103 අයියෝ සල්ලි....

හුග කාලෙකින් සිරා කයිවාරුවක් ඇද බා නැත... පහුගිය දොහේ ගණිකාවන් නීතිගත කිරීම, Dudesira හුජ්ජ බෑග්  බෙදා හැරීම ආදී සමාජය හිතැති, භාර දූර්ය, ඉතාමත් වටිනා කාර්යයන් බොහොමයක යෙදී සිටීම නිසාම සිරාට කයිවාරු අමතක වී ගියේය. එනමුදු කාමරේ ලෑලි දොර අභියස සිට තට්ටුව දමා ඇතුලට ඒමට අවසර පතන සුපින්වත් සහෘද කැළ මතක් වෙද්දි මගේ අක්මාව ගැහෙයි, හෘදය සංකෝචනය වී ප්‍ර‍සාරණය වේ...  දියං ඩෝ අපිට අළුත් පෝස්ටුවක් යැයි උනුන් මා හට බැට දෙන්නට කලියෙන් යමක්  ලිවීම සෞඛ්‍යයට හිතකරය...

ඔය පෙර කිව්ව පිවිතුරු නිමල අදහසත් සිත්හි දරා සිරා අතිජාත ස්කූටරයට නැගුනේ  තට්ටයාගෙ ස්පොට් එකෙන් ප්‍රින්ට් අවුට් කීපයක් ගන්න හිතාගෙනය... එතැන තට්ටයාට අමතරව දැද්දා ද සිටී...මුන් ඩබලම අපේ බෑන්ඩ් එකේ පැරණි එල කකුල් දෙකකි.  විනාඩි 10 ක පමණ කාල පමාවකින් ස්කූටර් යන්ත්‍ර‍ය සිරා කොලුවා අදාළ තැනට ගෙන ගියේය... මා යන විට සිය පෙම්වතියට තුරුලු උන අහිංසක පෙම්රාජයකු සේ තට්ටයා ඩුප්ලෝ යන්ත්‍ර‍යක් බදාගෙන  ඩුප්ලෝ පිටපත් දිගට හරහට නෙලාගෙන නෙලාගෙන යයි. දැද්දා කොලුවා දිගට හරහට කී බෝඩයෙන් අකුරු කොටාගෙන කොටාගෙන යයි... අකුරු වැරදුනත් උගෙ වේගය නම් සුපිරිය...

මොකෝ බොලව් උඹලා දෙන්නා  පුක කැඩිච්ච කඩි දෙන්නෙක් වගේ ගිණි කසේට වැඩ...

අප්පට... මේ අපේ සිරා අයියා නොවැ.... දන්නෙ නැද්ද හැබෑටම... අද පොඩි සංගිත සාජ්ජයක් තියෙනවා...ටිකට් වලට පෙන්වන...අපි මේ ඒක බලන්න යන්න උදේ ඉදන් ට්‍ර‍යි එක දෙන්නෙ... තට්ටයා ශ්‍රී මුඛය විවර කළෙහිය.

ඒමද... හොදා හොදා... ඉදලා හිටලා ඒම දේකුත් තියෙන්න එපායැ...

දුම්වැටියක් අතින් ගත්  මා නොහදුනන මුත් කලින් දැක පුරුදු තට්ටයාගෙ මිතුරෙක් ස්පොට් එකට ඇන්ටර් වූයේ ඔය අතරය...

අයියා... ඔහු මටද ගරුසරු දක්වා  මේස කොටේකට පශ්චාත් භාගය තද කළේය.

කැවුත්ත එළියට එන තරමේ වේගයකින්  ඉහළට අදිනා සිගැරට්ටුවේ රතු ගිණි දැල්ල සූස් හඩින්  ඉදිරියට ඇදේ....
සුදු පාට  මීදුම් ගලාලා අර පේන කන්දේ හැපීලා  ගීතය සිහිපත් කරමින්... සිගරට් දුම ස්පොට් එකේ ඔබ මොබ පාවෙයි.

ගෝතයො... ඔය මගුල එළියට වෙලා බීලා ඇතුලට වර... ගන්දස්කාරෙ බෑ...  පවු යකෝ උඹලා බදින ගෑණු..බැන්දට පස්සෙ කියහන් ඉන්න තැන... අපිත් ළගපාත ගෙයක් හරි කුලියට අරන් නවතින්නං...

තට්ටයාගෙ තර්ජනයෙන් පසුබා ගියා ගෝතයා එළියට ගොස් සිගැරැට්ටුව උගුරට දෙකට හමාර කොට ඇතුලට ආවේය.

මට එක්වරම සිහිවූයේ අපේ පොල් සෝමේය. හැඩ රුව වෙනස් වුවද මේකාද ඒ ඝණයේම බැව් මගේ අක්මාව මට සන් කල නිසාම... මම මේ අලුත් හාදයා හෙවත් ගෝතයා සමග කයියකට සැට් වුනෙමි. අන්න ඒ කයියට පින් සිදු වෙන්න සිරා අද පෝස්ටුවක් තලා ගන්නෙහිය.

මල්ලි මේ පළාතෙද ?

අනේ නෑ අයියා මම කළුතර පැත්තෙ... දැන් ගම්පහ තමා රාජකාරි කොරන්නෙ...

රාජකාරි කිව්වෙ ?

.......... සර්ගෙ ටියුෂන් පන්තියෙ ටියුට් බෙදන්නෙ... ළමයින්ගෙ කාඩ් චැක් කොරන්නෙ.... සර්ට කඩේ යන්නෙ... ඔක්කොම මම තමා ඉතිං....

හොදා හොදා... හොද අනාගතයක් තියේවි...

අපිටද.... අනේ නෑ අයියා සර්ගෙ අනාගතේ නම් පට්ටෙට ෂුවර්...  පන්තියෙ ඩෙස් පේළි ගාන වැඩි වෙන්න වැඩි වෙන්න...පාවිච්චි කරන වාහනේ වටිනාකමත් වැඩිවෙනවා... ඒ උනාට අපේ පඩිය නම් එකතැන.... ඒක නිකමටවත් ඉස්සෙන්නෙ නෑනෙ ...

හරි හරි ඕවා ගැන හිතන්න එපා... ළගදි දවසක පඩිය ඉස්සෙයි....තමන්ගෙ රාජකාරිය හරියට කොරන එක තමා හොදම දේ...

අන්න හරි අයියා...ඒම තමා මේ මමත්...වෙලාවක් කලාවක්, කෑමක් බීමක්... නෑ... උදේ සිට හැන්දෑ වෙන තුරාවට රාජකාරිය...

මේ දැනුත් ආවෙ අපේ ටියුට් එකක් ඩුප්ලෝ කරලා ඉවරද බලන්න....

තව පැය භාගයක් ඉදපන්... සුටුස් ගාලා ඉවරයක් කරලා දෙන්නම්... තට්ටයා මොර දෙයි...

ඉතිං මල්ලි ළගදි ගමේ ගියෙ නැද්ද...

මතක් කරන්නෙපා අයියා... ළගදි දවසක මම අම්බානට කුජීත වෙලා , සාටර් වෙලා මේ ඇවිත් ඉන්නෙ...

අප්පට ඒ මොකෝ හැබෑටම...

මට වාවන්නෙ නෑ අයියා... මට කියාගන්න බෑ... අයියෝ මගෙ රුපියල් 6000/-

හරි හරි මල්ලි අඩන්න එපා මටත් වාවන්නෙ නෑ.... මේකාගෙ කිඹුල් කදුළු දැක මටද තනි ඇහැට ඇඩෙන්නට ලගය...

මම ගිය මාසෙ දවස් 3 ක් සර්ගෙන් නිවාඩු අරන් ගමේ ගියා යාලුවො සැට් එකත් එක්ක පොඩි ජොලියක් දාලා එන්න...

ඉතිං ඉතිං... සිරාගෙ කුතුහලය වැඩි වෙන සෙයකි....

ඉතිං උදේ වරුවෙ ගෙදර ගිහිල්ලා ... නාලා කාලා ඇලට් එකක් දාගෙන හැන්දෑවට ගැන්සිය එක්ක සැට් වුනා... බන්ට් එක ළග පද්මා අක්කගෙ රෑ කඩෙන්  ඌරුමස් බයිට් එකක් දාගෙන කඩේ පිටිපස්සෙ  ළිං පඩියෙ තියාගෙන ගල් බෝතල් 2 ක් ගහලා මලකුත් ඇදලා එළියට එද්දි වෙලාව 11 ට විතර ඇති... ඔක්කොම අපි පස් දෙනයි...

තුන්දෙනෙක් මගදි සලාම් කියාගෙන උන්ගෙ ගෙවල් වලට මාරු උනා අරිද.... දැන් ඉන්නෙ කියද... දෙන්නයි... හික්....

ඒ එක්කම වැටෙන්න ගත් ඉක්කාවාගෙන් ගෝතයා බේරා ගැනීමට මට වතුර වීදුරුවක් වැය විය...

ඉතිං අපි දෙන්න මලේ  පවර් එක ඇගට අරන් පයින්ම කිලෝ මීටර් එක හමාරක් විතර ඇවිල්ලා පන්සල  ලග බස් හෝල්ට් එකේ හිට ගත්තා...

ඉතිං ඒ වෙලාවට බස් තියෙනවද...

බස් නෑ ඒ උනාට වැඩ ඉවර කරලා  ගෙදර යන බස් එකක් හරි ටෝක් කර ගන්න පුලුවන්...

අපි එද්දි බස් හෝල්ට් එකේ හිටියා තව තුන් හතර දෙනෙක්.... උන් ටික පන්සලේ හාමුදුරුවන්ට තිත්ත කුණුහබ්බෙන් බැන බැනා පන්සලට ගල් ගැහුවා.... අපි ඉතිං අයියා ඉදලා හිටලා මේ වගේ ෆන්ක් එකක් ගත්තට උපතින් බෞද්ධයො නොවැ... අනේ අපි අපේ පාඩුවෙ තමා පැත්තකට වෙලා හිටියෙ...

ඇයි බන් ඉතිං නිරපරාදෙ හාමුදුරුවන්ට බැන්නෙ....

හාමුදුරුවො ධර්මෙට වඩා බිස්නස් වැඩ කරන කෙනෙක්ලු... චරිතෙ අප්සැට් ලු....


විනාඩි 10 ක් ගියෙ නෑ... වේගෙන් ආපු පොලිස් ජිප් එකක් පත බ්රේක් පාරක් ගහලා නැවැත්තුවට වඩා වේගෙන් ඒකෙ ඇතුලෙ හිටිය රාළහාමිලා ටික එළියට පැන්නා....මට ඉතිං ඉවෙන් වගේ තේරුනා... මරාලයක් තමයි කියලා... ගල් ගහපු සැට් එක දුවද්දි අපි එතනම හිටියා...

http://www.sundaytimes.lk/120812/uploads/Police.jpg

අනේ රාළහාමිලා දෙන්නෙක් බලෙන්ම  අපිට පුකට දෙකක් දිලා ජිප් එකට නගින්න කිව්වා..

එහෙම පුලුවන්ද බන් වැරැද්දක් නැති මිනිස්සු ජිප් වලට පටවන්න...

වෙච්ච අසාධාරණය නිසා තරහා ගියා සිරා කොලුවා විමසුවේය.

එහෙම දාන්න බැරි උනාට අපි දෙන්නා ඒ වෙලාවෙ කෙලින් ඉන්න බැරි ගානට ඔන්දස්පොට් වෙලානෙ හිටියෙ අයියා... ඒක තමා පරහට හිටියෙ...

උඹලා නේද ගල් ගැහුවෙ පන්සලට.... පොලිස් ලොක්කා ඇහුවා...

ගල් ගැහුවට පන්සලට ගැහුවෙ නෑ මහත්තයෝ... අපි මේ ෆන් එකක් දාලා ගෙදර යන ගමන්....

ගංජා ගදක් එන්නෙ ගංජා ගැහුවද....

අනේ නෑ සර්... අපි මේ අති විශේෂ ටිකක් විතරයි බිව්වෙ...

හරි හරි  උඹලා ඔය බස් හෝල්ට් එකේ හිටියට දැන් බස් එන්නෙත් නෑනෙ... නැගපල්ලා...ගෙවල් ලගින්ම බස්සන්නම් කියලා සෑර් පොරොන්දු වෙච්ච හින්දම  මා එක්ක හිටිය අනිත් එකත් එක්කම මමත් ජිප් එකට නැග්ගා...

අනේ ඒ රාළහාමිලා අපි දෙන්නව දාගෙන පැය ගාණක් එහෙ මෙහෙ කැළෑ පාරවල් වල කරක් ගහලා ... තව කීපදෙනෙක්ම ජිප් එකට නැග්ගුවා... දැන් ජිප් එක ඇතුලෙ ඉඩත් නෑ... හරියට සාඩින් පැක් කලා වගේ...

කථාව කියන අතරතුර ගෝතයාගේ අංග චලනයන් කථාවට එක් කරන ජීවය ගැන කියන්න වදන් නැත..

තව ටික දුරක් ගිහිල්ලා කසිප්පු වික්ක ඇග මහත ගෑණු දෙන්නෙකුත් ජිප් එකට පැටෙව්වා... දැන් නම් හුස්ම ගන්න ඉඩත් නෑ... ජිප් එක අදින්නෙත් අමාරුවෙන්....

මේ මොන මගුලක්ද යකෝ... ගෑණියෙක්ට පාඩුවෙ යන්න දීපල්ලකො...

අර ගෑණුන්ගෙන් එකියක් මොර දුන්නනෙ හදිස්සියෙම...

ඒ මොකෝ බන්... සිරා හූ මිට්ටක් තිබ්බා...

අපි නම් නෙමෙයි... වෙන කවුද මදාවියෙක් ඒකිගෙ පපුව මිරිකලා....කරුවලේම....

ඒ එක්කම පැන නැගුන හිනාව නිසාම  තව පොඩ්ඩෙන් දැද්දා කැරකෙන පුටුවෙන් පත  බෑවෙන්නට  ඉඩ තිබුනි....

ගෑණි කට ඇරියා විතරයි  ජිප් එක නවත්තලා ලොකු මහත්තයා හංසයො මිරිකපු එකාව එළියට අරගෙන දුන්නා දෙන එක ආයෙ මදි නොකියන්න....

අපි ඉතිං පැයක් දෙකක් කරක් ගහලා සෑහෙන දුරක් ගිහිල්ලා ඉවර වුනාට පස්සෙ....

අර පන්සල ළගින් නැගපු උන් දෙන්නා බැහැපල්ලා.... කියලා ලොකු මහත්තයා කිව්වා... අයියට කියන්න ඒ වෙද්දි අපි කිලෝමීටර් 10 කට වඩා ගෙදරට දුරයි. ඔය දුර මේ මහ රාත්තිරියෙ පයින් යන්න බැරි කමටම මම  ඇහුනෙ නෑ වගේ හිටියා...

උඹලට ඇහෙන්නෙ නැද්ද.... බැහැලා ගෙදර යනවද නැද්ද....

මා එක්ක හිටපු  අනිත් එකා නම් පූස් පැටියා වගේ ජිප් එකෙන් බිමට බැස්සා... ඒ උනාට  මම බැස්සෙ නෑ...

අනේ සර් තව කොච්චර දුර පයින් යන්නද... ජිප් එකට දා ගත්තා නම් ගේ ළගින්ම බස්සන්නකො... කියලා මම කිව්වා....

උඹට ගේ ළගින්ම බහින්න ඕනෙ නේද... හරි හරි ළගින්ම බස්සන්නම් කියලා ජිප් එක පොලිසියට ගියා... මාව කූඩුවට දැම්මා අනිත් රොත්තත් එක්කම... අපි එද්දි  ඒක ඇතුලෙ එකෙක් බීඩි බොනවා... මෙලෝ යකෙක්ට ඉන්න බෑ... අපිත් එක්ක ගිය උන් දෙකක් දුන්නම උගෙ බීඩි කොටේ හැලුනා...

ඉතිං ඉතිං... යන්තරයෙන් එළියට එන පිටපත් එකතු කරමින් තට්ටයා තව තවත් ගෝතයා කථාවට පොළඹවයි...

උඹට කියන්න තට්ටෙ, මට අර බහින්න කියපු තැනින් බැස්සා නම් හොදයි කියලා හිතුනා බන්... අවේලාවෙ වීදි සංචාරය කියලා මාව පහුවදාම උසාවියට දැම්මා කියහන්කො... අදුනන යාලුවෙක්ට විස්තරේ කියලා ලෝයරයෙක් අල්ලලා ගෙදර උන්ට හොරෙන් උසාවි කූඩුවට නැග්ගා...

යුෂ්මතා වැරදි කරුද නිවැරදි කරුද කියලා ඇහුවාම වැරදි කරු කියන්න කියලා මෑන් මට කිව්ව නිසා එහෙම කිව්වා... ඒකෙන් නඩුව ඉවරයි... දඩේ පන්දාහයි...

ලෝයර්ට දාහයි..... අයියෝ සල්ලි 6000/- ඉවරයි..... හොද වෙලාවට අදටත් ගෙදර කවුරුවත් මේ ගැන දන්නෙ නෑ...

ඒකා හයදාහ මතක් කරමින් විස්සෝප වෙද්දී... තට්ටයා උගෙ වැඩේ අවසන් කර හමාරය...

ඉතිං ඊට පස්සෙ පද්මා අක්කගෙ කඩේ පිටිපස්සෙ සැට් උනේ නැද්ද.... සිරා ප්‍ර‍ශ්නයක් නැගුවා...

ගිය සතියෙ ඔය වගේම රෑ වෙලා මම කට්ටියට සැට් වෙන්න එන්න කියලා පණිවිඩේ යවලා යාලුවෙකුගෙ ගෙදර ඉදන් පාරට බැහැලා බස් හෝල්ට් එකේ හිටගෙන හිටියා... වෙලාව රෑ 9 ට විතර ඇති...

එදත් පොලිස් ජීප් එකක් නවත්තලා හෝල්ට් එකේ හිටිය අයගෙන්  කොහෙටද යන්නෙ අහලා නග්ගගත්තා... මගෙනුත් ඇහුවා කොහෙටද යන්නෙ කියලා... මට භයටම කියවුනා ගෙදර යන්න ඉන්නෙ කියලා... අපේ පැත්තෙ කැළෑ පාරවල් වල බස් අඩු හින්දා... මේ වගේ ඉදලා හිටලා පොලෝසියේ මහත්තුරු මිනිස්සුන්ව ජීප් එකේ දාගෙන යනවා...

අනේ ඒ පොලිස් මහත්තුරු එදා නම් ගේ ළගින්ම මාව දාගෙන ගියා... බැස්සට පස්සෙ තමා අරුන් සැට් එක මම එනකන් බලන් ඉන්නවා කියලා මීටර් උනේ....එදා නම් කලින් අහලා තිබුනෙ නැති කූණුහබ්බත් උන්ගෙන් අහගත්තා...

දැන් අපි අපේ ගෙදර පිටිපස්සෙ සැට් වෙන්නෙ අයියා.... රෑට පාරෙ බීලා අහුවුනොත් අපේ පැත්තෙ සොරිම තමා... ඊට පස්සෙ ගත්ත ආතොල් එකත් කුඩු...

තට්ටයා ලබා දුන් බිලත් රැගෙන ගෝතයා..... අයියා එහෙනම් අපි කැපුනා... වෙලාවක සැට් වෙමු  කියමින් මගේ දෑස් මානයෙන් මිදුනේය......

ඕකා ගැන කියලා වැඩක් නෑ අයියේ... පන්තියේ කෙල්ලො තුන් හතර දෙනෙක් ගෙන්ම යාලුවෙන්න අහැව්වා කියලා උන්ගෙ සර් ඌව ළගදි දවසක එලවන්නත් හැදුවා... කියමින් තට්ටයා ඩුප්ලෝ යන්ත්‍ර‍යේ විදුලි සැපයුම විසන්ධි කළේය.

ෆන් දැමීමෙන් පසු අවේලාවේ වීදි සංචාරය... ඉතා අහිතකරය... අයියෝ සල්ලි යනුවෙන් කීමට වැඩ සිදුවිය හැක.

මම කාමරේ වෙසෙන, සත්ගුණවත් සිරා කොලුවා...

ප.ලි

ගෝතයා තෙපලූ බසින්ම අකුරු කරන ලදී.

මෙම කථාවෙන් පාඨක ඔබට ගත හැකි ආදර්ශය නම්... 
ෆන් දැමීමෙන් පසු බස් හෝල්ට් අසල සිටගෙන සිටීම ඉතා භයානකය....