60 සිංගප්පූරුවෙන් සමුගැනීම

සිංගප්පූරු සංචාරයට අදාළව මා විසින් ලියූ ලිපි මාලාවේ අවසන් ලිපියයි මේ.

මා සිංගප්පූරුවේ සිටින අවසාන දිනයට කෙමෙන් කාලය ලගා විය. අවසන් වතාවටත් ලංකාරාමයට ගොස් ආගමික වතාවත් වල යෙදීමට මා හට තිබුනේ කැමැත්තකටත් වඩා ආශාවකි. සිංගප්පූරුවේ සිටි කෙටි කාල සමය තුල මා ඉතාමත් ප්‍රිය කල ස්ථානය එය වීම ඊට හේතුවයි. සෙනසුරාදා රාත්‍රියේ බොජ්ජංග සූත්‍ර දේශනාවටද සහභාගි වීමෙන් අනතුරුව ගාමිණී විලා වෙත පැමිණෙන විට වේලාව මධ්‍යම රාත්‍රියට ආසන්න වී තිබුනි. හෙටින් පසු උදාවන දිනය පිළිබද අවිනිශ්චිත තත්වය නිසා මසිත තැවුනද හැම විටම සුභවාදීව කල්පනා කිරීමට උත්සාහ කළෙමි. ගාමිණී විලාවෙන් රැගෙන යාමට අවැසි දෑ සූදානම් කිරීමෙන් පසු නිදිදෙව් දුව වැළද ගැනීමට උත්සාහ කලද නින්ද අහලකවත් නැත. මගේ නිවස අම්මා, තාත්තා, මතක් වන විට නෙතු නිරායාසයෙන්ම තෙත් වේ. විදේශයන්හි රැකියාවන් කරන ඇත්තන් ලංකාවේ තමන්ගේ ආදරණීයයන් මතක් වන වාරයක් පාසා විදින චිත්ත පීඩාව පිළිබද යම් තරමක අත්දැකීමක් දැන් මටද තිබේ.

වැලි කතරේ සිට දුකා අයියා ඒ පිළිබද ලියද්දී එදා මට ඒවා දැනුනාටත් වඩා සංවේදීව අද දැනෙනවා නොඅනුමානය. කෙනෙකු විදේශගත වූ ගමන් ඔහුට හරිගියා යැයි සිතන සමාජයක වෙසෙන ඇත්තන් ඔවුන් තම පවුලෙන් වෙන් වූ පසු විදින චිත්ත පීඩාවන් ගැන කිසි දිනක සිතන්නේ නැත. සෑම රාත්‍රියකම නින්දට යන විට ලංකාවේදී කල කී දෑ සිනමා රූප රාමු මෙන් නිරායාසයෙන්ම සිත තුල මැවේ. මුල් දින කීපය තුල මේ අත්දැකීම දරාගත නොහැකි තැන නැවතත් ලංකාවට ගිය ඇත්තන් පිළිබදවද මම අසා ඇත්තෙමි. සිතට කෙතරම් දුකක් /පාලුවක් දැනුනත් අරමුණ ජයගනිමි යන තිර අධිටනින් මගේ සිත නිතරම පුරවා ගැනීමට මට හැකිවිය.

වඩා හොද ජීවන තත්වයක්, වටපිටාවක් ඇති රටක සිට ඊට වඩා නරක තැනකට යාමට දෛවය මට අවකාශ සලසා තිබේ. මැලේසියාව පිළිබද තම අත්දැකීම් මගින් ගාමිණී අයියා සෑහෙන දැනුමක් මට දෙන්නට කාරුණික විය. සිංගප්පූරුවේ මෙන් රාත්‍රියේ නිදහසේ අතුරු පාරවල්හි ගමන් කිරීම මැලේසියාවේදී තමාගේ වල තමන්ම කපා ගැනීමක් විය හැක. මැලේසියානු පොලීසියද දුෂිත වීම මත මේ තත්වය උදාවන්නට ඇතැයි මට සිතේ.

රෑට වැඩිය එළියට යන්න එපා මල්ලි. කරන දේවල්, ගන්න ඕනෙ දේවල් ඔක්කොම දවල්ට කරගන්න. නවතින තැනට ආවට පස්සෙ ආයෙ එළියට බහින්න එපා. එහෙම හිටියාම ගැටළු අඩුයි. ගාමිණී අයියා මට කාරුණිකව උපදෙස් සපයයි.

ගාමිණී විලාවේ මොන්ඩි මෙන්ම තවත් කීප දෙනෙකුද තම මිතුරන් මුහුණ දුන් අත්දැකීම් ඇසුරෙන් යම් යම් දේ මට පැවසීය. වරක් මධු සමය පිණිස මැලේසියාවට පැමිණ තම බිරිද සමගින් දිවා කල මහමග යමින් සිටි ශ්‍රී ලාංකික තරුණයකු නැවතූ පොලිස් ඇදුමට සමාන ඇදුමක් හැදි අයෙකු තම හැදුනුම් පතද පෙන්වා විදේශ මුදල් පරීක්ෂා කිරීමට අවැසි බව පවසා තිබේ. පොලිස් නිලධාරියෙකු නිසා සැක නොසිතූ තරුණයා අත රැදි ඇමරිකානු ඩොලර් නෝට්ටු ඔහුට දැක්වීමෙන් පසු තරුණයා ඉදිරියේම ඒවා ගණන් කර නැවත භාර දී පොලිස් වෙස් ගත් තැනැත්තා නික්ම ගොස් ඇත. නැවත් ඩොලර් නෝට්ටු ගණනය කර බලන විට ඒවායින් කීපයක් අඩු බැව් තරුණයා දැන ගන්නා විට හොරා පළාතකවත් නැත.

එතරම් සූක්ෂම ලෙස හොරකම් සිදු කෙරෙන රටකි මැලේසියාව. එවැනි රටකට යන්නට පෙර දින රාත්‍රියේ මගේ සිතිවිලි ඔබට තේරුම් ගත හැකි වනු ඇත. බෑග් දාලා ටිකකටවත් කොහෙවත් යන්න එපා මල්ලි. ඔය බස් නවත්වන තැන් වල බෑග් හොරකම් කරන්නම වෙනම අය ඉන්නවා. ගාමිණී අයියා දෙන්නට බැරි වූ උපදෙස් මතක් වන පරිදි පවසයි.

සිංගප්පූරුවෙන් මැලේසියානු අගනුවර වන ක්වාලාලම්පූර් වෙත බස් රථ පිටත්වෙන තැන හා එතැනට ළගා වන ආකාරය පිළිබද ගාමිණී අයියාගෙන්ම දැනගත් මා පසුදා උදෑසන නිදි දෙව්දුවගෙන් මිදී සිටි විලාවේ නේවාසිකයන් සැමටම සුභපතා මාසයක මිතු දමට සමුදුන්නෙමි. කලින් දින මා සතුව තිබූ මුදල් මැලේසියානු මුදල් ඒකකයට මාරු කරගත්තත්...මා සතුව වටිනාකමින් අඩු නෝට්ටු හා කාසි නොතිබූ හෙයින් ඒ අඩුපාඩුවද ගාමිණී අයියා සම්පූර්ණ කලේ අවශ්‍ය විටෙක ප්‍රයෝජනයට ගැනීමටය. ගමනේ මුල් භාගය දුම්රියෙනුත් එතැන් සිට ඉතිරිය කුලී රථයකිනුත් ගමන් කර බස් රථ පිටත් වන ස්ථානයට ගොස් සිංගප්පූරු ඩොලර් 30 වටිනා ප්‍රවේශ පත්‍රයක් ලබාගෙන මගේ ගමන් මළු අදාළ තැන රදවා බස් රථයේ ඉදිරිපස මා හට නියමිත අසුනේ අසුන් ගතිමි.

මා ගමන් ගත් බස් රථය

බස් රථය ගුවන්යානයටත් වඩා සුවපහසු එකකි. කිලෝමීටර් 350 කට වැඩි දුරක් එය ගමන් කිරීමට නියමිතය. මට ඉදිරියෙන් වූ අසුනේ සිටියේ යෝධ ශරීරයකින් හෙබි ඉන්දියානු සීක් ජාතික තරුණයෙකු සහ ඔහුගේ බිරිදයි. සීක් ජාතිකයාගේ තලප්පාව දුටු වනම මට මතක් වූයේ හසිත මලයා සීක් දහම පිළිබද ලියූ ලිපි පෙළයි. සොදුරු යුවතියක විසින් ටිකට්පත් පරීක්ෂා කිරීමෙන් පසුව ගමන ඇරඹිනි. අධිවේගී මාර්ගයට එළැඹෙන තුරු සෙමින් ධාවනය වූ රථය එතැන් සිට සෑහෙන වේගයෙන් ධාවනය විය. රථය තුල වූ රූපවාහිනියේ විකාශනය වන බටහිර චිත්‍රපටය හා වීදුරුවෙන් පිටත පෙනෙන සිංගප්පූරුවේ විසිතුරු දෙස වරින් වර බලමින් සිටියදී රථය එක්වරම නතර කෙරිනි. Passport යනුවෙන් රියදුරා කෑ ගසයි. ඒ සිංගප්පූරුවේ සීමාවෙන් පිටත් විමට ප්‍රථම ගමන් බලපත්‍ර පරීක්ෂා කරන ස්ථානය බැව් පැහැදිලිය. සියලුම මගීන් රථයෙන් බැස ඒ කටයුතු අවසන් කරගෙන පිටතට පැමිණෙන විට ඒ ස්ථානය ආසන්නයට බස් රථය රැගෙන පැමිණ තිබු රියදුරා සහ ඔහුගේ සහායකයා රථයේ පැමිණි පිරිස ගණනය කර තහවුරු කරගැනීමෙන් පසු නැවතත් ගමන ඇරඹුනි. Singapore යනුවෙන් සදහන් ඊතලයක් අප ආ මග දෙසට යොමු කල පුවරුවක් පසු කරගෙන ඉදිරියට ඇදුනු බසය තවත් විනාඩි 10 කින් පමණ නැවතත් නතර විය. Visa, Baggage යනුවෙන් රියදුරා නැවතත් මොර දෙයි. ඒ මැලේසියානු දේශසීමාවට ඇතුලුවන ස්ථානය බැව් වැටහුනි. බසයේ වෙනම කොටසක රදවා තිබු ගමන් මළු දෑතට ගෙන මගීන් පේළියට සිට ගනී.

ශ්‍රී ලාංකිකයකු හෙයින්දෝ මගේ ගමන් බලපත්‍රය දෙස සූක්ෂමව බැලූ ආගමන විගමන නිලධාරියා මසකට වීසා නිකුත් කර සිය නිළ මුද්‍රාව තැබූ පසු රටට ඇතුලුවීමට අවසරය ලැබිනි. ගමන් මළු සියල්ල ස්වයංක්‍රීයව පරීක්ෂා කිරීමෙන් අනතුරුව නැවතත් බස් රථය වෙත යාමට අවසර ලැබුනි.

රථය දැන් එක එල්ලේ මැලේසියාව දක්වා ගමන් කරයි. මැලේසියාවේ මාර්ග පද්ධතිය නිමවා ඇති ආකාරය සැබැවින්ම විශ්මය ජනකය. ඉතාමත්ම සැලසුම් සහගතව සිංගප්පූරුවට නොදෙවෙනි ලෙස අධිවේගී මාර්ග හා සෙසු මාර්ග ඉදිකර තිබෙන අතර මාර්ග දෙපස ශාක මගින් අලංකරණය කර තිබුනි. ස්වභාවික සෞන්දර්යයෙන් අනූන රටක් වන මැලේසියාවේ නිල් පැහැයෙන් දිස්වෙන කදු පන්ති වරින් වර රථයේ කවුළුවෙන් පෙනේ. අප පසුකර යන රථ මෙන්ම මාර්ගයේ ධාවනය වන බොහෝ මෝටර් රථ මැලේසියාවේම නිෂ්පාදනය කරන ඒවාය. මැලේසියානු ජනතාව තමන්ගේම නිෂ්පාදන අගය කරන අන්දම පිළිබද යම් අවබෝධයක් ගන්නට එමගින් මට හැකි විය.

තවත් මද දුරක් ගමන් කල පසු මාර්ගයේ එක පසෙක දිගටම තිබුනේ ෆාම් වගාවකි. ෆාම් ඔයිල් නිෂ්පාදනයේ ලෝකයේ ප්‍රමුඛම රට වන මැලේසියාව එමගින් උපයන විදේශ විනිමයද සුලුපටු නොවේ. එක යායට ඈතට යනතෙක් පැතිරී ඇති ෆාම් ගස් රටඉදි ගසට පෙනුමෙන් සමානය. ලංකාවේද දකුණු අධිවේගී මාර්ගය අසල මෙවැනි වගාවක් තිබුනා මට මතකය.

ෆාම් වගාවක්...මෙහි ඇති ඵලයෙන් තෙල් ලබා ගනී.
http://www.pinoy-ofw.com/news/wp-content/uploads/2011/07/oil-palm-farm.png

සිංගප්පූරුවෙන් පිටත් වී පැය දෙකකට පමණ පසු මගීන්ගේ විඩා නිවා ගන්නට, වැසිකිළි අවශ්‍යතා ඉටු කරගැනීමට, ආහාර මිළදී ගන්නට රථය නතර විය. අධිවේගී මාර්ගයේ තැනින් තැන එවැනි ස්ථාන ඉදිකර ඇත්තේ සියලුම පහසුකම් සහිතවය. සිංගප්පූරුවේ මෙන් නොව මැලේසියාවේ පාරිභෝගික ද්‍රව්‍ය මිළ ඉතාමත් අඩුය. ලංකාවේ මුදලින් රු 150/- වැය කර සිංගප්පූරුවේදී ගත යුතු මිලිලීටර් 300 ක පානීය ජල බෝතලයක් වෙනුවට මැලේසියාවේදි රු 60/- වැයකර ලීටර් එක හමාරක පානීය ජල බෝතලයක් මිළදී ගත හැක. අනෙකුත් කෑම බීම මිළ ගනන්ද ඉතාමත් අඩුය. මට ඉතාමත් සතුටට හේතු වූ කරුණක් වූයේ සිංගප්පූරු ජාතිකයන් ටොයිලට් පේපර් පාවිච්චි කරන කාරණය උදෙසා මැලේසියානුවන් අප මෙන් ජලය භාවිතා කිරීමයි. එක ළග පිහිටියද දෙරටේ මිනිස් චර්යාවන්හි ඇත්තේ කැපී පෙනෙන වෙනසකි.

විනාඩි 20 ක පමණ කාලයකින් පසු නැවතත් රථය පිටත් වූයේ රියදුරුගේ හා සහායකයාගේ ගණනය කිරීම් තහවුරු වූ පසුය. නමුත් ආහාරයට ගත් දෙයක් රුයිතෙට වැඩ කිරීමෙන්දෝ සීක් ජාතිකයාගේ බිරිදට වැසිකිළි අවශ්‍යතාවක් ඇති වී ඇති සෙයකි. හින්දි භාෂාවෙන් සංවාදය අරඹා රියදුරා කරා ගොස් ඒ බැව් තරුණයා විසින් සැළ කලද රියදුරාට අධිවේගී මාර්ගයේ ඊට සුදුසු තැනක් හමුවන තුරු නතර කල නොහැක. තරුණිය ඉතා අපහසුවෙන් රථය තුල සිටී. තරුණයා රියදුරා අසල රිය සහායකයාට හිමි මිටි අසුනේ හිද මාර්ග සංඥා අනුව වැසිකිළි සොයයි. තව විනාඩි 20 ක් ඉන්න. රියදුරා පැවසූයෙන් තරුණිය දෑස් පියාගෙන අසුනට හේත්තු වූවාය. ඉන් අනතුරුව පැය භාගයකට වඩා ගත වුවද වැසිකිළි නැති තැන තරුණයාගේ ඉල්ලීම පරිදි ඉන්ධන පිරවුම් හලක රථය නතර විය. තරුණිය බසයෙන් බැස ගියාදැයි ඉගිලුනාදැයි මට මතක නැත. සීක් ජාතික තරුණයාට පින් සිදු වන්නට බසයේ සිටි සමස්ත කාන්තා පරපුරම වැසිකිළි කරා ඇදුනෝය.

පැය 5 ක පමණ ගමනකින් පසු රථය ගමනාන්තය වෙත ළගා විය. එය කේල් සෙන්ට්‍රල් නම් විය. කේල් (KL) යනු ක්වාලාලම්පූර් යන නමේ කෙටි යෙදුමයි. ඈතින් පෙනෙන සුප්‍රසිද්ධ පෙට්‍රොනාස් නිවුන් කුළුණු දෙස බලමින් මම රථයෙන් බිමට බැස්සෙමි. ඒ මගේ අවිනිශ්චිත හෙට දිනය පිළිබද සුභවාදීව කල්පනා කරමිනි.

මම කාමරේ වෙසෙන සත්ගුණවත් සිරා කොලුවා.

ප.ලි

සිරාගේ මැලේසියානු අත්දැකීම් ඇසුරින්  අලුත් ලිපි පෙලක් ලියන්නට මම යම් තරමක කාලයක් ගනිමි. නැතිනම් කාමරයට එන ඇත්තන්ට එකදිගට ලියවෙන එකම වර්ගයේ ලිපි නීරස විය හැකිය.

මැලේසියාවේ සුප්‍රසිද්ධ පෙට්‍රොනාස් නිවුන් කුළුණු සහිත ගොඩනැගිල්ලේ හිමිකරු ලංකාවේ යාපනයේ උපන් අයෙකු බැව් අසන්නට ලැබිනි. එය අද මැලේසියාවේ ජාතික සංඛේතයක් බදුය.