89 ගම හෙල්ලූ වල් බූලා

බූලා යනු ලොම් පිරුනු සුනඛ පෝතකයෙකුට කියන නමක් නොවේ. මුල්වරට මේ වචනය ශ්‍රවනය කරන අයට එවැනි චිත්ත රූපයක් මැවුනාට මට කොරන්න දෙයක් නැත. සිරි ලංකාවේ පලාතෙන් පලාතට ඇතැම් වචන මෙන්ම එහි අරුතද වෙනස් වනවා සේ මේ වදනද එසේම තැනින් තැනට වෙනස් වන එකකි.

ඇතැම් තැනක මා මෙහි බූලා යනුවෙන් හදුන්වන චරිතයම ග්‍රීස් යකා යනුවෙන්ද හදුන්වයි. ඒ අනුව බූලා යනු කවරෙකුදැයි දැන් ඔබට දළ අදහසක් ලැබී ඇතිවාට සැක නැත. ඒ අර්ථයෙන් ගත් කල ග්‍රීස් යකා යන්න බූලාට වඩා ජනප්‍රිය වදන වුවත් අප ගම් පළාතේ භාවිතා වන්නේ බූලා හෙයින් මෙයින් මතු මේ ලිපිය පුරාවට ග්‍රීස් යකා බූලා ලෙසම ලියවෙනු ඇත.

කාන්තාවන් දියනාන විටෙක, ඇග සෝදන විටෙක එදෙස හොරෙන් බලා සිටීම, මහ රාත්‍රීයේ කාන්තාවන් නිදා සිටින කාමර තුලට රිංගීම, කාන්තාවන්ගේ ශරීරාංග අත පත ගා ඒවා නියම ගානට වැඩී ඇතිදැයි සැකහැර දැනගෙන කලුවරේම මාරු වීම, කාන්තා යට ඇදුම් වලට පෙම් බැදීම, ඒවා වැඩි ආරක්ෂාවට තමා සන්තකයේ තබා ගැනීම වැනි සමාජය අනුමත නොකරන ක්‍රියා බූලාගේ රාජකාරි වෙයි.

වතාවක් අපේ ගම්පියසටද බූලෙකු අරක් ගත්තෙහිය. තනිව දිවි ගෙවූ මැදිවයසේ කාන්තාවකගේ නිවෙසක වසා නොතිබූ ජනෙල් පියනක් වැසීමට ගිය මේ කාන්තාව ඉදිරියේ හදිසියේම පහල වී ඇත්තේ උපන් ඇදුමෙන් සැරසී සිටි නිගන්ඨයෙක් බදු මධ්‍යම ප්‍රමාණයේ එකෙකි. ඒ දසුනින් භියපත්ව මහා රාත්තිරියේම ඈ නැගූ විලාපයේ දෝංකාරය පසුදා ඇදිරි වැටෙන වෙලාව වන විට ගම්මානයේ බහුතර ලදුන්ගේ සිත් භීතියෙන් මුසපත් කර තිබිනි.

අනේ බලන්න කවුද වලත්තයෙක් ------- ගෙදරට ඊයෙ රෑ අමු හෙළුවෙන් ආවා කියන්නෙ....අපේ ගෙදරට එහෙම ආවා නම් ඕකගෙ අහ වල් එක මාලු මන්නයෙන් කපලා තමයි මම පස්ස බලන්නෙ...ඇතැම් වීරෝධාර දේශමාමක කාන්තාවක දෙදෙනෙකු එසේ දිවා කල වහසි බස් දෙඩුවද...රාත්තිරිය උදා වන විට පණ භයේ ගැහෙමින් වේලාසනම නින්දට ගිය සිදුවීම්ද මේ කියන කාලයේ දුලබ නොවීය.

බොහෝ අය නොසිතූ ලෙස පිට පිටම දෙවැනි රැයේද බූලාගේ ආගමනය සිදු වී තිබුනි. එවර දවසේ මෙහෙවර අවසන් කොට දිය ස්නානය කරමින්  සිටි තරුණියක් බූලාගේ හැඩ සොබා දැක තිබුනි. ඈ නැගූ විලාපය බූලාගේ ආගමනය නැවත වතාවක් ගම්මානයට සන්නිවේදනය කළෙහිය.

දෙවැනි සිදුවීමෙන් පසු හැන්දෑකොරේ උදාවෙන විට කාන්තාවන් භීතියෙන් මුසපත් වීමත් ඒ හේතුවෙන් පුරුෂ පක්ෂයට සෑහෙන පාඩු සිදු වීමත් නිසාම දින දෙක තුනකට පසු ඕකාව කම්බස් කරලා තමයි පස්ස බලන්නෙ යනුවෙන් ඇතැම් තැනක සැමියකු වහසි බස් දොඩා වත්ත පිටිය මුර කිරීම ඇරඹුවද බිරිද නිදාගත් පසු භියටම මෙන් උන්ද නිදාගන්නට ඇත. නැතිනම් බූලා සෑම රැයකම හොල්මන් කරන්නට ඉඩක් නැත.

ඊයෙ උදේ කොහෙටද අනේ අරූ ඇවිල්ලා තියෙන්නෙ... සෑම උදෑසනකම මේ ගැටලුව බොහා දෙනා විමසන තැනට වැඩ සිද්ධවෙන්නට වැඩි කාලයක් ගියේ නැත. රාත්‍රිය උදාවෙත්ම එහෙං මෙහං එබි කං කර කෝලිත්තං කරනා මේ බූලා සියුම් භීතියක් ගම තුල මවා තිබුනි. අද රාත්තිරියේ මතුවෙන තැනින් නොව හෙට රාත්තිරියේ මේකා මතුවෙන්නේ තවත් තැනකිනි. මේකාගේ ක්‍රියා කලාපයේ තරම මොනවට පවසමින් මද දිනකට පසු බූලා යන වදන ඉදිරියට වල් යන විශේෂණ පදය යෙදිනි.

ලදු කැලෑ, බඩවැටි වලින් ගහන නොවූ පරිසරයක අපේ ගම පිහිටා තිබීමත්, ගමට ඇතුලුවෙන මාර්ගයෙන්ම නැවත පිටවිය යුතු වීමත්, ලග ලග නිවාස පිහිටා තිබීම යන සාධකත් සැලකූ විටෙක පිටස්තරයෙකු බූලා චරිතය රග පෑවේ යයි සිතන්නට අපහසු බවක් ඇතැම්හු කීවෝය.

ඕක මේ ගනං ගන්න තරං දෙයක් නෙමෙයි බොලව්...කොමාන්ඩෝ කොල්ලන්ව ඔය වගේ රහසේ ගම් වලට පිටත් කරලා ගම්මුන්ට අහු නොවී ආපහු ආ යුතු පුහුණුවක් තියෙනවලු. සමහරු එසේද කීවෝය. එහෙත් හමුදා වල සේවයේ නිරතව සිටි අපේ ගමේ අය කිව්වෙ, කොයි ගොනාද එහෙම කියන්නෙ...එහෙම පුහුණු හමුදාවේ නෑ කියාය.

එක් දිනක් උදෑසනක මා අවදි වන විට එකා දෙන්නා බැගින් අප නිවස පිටුපසින් ඇරඹෙන වෙල්යායට දුවමින් සිටියේ බූලාගේ නම කියමිනි. මමද නිදිගැට සහ කබ සම අනුපාතයෙන් කඩමින් පහළට රූටා යන  සරං කඩමල්ල ඉන වටා තද කරමින්, මගේ ජාමය බේරා ගනිමින් වෙලට බැස්සේ බූලාගේ මළ සිරුර කුඹුරක වැටී ඇතැයි යන සිතුවිල්ලෙනි.

එහෙත් එහි වූයේ අලුතින් වපුරන ලද කුඹුරක වූ පා සටහන් පෙළකි. ඒ අනුව ගත වූ රාත්තිරියේ බූලා සැරීසරා ඇත්තේ අපේ ඉසව්වේය. ගැටිස්සියන් ඇතුලු සියලු කාන්තා ප්‍රජාව රාත්තිරිය උදාවෙද්දී අහේතුක භියකට පත් වීම තව දුරටත් දරාගත නොහැකි වූ තැන ගම්මුන් විසින් ආරක්ෂක වැඩ පිළිවෙලක් ක්‍රියාත්මක කරනා ආකාරයක් පිළිබද කථිකා කලද රැයක් නිදිවරා පසුදා රාජකාරියට පිටත් වීමේ අපහසුතා ඇති වන නිසා බොහෝ අය ඒ වැඩපිළිවෙලට එක් නොවූයෙන්...අලුත් යෝජනාව ලත් තැනම ලොප් විය.

තවමත් බූලාගෙන් කිසිම අයෙකුට හානියක් වී නොමැත. අතනින් මෙතැනින් හෙළුවෙන් දිව ගිය බව පමණක් අසන්නට ලැබේ. වෙනදා සේවය නිම වී තනිව නිවසට ආ තරුණියන්, කාන්තාවන් , ගැටිස්සියන් රැගෙන එන්නට මෙදා සහපිරිවරින් නිවසේ උදවිය මහා මාර්ගයට වේලාසනින් ඇදෙනු දැකිය හැකි වෙයි.

මධ්‍යම රාත්‍රියද  පසු වූ තැන බූලාගේ රාජකාරි සැමදා වාර්තා වී තිබුනත් එක් දිනක් රාත්‍රී හතේ කණිසම වදිද්දී මහා කෝලාහලයක් බදු හඩකින් මගේ පාඩම් වැඩ කටයුතු බිද වැටුනි. දයාවතී අක්කලගෙ ගේ ලග මේ දැන් අර හොල්මන් කරන එකා හිටියලු....අන්න ගමේම කොල්ලො ගම පීර පීර බූලව හොයනවා...

ගමට ව්‍යසනයක් උදාවූ කල නියම වීර පුරුෂයෝ හැංගෙන්නට යන්නේ නැත. අවසානය දක්වාම සටන් කරනවා නියතය. ඒ උදාර සිතුවිල්ලෙන් ඔද වැඩී ගිය මගේ චිත්ත සන්තානය දරාගෙන  සිරා කොලුවා නිවෙසින් එළියට සම්ප්‍රාප්ත වන විට  අතේ තිබුනේ පුංචි පොලු කැබැල්ලකි.

විදුලි පන්දම්, හුළු අතු, ආදියේ එළියෙන් තරුණ, මහළු, වැඩිහිටි සියල්ලෝම ගම දෙවනත් කරති, කාන්තාවන් සියල්ලෝ නිවෙස් වලින් ඉවතට විත් එක් තැනක රැදී සිටිති.

ඕකව අහුවුනොත් මැරෙනකම්ම ගහපල්ලා...එකෙකු එසේ කියති.

එපා එපා...ඌට අපි ගෑණු ඇදුම් අන්දවලා ප්‍රදර්ශනය කොරමු.....තවෙකෙකු කියති.

සමස්ත ගමම ආවරණය වන පරිදි දැන් ක්‍රියාන්විතය කෙරීගෙන යයි. ගම වටේටම ඇත්තේ කුඹුරු යායක් බැවින් කිසිවෙකුට ගමෙන් ඉවතට යා නොහැක. සෑම තැනකම මුර සෙබළු ස්ථාන ගත වී හමාරය.

මමද කීප දෙනෙකු සමග කුඩා කණ්ඩායමක් සාදාගෙන ලදු පදුරු ඇති තැන් පීරා යන්නට පටන් ගතිමි. ඇසින් දුටු තොරතුරු අනුව බූලා මධ්‍යම ප්‍රමාණයේ එකෙකු වුවද කිසිවෙකු තනිව එහෙ මෙහෙ යන්නේ නැත.

අප නිවස කිට්ටුව අල්ලපු වත්තේ වූ බිමට පහත් වී තිබූ කෝපි පදුර තුල කිසිවෙකු සැගවී සිටින්නේදැයි බැලීමට මෙන් මා ඒ තුලට දැවැන්ත කලු ගලක් විසි කලෙමි. ඒ නිසා නැගුන සර සරය ඒ අවට සිටි කිසිවෙකුට ඇසුනි.

මෙන්න බූලා ඉන්නවෝ...වරෙල්ලා ඉක්මනට.... ඒකා හඩ තැලූයෙන් භට සේනාවෝ වහ වහා එහි පැමිණියහ. මම හොද ළමයා මෙන් කිසිවක් නොදන්නා එකෙකු මෙන් කල් මැරුවෙමි.

මෙතතින් තමයි සද්දෙ ආවෙ....මේ දැන් මෙතන ඉදලා තියෙනවා....කොල්ලො ඉක්මනට හොයපල්ලා...අද දෙකෙන් එකක් බේරගන්න ඕනෙ...අපේ ගෑණියෙක්ට රාත්තිරියෙ දොට්ට පිලට යන්නත් නෑ මේ කාලකණ්නියා නිසා....මට අහුවුනොත් මරලා ඔබනවා මේ ඇලේ...කබර අජියා මොර දෙන හඩ ඇසේ.

කෙසේ හෝ අපගේ ක්‍රියාන්විතය ආරම්භ වී සෑහෙන වෙලාවක් ගත වුවද බල්ලෙක් වත් සොයාගත නොහැකි විය. මෙහෙයුම නිමවා පිරිස විසිර යන අවස්ථාවේදී ගම්වාසී අප හිතවතෙකු හදිසියේ අප සොයාවිත් කිව්වේ මට ආරංචිය ආවේ දැන් බවත් නැත්තං ඕකව කුදලන්න මමත් එන බවකි.

මේ මහා මෙහෙයුමෙන් පසු බූලා  ටික දිනක් වරින් වර දර්ශනය වී සෑහෙන දවසක් නොපෙනීම ගියේය. අපේ ගමට පිටස්තර පුද්ගලයෙකුට මෙවැනි චරිතයක් රගපාන්නට බැරි බව ප්‍රත්‍යක්ෂ කරුණකි. ගමේ පිහිටීම ගැන හොද අවබෝධයක් නැතිව රෑ පානේ ගමන් බිමන් අපහසුය. ඒ අනුව බූලා ගමේම එකෙක් විය යුතුමය.

පළමු මහා මෙහෙයුම අවසන් වී සති දෙකකට පමණ පසු යලිත් වරක් බූලාගේ ආගමනය සිදුවූයේ ඉර එළිය සැගව යන්නටත් මත්තෙන්  6.30 කණිසමට පමණය. භට සේනාවෝ එදා නම් එක්වරම ගමම ආවරණය කරමින් යෙදූ ආරක්ෂක දැලෙන් මදුරුවෙකුට, මැස්සෙකුට මිස මිනිසෙකුට රිංගා යා නොහැක.

දවසේ විඩා නිවා ඇග සෝදා අවසන් වූ කාන්තාවකගේ හිරි ඔතප් බිදීමට තැත් කිරීම බූලාට එරෙහිව මෙදා නැගුනු චෝදනාවයි...

අරින්න එපා කොල්ලනේ..මේකව අද කම්බස් කරමු...පොල් විල්බට් අයියා හක්කේ අන්තිම කොනේ රැදුන ගිය සතියේ බුලත් හපද එළියට එන තරමේ හඩකින් කෑ ගසමින් පිරිස දිරිමත් කරයි.

ඔය වලත්තයව කුදලගෙන වරෙල්ලා...ගෑණු අපි සලකලා යවන්නං ඌට බීපු මව්කිරි මතක් වෙන්න....කට හැකර අම්මණ්ඩියක් එසේ කියද්දි කොල්ලන්ගේ මොරාල් අප් වූ නිසාදෝ  අහු මුළු නෑර බූලා සොයන්නේ මාරාවේශ වූ විලාශයෙනි. එවන් විටක බූලා මතුවූයේ නම් ඒකාගේ අවසන් කටයුතු සදහාවත් සිරුරු කොටස් ඉතිරි වෙනවා සැකය.

දඩාස්......යන හඩින් කුඩා පුවක් ගසක බදේ වැදුනේ තරමක කලු ගලකි. ඒ භට පිරිසේ ඉදිරිපෙල  නියමුවෙකු ඉලක්ක කර එල්ල වු ප්‍රහාරයක් බව කාටත් සැකයක් නැත. එහෙත් හොල්මන් කරනා බුලා සොයාගැනීමට කිසිසේත් නොහැක....ප්‍රතිඵලයකින් තොරවම එදිනද මෙහෙයුම අවසන් වද්දී පෙර දා පැමිණි ගම්වාසී හිතවතා මෙදාද පැමිණියේය.

මම ගෙදර නිදියගෙන හිටියෙ...මේ සද්දෙ ඇහිලා මම දුවගෙන ආවෙ. හෙතෙම එසේ පැවසීය. හැමදාමත් මෙහෙයුම අවසන් වද්දී අප ඉදිරියට පැමිණෙන මේ හාදයා ගැන කොලු පරපුරට ඇති වූයේ බලවත් සැකයකි. නමුත් වචනයෙන් පිට වූයේ නැත.

වරින් වර එළි දැක්වුනු බූලා නාටකය අතර තුර එම වසරේ සිංහල අලුත් අවුරුද්දද උදා විය. එම ප්‍රීතිය විදදරා ගැනීමට ගමට මද දුරකින් ගලා යන ඔය අසබඩ වෙල් එළියේ ගස් සෙවනක මධුවිත බෝතල් කීපයක් එකතු වූයේ සාමුහික දායකත්වයෙනි. අඩුම කුඩුම ඇති පදමට තිබූ මේ කියන දවසේ ගමේ පරම්පරා කීපයක ඇත්තන් එක පැදුරක වාඩි වී සීදුවේ ගල් රසය විදගත්තෝය.

බූලා යනු මේකායි අපේ සැකයට බදුන් වූ සගයාද මේ අවස්ථාවට එක් වී අදින් පසු අරක්කු සොයාගැනීමට නොහැකි වේදෝයි සිතා  වීදුරු කීපයක් එක ලග නැමූවෙන් කෙටි කලකින්ම හිස බිමට බර විය. කන සාක්කුවට වැටුනි. මේකාව බිම සතපවා ඉතිරියත් බඩ ගෙඩිවලට හලාගෙන පිරිස නිවෙස් වලට යන්නට සිතුවා පමණි.

බිම වැටුන එකා විකාර දොඩවයි. කිසිවෙකු ඒ පිළිබද තැකීමක් නොකලද එක්වරම උගේ ශ්‍රී මුඛයෙන් වැඩි හරිය පිට වූයෙන් ඇද සිටි මල් මල් කමිසය කබරයාගේ රටා වලින් අලංකාර විය.

මේකාට වමනෙ ඉස්පොල්ලෙ ගියොත් මල මගුලයි...ඔන්න ඕකව අර ඔයට අල්ලලා හෝදලා ආයෙම මේ කොහෙං හරි ඇල කොරපල්ලා...මතක ඇතුව ඔලුව පැත්තට හරවලා තියපල්ලා.

හැඩිදැඩි සැල්ටොන් මාමාගේ වචනයට සියල්ලෝ කීකරු වුයෙන් ඒකාව රැගෙන කොලු කුරුට්ටෝ ඔයට බැස්සෝය. පිරිසිදු කිරීමේ කටයුතු අහවර කර  ගොඩට එන්නට හදනා විටෙක එකෙකු පෙන්වූයේ ඈතින් ඇති පාලම යට සිට ඇදුම් ගලවමින් සිටි පුද්ගලයෙකි.

ගමේ ඉඹා ගාතේ ඇවිද ගිය මන්දමානසික පුද්ගලයෙකු පාලම යට ජීවත් වන්නේ කාලයක සිටය. එහි අරුමයක් නැත. මේකාට සමහරු පිස්සා කියා නිග්‍රහ කලාට සමහරු පින් තකා කෑම වේලක් දුන්නෝය. පුංචි පහේ වැඩක් පලක් කොර ගත්තෝය. පොල් ගස් නගින්නටද රුසියෙකි.

මම දැන් සෑහෙන වෙලාවක ඉදන් බලා හිටියෙ...අරූ ගලවනවා ගලවනවා ඉවරයක් නෑ බං...ඔච්චර කොහෙන්ද ඌට ඇදුම්...පොඩ්ඩක් ඇහැ දාමුද ?  එකෙකු ගෙන ආ යෝජනාව සභා සම්මත වෙන්නට වැඩි වේලාවක් ගියේ නැත.

උමතු පුද්ගලයාට නොපෙනෙන්නට පිරිස මදින් මද පාලම යටට සමීප විය. කඩියෙකු මෙන් කඩිසරව ඇග ලා සිටි ඇදුම් රාශියක් එකින් එක ගලවනු පෙනෙයි. නමුත් දර්ශනය තවමත් අපහැදිලි නිසා තව දුරටත් පාලම සමීපයට යාම අවශ්‍ය විය. නිවාඩු ලබා ගම පැමිණි සිටි හමුදා සෙබලෙකු කාටත් ඉස්සර විය.

පාලම යට පදුරක් අස්සට වන්නට ඇදුම් රාශියකි. ඒ සියල්ලම කාන්තා යට ඇදුම් බව සහසුද්දෙන් පෙනෙයි. ඒ අතර වර්ණ හා රටා රාශියකි. ඇතැම් විද්‍යාත්ම පරීක්ෂණ අතර තුර සිදුවන වැරදීම් නිසා සොයන්නට නොසිතූ දෙයක් හමු වුනා සේ කනාවට හෝ අප මේ සොයාගෙන ඇත්තේ ගමට පිළිලයක් වී තිබූ වල් බූලාය.

මූගෙ අම්මට...........යකෝ අපේ ගෑණි ගිය සතියෙ මා එක්ක පොලේ ගිය වෙලේ ගත්ත අලුත්ම දම්පාට .................. බොල අරූ අර ඇදගෙන ඉන්නෙ....ඕකට මම....මත්පැනින් සන්තර්පනය වී කෝපයෙන් ඉහවහා ගොස් සිටි තැඹිලි සෝමයියා අප දෙසට පසුපස හරවා තම සරමට යටින් ඇද සිටි කාන්තා යට ඇදුම් උනා දමන පිස්සාට හදිසියේම එල්ල කලේ දරුණු පා පහරකි. එහි ආනුභාවයෙන් ඔයේ ඉවුරට ආසන්නයේ තිබූ අත්තික්කා ගසේ අතු කීපයක්ද කදෙන් වෙන් කරමින් ජබොක් යන අනුකරණයෙන් ඔයට වැටුනේ බුදු අම්මෝ යනුවෙන් විලාපයක්ද නගමිනි.

මේ හඩ ඇසුනු ඒ ආසන්නයේ ඇති සමරු මාමාගේ සිල්ලර කඩයේ සිටි සිහියෙන් යුතු පිරිසක් දිව ආයෙන් පිස්සාට යලි ජීවතුන් අතරට එන්නට අවකාශ ලැබිනි. මෙයින් පසු මද කාලයක් මේ පුද්ගලයා ගමේ සැරිසැරුවද පසුව එක්වරම අතුරුදහන් වී සිටියේය. ගමට මායිම් වූ පොල් වත්තක සේවයට මේකාව කැටුව ගිය බවක් අපට ආරංචි විය. නමුත් ඊටත් වසරකට පමණ පසු හෙතෙම ස්වභාවික හේතු මත මිය ගොස් ඇති පුවත ගමට සැළ විය.

මම කාමරේ වෙසෙන සත්ගුණවත් සිරා කොලුවා.

ප.ලි

මෙවැනි පුද්ගලයන්ට පහර දීම පාපයකි. ගත යුතු හොදම පියවර නම් එවැනි අය අල්ලාගෙන මානසික සෞඛ්‍ය ආයතනයට යොමු කිරීමයි. විකෘති ලිංගික ආශාවන් සන්තර්පණය කර ගැනීමට මාන බලනා මෙවැන්නන්ගෙන් බූලන් හෙවත් ග්‍රීස් යකුන් උපදී.

අප එදා නිකරුණේ සැක කල පුද්ගලයා උපන් ගෙයි අහිංසකයෙකි. ඒ නිසා හැම විටම සැකය සාධාරණ නොවන බැවින් කරුණු ඔප්පු කරගත හැකි පසුබිමක පමණක් කෙනෙකුට චෝදනාත්මක ඇගිල්ල දිගු කරන්න. මෙය ජීවිතයේ බොහෝ තැන් වලදී ඔබට ප්‍රයෝජනවත් වනවා නියතය.

මන්ද මානසික පුද්ගලයා මෙහෙයුම් අවස්ථා වලදී දිව ගොස් අදුරේම උසැති පොල් ගස් මත සැගවෙන්නට ඇතැයි අපට පසුව සිතුනි.


අපේ නලින් මාමලගෙ ජාල පත්තරේ පලවූ මෙවැනිම පුවතක් මෙතැනින්