72 නගාගේ විරහා වේදනා

සිරා කොලුවගෙ මිත්තරයෙක් වෙච්ච නගා කොලුවගෙ ආදර කථාවට අවසානයේ මක්කද උනේ කියලා බොලාට කියන්නයි සිරා කොලුවගෙ මේ සූජානම. පහුගිය දොහේ කාමරයට ආව ගියා බොහෝ ඇත්තො ඒ හරිය දැනගන්න ඉන්නෙ බොහොම කැමැත්තෙන් කියලයි මගේ අක්මාවට දැනෙන්නෙ.

නගාගෙ ආදර කථාවෙ කලින් කොටස් කියවන්න අතපසු වෙච්ච ඇත්තන්ට මෙන්න උදව්වක්
1 කොටස  2 කොටස  3 කොටස

ඖෂධවේදී විභාගයෙන් අසමත් උනාට පස්සෙ චූටි නංගි මානසිකව ඉතාම පහත් තැනකට වැටුනා. ඒ හින්දම සිරා කොලුවට වගේම පුෂ්පෙ ගොයියටත් ඇයව යථා තත්වයට ගේන්න සෑහෙන්න මහන්සි වෙන්න සිදු උනා කියන දේ මුසාවක් එහෙම නෙමෙයි බොලව්.

මම බෙහෙත් ජාති ගැන දන්නවා...මට වෙලාවකට හිතෙනවා බෙහෙත් පෙති අහුරක් කටට දාගෙන බීලා මැරෙන්න.

චූටි නංගි දුරකථනයෙන් අමතපු වතාවක සිරා කොලුවට කිව්වෙ විහිළුවකට එහෙම නෙමෙයි. මේ කෙල්ල ඇත්තටම මේ දේ කරාවි කියලා අපි දෙන්නටම හිතුනා. ඇය ඒ තරම් වේදනාවකින් ඒ සමයෙදි ජීවත් උනේ.

මිත්‍රත්වය කියන වදනට ශක්තිමත් අරුතක් දෙන්න මටත් පුෂ්පෙ කොලුවටත් හැකි උනේ ඇයව නැවතත් ඖෂධවේදී විභාගයට ඉන්දවන්න තරමට මානසික තත්වය හදන්න පුලුවන් වෙච්ච හින්දයි. චූටි නංගි අන්තිමේදි කැමති උනා දෙවැනි වතාවටත් විභාගයට පෙනී ඉන්න.

මේ වතාවෙ ඇය මේ වෙනුවෙන් අතිරේක පන්තියට පැමිණෙන ඉරිදා හැන්දෑවට සිරා කොලුවත් ගම්පහ නගරයට බඩ ගෑවා. ඇයව මුලිච්චි වෙලා ඇය සමග කථා කරද්දි දුරකථනයකින් කථා කරනවට වඩා මම කියන දේ ඇයට දැනේවි කියලා මට විශ්වාසයක් තිබුනා. විභාගය පිළිබද හොද ධෛර්යයක් එන්නත් කරලා..ජීවිතයෙන් පලා යන්න තීරණය කරන්නෙ ආත්ම විශ්වාසයක් නැති මිනිස්සු කියන කාරණය අවබෝධ කරලා දුන්නට පස්සෙ ඇගේ කථා බහ බොහෝ දුරට වෙනස් උනා. සිනහව අදුනන්නේ නැතිව සිටි ඇය නැවත සිනාසෙන්න පටන් ගත්තා.

චූටි නංගි මේ වතාවෙ බොහොම හොද අධිෂ්ඨානයකින් විභාගයට සූජානම් උනා. නගා කොලුවා කැලණිය සරසවියට වෙලා ඇයව සම්පූර්ණයෙන් අමතක කරලා තමන්ගෙ පාඩුවෙ අධ්‍යාපන වැඩකටයුතු වල යෙදිලයි උන්නෙ.

උඹ ඒකිට කැමති නැත්තං...කෙලින්ම කියපන්...අපි කොච්චර එහෙම කිව්වත් නගා ඒ දේ කලේම නෑ.

දවසින් දවස ගෙවිලා ගිහිල්ලා චූටි නංගිගෙ ඖෂධවේදී විභාගයට ඉතිරිව තියෙන්නෙ තවත් මාසයක කාලයක්, පෙර වතාවෙ අත්දැකීම් එහෙමත් උපයෝගී කරගෙන ඇය මේ වතාවෙ ඉතාම හොදට විභාගයට සූදානම් වී අහවරයි.නමුත් නගා කොලුවා කලින් වතාවෙ කරපු වැරැද්ද දෙවැනි වතාවටත් කලා. චූටි නංගිට හදිසියේම දුරකථනයෙන් කථා කලා.

කිසිම වෙනසක් නෑ....ගිය වතාවෙ වගේම තමයි. චූටි නංගිගෙ මානසික ඒකාග්‍රතාව හිටි අඩියේම අන්තිම පහත් තැනකට ආයෙමත් වතාවක් වැටුනා. මේ වතාවෙත් තමන්ට අභියෝගය ජයගන්න බැරි වේවි කියලා ඇය ඉකි බිදිමින් ජංගම දුරබණුවෙන් පවසද්දි මට වගේම පුෂ්පයාටත් නගාව මරාගෙන කන්න තරමේ කේන්තියක් දැනුනා.

ඇයි....එයා මගේ ජීවිතේ එක්ක මේ විදියට සෙල්ලම් කරන්නෙ...චූටි නංගි අපෙන් ඇහුවා...අපි ඉතින් කාගෙන් කියලා අහන්නද ?

දෙවැනි වතාවෙත් පරදින්න එපා....ඔයා කොහොම හරි දිනන්න...ඔයාගෙ ජීවිතෙන් යන්න ගිය කෙනෙක් නිසා ඇයි ඔයා ඔයාගෙ අනාගතය උකසට තියන්නෙ. මේ දේවල් අපි දෙන්නා චූටි නංගිට කිව්වෙ ඇයව මුලිච්චි වෙලා මිස දුරබණුවෙන් නොවෙයි. තමන්ව ධෛර්යමත් කරන්න තමා ලගම කෙනෙක් ඉන්නවා කියන ශක්තිය ඇයව නිසි ඉලක්කයට රැගෙන යාවි කියන බලාපොරොත්තුව මටත් පුෂ්පයටත් තිබුනා.

මේ වතාවෙත් මට විභාගෙ පාස් වෙන්න බැරි වේවි. විභාගයට තව තියෙන්නෙ සතියයි. චූටි නංගි බොහොම දුක්බරව එහෙම කියපු දවසක, ඇගේ සිතෙන් මේ සෘණාත්මක සිතුවිලි අයින් කරලා දාලා ඉතිරි සතිය තුල හොද විශ්වාසයකින් විභාගයට මුහුණ දෙන්න තරමට හිත හදන්න අපි දෙන්නට හැකි උනා.

ඇය විභාගයට මුහුණ දුන්නා. රැකියාවෙ කටයුතු සමග මමත් පුෂ්පයත් කාර්යබහුල උනා. චූටි නංගි විභාගයක් ලිව්වද කියන කාරණයත් අමතක වෙලා තිබුන පසුබිමක හදිසියේ දවසක කාලයකට පස්සෙ ඇගෙන් ඇමතුමක්..

මම අම්මට තාත්තට කියන්නත් කලින් මේ ඔයාට කථා කලේ...

මොකද හදිස්සියේ....

මම විභාගෙ පාස්...ඊයෙ ප්‍රතිඵල ආවෙ...එහෙම කිව්ව චූටි නංගිගෙ කටහඩ හදිසියේම වෙනස් උනා. ඇයට හැඩුම් ආවා. සතුට වැඩි කමට වෙන්න ඇති.

මේ ප්‍රතිඵලය  ගන්න ඔයාලා දෙන්න දුන්නු උදව් මට කවදාවත් අමතක වෙන්නෙ නෑ. ඔයාලා නැත්තං මම කවදාවත් මේ විභාගය පාස් වෙන්නෙ නෑ...මානසිකව ගොඩාක් පහළට වැටිලා හිටිය මට ඔයාලා කරපු දේවල් වලට ගොඩාක් ස්තූතියි .

මගේ හිත සතුටින් පිරුනා. දැන් චූටි නංගිගෙ අනාගතයට ශක්තිමත් අඩිතාලමක් වැටිලා. අගයක් තිබුනෙ නැති කෙල්ලට දැන් අගයක් තියෙනවා. උසස් පෙළ කරපු කාලෙදි වගේ නිදහස් මානසිකත්වයකින් ජීවත් වෙන්න ඇයට හැකියි.

තවත් සතියක පමණ ඇවෑමෙන් ඇය අපි දෙන්නාටම ගම්පහ නගරයේ අවන්හලකදි පුංචි පහේ සංග්‍රහයක් දුන්නෙ අපිත් එක්ක තිබුන ලෙංගතුකම නිසාමයි. අන්න එදා තමයි ඇය මේ රහස අපට හෙළි කලේ.

මට යෝජනාවක් ඇවිල්ලා අනේ. මම මොකද දැන් කරන්නේ ?

මොනවා කරන්නද...ඒ කොල්ලා හොඳ නම් කැමති වෙන්න...ඔයා ගැන හිතන්නෙ නැති නගා ගැන තවත් හිතන්නෙ මොනවටද...ඔයාට ඒකා දුන්න ගින්දර මදිද...මමත් පුෂ්පයත් එහෙම කිව්වා.

මට එයාව අමතක කරන්න ලේසි නෑ.  චූටි නංගි තවමත් නගාට ආදරෙයි.

තමන්ට ආදරේ නැති කෙනෙක්ව බලෙන් ලබා ගන්න බෑනෙ...ඒ නිසා ඉස්සෙල්ලාම ඔය කියන හාදයට ගෙදර එන්න කියලා කථා බහ කරලා බලන්න. එයාගෙ ගතිගුණ හොද නම්...ඔයාට කරදරයක් නැතුව ජීවත් වෙන්න පුලුවන් කියලා හිතෙනවා නම් කසාද බදින්න. අපේ යෝජනාවට ඇය අකමැත්තෙන් හරි කැමති උනා.

තවත් සති දෙක තුනකට පස්සෙ චූටි නංගිගේ මනාලයා ඇය බැහැ දකින්න නිවසට ආවා...අකමැති වෙන්න හේතුවක් තිබුනෙ නැති හින්දා ඇය අන්තිමේදි ඔහුට කැමැත්ත දුන්නා.

මේ වෙද්දි මේ කෙලී නිසා නගා එක්ක අපි හිටියෙ තරමක අමනාපෙකින්...ඒ නිසාම කෙටි පණිවිඩයක් විදියට මම ඇගේ තීරණය ඔහු වෙත යැව්වා. අපි හිතුවෙ නැති දෙයක් තමයි අන්තිමේදි සිද්ධ උනේ.

නගා ගොයියා මෙච්චර කල් තිබුනෙ නැති අමුතුම අමාරුවක් උත්සන්න වෙලා චූටි නංගි හොයාගෙන පිස්සු බල්ලෙක් වගේ ගම්පහට කඩාපාත් උනා. උපන් දින තෑග්ග ගන්න ආවෙ නැති මිනිහට චූටි නංගි තව කෙනෙක්ට අයිති වෙන්න යනවා කිව්වම උණ ගැනිලා.

මගේ අතින් වැරදි වෙන්න ඇති...අනේ කොහොම හරි චූටි නංගිව ආයෙමත් මට සෙට් කරලා දීහං...නගා පින්සෙන්ඩු උනා. පෙර වැරදි තියෙන හින්දම මමත් පුෂ්පයත් මේකාගෙ බස් කනකට ගත්තෙ නෑ.

අපේ සහායක් නැති තැන නගා තනිවම සටනට එළැඹුනා. ඒ වෙද්දි චූටි නංගි ගම්පහ නගරයේම ඔසු හලක පුහුණු වෙමින් උන්නෙ. දුරකථනයෙන් ඇමතුවාම මට ඔයත් එක්ක කථා කරන්න දෙයක් නෑ කියලා නගා හමුවීම ඇය ප්‍රතික්ෂේප කරපු නිසාම ඒකා පිස්සුවෙන් වගේ දවසක්දා ඇගේ සේවා ස්ථානයට කඩා වැදිලා. කථා කරන්න පොඩියක් එළියට එන්න කියලා කරදර කරද්දි....එතැන හිටිය පුරුෂ පාර්ශවය ඒකාගෙ බෙල්ලෙන් අල්ලලා බල්ලෙක් වගේ එළියට තල්ලු කොරලා තිබුනා.

අපේ ඇස් අදහා ගන්න බෑ. නගා විරහා වේදනාවෙන් කෑ මොර දෙනවා...මේකා මේ රගපානවද කියලා අපට සැකයක් නැත්තෙත් නෑ. නමුත් මාසයක් දෙකක් ගත උනත් නගාගේ රෝගය සුව උනේ නෑ. අධ්‍යාපන කටයුතු පවා අඩාල කරගෙන මේකා චූටි නංගි මත්තෙ මැරෙද්දි මිත්තරයෙක් විදියට අපේ පපු කැවුතු උණු උනා.

පුෂ්පයා වගේම මමත් රැකියාව නිම කරලා නිවසට එද්දි අපේ නිවෙස් දෙකෙන් එකක නගා අපේ ආගමනය බලාගෙන රැදී ඉන්නවා. ගමන් වෙහෙස නිවාගන්න පවා ඉසිඹුවක් නෑ. නගාගෙ දුක්බර ආදර කථාවට සවන් දෙන්න වෙනවා. මේ මගුල හැමදාම කරන්න බෑනෙ. සිරා කොලුවා දවසක්දා පෙර වැරදි සියල්ල මතක් කරලා ඒකාට හොදවායින් කියා දුන්නා. එදායින් පස්සෙ සෑහෙන කාලයක් ගතවෙන තුරු අපේ නිවස පැත්ත පළාතක නගා ආවෙ නෑ. දැන් ඉතිං පුෂ්පෙ කොලුවා විතරයි නගාට ඇහුම්කන් දෙන්න ඉතිරි වෙලා ඉන්නෙ.

ඒ කාලෙ ඉතිං අපි මධුවිතකට එහෙම ඉදගත්තෙ ඉදලා හිටලා, හීනියට කයියක් එහෙම ගහලා පොඩි ජොලියක් දාන්න. නමුත් ආපු වෙලේ ඉදන් නගාගෙ අදෝවැඩියාව...චූටි නංගි ගැන දොඩවනවා. එක දවසක් පුෂ්පයට හොදටම තරහා ගිහින් නගාට ගහන්න අතක් ඉස්සුවා මේ කරදරේ ඉවසලා ඉවසලා බැරිම තැන. නමුත් ගැහුවේ නෑ.

බාහිරින් බැලුවාම දැන් නගා උන්මත්තකයෙක් වගේ....තමන්ට මුලිච්චි වෙන්නෙ කොල්ලෙක්ද බල්ලෙක්ද බලන්නේ නැතුව ඒකා තමන්ගෙ විරහා වේදනාව කියව කියව ඇවිදිනවා.

මචං මට උදව් කරපංකො....පින් සිද්ධ වෙයි බං...මිත්තරයෙක් උනත් මේ විදියට බැගෑපත් වෙද්දි අපි කොහොමද ඉවසන්නෙ....

උඹ ඇත්තටම ආදරේ කරනවද මේ සැරේ....අපි උගෙන් ඇහුවා...

ඔව් බං...ඇත්තමයි සත්තයි...ආයෙ කවදාවත් අමතක කරන්නෙ නෑ.

අපේ වචනය නිසාම යෝජිත මනාලයාට නිවසට එන්නට අවසර දුන් චූටි නංගිට,  නගා ගැන නැවත හිතලා බලන්න පුලුවන්ද කියලා කියන්න අවසානයේ අකමැත්තෙන් උවත් අපට සිදු උනා. නමුත් හැමවිටම ඇගේ ප්‍රතිචාරය වූයේ..

ඔය මනුස්සයා හින්දා මම පුදුම දුකක් වින්දෙ...ආයෙමත් මට කථා කරන්න දෙයක් නෑ....කරුණාකරලා මේ ගැන කථා නොකර ඉමු.

දවසින් දවස නගා විකාර දොඩවනවා...මේකට මානසික රෝගයක්වත් හැදෙයිදෝ කියන භය මටත් පුෂ්පයටත් ඇති උනා. අපි චූටි නංගිගෙ ගෙදර යමු. අන්තිමේදි අසීරු තීරණයකට ආවා...ඇගේ මව මේ ආදර සබදතාව ගැන දැන සිටි කෙනා නිසා ඇය හා චූටි නංගි සමග සාකච්ඡා කරලා නැවතත් හැකිනම් නගාට අවස්ථාවක් දෙන්න කියන ඉල්ලීමයි අපට කරන්න ඉතිරි වෙලා තිබුනෙ.

පන්සලේ පාඩම් කරපු කථාවෙන් බොලාට හමුවුන වනිගයා තමන්ගෙ මිත්තරයෙකුගෙ මෝටර් රථයක් මේ ගමනට ඉල්ලගත්තා...දවසක්දා හිරු අවරට ගියාට පස්සෙ මමත්, පුෂ්පයත්, නගාත් රථයට පැටවුනා. රිය පදවන වනිගයාගෙ දෑතට සියලු දෙවි පිහිටයි කියලයි අපි ගමන පිටත් උනේ. චූටි නංගිගෙ පියා නිවසේ රැදී ඉන්න වෙලාවක මේ ගැන කථා කරන්න විදියක් නැති නිසා ඔහු නිවසේ නැති වේලාවක් තෝරාගෙනයි අපි මේ ගමන යන්නේ.

රථය ඇගේ මිදුලේ නිවසට සමීපයෙන් නතර කොලා. වීදුරු සියල්ල ටින්ට් කරලා තියෙන නිසා ඇතුලෙ ඉන්න නගාව පිටතට පේන්නෙ නෑ...වනිගයා  චූටි නංගිට කලින් මුලිච්චි වෙලා නැති නිසා ඔහුවත් ඇයට හදුන්වා දීලා අපි තුන්දෙනා සාලයේ තිබුන පුටු තුනකට බර දුන්නා. චූටි නංගි, ඇගේ මව සහ නැගණිය සමග අපට සම්මුඛ උනා.

ඕගොල්ලො ආවෙ අරයා ගැන කථා කරන්න නම් කරුණාකරලා ඒ ගැන කථා කරන්න එපා. චූටි නංගි කථාව පටන් ගන්නත් කලියෙන්ම උදැල්ල දැම්මා. ඇයට තමන්ගෙ දුක්බර අතීතය සිහිවෙලා දෙනෙතට කදුළු උනනවා. ඒ දසුනෙන් ඇගේ නැගණියත් සංවේදී වෙච්ච හැටි මට හොදට මතකයි.

ඔය ගැන ආයෙ කථා කරනවට මමත් කැමති නෑ පුතේ...මේ දරුවා පහුගිය කාලෙ මොන තරම් දුක් වින්දද ඔය සම්බන්දෙ හින්දා, මම ඒ සේරම දේවල් දන්නවා. චූටි නංගි වෙනුවට ඇගේ මව අපි එක්ක කථා බහේ යෙදෙනවා.

ඔයාලා ඉක්මනට ආපහු යන්න...තාත්තා ආවොත් ප්‍රශ්නයක් වේවි. 

අන්තිමේදි මම චූටි නංගි සමග  පුද්ගලිකව කථා කරන්න මිදුලේ නවතා තිබුන රථය අසලට ඇයව කැදවාගෙන ආවා. වෙනත් කෙනෙක්ට කැමති වෙන්න කිව්ව සිරාට.....ආයෙමත් නගා ගැන හිතන්න පුලුවන්ද කියලා අහන්න සිදු වෙලා.

ප්ලීස්...ඔය ගැන ආයෙ මා එක්ක වචනයක්වත් කථා කරන්න එපා. මම අපේ ගෙදර ආපු කෙනාව බඳින්න හිත හදාගෙන ඉවරයි. 

රථයට හේත්තු වෙලා චූටි නංගි කරනා කථා බහ ඒ තුල ඉන්න නගා කොලුවට හොදට ඇහෙනවා. ඒකා වීදුරුවකුත් යන්තමට පහත් කරගෙන මේ කථා බහට ඇහුම්කං දෙනවා...

මම අන්තිම තුරුම්පුවත් ගැහුවා...

මේ වතාවෙ නම් අපේ එකා ඇත්තටමයි ආදරේ කරන්නෙ...ඒක මට හොදටම විශ්වාසයි...මට කියන්න ලැබුනෙ එපමණයි.

නවත්තගන්න...ඔය බල්ලා නිසා මම පුදුම දුකක් පහුගිය කාලෙ වින්දෙ...මට තවත් නම් දුක් විදින්න බෑ. චූටි නංගි මහා හයියෙන් අඩාගෙන නිවස තුලට දිව්වා...ඇගේ පියා පැමිණියහොත් අපට බඩකට පුරා සැලකුම් ලැබේවි කියලා හිතුන නිසාම තවත් මොහොතක් හෝ අපි එතැන සුනංගු උනේ නෑ. තමන්ට බල්ලා කියනවා නගාට හොදට ඇහුනා. ඒකා සද්දයක් නැතුව රථය තුල අසුන් ගෙන හිටියා.

පේනවනෙ...මේක ආයෙ කොහොමවත් අටවන්න බෑ...උඹ වෙන අතක් බලාගනින්...අස්සයා ගියාට පස්සෙ ඉස්තාලය වහලා වැඩක් නෑ. උඹ අන්තිම මොහොත වෙනකං මොන මගුලක් කලාද ? පුෂ්පයා තමන්ගෙ තීරණය නගාට දැනුම් දුන්නා.

මේ සිදුවීමෙන් පස්සෙ අපි සුපුරුදු පරිදි නැවතත් රැකියාවේ කටයුතු සමග කාර්යබහුල වෙලා. නමුත් නගා තවමත් ඇය ගැන හිතමිනුයි කාලය ගත කරන්නේ. මගේ රළු වදන් හමුවේ අපේ නිවෙසට මේ ගැන කථා කරන්න නාවාට ඒකා තව දුරටත් පුෂ්පෙ කොලුවට ඇණයක් වෙලා.

මට ඒකි නැතුව ඉන්න බෑ බං...අපි වශියක් වත් කොරමු....නොපෙනෙන බලවේග කෙරෙහි විශ්වාසය තියන තැනටම දැන් දැන් නගා පිරිහිලා. පහුගිය කාලෙ මේ ආදරය නිසා චූටි නංගි වින්ද වද වේදනා දෙගුණ තුන්ගුණ වෙලා දැන් නගා විදිනවා. හරියට දෛවයේ සරදමක් වගෙයි.

නගාගේ කරදරයෙන් බේරෙන්න බැරිම තැන...උඹට ඒක කරන්නම ඕනෙ නම් කොරහං...කියලා පුෂ්පයා කිව්ව නිසා නගා කොහේදෝ දේවාලයකට ගොහිං වැලි අහුරක් මතුරවගෙන තිබුනා. චූටි නංගිගේ දෙපතුල් වලට පෑගෙන විදියට මේ වැලි ඇගේ මිදුලට ඉහින එක තමයි නගාට ඇති අභියෝගය.

අන්තිමේදි වැලි ඉහින්න යන ගමනට පුෂ්පෙ කොලුවා  අකමැත්තෙන් උනත් එකතු උනා. දවසක්දා මහ රාත්තිරියක ඇගේ නිවස සමීපයටම යතුරු පැදිය පදවපු පුෂ්පයා වටා පිටාව ගැන අවධානයෙන් ඉද්දි නගා වැලි අහුර ඉහින්න චූටි නංගිගේ නිවෙස සමීපයට ගොහින්....මේ වෙලාවෙ හදිසියේම වගේ නිවසේ පිටත විදුලි බුබුලක් දැල්වීම නිසා කලබලයට පත් වෙච්ච අපේ අසරණ පෙම්බරා ඈත තියා දමලා ගැහුව වැලි අහුර මිදුලට මෙහායින් තියෙන පොල් ගහක වැදිලා එතැනම බිම පතබෑවුන බව මේ සිද්ධිය සිදු වෙලා බොහෝ කාලයකට පස්සෙ මට කිව්වෙ පුෂ්පෙ කොලුවා.

තව දුරටත් අපට උගේ අදෝවැඩියාව අහන්න වෙලාවක් තිබුනෙ නෑ. දිගින් දිගටම චූටි නංගි වෙත නගා කරදර කල නිසාම ඇය අපේ මිතුරු ඇසුරෙනුත් ටිකෙන් ටික ඈත් උනා. එහෙම උනා කියලා ඇයට වරදක් කියන්න බෑ.

කාලයේ ඇවෑමෙන් නගා බොහොම අමාරුවෙන් තමන්ගෙ උපාධිය සම්පූර්ණ කරගත්තා. චූටි නංගි යෝජිත පුරුෂයා සමග විවාහ උනා. ඉන් පසුව  කිසිදිනෙක ඇය අපට මුලිච්චි වෙලා නෑ. ජංගම දුරබණුවෙන් හෝ කථා බහක යෙදී නෑ. වර්තමානය වෙද්දී චුටි නංගි තමන්ගේම කියලා ඔසු හලක් (Pharmacy) පවත්වාගෙන යන එක්දරු මවක් බව කවුදෝ කිව්වා මතකයි. චූටි නංගිට රැස් පෙන්වලා අන්තිමේදි බලු වෙච්ච නගා නම් තවමත් අවිවාහකයි.

කොටස් 4 ක් පුරා දිවගිය නගාගේ ආදර අන්දරය මෙතෙකින් සමාප්තයි !

මම කාමරේ අරින සිරා කොලුවා.

ප.ලි

ඇතැම් පෙම්වතෙකුට හිටි අඩියේම තමන්ගේ පෙම්වතිය අගේ නැතුව යයි. නමුත් ආදර සම්බන්ධය නිම වූ පසු ඇය තවත් කෙනෙකු සමග සම්බන්ධයක් ගොඩනගා ගතහොත් නැවතත් ආදරය කරන්නට සිතෙයි. මේ අරුමය කුමක්ද ? ආදරය යනු ආත්මාර්ථකාමී සිතුවිල්ලක් නොවේද ?