78 සංචාරය මරණයෙන් කෙළවර වන සෙන්ටිනල් දූපත

අපේ පෘථිවිය අතීතයට වඩා තාක්ෂණය පැත්තෙන් දැන් සෑහෙන්න දියුණුයි. ලෝකයේ එහා කොනේ ඉන්න කෙනාගෙ මුහුණ බලාගෙන සජීවීව කථා කරන්න, එහෙමත් නැත්තං පෘථිවිය වටා තියෙන ග්‍රහලෝක වලට යානා යවන්න තරම් පෘථිවියේ තාක්ෂණය දියුණු වෙලා. මේ කියන තාක්ෂණය දවසින් දවස සෑම අහු මුල්ලක් දක්වාම ව්‍යාප්ත වෙමින් තියෙන වටපිටාවක, චන්ද්‍රිකාවක් තබා ගුවන් විදුලියක් හෝ දැක නැති මිනිසුන්ද ඉන්න බව ඇහුවම ඔබ පුදුම වෙන්නත් පුලුවන්. නමුත් එය මුසාවක් නොවෙයි. එවැනි මිනිසුන් විවිධ ගෝත්‍ර වලට අයත් සාමාන්‍ය ජන ජීවිතයට ඔබ්බෙන් ජීවත් වෙන ඇත්තො. අපි අද යුරේනියම් වලින් බල ගැන්වෙන යුගයක් පිළිබද කථා කරද්දි මේ ඇත්තන් තවමත් ජීවත් වන්නේ ගල් යුගයේ.

අතීතයේදී සාමාන්‍ය ජන සමාජයෙන් බැහැරව හුදෙකලාව දිවි ගෙවපු බොහෝ ගෝත්‍ර, මේ වෙද්දි සාමාන්‍ය සිවිල් සමාජය සමග යම් තරමකින් ගණුදෙනු කරන තැනට පත්වෙලා තිබුනත්, වර්තමානයේ වුවත් කිසිම විදියකින් බාහිර ලෝකය සමග සම්බන්ධතා තබාගන්න අකමැති ගෝත්‍රයක් පිළිබද ජාලෙන් පෙරලපු කථා විශේෂාංගයෙන් අද ඔබට කියන්නයි සිරා කොලුවගෙ මේ සූජානම. මේ අය ගැන සිංහලෙන් ලියවෙන දෙවෙනි වතාව මෙයයි.

බෙංගාල බොක්ක ආශ්‍රිත මුහුදු ප්‍රදේශයේ පිහිටා තිබෙන අන්දමන් සහ නිකෝබාර් දුපත් සමූහයට දූපත් 300 ක් පමණ අයත්, ඒවා කිලෝමීටර් 725 ක් පමණ දුරට විහිදී තිබෙනවා. මේ දූපත් සමූහයේ ඉන්දුනීසියාව සහ මියන්මාරය අතර කලාපයේ පිහිටා තිබෙන උතුරු සෙන්ටිනල් (North Sentinel ) දූපත ලොවෙන් හුදෙකලා වී වෙසෙන, සෙන්ටිනලීස් (Sentinelese) නැමති ගෝත්‍රයේ නිජබිමයි.

ඉන්දුනීසියාවේ සුමාත්‍රා දූපතේ ඉදන් කිලෝමීටර් 120 ක පමණ දුරකින් තමයි වර්ග කිලෝමීටර් 72 විශාල උතුරු සෙන්ටිනල් දූපත පිහිටා තිබෙන්නේ. ඉන්දියාවට අයත් මේ දුපත් සමූහයේ පරිපාලන කටයුතු සිදු වෙන්නෙ Port Blair හි සිටයි. ඉංග්‍රීසි ජාතිකයන් Port Blair පාවිච්චි කර තිබෙන්නේ ඉන්දියාවේ සිටි ඔවුන්ගේ සිරකරුවන් වගේම තමන්ට විරුද්ධව නිදහස් සටනට එළැඹුන සටන් කරුවන් රදවා තබන සිර කදවුරක් විදියට බවයි සදහන් වෙන්නෙ.

සෙන්ටිනලීස් ගෝත්‍රිකයො තමන්ගෙ දූපතට ආගන්තුකයන්ට පැමිණෙන්න අවසර දෙන්නෙ නෑ. ඒ වගේම බාහිර සමාජය එක්ක ගණුදෙනු කරන්න කිසිම කැමැත්තක් දක්වන්නෙත් නෑ. ඒ හේතු නිසාම ලෝකයේ සංචාරය කරන්නට අපහසුම තැන විදියට උතුරු සෙන්ටිනල් දූපතේ නම සමහර තැන් වල කියවෙනවා.

මේ ගෝත්‍රිකයන්ගෙ සමීප ඡායාරූප නෑ.

මේ ගෝත්‍රයේ මුතුන් මිත්තො අප්‍රිකානු මහද්වීපයෙන් පිටතට ගිය පළමු කණ්ඩායමේ අය කියලයි විශ්වාස කරන්නෙ. ඒ ඇත්තො කුඩා ප්‍රමාණයේ දූපත් වල වසර 60000 කට ඈත අතීතයේ සිටම ජීවත් වෙලා තිබෙනවා. පොදුවේ අන්දමන් දූපත් කලාපයේ මෙන්ම ගිණිකොන දිග ආසියාව, මලයාසියානු අර්ධද්වීපය අවට, පිලිපීනය, ඔස්ට්‍රේලියාවේ ටස්මේනියාව ආශ්‍රිතව හුදෙකලාව ජීවත් වන මෙවැනි ගෝත්‍ර වර්ග වල මිනිසුන් හදුන්වන්නේ Negritos යන නමින්. තද කලු පැහැති සම වගේම, කැරළි ගැසුනු කොණ්ඩයත් මේ අයගෙ පොදු ලක්ෂණ. මේ ගෝත්‍රිකයන්ගෙන් බොහෝ අය බාහිරට පේන විදියට වමත් කරුවන්.

මේ ඇත්තන්ගෙ වාසස්ථාන හරිම සරලයි. පැති බැමි හෝ බිම් සැකසුමක් නැති , වහළය සදහා කොළඅතු සෙවිලි කල නිවාස තමයි සෙන්ටිනලීස් ජනතාව භාවිතා කරන්නේ. ඒ අයට තමුන්ගෙ ආයුධ හදා ගන්න ලෝහ වර්ග තිබුනෙ නෑ. නමුත් ඔවුන්ගේ වෙරළට පාවී ආ ලෝහ කොටස් වගේම මේ මුහුදු කලාපයේ අනතුරට පත්වෙච්ච නෞකා මගිනුත් ඇතැම් ලෝහ කොටස් මේ අය අතට ලැබුනා. ඔවුන් ඒවා මුවහත් කර තමන්ගේ ආයුධ ලෙස භාවිතා කරන පිහිය, හෙල්ලය,වෑය, ඊතල ආදිය සකසාගෙන තිබෙනවා. සතුන් දඩයම, මාළු ඇල්ලීම වැනි කටයුතු වලට ඔවුන් ඊතල යොදා ගන්නවා. මේ ජනතාව ආහාර ද්‍රව්‍ය ගබඩා කිරීම උදෙසා උණ බට වලින් මෙන්ම වෙනත් ශාක පොතු වලින් භාජන සකසාගෙන තිබෙනවා.

සෙන්ටිනලීස් ජනවර්ගයේ වර්තමාන ජනගහණය ගැන කවුරුවත් හරියට දන්නෙ නෑ. බාහිර ලෝකය සමග කිසිදු සම්බන්ධතාවක් පවත්වන්නේ නැති නිසා ඒ ගැන පැහැදිලි තොරතුරක් දක්වන්න කිසිවෙකු නෑ. ජනගහනය සමහර විටක 40 - 500 අතර ප්‍රමාණයක් වෙන්නත් පුලුවන්.

තමා වෙත පැමිණෙන ආගන්තුකයා සතුරෙක්ද නැතිනම් මිතුරෙක්ද කියන කාරණේ මේ ගෝත්‍රිකයො තකන්නෙ නෑ. ඔවුන්ගේ දූපතේ වෙරළට ඔබ වැරදීමකින් ආවත්, හිතාමතාම ආවත් ඔවුන් ආගන්තුක සත්කාරය දක්වන්නෙ එකම විදියකට. ඒ හෙල්ලයකින් ඔබේ පපුවට ඇනීමෙන්, නැතිනම් ඊතල වරුසාවක් ඔබ වෙත එල්ල කිරීමෙන්. කෑම වර්ග, රෙදිපිළි ඒ ඇත්තන්ට වැදගත් දේ නොවෙයි. මේ අය කෙතරම් නොහික්මුන ජන වර්ගයක්ද කියනවානම් 2004 වර්ෂයේදි ඇති වූ සුනාමියෙන් පීඩාවට පත් වූ මේ දූපතේ ගෝත්‍රිකයන් බේරා ගැනීමට පැමිණි, ගලවා ගැනීමේ කණ්ඩායම් වලටත් ඔවුන් තමන්ගේ සුපුරුදු ප්‍රතිචාරයම දැක්වූවා.

2004 වසරේ සුනාමියට තුඩුදුන් සාගර පතුලේ භූමිකම්පාව සිදුවුනේ නිකෝබාර් දූපත් ආසන්නයේ. මේ විපතින් හානියට පත් වූ මේ ගෝත්‍රයේ ඇත්තන්ට සහන සලසන්න සහන කණ්ඩායම් ආවෙ ඉන්දියානු නාවික හමුදාවෙ හෙලිකොප්ටර් යානා වලින්. ඒ අයට අවශ්‍ය උනේ සුනාමියෙන් දිවි බේරාගත් අයට උදව් කරන්න. ඒ උනාට ඒ සදහා තිබුනේ ඉතාම සුළු අවස්ථාවක්. මේ හින්දම ඔවුන් ආහාර අඩංගු පාර්සල් ගුවනින් දූපතට හෙළන්නට උත්සාහ කලා. ඒ අවස්ථාවේත් දූපතේ ගල් ගුහා වලින් වගේම කැලෑව තුලිනුත් මතුවෙච්ච සටන් කාමීන් හෙලිකොප්ටරය දෙසට ඊතල ප්‍රහාර එල්ල කලා.

සෙන්ටිනලීස් ගෝත්‍රිකයො ගැන ලෝකයා දන්නෙ බොහොම පොඩ්ඩයි. ඔවුන්ගේ භාෂාව, ඔවුන්ගේ පුරුදු, ගති සිරිත් විරිත්, ආදී සියලුම දේ මේ දූපතේ ගණ වනාන්තර ඇතුලෙ සැගවිලයි තිබෙන්නේ. නමුත් ඔවුන් තමන්ගෙ ජීවිතය පවත්වාගෙන යන්න ආහාර සපයාගන්න විදිය ගැන නම් අදහසක් ගන්න අපහසු නෑ. ස්වභාවයෙන්ම හොද දඩයක්කාරයො පිරිසක් වන මේ අය සත්ව දඩයමෙන් සහ කැළෑවෙන් සපුරා ගන්නා වෙනත් ශාකමය ආහාර මගින් යැපිය යුතුයි. ඔවුන් සත්ව පාලනය හෝ කෘෂි භෝග වගාකිරීමක් කරන්නෙ නැති නිසා වෙනත් විකල්පයක් නෑ. පොල්, පළතුරු, මාළු, කැලෑ ඌරන්, කටුස්සන්, තලගොයින්, කැස්බෑවන්, කුඩා කුරුලු වර්ග, වගේම මී පැණිත් ඔවුන්ගේ අාහාර වලට ඇතුලත්. 1880 දී සෙන්ටිනල් දූපතට පැමිණි ඉංග්‍රීසි ජාතික ගවේෂකයකු වන M. V. Portman පවසා තිබෙන්නේ මේ අයගේ ආහාර සැකසීමේ රටාව අන්දමන් දූපත් කලාපයේ වෙසෙන Onge ගෝත්‍රිකයන්ගේ ක්‍රමයට සමාන නමුත් අැබෝර්ජියන් වරුන්ගේ ක්‍රමයට වඩා බොහෝ සේ වෙනස් බවකි.

උතුරු සෙන්ටිනල් දූපත ඉන්දියාවට අයත් වුවත් මෙහි වෙසෙන ගෝත්‍රිකයො ඉන්දියාව කියන්නෙ කුමක්ද කියලාවත් අහලා නැතුව ඇති. සෙන්ටිනල් ගෝත්‍රිකයො සමග මිත්‍රත්වය ඇති කරගන්න ඉන්දියානු රජය උත්සාහ ගෙන තිබෙන්නේ 1964 වගේ කාලයේ ඉදන්. අවසානයේ ඔවුන්ගේ සියලුම උත්සාහයන් වතුරේ ගියා. මේ උත්සාහයන් 90 දශකයේ මුල් භාගයේදී ඔවුන් අතහැර දැමූවේ මෙවැනිම වැඩසටහන් නිසා Jarawa ගෝත්‍රිකයන් අතින් රජයේ පාර්ශවයේ කීප දෙනෙකු මිය ගියාට පස්සෙ.

මේ ඉන්නෙ Jarawa  ගෝත්‍රිකයන්

ඉන්දියානු රජය උතුරු සෙන්ටිනල් දුපතට පිවිසීම වර්තමානයේ තහනම් කරලයි තියෙන්නෙ. දූපතට හැතැප්ම 3 කට එහායින් අනතුරු ඇගවීමේ කලාපයකුත් පවත්වාගෙන යනවා. ඒ මෙහි පිවිසෙන්න උත්සාහ කරන ගවේෂකයින්ගේ සහ වෙනත් ඇත්තන්ගේ ආරක්ෂාව උදෙසා. නමුත් කිසියම් ක්‍රමයකින් මේ ආරක්ෂක කලාප පසුකරගෙන මේ ගෝත්‍රිකයන් මුණ ගැසෙන්නට යන කෙනෙකුගේ අවසානය නම් සුන්දර එකක් වෙන්නෙ නෑ.

සෙන්ටිනල් ගෝත්‍රිකයො තමන්ගෙ ආගන්තුකයන්ට ආගන්තුක සත්කාර දක්වපු ආකාරය ගැන කියවෙන ඇග කිළිපොලා යන කථා පුවත් කීපයක්ම තියෙනවා. 1896 දි අන්දමන් දූපතේ ඉංග්‍රීසි ජාතිකයන් පිහිටා තිබුන සිර කදවුරෙන් පැන ගිය සිරකරුවෙක් අහම්බෙන් වගේ උතුරු සෙන්ටිනල් දූපතේ වෙරළ තීරයට පැමිණියා. දවස් කීපයකට පස්සෙ ඔහු පිළිබද සෙවූ කණ්ඩායමට වෙරළෙ තිබිලා හමුවුනේ උගුරු දන්ඩ කපා, ඊතල වලින් සිදුරු කර තිබුන ඔහුගේ මළ සිරුර.

1974 දි මේ ඇත්තන් ගැන වාර්තා වැඩසටහනක් සකසන්න එහි ගිය ඉන්දියානුවන් කණ්ඩායමක අධ්‍යක්ෂක වරයාගෙ කලවයේ අඩි 8ක් පමණ දිග දැවැන්ත ඊතලයක් ඇනුනා. මේ ගමන අතරතුර කෙසේ හෝ ඔවුන් මේ ගෝත්‍රිකයන්ගෙ ඇතැම් දර්ශන රූපගත කලා. එය තමයි සෙන්ටිනල් ජනවර්ගය කැමරා කාචයට නැගූ ඉතිහාසයේ පළමු අවස්ථාව. මේ දර්ශන ඔවුන් Man in Search of Man නැමති වාර්තා වැඩසටහනේ ඇතුල් කලා. පහතින් දක්වලා තියෙන්නෙ එම වාර්තා වැඩසටහන. සෙන්ටිනල් ජනතාව වාර්තා වැඩසටහන් කණ්ඩායමට ප්‍රතිප්‍රහාර එල්ල කරන ආකාරය වගේම, මේ කලාපයේ වෙසෙන අවශේෂ ගෝත්‍රික කණ්ඩායම් දෙකක් වන Onge සහ Jarawa ගෝත්‍රිකයන්ගෙ දර්ශනත් මේ රූපරාමු වල තිබෙනවා. නමුත් සෙන්ටිනල් ජනතාව අනිත් ගෝත්‍ර දෙකේ ජනතාව වගේ මේ පිරිස සමග සුහද වෙන්නෙ නෑ.

ඉන්දියානු මානව විද්‍යාඥයකු වන T.N.පණ්ඩිත් මහතා 80 දශකය අග, 90 දශකය මුල් භාගයේ උතුරු සෙන්ටිනල් දූපතට ගිය රාජ්‍ය අනුග්‍රහය ලද සංචාර කීපයකට නායකත්වය ලබා දුන් අයෙක්.

අපි එහි ගිය සමහර අවස්ථා වල ගෝත්‍රිකයො අප දෙසට ඔවුන්ගේ තට්ටම් හරවා මළ පහ කරන ඉරියව්වෙන් වැල්ලෙ ඉදගත්තා. ඒ අපට අවමන් කරන්න, අපහාස කරන්න. ඔවුන් අපිව පිළිගන්න සූදානම් නෑ කියන ඉගිය තමයි ඒ විදියට ලබා දුන්නෙ. පන්ඩිත් මහතා ඒ විදියටයි තමන්ගෙ අත්දැකීම් ආවර්ජනය කරන්නෙ.

පුුදුමයකට වගේ බාහිරින් දූපතට පැමිණි අය කලහකාරී නොවන ලෙසට මේ ගෝත්‍රිකයන් විසින් පිළිගත්ත අවස්ථාවක් තිබෙනවා. 1991 ජනවාරි මස 4 වෙනිදා පණ්ඩිත් මහතාගේ මෙහෙයවීම යටතේ කාන්තා, පිරිමි, ළමා 28 දෙනෙකුගෙන් යුතු කණ්ඩායමක් එහි ලගා උනා.

ඒ අවස්ථාවෙ ඔවුන් අප මුණ ගැහෙන්න අප වෙත පැමිණියා. ඒක හරිම පුදුමයක්. ඒ ඇත්තො හිතන්න ඇති අපි සමග කථා බහ කරන්න දැන් කාලය ඇවිල්ලා කියලා. පණ්ඩිත් මහතා එහෙම කියනවා.

2011 වසරේදී ඉන්දියානුවන් පිරිසක් අසලටම පැමිණි සෙන්ටිනල් ජනතාව

නමුත් අවාසනාවකට වගේ වැරදීමකින් මේ දූපත ආසන්නයේ මාළු බෑමේ නිරතව සිටි ධීවරයන් දෙදෙනෙක් 2006 දි ගෝත්‍රිකයන් අතින් මිය ගියා. ඔවුන්ගේ මළ සිරුරු රැගෙන යාමට පැමිණි හෙලිකොප්ටරයටද ඔවුන් සුපුරුදු ඊතල ප්‍රහාරය එල්ල කලා.

වර්තමානය වන විටත් සබදතා ගොඩනගා ගැනීමට අපහසු වූ ගෝත්‍ර අතර අවසානයේ සිටින්නේ සෙන්ටිනල් ජනතාව. ඔවුන් නූතන ශිෂ්ඨාචාරය, සභ්‍යත්වය හදුනන්නෙ නෑ. ඔවුනට කල හැකි හොදම දේ තමයි ඔවුන් දැන් ජීවත් වෙන විදියට ලෝකයෙන් හුදෙකලා වෙලා ජිවත් වෙන්න ඉඩ දෙන එක. මේ අයට නූතන සමාජයට හැඩ ගැසීම ඉතාම අපහසු වාගේම ඔවුන්ගේ ශරීර වල ප්‍රතිශක්තිකරණ හැකියාවත් මේ නිසා වෙනස් වෙන්න පුලුවන්.

කිසිම අවස්ථාවක බාහිර ලෝකයෙන් කිසිදු උදව්වක් ලබා නොගන්නා මේ ජනවර්ගය සැබවින්ම පුදුමාකාර කණ්ඩායමක්. මෙවැනි මිනිසුන් වර්තමානයේ හරිම දුර්ලභයි. ඔවුන් කොහොමද බාහිර ලෝකය දකින්නෙ, ඔවුන්ව ආමන්ත්‍රණය කරන්නෙ, සමහර විට අපි ඔවුන් සෙන්ටිනල් ජනතාව ලෙස ආමන්ත්‍රණය කරන බව පවා ඔවුන් දන්නෙ නෑ. මේ ගෝත්‍රිකයො ගැන පරීක්ෂණ කරන ඇතැමෙක් එහෙම කියනවා.

අද ලිපියට මූලාශ්‍ර

Wikipedia අඩවියෙන් සහ යූ ටියුබ්හි වාර්තා වැඩසටහන් මගිනි.

මම කාමරේ අරින සිරා කොලුවා.

ප.ලි

වසරකට දෙවරක් පැවැත්වෙන මැලේසියාවේ සංචාරක අංශයේ දැවැන්තම ප්‍රදර්ශනය වන MATTA FAIR (Malaysian Association of Tours & Travel Agents) වෙනුවෙන් සහභාගි වීමට ඇති නිසා බොලාගේ කමෙන්ටු වලට සිරා කොලුවාගේ පිළිතුරු ප්‍රමාද වන බව දන්වා සිටිමි.

සෙන්ටිනල් ගෝත්‍රිකයො ගැන සිංහලෙන් පුංචි සටහනක් මෙන්න මෙතන තිබුනා.