලෙස රුසියානු හමුදා උපකල්පනය කිරීම, මෙවැනි ප්‍රහාරයක් එල්ලවීමට හේතු ලෙස දැන් කරළියට පැමිණ තිබේ. පසුගිය සති කීපය ඇතුලත MH 17 යානය අනතුරට පත් වූ ගුවන් කලාපය තුලදීම යුක්රේන යුධ ගුවන් යානා සහ හෙලිකොප්ටර් යානා කීපයක්ම බිම හෙලන්නට කැරළිකාර හමුදාව සමත් වී තිබේ. යුක්රේන ජනාධිපතිවරයා සහ අගමැතිවරයා අතර ඇති වූ බලය බෙදාහැරීම පිළිබද මත ගැටුමක් මත මේ සටන් ඇවිලී තිබේ. මැලේසියානු ගුවන් යානය විනාශ වීම පිළිබද ඇමරිකාව පවසන්නේ ප්‍රහාරය එල්ල කල ආයුධය කුමක්දැයි නිශ්චිතව කිව හැකි වුවත් මිසයිලය ගුවන් ගත වූයේ කොතැනින්ද යන්න පිළිබද නිශ්චිත අදහසක් තමන්ට නැති බවයි.

යුක්රේනයේ පවතින කලහකාරී තත්වය නිසා බොහෝ ගුවන් සේවා තම ගුවන් මාර්ග යුක්රේනයට පිටතින් පවත්වාගෙන ගොස් තිබේ. මැලේසියානු ගුවන් සේවයද එම පියවරම අනුගමනය කර තිබේ. නමුත් ගුවන් ගමන් පාලක මණ්ඩලය ලබා දුන් වැරදි තොරතුරක් නිසා හෝ යානයේ ගුවන් නියමුවන්ගේ අභිමතය පරිදි සමස්ත ගමනේ දුර අඩුකර ගැනීමට මේ ගුවන් මාර්ගය තෝරාගන්නට ඇතැයි මැලේසියානු පාර්ශවය පවසයි. යුක්රේනයට අයත් ගුවන් කලාපය තුල අඩි 35000 ක උසක් පවත්වාගෙන යන්නට නියමුවන් අවසර ඉල්ලා සිටියත් යුක්රේන ගුවන් යානා පාලක නිලධාරීන් පවසා ඇත්තේ අඩි 33000 ක උසකින් ගමන් කරන ලෙසයි.

නෙදර්ලන්තයේ සිට ඔස්ට්‍රේලියාව බලා එක එල්ලේ පියාසර කිරීම අපහසු නිසා මැලේසියාව හරහා ඔස්ට්‍රේලියාව බලා යන්නට සිටි නෙදර්ලන්ත ජාතිකයන් යානයේ බහුතර මගීන් කොට්ඨාශයයි. ඔස්ට්‍රේලියාවේ පැවැත්වෙන ජාත්‍යන්තර මට්ටමේ  ඒඩ්ස් පිළිබද සමුළුවකට සහභාගි වීම මෙයින් බහුතරයගේ අරමුණ වී තිබේ. ඒඩ්ස් රෝගය පිළිබදව ලෝක මට්ටමේ විශේෂඥයෙකුද මේ ගුවන් යානයේ සිටි බවට විශ්වාස කෙරෙයි.

අත්වැරදීමකින් මැලේසියානු ගුවන් යානයට ප්‍රහාරයක් එල්ල වී ඇති බව බොහෝ පාර්ශවයන් පිළිගන්නා කාරණයයි. යානයට ගමන් කරන්නට ඉඩ ලැබී තිබෙන්නේ යුක්රේන ගුවන් සීමාව තුල සුළු දුර ප්‍රමාණයක් බව ඇතැම් වාර්තාවක කියවෙයි. කිසිදු  කිසිදිනක නිවැරදි කල  නොහැකි මේ අත්වැරදීම නිසා කුඩා දරුවන් 3 දෙනෙකු සහ කාර්යමණ්ඩලයේ 15 දෙනෙකු ඇතුලුව 298 දෙනෙකු මේ වන විට මරු වසගයට ගොස් තිබේ. කිසිදු කෙනෙකු දිවි ගලවාගැනීමට සමත් වී නැත.

























































මේවා සමග හුරතල් වූ කුඩා දරුවන් දැන් කොහිද ?

යුක්රේන සටන්කාමීන්
MH 17 ගුවන් යානයේ පළමු නිලධාරියා ලෙස Wan Amran Wan Hussain කටයුතු කර තිබේ. ගුවන් නියමුවෙකු ලෙස වසර 25 ක අත්දැකීම් ඇති හෙතෙම දෙදරු පියෙකි. වයස අවුරුදු 10 වන ඔහුගේ වැඩිමල් පුත්‍රයා මේ සිදුවීම සැල වූ වේලාවේ සිටම නොනවත්වා හඩන බව අන්තර්ජාලයේ සටහන් වී ඇත.


පුතුන් දෙදෙනා සමග ප්‍රධාන නියමුවා
මේ ගුවන් යානයේ සහායක නියමුවා ලෙස කටයුතු කොට තිබෙන්නෙ Eugene Choo Jin Leong නැමැති අයයි. 

අනතුර සිදු වූ වහාම පාර්ලිමේන්තුවේ හදිසි සැසියක් කැදවා තිබෙන මැලේසියානු අගමැති නජීබ් රසාක් මහතා එහිදී කියා ඇත්තේ 2014 වසර මැලේසියාවට දුක්බර වසරක් බවකි. ඔහුගේ මිත්තනියක්ද (සීයාගේ දෙවැනි විවාහක කාන්තාව) මේ ගුවන් යානයේ ගමන් කර ඇති බවට පුවත් පල වී තිබෙනු දැකිය හැකිය. මීට සමගාමීව අනතුර සිදු වූ දිනට පසු දින  එක්සත් ජාතීන්ගේ ආරක්ෂක මණ්ඩලයේ සැසි වාරයක්ද පවත්වා ඇති අතර එය කැදවීමට මූලික වී ඇත්තේ එංගලන්තයයි. අනතුරින් මිය ගිය අය අතර ඇමරිකානු සම්භවයක් ඇති නෙදර්ලන්ත පුරවැසියෙකු ඇති අතර, ඇමරිකානු ජනාධිපති බරක් ඔබාමා විසින් මේ සිද්ධියට වගකිව යුතු වන්නේ රුසියාවට හිතැති කැරලිකරුවන් බවද පවසා තිබේ. මිසයිලයක් නිසි ඉලක්කයකට පතිත කරන්නට නම් ඒ සදහා තාක්ෂණික සහයෝගයක් තිබුය යුතු බවත් ඒ අනුව නිසැකවම මේ සිදුවීම පිටුපස රුසියාවද සිටිය යුතු බත් ඔහු වැඩිදුරටත් කියා සිටියි. එය තවත් සීතල යුද්ධයක ආරම්භයක් වන්නටද බැරි නැත. අඩි 30000 ක පමණ උසකින් ගමන් ගන්නා යානයකට ප්‍රහාර එල්ල කල හැකි ප්‍රබල අවියක් ඇත්තේ යුක්රේනයට නොව රුසියාවට බවද ඇමරිකානු ජනාධිපතිවරයා කියා තිබේ.


අනතුරින් විපතට පත්වූ අයගේ ඥාතීන් සමග මැලේසියානු අගමැතිවරයා සහ බිරිද ශෝකය බෙදාගනිමින්


එක්වරම විශාල පිපුරුම් ශබ්දයක් ඇහුනා...ඒ එක්කම ගොඩනැගිලි හෙල්ලුම් කෑවා. ඊටත් පස්සෙ මළ මිනී වැස්සක් වහිනවා වගේ බිමට කඩාගෙන වැටුනා.  එක් මළ සිරුරක් තිබුනෙ අපේ නිවසෙ වහලෙ උඩ. ගුවන් යානයේ කොටස් ඇද වැටුන Grabovo  ගම්මානයේ වෙසෙන  Irina Tipunova නැමති යුවතිය එසේ කියා තිබුනා.

අහස මොර ගාන සද්දයක් ටික වෙලාවක් ඇහුනා...ඒ එක්කම ටක ටක ගාලා අහසින් පොළවට මොනවද වැටුනා...හොයලා බලද්දි ඒ මළ සිරුරු, වයස අවුරුදු 65 ක විශ්‍රාමිකයෙකු එහෙම කිව්වෙ කුස්සියෙ කැඩී ගිය සිවිලිම පෙන්වමින්. වහලය කඩාගෙන සිවිලිම හරහා ඔහුගේ නිදන ඇද අසලටත් නිරුවත් කාන්තා සිරුරක් වැටී තිබෙනවා. ඔහුගේ නිවසේ සිට මීටර් 100 ක වපසරිය ඇතුලෙ තිරිගු වගා කරලා තිබුන භූමිය තුලට තවත් සිරුරු දුසිම් ගනනක් පතිත වී තිබෙනවා.

 නම සදහන් කරන්න අකමැති තවත් ගැමි කාන්තාවක් තමා දුටු දේ කියලා තියෙන්නෙ මේ විදියට....මට ගුවන් යානය පුපුරන සද්දෙ ඇහුනා....මම ඉක්මනට ඇරලා තිබුන දොර වහන්න ඉස්සරහට දිව්වා. ඒ එක්කම මම දැක්කා අහසින් මිනිස්සු වැටෙන හැටි.  මගේ එළවළු පාත්තියටත් එක්කෙනෙක් වැටුනා. ගුවන් යානයේ ඉදිරිපස කොටස වැටුනෙ අපේ ගෙදර ඉදන් කිලෝමීටරයක් විතර කිට්ටුව දුරක තියෙන සූරිය කාන්ත වගාවට. මළ මිනී වලට අමතරව යකඩ කෑලි, ගමන් මළු, සහ අනෙකුත් සුන් බුන් මේ කෘෂිකාර්මික ප්‍රදේශය තුල පතිත වී  තිබෙන වග ඇගේ කථාවෙන් හෙළිවෙනවා.


ගුවන් යානයේ සුන්බුන් සහ මළ සිරුරු සොයමින්

මළ සිරුරක්




ගමන් මළු
සමහර සිරුරු හොද තත්වයෙන් තිබුනා. තවත් සමහර ඒවා තැලී පොඩිවී හදුනාගත නොහැකි විදියට තිබුනා. ගුවන් යානයේ පාලක මැදිරිය තුල කාන්තා සහ කුඩා ළමුන් පිරිසකගේ සිරුරු තිබුනා. භූමිය පුරාම සපත්තු, ඇදුම්, හිස් ගමන් මළු, බෙහෙත්, සහන සේවකයො තමන්ගෙ අත්දැකීම් ඒ විදියටයි දක්වා තිබෙන්නෙ.

Intan Maizura Othman ගෙ සැමියා Mohd Hazrin Hasnan  මේ විනාශ වූ ගුවන් යානයේ කාර්ය මණ්ඩල සාමාජිකයෙක්. ඇගේ නෙත් අගින් ගලන තවමත් වේලිලා නැති කදුලු දරාගෙන Intan  කිව්වෙ මෙහෙම කථාවක්.

මගේ සැමියා මේ ගුවන් යානයේ සේවය කලා. ගුවන් යානයේ සුන්බුන් රූපවාහිනියෙ දකිද්දි මම ප්‍රාර්ථනා කලේ මේ ගුවන් යානය MH 17 නොවී MH 370 වෙන්න කියලයි. යානයේ සුන්බුන් දකිද්දි මගේ, මගේ දරුවන්ගෙ අනාගතය සුව පහසු එකක් නොවන වග මට වැටහෙනවා. 

මේ අතර නියමිත වේලාවට ගුවන් තොටුපලට පැමිණීමට නොහැකි වීමෙන් මෙම ගුවන් යානය මග ඇරුනු කාන්තාවකද සිටියි. ඇය තම අත දරුවාද සමග මාධ්‍යයට අදහස් දක්වමින් කියා තිබුනේ මේ සිද්ධිය සැල වූ වහාම තමා දැඩි ලෙස කම්පනයට පත් වූ බවත්, දෙවියන් විසින් තම දෙමාපියන් සහ ඥාති හිතමිත්‍රාදීන් සමග තව දුරටත් ජීවත් වීමට තමා හට දෙවන වාරයක් උදා කර දී ඇති බවකි.


ප්‍රමාදය විසින් දිවි රැක දුන් කාන්තාව


ලෝක ඉතිහාසයේ මගී ගුවන් යානාවක් වෙත එල්ලවූ මෙවැනි වර්ගයේ පළමු ප්‍රහාරය මෙය නොවේ.  




මෙහි දක්වා ඇති  ගුවන් අනතුරු වලට අමතරව 1998 සැප්තැම්බර් මස 29 වන දින ලයන් එයාර් ගුවන් සේවයට අයත්  LN 602 අංකය සහිත ඇන්ටනොව් 24 වර්ගයේ යානයකට මිසයිල ප්‍රහාරයක් එල්ල කල දෙමළ විමුක්ති කොටි ත්‍රස්තයින් එය බිම හෙළා පුද්ගල ජීවිත 47 ක් විනාශ කළෝය.

ගුවන් යානයේ ඉරණමත් සමගම ජීවිතයෙන් සමුගත් මගී ජනතාව අතර මැලේසියානු රංගන ශිල්පිනයකද වෙයි.  Shuba Jaya නැමති ඇය කුළුදුල් දරු ප්‍රසූතියෙන් පසු තම නෙදර්ලන්ත ජාතික සැමියාගේ පාර්ශවයට දරුවා පෙන්වීමට ඔහු සමග එහි ගොස් ආපසු එන අතරතුර මේ අනතුරට මුහුණ දී තිබේ.




Sanjid Singh අනතුරට ලක් වූ MH 17 ගුවන් යානයේ සේවකයෙකු ලෙස කටයුතු කල අයෙකි. ඔහුගේ බිරිදද ඔහු මෙන්ම මැලේසියානු ගුවන් සේවයේ ගුවන් සේවිකාවක වූ අතර ඇය MH 370 ගුවන් යානයත් සමග අතුරුදන් වී සිටින තැනැත්තියකි. දෛවයේ සරදමකට මෙන් එක ලග සිදුවූ ගුවන් අනතුරු දෙකකින් එකම පවුලක් වාර දෙකක් විපතට පත් වී තිබේ. පුතා ඕනෑම රටක ඉදන් පිටත් වෙද්දි මට කථා කරලා කියනවා අපි දැන් පිටත් වෙන්න යන්නෙ කියලා...ඒ වගේ නෙදර්ලන්තයෙන් පිටත් වෙද්දිත් මට කිව්වා තාත්තා එක්ක හෙට දවල් කෑමට මම ගෙදර එනවා කියලා, Sanjid  ගේ පියා තම පුත්‍රයාගේ සහ ලේලියගේ ඡායාරූපයක් දෙස බලමින් දුක්බරව වචන අමුණයි.



Angeline Premila Rajendran  MH 17  ගුවන් සේවයේ සේවයේ නියුතුව සිටි එක් ගුවන් සේවිකාවක්. ඇය මේ සංචාරය සදහා නිවසින් පිටත් වීමට පෙර තම පවුලේ අයට පවසා ඇත්තේ තමා යළි එන තුරු සුනඛ සුරතලා හොදින් රැක බලාගන්නා ලෙසයි. සතුන් හට මහත් සේ කරුණාව දැක්වූ තැනැත්තියක් වුවද ඇයටද මේ ගුවන් අනතුරින් දිවි රැක ගන්නට හැකියාවක් ලැබුනෙ නෑ.


 MH 17  ගුවන් යානය තුල මෙවැනි කථා අපමණ තිබුනද මෙයින් මතු මම ඒවා කියන්නට නොයමි. නිරායුධ සිවිල් පුද්ගලයින් 298 ක් ගමන් ගත් මේ යානයට මෙවැනි විපතක් කොට, එයට සම්බන්ධ වූ පාර්ශවය අත් කරගත්තේ කුමන ප්‍රතිලාභයක්ද ? මේ යානය තුල සිටි අයගේ යැපෙන්නන් හට මෙන්ම, සමීපතමයන්ටද මේ සිදුවීම රාත්‍රියේ දුටු නරක සිහිනයක් මෙන් ජීවිත කාලය පුරාම සෝ ලතැවුල් ඇති කරනු ඇත.

විපතට පත් වූවන්ගේ පවුල් වල සාමාජිකයින්


ගුවන් යානයේ සේවයේ නියුතුව සිටි අයගේ පවුල් වල සාමාජිකයින් දුක බෙදාගනිමින්


























අදින් පසු හෝ මෙවැනි විපතක් යලිදු කිසිදිනෙක අසන්නට නොලැබේවා ! මෙවැනි විනාශයන් සිදු කරමින් සුන්දර ලෝකය අසුන්දර කරන උන් හට මෛත්‍රී සිත් ඇතිවේවා !



මම කාමරේ අරින සිරා කොලුවා.


ප.ලි

මෙම ලිපියට මූලාශ්‍ර Yahoo Malaysia සහ අන්තර්ජාල පුවත් වෙබ් අඩවි කීපයකිනි.

මේ අනතුරින් දිවි තොර වූ අයගේ නම් ලැයිස්තුව මෙතැනින්

මැලේසියාවේ සංචාරක ක්ෂේත්‍රයට අදාළ ආයතනයක සිරා කොලුවා රැකියාව කරන බව සිරාගෙ කාමරේ බොහෝ පාඨකයන් දනිති. මැලේසියානු ගුවන් සේවය මෙරට සංචාරක කර්මාන්තයේ කටයුතු කරන සමාගම් වෙත මේ අනතුරෙන් පසු මාධ්‍ය නිවේදනයක් එවා තිබුනි. අපේ ආයතනයට ලැබුනු එම නිවේදනය ඔබේ දැන ගැනීම පිණිස මම මෙහි පල කරමි. මේවා මේ ගුවන් අනතුර පිළිබද සිංහලෙන් වාර්තා කල කිසිදු තැනක අඩංගු නොවූ දෑය.


අනතුරෙන් මිය ගිය බහුතරය නෙදර්ලන්ත ජාතිකයන්ය


අනතුරට පත් ගුවන් යානය පිළිබද තොරතුරු



Related Posts Plugin for WordPress, Blogger...