89 සිංගප්පූරුවේදී හමු වූ කළණ මිතුරා

සිංගප්පූරුව පිළිබද ලිපි මාලාවේ තවත් අලුත් යමක් ඔබට කියන්නයි මේ වෑයම.

සිංගප්පූරුවේ ජන ජීවිතය අති ධාවනකාරී වේගයකින් ඉදිරියට ඇදෙන්නකි. ඒ තුල නවීන තාක්ෂණයේ ආශිර්වාදය මොනවට ලැබී තිබුනද බොහෝ ස්වදේශිකයන් ජීවත් වන්නේ යම් කිසි වැඩසටහනකට අනුව ක්‍රියා කරන රොබෝ වරුන් පිරිසක් මෙනි. ඔවුන් තුල සිනහව, සුහදතාව ආදිය සීමා වී ඇත්තේ තමා හොදින් දන්නා කියන අය අතර පමණකි. දුම්රියේ මෙන්ම බස්රියේද හැමවිටම දැකිය හැක්කේ ස්මාර්ට් වර්ගයේ ජංගම දුරකථනයකට හෝ ටැබ් එකකට සම්පූර්ණ අවධානය යොමු කර ඇති තරුණ පිරිසකි. ඔවුන් ඒවායේ වහලුන් බවට පත්ව සිටිති.

මා නොයෙක් වර ඉතා රූමත් යුවතියන් දැක්කෙමි. එහෙත් ඒ ඇත්තියන්ගෙන් බහුතරයකගේ පිටතට පෙනෙන විවිධ අඩුපාඩු තිබිනි. සමහර අයගේ කකුල් බකල්ය. නැතිනම් මුහුණ ඇදය. කන්පෙති වක ගැසිලාය. අපේ මව්වරුන් තම දරුවන් කුඩා කලම දරුවා සිය දහස් වාරයක් අත පත ගාමින් මෙවැනි අඩුපාඩු සකසන බැව් ඔබ හොදින් දනී. ඒ සදහා බොහෝ විට මවට ඇගේ මවගේ (මිත්තනියගේ)  සහයෝගයද ලැබේ. එහෙත් සිංගප්පූරු මව්වරුන්ට දරුවා බිහිකිරීමෙන් පසු වැඩි කාලයක් ඔවුන් වෙනුවෙන් කැපවීමට ඉඩක් නැත. ආර්ථික සටන ජය ගන්නට ඇයද සැමියාට සහාය විය යුතුය. ඒ නිසාවෙන් දරුවා බිහිවී මාස දෙක තුනකට පසු මවගේ චරිතය ආරූඩ කරගන්නේ නිවසේ සේවිකාවකි. ඇය බොහෝවිට පිලිපීන ජාතික කාන්තාවකි. දරුවන්ගේ කටයුතු සදහා බොහෝ ස්වදේශිකයන් පිලිපීන ජාතික තරුණියන්ගේ සේවය ලබාගන්නා අන්දම මම දැක ඇත්තෙමි. ඒ ඔවුන් ඉතා කරුණාවෙන් දරුවන්ට සැලකුම් කරන නිසාවෙන් විය යුතුය. දරුවන්ද තමන්ගේ මවට වඩා මේ සේවිකාවන්ට ඇගෑළුම් පායි. දුම්රිය පලක් ආසන්නයේ පදිංචිව සිටින්නේ නම් උදෑසන මව සේවයට යන විට සේවිකාව දරුවාද ළදරු කරත්තයක තබා තල්ලු කරගෙන දුම්රිය ස්ථානය ආසන්නයට යයි. පාසල් යන වයසේ දරුවන් සිටී නම් ඔවුන් පාසල් රැගෙන යන්නේද ඇයයි. නැවතත් සන්ධ්‍යාවේ මව පිළිගැනීමට දරුවා සමග ඇය එන පෙර මගට යයි.

අපට සිංගප්පූරු ජාතිකයන්ගෙන් ගත හැකි ආදර්ශයන් කීපයකි. ඔවුන් කිසිම විටෙක තවෙකෙකුගේ ඇද සොයන්නට යන්නේ නැත. තමා පසුකර යන අයෙකුගේ ඇදුමේ ඇද පෙන්වා තමන්ගේ මිතුරා /මිතුරිය සමග සිනාසෙනු මම කිසිවිටෙක දැක්කේ නැත. මෙහි සමාජය කාන්තාවන්ට මහත් සේ ගෞරව දක්වයි. රාත්‍රී මැදියම් කාලයේ වුවද කාන්තාවකට තනිව ඕනෑම මගක ඇවිද යා හැකි අතර ඇයට භිය වීමට කිසිම කාරණයක් නැත. ස්ත්‍රී දූෂණ / මනුෂ්‍ය ඝාතන වාර්තා නොවන තරම්ය. තරුණ කොල්ලන් සම වයසේ තමන් නොදන්නා යුවතියකට කිසිම ආකාරයක විහිළුවක් කරනු මම දුටුවේ නැත. කාන්තාවන්ට කැමති රැකියාවක නියැලෙන්නට පූර්ණ නිදහස ඇති අතර මෙහි පොදු ප්‍රවාහන සේවයට අදාළව තට්ටු දෙකේ විශාල බස්රථ පදවන කාන්තා රියදුරු වරියන්  පවා සිටී.

එවැනි අයෙකු පැදවූ බස් රථයක මා වරක් ගමන් කල අතර ඇය කාන්තාවක් කියා සෙසු රියදුරන් ඇයට වෙට්ටු දැම්මේ නැත. මහා මාර්ගයේ විනය ඉතා ඉහළය. ඒ නිසා වාහන පැදවීම පහසුය. අස්සෙන් දමා ඉස්සර කිරීම්, වාග් සංග්‍රාම නැත, පොලීසියට ජරාව දීම් නැත. සිංගප්පූරු පොලීසිය සෑම රටකම සිටිය යුතු වර්ගයේ පොලීසියක් වන්නේ ඔවුන් තමන්ගේ රටට ඉතාමත් අවංකව සේවය කරන පිරිසක් හෙයිනි. යම් වරදකට හසුව ඔවුන්ට පගාව දීමට තැත් කල ලංකාවේ ඇත්තෙක් දිනක් මට පැවසූයේ, මුදල් දෙස බලා සිනාසී, ඔය සල්ලි ඔයා තියාගන්න, කරන්න පුලුවන් උපකාරයක් කරන්නම් යනුවෙන් පොලිස් නිලධාරියෙක් ඔහුට පැවසූ බවය. උසස් පෙළ නිම කල පසු සරසවි අධ්‍යාපනයට සම්බන්ධ වීමට ප්‍රථම සෑම සිංගප්පූරු ජාතික සිසුවෙක්ම වසර දෙකක කාලයක් පොලීසියට හෝ හමුදාවට බැදී සේවය කල යුතුය යන්න මෙහි අනිවාර්ය සාධකයකි. එය ජාතික සේවය යනුවෙන් හදුන්වයි. ඒ හේතුවෙන් මහ මග දකින්නට ලැබෙන බහුතර පොලිස් නිලධාරීන් ශරීර වලින් කුඩා දරුවන් බදු පිරිසකි.

අනෙක් කාරණය අවංකත්වයයි. කුලී රථයකින් ගමන් කරන්නේ නම් යා හැකි කෙටිම දුර අනුගමනය කරන අතර රියදුරුට පාර වැරදීමකින් රථයේ කුලිය වැඩි වුවහොත් ඒ වැඩිවන මුදල අයකරන්නේ නැත. සිංගප්පූරුවේ කුලී රථ පැදවිය හැක්කේ සිංගප්පූරු ජාතිකයන්ට පමණක් වන අතර සෑම රථයක් තුලම GPS උපකරණයක් මෙන්ම CCTV කැමරාවක්ද තිබෙන බව මම කලින් වතාවකද ඔබට කී බැව් මතකය.

සිරාගේ කාමරයට නිතර යන එන ඔස්ට්‍රේලියාවේ වෙසෙන මගේ පාසල් මිත්‍රයා මයික් කාලයක් සේවය කලේ නැගෙනහිර ටිමෝරය නම් සිංගප්පූරුව ආසන්න දූපත් රාජ්‍යයකය. එහිදී ඔහුගේ හොදම මිත්‍රයකු වූයේ ට්‍රෙවෝ නම් සිංගප්පුරු ජාතිකයෙකි. කාලයේ ඇවෑමෙන් ඔහුගෙන් සමුගෙන මයික් වෙනත් දේශයකට ගියද මිතුදම බිදුනේ නැත. සිරා කොලුවා මෙහි පැමිණිකල මයික් තම පැරණි මිතුරාට මගේ වගතුග පවසා කල හැකි උදව්වක් කරන ලෙස පැවසූවෙන් දිනක් ට්‍රෙවෝ මා අමතා හමුවීමට අවැසි බැව් පැවසීය. රට තොට ගැන මගේ අවබෝධය අවම හෙයින් මට ඉතාමත් යාබද දුම්රිය ස්ථානයේදී රාත්‍රී 7 ට හමුවීමට කථිකා කර ගත්තෙමි.

මට දුම්රිය ස්ථානයට පා ගමනින් යන්නට ගත වන්නේ විනාඩි 5කි. හරියටම 7ට මම නිවෙසින් පිටත් වුනෙමි. 7.05 වන විට මම දුම්රිය ස්ථානයට ගොස් ට්‍රෙවෝ වෙත ඇමතුමක් ගත් කල මා වෙත පැමිණියේ සිංගප්පූරුවේදී නිතර දැකිය හැකි කුඩා ශරීරයකින් හෙබි සිංගප්පූරු ජාතිකයකු නොව දේහදාරී තරුණයෙකි.

මිත්‍රත්වයට සැබෑ අරුතක්....ට්‍රෙවෝ

යාලුවා ඔයා විනාඩි 5 ක් ප්‍රමාදයි යනුවෙන් හෙතෙම තම ඔරලෝසුව පෑයෙන් සිංගප්පූරු ජාතිකයන් කෙතරම් වෙලාව ගැන සැළකිලිමත් දැයි මට වැටහුනේ පළමු වතාවටය. අපි මොනවහරි කාලම කථා කරමු, මොනවද ඔයා කන්න කැමති යනුවෙන් විමසා ඇරඹුනු අපේ මිතුරු කම හිතාගත නොහැකි වේගයකින් ඉදිරියට ඇදුනේ මා මයික්ගේ මිතුරෙකු වූ නිසාමය.

පළමු හමුවීම තවත් රසකල  චීන ආහාර

මා හට මුදලින් මෙන්ම විවිධ දෑ මගින් කීප වාරයක් උපකාර කල ට්‍රෙවෝ සිංගප්පූරුවේ වර්තමානයේ විදේශික සේවකයන් කෙරෙහි රජය අනුගමනය කරන ප්‍රතිපත්තිය මෙන්ම එම තීරණයන් නිසා සිංගප්පූරු ආර්ථිකය යම් තරමකට පසුගාමී වී ඇති අන්දමද පැහැදිලි කළේය. ඔහුගේ ඉංග්‍රීසි උච්චාරණය චීන භාෂාවේ මෙන් නිසා ඇතැම් වචන ග්‍රහණය කර ගැනීමට අපහසුය. එවැනි විටෙක හෙතෙම කීප වතාවක් ඒ දේ නැවත නැවත උච්චාරණය කලත් මට ග්‍රහණය කර ගැනීමට අපහසු තැන දෑතින්ම හිස කසමින් ඔලුව අප සිටිනා මේසය මත තබා ගනී. ඔයාට වගේ තමයි ඔයාගෙ යාලුවටත් සමහර දේවල් එකසැරේ තේරුම් ගන්න බෑ. ඒත් එයා දෙවැනි සැරේ තේරුම් ගන්නවා. ඔයා දෙවැනි සැරේ තේරුම් ගන්නෙත් නෑ යනුවෙන් ඔහු සිනාසෙයි. එවැනි විටෙක සමාවෙන්න මගේ ඉංග්‍රීසි උච්චාරණය එතරම් හොද නෑ යනුවෙන් පවසන්නටද ට්‍රෙවෝ අමතක නොකරයි.

සති 4 කට පසු සිංගප්පූරුවෙන් මා සමුගැනීමට සූදානම් විය. ඒ මා කලින් සැලසුම් කල පරිදි රැකියාවකට එක් වීමට අපොහොසත් වීම නිසාවෙනි. මගේ තීරණය පිළිබද ට්‍රෙවෝ වෙත දැන්වූ විට හදිසියේ මා හමුවීමට වේලාවක් වෙන් කරගත් හෙතෙම එදිනද මට කලියෙන් පැමිණ සිටියේය. මගේ ප්‍රමාදයට සමාව ඉල්ලා ඇරඹුන අපේ කථා බහ ඔහුගේ අනුග්‍රහයෙන් එක් වූ රාත්‍රී භෝජන සංග්‍රහයකින්ද රසවත් විය. ඉන් අනතුරුව මා සමග ඔහු ගියේ නිමි ඇදුම් අළෙවි සැළක් වෙතය. ඔයාට ඕන දේවල් මෙතනින් ගන්න ඔහු පවසයි.

මට ගන්න දෙයක් නෑ... මම අවශ්‍ය දේවල් ලංකාවෙන් අරගෙන ආවෙ...ට්‍රෙවෝගේ මුදල් නිකරුණේ නාස්ති කිරීමට අකමැති වූ මම එසේ පිළිතුරු දුන්නද ඔහුගෙන් ගැලවී යන්නට මට ඉඩක් ලැබුනේ නැත. ගන්න මේ ටී ෂර්ට් , ඔයා මේ පාටට කැමතිද , මේ ෂර්ට් එක ඔයාට හොදට මැච් වෙයි. මේ ඩෙනිමත් ගන්න...මේ ආකාරයෙන් මගේ කැමැත්තකින් තොරව මා වෙනුවෙන් ඇදුම් සදහා මුදල් වියදම් කල ට්‍රෙවෝ අවසානයේ මට නියම සමින් නිමකල ඉන පටියක්ද තිළිණ කළේය.

ඔයා ලංකාවට නෙමෙයිනෙ යන්න යන්නෙ...ඒ නිසා මේ දේවල් ඔයා යන අලුත් රටේදි ප්‍රයෝජනවත් වෙයි. ඒ නිසා ගන්න. හෙතෙම ඉතා කරුණාවෙන් පවසා මට සමුදීමට නැවත දුම්රිය ස්ථානයටද පැමිණියේය. එහිදී නැවතත් තම පසුම්බියට අත පෙවූ හෙතෙම මට යම් මුදලක් ලබා දුන්නේය. මෙතරම් මුදලක් ඇදුම් වෙනුවෙන් වැය කර තවත් මුදල් ලබා ගැනීමට මම තරයේ විරුද්ධ වුවත් ට්‍රෙවෝගෙන් ගැලවීමක් ලැබුනේම නැති තැන මම ඔහුට ස්තූති වන්ත වී එය භාර ගතිමි.

හෙට නැති වුනත් පස්සෙ දවසක අපි අනිවාර්යෙන්ම සිංගප්පූරුවෙදි ආයෙත් හමු වෙනවා. පරිස්සමෙන් ඉන්න යාලුවා යනුවෙන් පවසා මගේ අත තරයේ අල්වාගෙන මට සමුදුන් ඔහු දුම්රිය ස්ථානයේ ස්කැලේටරයේ  නැගුනු මා පහළට ගොස් නොපෙනී යන තුරුම මා වෙත නෙත් යොමා බලා සිටියේය.

එදින රාත්‍රියේ විලාවට ගොස් මා නැවතත් මගේ කෘතඥතාව පලකර ට්‍රෙවෝ වෙත කෙටි පණිවිඩයක් යැව්වෙමි. එයට පිළිතුරු ලෙස ඔහු එවා තිබුනේ ඔහු විසින් මා වෙත කල උපකාර නැවත නැවත සදහන් කිරීම අනවශ්‍ය බවත් ඒවා සිතේ තබා ගැනීම පමණක් ප්‍රමාණවත් බවත්ය.

සිරා කොලුවා සැබැවින්ම තමන්ට හැකි ලෙස ඕනෑම කෙනෙකුට උදව් කරන චරිතයකි. ඒ නිසාමදෝ මගේ මේ චාරිකාව පුරාවටම මට මුණගැසුනේ පුදුමාකාර සුහදත්වයක් ඇති මිනිසුන්ය.

මම කාමරේ වෙසෙන සත්ගුණවත් සිරා කොලුවා..

ප.ලි

මේ මිත්‍රත්වයට පාලම වූ මයික් වෙත මගේ ප්‍රණාමය..

තවමත් දුරකථන ඇමතුම් හා විද්යුත් ලිපි මගින් ට්‍රෙවෝ මා පිළිබද තතු විමසයි. ඔහු CAT සන්නාමය සහිත බරවාහන යන්ත්‍රෝපකරණ සදහා ටිමෝරයේ කළමනාකරු (Country Manager) ලෙස සේවය කරයි.