104 චූටි නංගිගේ ස්වයංවරය

සිරා කොලුවගෙ අතිජාත මිත්තරයෙක් වෙච්ච නගා කොලුවගෙ ආදර කථාව බොලාට කියන තවත් දවසක අපි හමු වෙලා. මේ සිදුවීම් අද ඊයෙ වෙච්ච ඒවා වගේ හදවතේ ගැඹුරු තැනක සටහන් වෙලා තිබුනත් අපටත් හොරා කාලය වේගයෙන් ගතවෙලා දශකයකටත් වැඩි කාලයක් ගෙවිලා ගිහිල්ලා. චූටි නංගිගෙ මුදල් පසුම්බියෙන් එළියට පැන්න ඇගේ පෙම්වතාගෙ රූපයෙන් කලින් කොටස අහවර උනේ. අද එතැන ඉදන් ඉදිරියට.

පුස්තකාල ජීවිතය හමාර කරලා අපි උසස් පෙළ විභාගයටත් ඉද ගත්තා. විභාගයට උත්තර බැඳපු ආකාරය අනුව විශ්ව විද්‍යාල ප්‍රවේශය අපේක්ෂා කරන්න බැරි හින්දම දෙවන වතාවටත් විභාගෙට පෙනී ඉන්න මමත් නගා කොලුවත් ඒ වෙද්දිත් සූජානම් වෙලා අහවරයි. උපකාරක පන්ති පටන් ගත්ත අලුතම වගේ නගා කොලුවත් මමත් පන්සල් හන්දියේ පුෂ්පෙ ගොයියත් පෙර පුරුදු ගමන යළි ඇරඹුවා.

මෙදා පොටේ නම් දෙනවා බැටේ කියලා හිතාන මුල ඉදන්ම ඉතාම හොදින් අධ්‍යයන කටයුතු කරන්නයි අපි තුන්දෙනාගෙම වෑයම. කලින් වතාවෙ වගේම මේ වතාවෙත් ගම්පහ පුස්තකාලයේ උපකාරය පතන්න අපි අමතක කලේ නෑ. මමත් නගා කොලුවත් පුස්තකාල උඩුමහලෙ පාඩම් කරන්න වෙන් කරලා තිබුන කලාපෙට සැට් වෙලා අධ්‍යයන වැඩ කටයුතු කොරාන යනවා. කලින් අවුරුද්දෙ අපිත් එක්ක එක බඩවැල කඩාන ආපු සහෝදරයො වගේ සහෝදරත්වයෙන් ඉදලා..විභාගයෙන් අනතුරුව විසිර ගියපු කිසිවෙක් දැන් එහි නැති නිසා මුල් දවස් කීපයේ දැනුනෙ පුදුමාකාර පාලුවක්. දැරිවියන්ගේ ඉසව්වෙත් අපි එක්ක හිතවත් වෙච්ච, අපේ නෙත් වලට රසදුනක් වෙච්ච කිසිම මුහුණක් දකින්න නෑ. උසස් පෙළට පළමු වතාවට මුහුණ දෙන්න සැරසෙන අපට වඩා වසරක් වයසින් අඩු යුවතියො කීප දෙනෙක් හැරෙන්න තවමත් එහි වැඩි ජනකායක් නෑ.

දවසක් දෙකක් ගත වෙද්දි පුස්තකාල මතකය නගා කොලුවගෙ හිතට දුකක් ගෙනාව නිසාම ඒකා නිවසේ ඉදන් වැඩ කටයුතු කොරන්න තීරණය කලත් හදිසියේ ඒ අදහස අතහැර දමන්න සිදු උනේ අනපේක්ෂිත සිදුවීමක් නිසා. එක දවසක් දවල් වරුවක පුස්තකාලෙ පාඩම් කරන කොටසෙ දැරිවියන්ගෙ පැත්තෙ අපට හුරු පුරුදු මුහුණක් සිනාමුසුව අපි දිහා බලා උන්නා.

වෙන කවුරුවත් නෙමෙයි බොලව් චූටි නංගි.......

අපි වගේම දෙවන වතාවටත් විභාගෙ ලියන්න ඒ ඇත්තිත් කල්පනා කොරලා.

ඒ දසුනින් නගාගෙ හිතේ දහසක් මල් පීදුනා. හැමදාම පුස්තකාලෙ එන්න මිනිහට දැන් හේතුවක්, ආශාවක් තියෙනවා. එදා හවස ගෙදර යන ගමන් චූටි නංගි එක්ක බොහොම හිතවත්ව කථා බහ කරන්නත් නගාට අවස්ථාව ලැබුනා. ඒකා උන්නෙ හරිම ප්‍රීතියෙන්.

දවසක් දෙකක් යද්දි මේ දෙන්නා යාලුවො දෙන්නෙක් වගේ හිතවත්, පාඩම් වැඩ කටයුතු අවසානයේ හැමදාම වගේ අපි තුන්දෙනා දොඩමළු උනා. මේ අතරවාරයේ දවසක තමයි චූටි නංගිගෙ පෙම්වතා ගැන නගා කොලුවා විමසුවෙ. ඒ වෙලාවෙ ඇගේ මුහුණ දුක්බර වෙච්ච ආකාරය මට තවමත් මතකයි. මාස 6 කින් එයා මාව මුණගැහෙන්න ඇවිල්ලා නෑ. ඇය එහෙම කිව්වා.

නගා ගොයියට කලින් වතාවෙ චූටි නංගිගෙ ප්‍රේමය දිනාගන්න බැරි උනත් මේ වතාවෙ නම් වැඩේ ගොඩදාගන්න පුලුවන් කියලා මගේ අක්මාවට දැනුනත්..මේ මගුල් නිසා නගාගෙ විභාග ප්‍රතිඵලයට කෙළවෙයිද කියලාත් නොහිතුනා නෙමෙයි.

තවත් මාස දෙක තුනක් ගත වෙද්දි අලුත් මුහුණු වලින් පුස්තකාලය පිරුනා. මේ චරිත දිනපතා හමුවෙද්දි අපි අපිටත් හොරෙන් එකිනකො සමග සුහද වෙලා. දැරිවියන්ගෙ පැත්තෙ ඉතාම සුන්දර දැරිවියො කීප දෙනෙකුම වාඩි වෙලා උන්නත්...සිරා කොලුවා මේ වතාවෙ මේ කිසිදෙයක් ගැන උනන්දු උනේ නෑ. විභාගයෙන් උසස් ප්‍රතිඵලයක් ගන්න අරමුණ විතරයි මට තිබුනෙ.

කාලය ටික් ටික් හඩින් ගත වෙනවා. විභාගයට තියෙන දින ගනන එකින් එක අඩු වෙනවා...නගා සහ චූටි නංගි අතර තියෙන ඇයි හොදයිය නැගලම යනවා.

ඇගේ පෙම්වතා ඇගෙන් කෙමෙන් කෙමෙන් දුරස් වන බවත්, නගා ගොයියා දිනෙන් දින ඇයට සමීප වන බවත් මේ දෙදෙනා සමීපයේ හිටිය මට අමුත්තක් උනේ නෑ. ඇය නිවසින් රැගෙන එන බත් ගෙඩිය ඇයත් සමග අනුභව කරන්න, චූටි නංගි සමග වැහි දවස් වලට කුඩේ යටින් යන්න නගාට අවස්ථාව ලැබිලා. ඒ දිහා බලාන මිත්තරයෙක් විදියට මම ඉතාමත් සතුටු උනා. මේ දෙන්නගෙම පොදු හිතවතෙක් බවට සිරා කොලුවා උසස් වෙලා.

අපේ එකාට නැවත වතාවක් චූටි නංගිගෙන් කැමැත්ත විමසන්න අවශ්‍ය උනේ නෑ. උසස් පෙළ විභාගය ලියන්න දෙවැනි වතාවට ගම්පහ පුස්තකාලයට සමුදෙනකොට නගා සහ චූටි නංගි එකිනෙකාට පෙම් කරමින් උන්නු ජෝඩුවක්.

දෙවන වතාවටත් උසස් පෙළට මුහුණ දීලා නිවසට වෙලා ඉසිඹුවක් ලබමින් උන්නු කාලෙ අපි අතරෙ ආශ්‍රය, හමුවීම් සීමා සහිතවයි සිදු උනේ. එක දවසක් නිවසේ දුරබණුවට නගා කොලුවාගෙන් ඇමතුමක් ලැබුනා.

උඹ මොකද බොල කරන්නෙ....

මොනවා කරන්නද....උඹට වගේ ලව් කර කර ටවුම පුරා ඇවිදින්න, චිත්‍රපටි හෝල් ගානෙ යන්න එකියක් මට නෑනෙ...

ඒ ඉලව්ව ගැන කථා කරන්න තමයි මම උඹට කථා කලේ.

මොකද පොල්ල තියලා කෙල්ල මාරු උනාද ?

නෑ බං....ඒකිගෙ පරණ කොල්ලට කාලෙකට පස්සෙ චූටි නංගිව මතක් වෙලා. ඊයෙ පෙරේදා දවසක කෝල් එකක් දීලා. එයා ඉතිං අපි දෙන්නගෙ සම්බන්ධය ගැන කිව්වම මිනිහට තරහා ගිහිං...මාව මුණගැහෙන්න ගම්පහට එනවා කියලා...

කොහෙ එකෙක්ද බොල...

ජා-ඇල

උඹ භය වෙන්න එපා අපි මොනවා හරි කොරමු.

ජා-ඇල කිව්වම පොඩියක් විතර වලියට බර ගතියක් තියෙන නිසා නගාගෙ දෙකකුල් දැම්මම මැඩ්ලින් ගහනවා. මේ ඇමතුමෙන් සතියකට විතර පස්සෙ ගම්පහ දුම්රිය නැවතුම අසල චූටි නංගිගෙ අලුත් සහ පරණ කුමාරවරු අතර හමුවකට මග එළිපෙහෙලි උනා.

උඹ භය වෙන්න එපා...මමයි පුෂ්පයයි ඈතින් බලාන ඉන්නම්...උඹ ඒකා එක්ක සුහදව කථා කරපං...අවුලක් ගියොත් අපි දෙන්න ගේමට ඇන්ටර් වෙන්නම්. මම ඒ විදියටයි නගාට උපදෙස් දුන්නෙ.

සති අන්තයේ දිනෙක සවස් වරුවක තමයි මේ සිද්ධිය සිද්ධ උනේ. සිරා කොලුවත්, පුෂ්පෙ ළමයත් ඒ ඉසව්වට යද්දි විනාඩි කීපයක් ප්‍රමාදයි.

නගා, චූටි නංගි සමග ටිකක් විතර උස මහත කලු හාදයෙක් කථා බහක නිරත වෙලා ඉන්න ආකාරය අපිට ඈතටම පෙනුනා.

එකපාරටම යන්න ඕනෙ නෑ. ප්‍රශ්නයක් ආවොත් එතනට යමු...පුෂ්පයා එහෙම කිව්ව නිසා දුම්රිය ස්ථානය කිට්ටුව තැනක අපි දෙන්න මේ තුන් කට්ටුව දිහා බලාන උන්නා.

කථා බහ සුහද නොවන වග තේරුම් ගන්න අපිට වැඩිවෙලාවක් ගියේ නෑ. ආගන්තුක තරුණයා අත පය වනමින් වේගයෙන් කථාබහ කරන විලාශය අපේ හිත් ගත්තෙත් නෑ. ස්වභාවයෙන්ම සටනට යන්නෙ නැති අහිංසකයෙක් වෙච්ච අපේ නගා මුව පොව්වෙක් වගේ බලාන හිටියා.

අන්න ඒ වගේ වටපිටාවක අපි දෙන්නත් කථාවට මැදිහත් උනා. ඔබ දැකුමෙන් මා නෙත ලැබුවේ....ලද ඉහළම සතුටයි මෙලොවේ......වගේ නගා අපි දෙන්නා දිහා බලාන උන්නා. අපි කවුද කියලා ආගන්තුකයට හදුන්වා දුන්නට පස්සෙ මිනිහා අපේ පැත්තට හැරුනා. අපේ පුෂ්පෙ ගොයියත් හොද දේහදාරී පුරුෂයා. ඒ හින්දා ආගන්තුකයා ටිකක් විතර කළබල වෙලා.

මචං මේ මගේ ගර්ල් ෆ්‍රෙන්ඩ්....වැඩ නිසා මට ටික කාලයක් හම්බවෙන්න එන්න බැරි උනා. (ඒ කාලෙ අද කපොල් වලට වගේ මල් කඩන්න ජංගම දුරබණුව අද මෙන් පදුරක් පදුරක් ගානේ තිබුනේ නැත) මම වැඩ ටික ඉවරකරගෙන එද්දි මෙයා වෙන කෙනෙක්ට සෙට් වෙලා.

දුක වගේම තරහා මුසුවෙචච බැල්මක් මිනිහා ලග තිබුනෙ. එතැනින් පස්සෙ ගොඩාක් දේ ගැන එයා තර්ක කලත්..චූටි නංගි නගා ලගට වෙලා ලේන්සුවෙ කොණක් හපමින් නිහඩව සිටියා.

මේ ඇත්තගෙ කථාව ටික වේලාවක් අහගෙන ඉදලා..මම මිනිහගෙ පිටට තට්ටුවක් දැම්මා.

මචං..මේ වගේ දේකට ගහමරා ගන්න එකේ තේරුමක් නෑ. උඹ ආදරය කරපු කෙනා මෙතන ඉන්නවනෙ දැන්...අපි එයාගෙන්ම අහමු එයා කාටද කැමති කියලා.

මගේ ස්වයංවර යෝජනාවට ඔහු එකග වුනා.

ඔයා මේ දෙන්නගෙන් කාටද කැමති...මම චූටි නංගිගෙන් ඇහුවා.

මොහොතක් නිහඩව සිටි ඇය....මම කැමති මෙයාට...ඇය නගාගෙ අත අල්ලගත්තා.

පැරණි පෙම්වතා බිම බලාගෙන නිහඩවම සිටියා. නමුත් ඔහුගේ හිතේ විශාල දුකක් හිර වී තිබෙන බවක් මට දැනුනා.

අපේ එකා ගිය අවුරුද්දෙ ඉදන් ඔය කෙල්ල ගැන හිතන්නෙ. මුලින්ම අහපු වෙලේ කැමති උනේ නෑ...උඹේ ෆොටෝ එකක් පවා පෙන්නුවා...මාස ගානක්ම උඹලා දෙන්නා මුලිච්චි නොවුන නිසා මේ සම්බන්ධෙ ඉවරයි කියලා ඒකි හිතන්න ඇති.

ඕවා ඔහොම තමයි බං...ගෑණු කියන්නෙ අමුතුම ජාතියක් කියලා උඹ අහලා ඇතිනෙ...ඔය මගුල් අමතක කරලා කරන දෙයක් හොදින් කරගෙන වෙන කෙනෙක් හොයාගනිං...පුෂ්පෙ ළමයත් මිනිහගෙ හිත හැදුවා.

තවත් මොහොතක් ඔහු ගම්පහ දුම්රිය නැවතුම අසල බලා සිටියත්, අලුත් ජෝඩුව නම් ඊට කලියෙන් සතුටින් විසිර ගියා. කලින් ආශ්‍රය කරලා නැති උනත් පරණ පෙම්වතා පිළිබද විශාල කණගාටුවක් ඒ වෙද්දිත් මගේ හිතේ මෝදු වෙලා. මොකෙක් උනත් කොල්ලෙක්නෙ...මට එහෙමයි හිතුනෙ.

මේ සියලු සිදුවීම් නිම උනාට පස්සෙ අපේ සත්‍ය ප්‍රේම භෘංගරාජයා නගා...අපිට මුලිච්චි උනේ ඉදලාම දවසක තමයි. තමන්ගෙ ප්‍රේමකථාව නැගලම යන බවක් තමයි මිනිහා හැම වෙලාවෙම අපිට කිව්වෙ. ඔයින් මෙයින් විභාග ප්‍රතිඵල නිකුත් වෙන දවසත් උදා උනා.

ප්‍රතිඵල නිකුත් වෙච්ච දවසෙ හැන්දෑවෙ අපේ මිදුලෙ ඉදන් නගා බෙරිහන් දෙනවා මගේ නම කියලා.

මොකද බොල....නම කියන්න පුරුදු වෙනවද ?

උඹ ප්‍රතිඵල බැලුවෙ නැද්ද ?

නෑ...තවම බැලුවෙ නෑ..උඹ බැලුවද ?

ඔව්...නගා කෝල හිනාවක් දැම්මා...

ඉතිං...කොහොමද ප්‍රතිඵලේ

A 3 යි. නගා මාව වැළදගත්තා.

උඹත් ඉක්මනට බලහං...කැම්පස් යන්න පාස් වෙලා තියේවි....

අපේ නිවසින් ප්ලේන්ටියක් ගහපු නගා, මගේ මෑණියන්ගෙ දෙපා වැදලා, උගෙ පොල්ල නැති බයිසිකලේ උඩට ගොඩ උනා. දෑ වසරක්ම මේ ප්‍රතිඵලේ ගන්න මා එක්කම මහන්සි වෙච්ච එකා නිසා නගා ගැන මට පුදුම සතුටක් දැනුනා.

වාණිජ අංශයෙන් විභාගයට ලියපු නගා සරසවි වරම් ලබලා, ජීව විද්‍යා අංශයෙන් විභාගය ලියපු චූටි නංගිට මොකද උනේ, මුන් දෙන්නගෙ ආදර අන්දරය ඊට පස්සෙ නැගලම ගියාද, ඊලග කොටසෙන් ඒ ටික දෙසාබාන්නයි මගේ සූජානම. එතකං ඉවසං හිටහල්ලා.....

මම කාමරේ අරින සිරා කොලුවා.