76 කෑ හැටියේ බඩ යාම

එදා පත්තර ඇසුරෙන් සිරාගේ කාමරයේ දිග ඇරුනු ලිපි මාලාවේ තවත් ලිපියක් සමගින් ඔබ මා හමුවන දිනයකි අද. මෙතෙක් කල් පල වූ දෑ විවිධ මාතෘකා අනුව වර්ග කර දැක්වීමට මම උත්සාහ කළෙමි. ඒ අනුව අද පලවන සියලුම දැන්වීම් ලෙඩ රෝග සහ විවිධ අපහසුතා සදහා සහනය සලසන නිෂ්පාදන හා ප්‍රතිකාර ක්‍රම වලින් සන්නද්ධ ඒවාය. මේ ලිපියත් සමගින් එදා පත්තර කී කථා ලේබලයෙන් ලියැවුනු ලිපි පෙල නිමාවට පත් වේ. ඉදිරි දිනයක නැවතත් මෙවැනි යමක් ඇස ගැටුනහොත් නිසැකවම එය කාමරයට ගෙන එමි.

මෙතෙක් ලිපි පෙල නුදුටු අය මෙතැනින්  ඒවා කියවන්න.

සුනිල් දැන් ප්‍රීතියෙන් සිටින රහස ඔබ දන්නවාද ?

සුනිල් ඈලි මෑලි දුබල ගතියෙන් පෙළුණි !  ඔහුගේ ශක්තිය හා ජීව බලය හීන වී ඔහුගේ ශරීරය දිරාපත් වී, වෙහෙසට පත්ව අලසයෙක් විය. නින්ද නොයාමෙන් ජීවිතය නීරස විය. (සුනිල්ට ඈලි මෑලි දුබල ගතිය ඇති වී තිබුනි)

දැන් සුනිල් ප්‍රීතියෙන් සිටී. ඔහු ශක්තිසම්පන්න පෘෂ්ඨිමත් ප්‍රබලයෙක් විය. ඔහුගේ සාමාන්‍ය නිරෝගී භාවය සහ පෙර තිබූ උද්යෝගය නැවත ලගා වී නිදි සුවය ලැබුනි. (දැන් සුනිල්ට ඈලි මෑලි දුබල ගතිය නොමැත) 

ඔබ ගනු ලබන ආහාර වලින් උවමනා තරම් පෝෂ්‍යගුණය ලබාගැනීමට ඔබේ ශරීරය අපොහොසත් වුවහොත් ඈලි මෑලි දුබල ගතිය (කෑම අරුචිය සහ ශක්තිය නැතිවී යාම, හිසරදය සහ නහර දුර්වලතාවය) වැළදෙන බව රසායනාගාර පරීක්ෂණයන්ගෙන් ඔප්පු වී ඇත. විශේෂයෙන්ම මාංශ ජනක ධාතුන් සහ විටමින් B පදාර්ථය අඩු වූ විට එය ඇති වේ. ඔබ ඈලි මෑලි දුබල ගතියෙන් නොපෙළිය යුතු අතර එයින් සුවය ලබාගත හැකි බව වැඩිදුර පර්යේෂණයන්ගෙන් ඔප්පු වී ඇත. 

පැනෝපෙප්ටන් පුදුමාකාර ලෙස සහනය ලබාදේ. සාමාන්‍යයෙන් ඈලි මෑලි දුබල ගතිය වැළදුන විට දිනපතා අවශ්‍ය මාංශ ජනක ධාතූන් සහ විටමින් බී පදාර්ථයන් බෙහෙවින් අඩංගු ඖෂධීය පානයක් ගැනීමට වෛද්‍යවරු නියම කරති. පැනෝපෙප්ටන්හි සෞඛ්‍ය සැපතට ඉවහල් වන මේ ප්‍රධානතම විටමින් පදාර්ථයන් බහුලව අඩංගු වී ඇත. 

පැය 24 ක් තුලදී ඉතා සීඝ්‍ර පුදුමාකාර ප්‍රතිඵල ලබාදෙන පැනෝපෙප්ටන් වල මනා දිරවීමේ සහ උරාගැනීමේ සංයෝගයන් අඩංගු වී ඇත. බාල මහළු දහස් ගණනකට සමව ක්ෂණික ප්‍රතිඵල ලබා දී ඇති පැනෝපෙප්ටන් ඔබත් පාවිච්චි කරන්නෙහි නම් නැවත වරක් ඔබ ඈලි මෑලි දුබල ගතියෙන් නොපෙලෙනවා ඇත.

කාලයේ ඇවෑමෙන් සමහරක් විට පැනෝපෙප්ටන් මේ වන විට භාවිතයෙන් ඉවත් වී ඇතුවාට සැකයක් නැත.

ප්‍රේත දෝෂ වින දෝෂ, අපල උපද්‍රව ගැන කථාකරද්දි ඒ සියලුම දේවල් ජනතාවගේ පොකැට්ටුවට තට්ටු කරන දේවල් බව බොහෝ දෙනා දන්නවා. මේ දේවල් දුරු කරලන්න භාර ගන්න අයත් අවසානයේ ජනතාවගේ පොකැට්ටුවටම තමා තට්ටු කරන්නෙ. භාහිර අයගේ මැදිහත් වීමකින් තොරව තමන්ගේ නිවසේ ඇති දෝෂ දුරුකර ගත හැකි අන්දමක් ගැන සදහන් දැන්වීමක් හදිසියේ නෙත ගැටුනා. ඒ වෙසමුනි නයනායුධය නම් බලගතු සුවද ධූපයක් ගැන... මෙය භාවිතයෙන් දුම් ඇල්ලූ කල සියලු අපල දුරු වේලු.

කෑ හැටියේ බඩ යාම...කටක් ඇරලා කියන්න පුලුවන් ලෙඩක්ද...මේ ලෙඩේ හැදුන උන් කන්න බොන්න ඇත්තෙ වැසිකිළිය කිට්ටුවක ඉදගෙන වෙන්න ඇති. මේ ලෙඩේ අද නැද්දා මන්දා...කෙසේ වෙතත් බඩ යා හැකි විවිධ ආකාර පිළිබදවත් මේ දැන්වීමෙන් කියා දෙනවා.

ශරීරයේ ඇති වන අපහසුතාවක් සමනය කරගැනීම උදෙසා නිපදවූ නිෂ්පාදනයක් මීළගට...සෙම්ප්‍රතිශ්‍යව නිසා ඇතිවන නාස්පුඩු හිරවීමට එමගින් ඉක්මන් සහනය ලබා දුන්නේලු.

මේ තියෙන ලෙඩ ලිස්ට් එක දැක්කම භයත් හිතෙනවා...ඔය පණදෙන බෙහෙතකුත් තියෙන්නෙ...පණ එන්නෙ කාටද කියන එකනම් කියවලාම දැනගන්න.

කොල්ලො අර්සස් ද...නරකද සත්‍යාපාලගෙන් බෙහෙත් ටිකක් බීලා බැලුවොත්...

මේ කාන්තා රෝග පිළිබද දැන්වීමක්... ඒ පිළිබද විශේෂඥතාවක් සහිත වෛද්‍යවරයෙක් පලකරන ලද්දක්...පයාගල දුම්රිය නැවතුමේ  නාමපුවරුව තවමත් තියෙන්නෙ මේ දැන්වීමේ දක්වා තියෙන පරිදි නේද ?

ඒ කාලෙ ඉතිං පවුලක් ගත්තොත් අවම 6 දෙනෙක් වත් ඉන්නවා...බොහෝ තැන් වල ඊට වැඩි මිසක් අඩු නෑ. පවුලෙ යැපීමට ප්‍රමාණවත් සහල් කුඹුරෙන් ලබා ගැනීමට හැකි වීම, බතට අවශ්‍ය අනිකුත් දේවල්  තමන්ගෙ ගෙවත්තෙන්ම ලබා ගැනීමට හැකි වීම, දරුවන්ගෙ පෝෂණයට අවශ්‍ය කිරි ගෙදර ඇති කරන එළදෙන මගින් ලබා ගැනීමට හැකි වීම, ඇළ දොළ ගංගා මගින් ප්‍රෝටීන් අවශ්‍යතාව සපුරමින් මත්ස්‍ය අස්වැන්න නිවසට පැමිණීම ආදීය නිසාම මේ වගේ ඉහළ අගයක දරුවන්  ප්‍රමාණයක් භිය සැක නැතුව ජනිත කරන්නට හේතු සාධක වෙන්න ඇති. ඊට අමතරව අදුර වැටුනට පස්සෙ රූපවාහිනී නරඹන්න...චිත්‍රපට, ක්‍රිකට් තරග, අන්තර් ඡාලය වගේ දේවල් නොමැති නිසා අදාළ කර්තව්‍යයට වැඩි වැඩියෙන් හිත යොමු වෙන්නත් ඇති. බත් කන්න බැරි නම් ප්‍රයෝජනයට ගන්න කොස් ගහක් දෙල් ගහක් සෑම වත්තක පාහේම තිබුනා.

නමුත් කාලයේ ඇවෑමෙන් මේ කියන කාරණය ආර්ථික ප්‍රශ්නයක් බවට පත්වෙනවා. ඒ නිවසේ ආර්ථික තත්වය අයහපත් වන්නට පටන් ගැනීමත් සමග. මහගෙදර වත්ත දරුවන් අතර බෙදා දෙනකොට බව භෝග වවන්නට ඉඩක් කඩක් නැති වුනා. ඒ නිසාවෙන් කලින් නොමිලේ ලැබුනු දේවල් මුදල් දී වෙළදපොලෙන් ලබා ගැනීමට සිදු වුනා. පඩිපෙල වගේ දරුවන් ඉද්දි ඒ බර ගෘහ මූලිකයට දැනෙන්නට පටන් ගත්තා. එයින් පසු තමයි පවුල් සැලසුම් කියන වචනය ලංකාවෙ ශබ්ද කෝෂයට එකතු වෙන්නෙ. ඒ පිළිබද දන්න සිංහලෙන් තේරුම් කිරීමට ගත්ත වෑයමක් විදියටයි මීළග දැන්වීම හදුන්වා දෙන්න පුලුවන්...

1959 සැප්තැම්බර් මාසය වෙද්දි ලංකාදීප ඉරිදා පත්‍රය පමණයි ඔවුන් කළු පැහැයට අමතරව තවත් වර්ණයක් එකතු කර මුද්‍රණය කර තිබෙන්නෙ. ඒ අනුව මේ දැන්වීම ඉරිදා ලංකාදීපයේ පල වූවක්... වර්ණ දෙකකින් පල වී ඇති නිසාම මේ සදහා පුවත්පත අයකර ඇති ගාස්තුවත් අනෙකුත් ඒවාට වඩා වැඩියි.

උපත් පාලනය කියන නුහුරු වචනය මිනිසුන්ට සමීප නැති නිසා...එයින් කියැවෙන අරුත පොදු ජනයා ග්‍රහණය කර නොගනී යැයි විශ්වාස කල නිසා සීඝ්‍රයෙන් බෝවීම කියන වදන භාවිතා කරන්නට ඇති කියලයි මට හිතෙන්නෙ. පේනවනේ අතින් කටින් වඩාගෙන ඉන්න අන්දම...

දැනට පවතින මේ තත්වය අනුව තව තවත් බෝවීම ඇති වුවහොත්, අනාගතය කෙබදුද යන්න ඔබට වැටහෙනවා ඇත. එසේ නම් අදම උත්පත්ති පාලනය සදහා ලෝක පවුල් සංවිධාන සංගමය පිළිගත් නෝනාවරුන්ගේ උපකරණයක් වූ "චැක් පැසරි" යක් පාවිච්චි කරන්න. බොහෝ කාලයක් සේවය ගෙනදෙනවත් හැර ඔබේ අවශ්‍යතාවය මැනවින් ඉටු කරයි.

එදා පත්තර කී කථා මෙතෙකින් සමාප්තයි.

මම කාමරේ වෙසෙන සත්ගුණවත් සිරා කොලුවා..

ප.ලි

මෙහි ඇති රෝගාබාධයන් හා චැක් පැසරි  පිළිබද දැනුමක් ඇත්තෝ ඒවා පහදා දෙත්වා..