82 සිංගප්පූරුවේ මිත්‍ර සමාගම

කාලය අස්පවේගයෙන් ගොස් සිංගප්පූරුව තුල මා ගත කරන හතර වෙනි සතියටද එළැඹුනි. මට සතියකට පමණ කලින් රැකියා දඩයම පිණිස සිංගප්පූරුවට පැමිණ ගාමිණී විලාවෙහි ලැගුම්ගෙන සිටි මෘදුකාංග ඉංජිනේරුවන් කීප දෙනෙකුම නැවත ලංකාවට ගියේ සිංගප්පූරුවේ රැකියා අපේක්ෂා කරන විදේශ සේවකයන් කෙරේ සිංගප්පූරු රජය පනවා ඇති නීති රීති වල තරම මොනවට කියා පාමිනි. මා ලංකාවෙන් පැමිණෙන විට සැලසුම් කරගෙන ආවේ මාස 2ක් මෙහි රැදී සිටින්නටය. සිංගප්පූරුව යනු ලාංකිකයන්ට වීසා ලබාගැනීමකින් තොරව යා හැකි රටවල් දෙකෙන් එකකි. ඒ අතරිනුත් දියුණුම රටයි. ගුවන්තොටුපලේදී ආගමන විගමන නිලධාරීන්ගේ පරීක්ෂා කිරීම් වලින් පසු මාසයක කාලයක් එරට රැදී ඉන්නට වරම් ලැබෙයි. දෙවැනි මසකට වීසා දීර්ඝ කරගැනීමට අන්තර්ජාලයෙන් ඒ සදහා ඉල්ලුම් කිරීමට සිංගප්පූරු රජය විසින් පවත්වාගෙන යන වෙබ් අඩවියක් ඇතත් ඒ ක්‍රමවේදයෙන් ඉල්ලුම් කරන අපේක්ෂකයන් බහුතරයක් වර්තමානයේ ඉන් අසමත් වන නිසා මා තෝරා ගත්තේ අනෙක් ක්‍රමයයි. එනම් ගොඩබිමෙන් මැලේසියාවට ගොස් දින දෙක තුනකට පසු නැවතත් සිංගප්පූරුවට පැමිණීමයි. එවිට තවත් මසක් මෙහි රැදී ඉන්නට වරම් ලැබේ.

අතීතයේදී සිංගප්පූරුවට පැමිණි පසු ලංකාවේදී අනුමත කරගත් මැලේසියානු වීසා නොමැතිව මැලේසියාවට ඇතුලුවීමට පහසුකම් තිබුනත් දැන් ඒ මාර්ගය අපට අවහිර වී තිබේ. දිගින් දිගටම මැලේසියාව තුල සිදුවූ මිනිස් ජාවාරම් නිසා මැලේසියානු රජය ශ්‍රී ලාංකිකයන් කෙරෙහි වන ආගමන නීති දැඩි කර ඇති හෙයින් ලංකාවෙන් පැමිණෙන විට මැලේසියානු වීසා රැගෙන ඒමට සැමට සිදුවෙයි. ඒ සදහාද පෙර නොවූ විරූ ලියවිලි ප්‍රමාණයක් වර්තමානයේ ඉදිරිපත් කලයුතු අතර බැංකු ගිණුම් වාර්තා පවා අවශ්‍යය.

පළමු මාසය තුල මා සිංගප්පූරුවේදී ලද අත්දැකීම් මෙන්ම එහි පවතින අලුත් නීති රීති නිසාවෙන් තවත් මසක් එහි ගත කිරීම ඵල රහිත මුදල් නිකරුණේ වැයවන වෑයමක් බව මට ඒ වන විටත් වැටහී තිබූ හෙයින් මැලේසියාව තුල දෙවැනි මස ගත කිරීමට මම ඉටා ගතිමි. මා කලින් සේවය කල ආයතනයකදී හදුනාගත් මිතුරෙකු ඒ වන විටත් මැලේසියාවේ සිටීම මට මහත් සහනයක් විය. එතැන් පටන් පරිගණක තිරයෙන් මෑත් වී රැකියා දඩයමෙන් ඉවත් වීමට අවස්ථාව ලද නිසා සිංගප්පූරුව තුල යම් තරමකට සංචාරයටත්, හමුවීමට නොලැබුනු මිතුරන් හමුවීමටත් අවකාශ සැලසුනි.

සාමාන්‍ය පෙළ කරන අවධියේ මගේ පාසලේ මගේ පන්තියේම සිටි මිත්‍රයෙකු වන නුවන් සිය බිරිදද සමගින් අද සේවය කරන්නේද සිංගප්පූරුවෙහිය. සාමාන්‍ය පෙළින් පසු ඔහු ගණිත අංශයත් මා වාණිජ අංශයත් තෝරාගැනීම නිසාවෙන් අප දෙදෙනා ඉන් පසු පාසල තුල පවා හමුවූයේ කලාතුරකිනි. ඒ මෙම අංශ දෙක පිහිටා තිබුනේ පාසලේ දෙකෙළවරක හෙයිනි. මොරටුව සරසවිය හරහා අනාගතයට සවිමත් අත්වැලක් ලැබූ ඔහු මට 2001 වසරින් පසු හමු වී තිබුනේ නැත. එහෙත් මූණු පොතේ මිතුරන් ගොන්නේ සිටීම නිසාත්, මා මිත්‍ර සහන් ඔහුගේද මිතුරෙකු වීම යන කාරණා මත මගේ සිංගප්පූරු ආගමනය ඔහු දැන සිටියේය.

මෙහි පැමිණි පසු දුරකථනයෙන් කීප වතාවක් කථා කලත් ඔහුගේ අවිවේකී කම මත අපට හමුවීමට අවස්ථාවක් නොලැබුනද මම සිංගප්පූරුවෙන් පිටත් වන පුවත අසා ඔහු මට ක්ෂණිකව ඔහුගේ නිවසේ රාත්‍රී භෝජනයකට ඇරයුම් කළේය.

උඹ මෙච්චර ලගට ඇවිල්ලා ආපහු යන්න හදද්දි මගේ ගෙදරට එක්ක ගියේ නැත්නම් මට සෑහෙන අවුල් බං... නුවන් එසේ පැවසුවේ අප අතර පවතින නිහඩ මිතුදම නිසා බැව් සක්සුදක් සේ පැහැදිලිය. ඔහුගේ නිවස කිට්ටුව ඇති Hougang දුම්රිය ස්ථානයට පැමිණ රැදී සිටින ලෙස මට දැනුම් දුන් හෙතෙම මා කැදවාගෙන යාමට පැමිණියේ ඔහුගේ බිරිදද සමගිනි. වසර 12 කට පසු මගේ පන්ති සගයා නැවත දකින්නට ලැබීම මට මෙන්ම ඔහුටද මහත් සතුටක්ම විය.

මේ මචං මගේ වයිෆ්...ඔහු මුලින්ම බිරිදට මා හදුන්වා දී පා ගමනින්ම නිවසට යන්නට විය. මමත් මචං ගාමිණී විලා එකේ මුලින්ම හිටියෙ. මෙයාව මෙහෙට එක්කගෙන ආවට පස්සෙ තමයි ඉතිං අපාර්ට්මන්ට් එකක් ගන්න හිතුවෙ. සිංගප්පූරුවේ මෙවැනි නවාතැනකට සෑහෙන මිළක් ගෙවිය යුතු වුවත් මේ දෙපලම මෘදුකාංග ඉංජිනේරුන් ලෙස වෘත්තියේ නිරතව සිටින හෙයින් එය ගැටලුවක් වී නැත.

වසර 12 කට පමණ පසු හමුවූ අපට  කථා කරන්නට කොතෙක් දේ නම් තිබේද ? අප දෙදෙනා මුලින්ම හමුවූ තැන සිට කල දග වැඩ මෙන්ම රසවත් සිදුවීම් වලින් නිවසේ ආලින්දය පිරී යද්දී ඔහුගේ බිරින්දෑ නිහඩවම රාත්‍රී භෝජනය පිළියෙල කලාය. කාලය ගතවූ අයුරු අපට දැනුනේවත් නැත. කථා කරන්නට එතරම් දේ තිබේ. 10 වසරේ සිටියදී නුවන් පන්තියේ ප්‍රථමයා නොවුනත් මුල් ස්ථාන 10 අතර තුර ස්ථානයක් වාර විභාගයෙන් නිරතුරුව දිනාගත් චරිතයකි. පොතටම ඇළී උන් චරිතයක් නොවූ නිසාම ඒකා තුල වූයේ තරමක දාංගලයකි. මෙවැනි දැගලිල්ලක් අතර තුර පන්තියේ ඇතුල්වීමේ දොරටුව හරහා ක්ෂණිකව පෙනී සිටියේ එකල අපට විද්‍යාව ඉගැන්වූ සුගතපාල ගුරුතුමාය. ඉතා විශිෂ්ඨ ගුරු පියෙකු වූ එතුමා තරහා ගියොත් නම් මෙල්ල කිරීම උගහටය. ඔහු එක්වරම නුවන් වෙත එළඹ මේ සැරේ පන්තියේ කී වෙනියාදැයි විමසීය. නුවන් එයට පිළිතුරු දුන්නේ 5 වෙනියා ලෙස බැව් මගේ මතකයේ තිබෙයි. එකෙනෙහිම උගේ කන්කෙටියෙන් අල්ලාගත් සුගතපාල සර් උඹ දගලනවා මදිවට බොරු කියන්නත් එනවා නේද...උඹ වගේ දගලන එකෙක් කොහොමද යකෝ 5 වෙනියා වෙන්නේ යි කෝපයෙන් හඩ තැලූ අතීතය අපි නැවතත් සිනාහඩ අතරින් මෙනෙහි කලෙමු. එන්න කෑම කාලා ඉන්න... නුවන්ගේ බිරිද ඒ සිනහවට විරාමයක් තැබූයේ කුස්සියේ කටයුතු අහවර වී ආහාර මේසය සූදානම් කිරීමෙන්ද අනතුරුවය.

අනේ රසද දන්නෙ නෑ...මම පළවෙනි වතාවට තමයි මේවා හැදුවෙ...ඇය කෑම මේසය මත වූ පැස්ටා බදුන දක්වමින් පැවසුවාය. ඒ කෙටි කාලය තුල ඇය තනිවම තවත් ආහාර වර්ග කීපයක්ම සකසා තිබුනි. තිදෙනාම ආහාර බෙදාගෙන අනුභවය ඇරඹුනු පසු ඇය නැවතත් පෙර ප්‍රශ්නයම නැගුවාය.

කෑම හොදද ? ඔව් වරදක් නෑ රසයි, මගේ පිළිතුර හමුවේ ඇගේ මුවේ මන්දස්මිතියක් නැගුනි. හමු වී තවමත් වැඩි වේලාවක් ගත නොවුනත් ඇයද මා සමග සෑහෙන හිතවත් කමක් ඇතිකරගෙන ඇති සෙයකි.

පළමු වටය අවසානයේ අනේ තව බෙදා ගන්න...ඇගෙන් බේරුමක් නැත...මගේ තඩි බඩ ගෙඩිය දක්වා රාත්‍රියට අඩුවෙන් කෑම කන බව දැක්වුවද ගැලවීමක් නැති තැන බඩ පැත්තක දමා නැවතත් බුදින්නට මට සිදු විය. ආහාර වේල අවසානයේ පිරිනැමුනු හිමකිරම බදුනකින්ද සන්තර්පණය වූ පසු ඇය කීවේ මේ දින වල කාර්යාලයේ වැඩ අඩු නිසා දවස පුරාම සිංහල බ්ලොග් කියවන බවකි. මා එවිට සිරාගේ කාමරය පිළිබද විමසූ විට ඇගේ පිළිතුර වුයේ එය දැක ඇති මුත් කිසිදා කියවා නැති බවය. එය ලියන්නේ මා බැව් කී විට ඇය කීවේ ඊළග වතාවේ නිසැකවම කියවන්නම් කියාය.

මිත්‍රත්වයේ උණුසුමින් නැහුවුනු දෙහෝරාවකට පමණ පසු මම ඔවුන් දෙපලගෙන් සමුගැනීමට සැරසුනෙමි. ඒ අවස්ථාවේ මතක සටහනක් ලෙස අප තිදෙනාගේ ඡායාරූපයක් ගැනීමට අවැසි වූ නිසාවෙන් ඔවුන්ගේම නිවසේ කාමරයක් කුලී පදනම මත ලබාගෙන සිටින කොරියානු යුවතියක අපට පිළිසරණ වූවාය.

මම ඔවුන්ටද ඔවුන් මටද සුභ පැතීමෙන් අනතුරුව යලිදු මා දුම්රිය ස්ථානය දක්වා ඇරලවීමට දෙපලම එක්වූහ. ස්වයංක්‍රීය පඩිපෙළින් මා පහළට යද්දී මට සමුදෙමින් දෙදෙනාගේම සෙළවෙන අත් මම යන්තමින් දුටිමි.

මට නොයෙක් වර විවිධ උපකාර කල ජෙරමි හමුවීමට ඊට පසුදින යොදාගතිමි. සිංගප්පූරුවට පැමිණි පළමු දිනයෙන් පසු නැවත මා ඔහු මුණගැසෙන්නේ අදයි. අප දෙදෙනා සිටින්නේ රටේ දෙකෙළවරක විම එයට හේතුවයි. දම්පැහැති දුම්රිය මගෙන් රතු පැහැති දුම්රිය මගට මාරු වී Lake side දුම්රිය පල දක්වා ගමන්ගත් පසු ඔහුගේ රියෙන් මා රැගෙන යාමට ඔහු එකවී සිටියේය. දුම්රිය පලෙන් බැස බෑගයේ තිබූ ජංගම දුරබණුව රැගෙන බලන විට ජෙරමිගෙන් ඇමතුම් කීපයකි. මම සැනෙන් ඇමතුමක් ගත්තෙමි.

Lake Side දුම්රිය ස්ථානය

අනේ බං ෆෝන් තියෙන්නෙ කථා කරන්න, කොහෙ මගුලකද ඕක තිබ්බෙ....මම ස්ටේෂන් එක කිට්ටුව හිටිය නිසා උඹ කොහෙද බලන්න කථා කලේ....දැන් ට්‍රැෆික් එකේ මම ආපහු එනකං බලාගෙන හිටහං පැය භාගයක් විතර...කාපන් පරිප්පුව.... ඔහු කෝචොක් සිනහවක්ද සමගින් ඇමතුම විසන්ධි කලේය.

දුම්රියෙන් බසින විටම ඇදහැලෙන්නට වූ මහ වරුසාව තුරල් වන පාටක් නැත. රැකියා නිමවී නිවසට යන ජනතාව බස් රථ මගින් හා කුලී රථ මගින් ක්‍රමයෙන් වියැකී යයි. සුන්දර සිංගප්පූරු යුවතියන් දෙස ඇහේ පොට යනතුරු බලා සිටි මාගේ දෙකකුල් රිදෙන අවස්ථාව වන විට යන්තමින් ජෙරමි පැමිණියේය. ඒ වන විට පැය භාගයකටත් වඩා ඉක්මවා ගොස් තිබිණි.

ලංකාවේදී මා සේවය කල දැන්වීම් ප්‍රචාරණ ආතනයක මගේ අංශයේ කළමනාකරු ලෙස සේවය කල ජෙරමි ඔහුට සර් කියා ඇමතූ පළමු දිනයේම එය ප්‍රතික්ෂේප කල අතර මා හට ඇමතුවේ ඔහුගේ මිතුරෙකු ලෙස මචං යන වදන වැඩිපුර භාවිතයෙනි. සිංගප්පූරුවේදී ඔහු රාජකාරී කරන්නේ දැන්වීම් ප්‍රචාරණයට පරිභාහිර ආයතනයකය.

විනාඩි 15 ක පමණ ගමනකින් පසු ඔහුගේ නවාතැනට ළගා වීමට අපට හැකි විය. මචං මේ තමයි මගේ කම්පැණිය මට දීලා තියෙන ගේ මෙහෙ මාත් එක්ක කම්පැණියෙ වැඩ කරන තව දෙන්නෙක් ඉන්නවා. සිංගප්පූරුවේදීද කළමණාකාර තනතුරක සිටින නිසා ඔහුට වාහනයක් සහ නවාතැනක් ලැබී තිබේ.

ෆ්‍රිජ් එකෙන් කැමති දෙයක් අරන් බීපන්...ඔහුගේ සුන්දර නිවෙස ඔබ මොබ යමින් සිටින විට ලද ආරාධනයෙන් කුල්මත්ව මා තෝරා ගත්තේ ලංකාවේදී මේ ආකාරයෙන් පානය කරන්නට නැති පානයකි. එහි රසයට සමහරු අකමැති වුනත් කුළුදුලේ පානය කල නිසාදෝ මගේ අකමැත්තක් නොවුනි. තරමක පල් රසක් තිබුනද නරකම නැත. කුඩා කුරුම්බා කැබලිද බදුන තුල වෙයි. කරනවානම් වැඩ මෙව්වාය. අපේ රටේ ඇති තරම් තිබෙන කුරුම්බා ටින් කර අපනයනය කිරීමට අදහසක් පහළ නොවුනත් තායිලන්තයට නම් එය විදෙස් විනිමය ලබාදෙන නිපැයුමක් වී ඇත.

මගේ ඉදිරි වැඩපිළිවෙල පිළිබද සාකච්ඡා කිරීමෙන් අනතුරුව මගේ තීරණයට සිය කැමැත්ත පළකල ජෙරමි ඔහුගේ මිතුරෙකු වන සිංගප්පූරු ජාතික විශ්‍රාමික කමාන්ඩෝ උපදේශකයෙකු සමග රාත්‍රී භෝජනයකට මා රැගෙන ගියේය. රිචර්ඩ් නම් හෙතෙම ලංකාව ඇතුලු කලාපයේ රටවල් කීපයකම හමුදාවන් වෙත උපදේශකයෙකු ලෙස තම දැනුම ලබා දී ඇති බැව් මා සමග පැවසූවේය. මැලේසියාවට යාමට මා සූදානමින් සිටින බැව් සැළකල පසු රිචර්ඩ් මද සිනහවක් සමග මට කීවේ පරිස්සම් වෙන්න. මැලේසියාව සිංගප්පූරුවට වඩා සෑහෙන්න වෙනස්, එහෙ රෑට පාරෙ යන එක තරමක් අවධානම්, හරියට හොරු ඉන්නවා යනුවෙනි.

රාත්‍රී භෝජනය අවසානයේ මා ගාමිණී විලාවට ඇරළවීම පිණිස මේ දෙදෙනාම පැමිණි අතර ගාමිණී අයියා සමග කෙටි පිළිසදරකින් පසු ඔව්හු මට සුභපතා යලිත් දවසක හමුවන පැතුමෙන් නික්ම ගියහ.

මම කාමරේ වෙසෙන සත්ගුණවත් සිරා කොලුවා..

ප.ලි

නුවන් යනු ආරූඩ නාමයකි.

මා හට මිත්‍රත්වයේ උණුසුම සමග රසවත් රාත්‍රී භෝජන සංග්‍රහයක් භුක්ති විදීමට ආරාධනා කල මගේ මිතුරා සහ ඔහුගේ බිරිද ආදරයෙන් මතක් කරමි