Monday, April 20, 2015

54 මැලේසියාවේ අපේ අවුරුදු

සුන්දර මැලේසියාව තවත් සුන්දර කල දිනයක් ඊයෙ දිනයේ නිමාවට පත් විය. මව්බිමෙන්, තම ඥාති හිතෛශීන්ගෙන් ඈත්ව රිංගිට් සෙවීමේ සටනක නිරතව සිටින අපේම ජනතාවට මව්බිමේ ජීවත් වෙනවා යැයි මැලේසියාවේ සිට දැනෙන දවසක් වේ නම් ඒ මැලේසියාවේ බක්මහ උළෙල පැවැත්වෙන දවස බව අතිශෝක්තියක් නොවේ.

උදෑසන සිටම සතුටේ ගිලුන ඇස්ගෙඩි සහ උද්යෝගයේ හසරැලි සහිත අක්කලා නංගිලා අයියලා මල්ලිලා මෙන්ම නැන්දලා මාමලාද දකින විට බක්මහ උළෙල පැවැත්වෙන පිටිය තුල පුංචි සිරි ලංකාවක් මැවෙයි. ඒ අසිරිය මගේම දෑසින් දැක බලාගන්නට සිරා කොලුවාට ලැබුන දෙවන අවස්ථාව මෙයයි.

මේ සතුට අපට තිළිණ කරන්නට තිරය පිටුපස සිට බොහෝ පිරිසක් වෙහෙසෙති. මෙවැනි යමක් පිටරටක සිට සංවිධානය කිරීම යනු සැබැවින්ම භාරදූර්ය, දුෂ්කර, වියදම් අධික කාර්යයකි. එහෙත් ඒ සත්පුරුෂයන් බක්මහ උළෙලට පැමිණෙන කිසිවෙකුගෙන් ශත පහක් අයකරන්නේ නැත. උදෑසන ආහාරය මෙන්ම දිවා ආහාරයද නොමිලේම ලබා දී තරඟ වලින් ජය ගන්නා අයට වටිනා ත්‍යාග භෝග මෙන්ම දහසින් බැඳි පියලිද ලබා දෙති.

ශ්‍රී ලංකා විධායක වෘත්තීය වේදීන්ගේ  සංගමය /  මැලේසියාවේ ශ්‍රී ලංකා තානාපති කාර්යාලය / බ්‍රික්ෆීල්ඩ් නුවර බෞද්ධ මහා විහාරය / සෙන්තුල් පුරවයේ ශ්‍රී ජයන්ති සමිතිය / ශ්‍රී ලංකා සේවක සුභ සාධක සංගමය හා FOMSO (Federation of Malaysian Sri Lankan Organisations) යන සංවිධාන 6 ක් මේ බක්මහ උළෙල පිටුපස සිටිති. එයින්ම මේ කාර්යයේ බැරෑරුම් කම ඔබට අවබෝධ කරගත හැකිවනු ඇත.

ජනවාරි මස සිටම වි‍ටින් විට රැස්වී බක්මහ උළෙලට අදාළ තීන්දු තීරණ ගන්නා මේ සංවිධාන වල ඇත්තන් වසර ගණනාවක් පුරා එක්ව කටයුතු කිරීම ප්‍රශංසනීය ක්‍රියාවකි. මැලේසියාවේ ක්‍රිකට් ක්‍රීඩාව සංවර්ධනය කිරීමේ වගකීම ලෝක ක්‍රිකට් සම්මේලනයෙන් බාර දී ඇති ලංකාවේ පළමු ටෙස්ට් ක්‍රිකට් නායකයා ලෙස විරුදය ලැබූ බන්දුල වර්ණපුර මහතා බක්මහ උළෙල සාර්ථක කරගැනීමට මේ සංවිධාන වලට ගුරුහරුකම් දෙමින් ලබාදෙන සහයෝගයත් මේ සාර්ථකත්වය අත්කරගැනීමට බොහෝ සේ ඉවහල් වී තිබේ.

සිරා කොලුවා ඉහත එකදු සංවිධානයකටවත් අයත් නොවූවත් මගේ ආයතන ප්‍රධානියා සහ ඔහුගේ මෙන්ම මගේද හිතවතුන් මේ සංවිධාන තුල සිටීමත් නිසා බක්මහ උළෙලේ ඇතැම් කටයුතු වලට මගේ දායකත්වය ලැබේ. සමහර විටක ඒ වේදිකා සැරසිලි නිර්මාණය කිරීමෙනි. ඇතැම් විටෙක බඩු ගේන්න කඩේ යාමෙනි.

මෙදා පොටේ මා හට මේ කාරණා ද්විත්වයම ඉටු කරන්නට අවස්ථාව ලැබුනි. සෙනසුරාදා දිනයේ ආයතන ප්‍රධානියාගෙන් මිළදී ගතයුතු භාණ්ඩ ලැයිස්තුව හා මුදල් ලැබුනි. දැන් ඉතින් මේවා තිබෙන තැනකින් සොයා මිළදී ගැනීමේ වගකීම මා සතුය.

කොට්ටා පොර ගසන්නට කොට්ටා / කණා මුට්ටිය බිඳින්නට මුට්ටි / බනිස් කෑමේ තරඟයට බනිස් / මුට්ටි එල්ලන්නට කොහු ලණු / ආදී අටෝරාශියක් ද්‍රව්‍ය එහි විය. දිවා වරුවේ ඔපීසියේ මැලේසියානු ජාතික දෙමළ තරුණයෙකු සමග ඇතැම් දේ මිළදී ගත්තත් තවත් දේ හවස් යාමයේ මිළදී ගැනීමට ඉතිරි විය. එවර අායතන ප්‍රධානියාගේ පාකිස්ථාන ජාතික රියදුරා මා හට සහාය විය. ඇතැම් කඩයක බඩු විකුණන්නේ බංගලි තරුණයෙකි. නැතිනම් පාකිස්ථාන හෝ ඉන්දියානු ජාතිකයෙකි. ඉංග්‍රීසි වටහාගැනීමට අපහසු ඔවුන් සමග හින්දි භාෂාවෙන් හෝ උර්දු භාෂාවෙන් කථා කොට ඒවා මිළදී ගන්නට තාහීර් නම් මේ මිත්‍රයා උදව් විය.

මැටි මුට්ටි කීපයක් සොයාගන්නටද සෑහෙන කාල වේලාවක් ගත විය. දමිළ ව්‍යාපාරික ස්ථාන වල මැටි කළ තිබුනද කණා මුට්ටියට ගැලපෙන ප්‍රමාණයේ මුට්ටි ඒවායේ නොවීය. අවසානයේ දෙමළ මල් කඩයක තිබී අපට උවමනා ප්‍රමාණයේ මුට්ටි සොයාගත හැකි විය.

මල්ලි බඩු ටික ගත්තද ? කණා මුට්ටියට ගහන්න පොල්ලකුත් හොයාගෙන එන්න. බක්මහ උළෙලේ සංවිධාන කටයුතු වල ප්‍රධානම කටයුතු රැසක් ඉටුකරන කාලිංග අයියාගෙන් ඇමතුමකි. මේ කාරියට ගැලපෙන පොල්ලක් කොහෙන් හොයන්නද ? මම තනිවම සිතුවෙමි. අවසානයේ චීන ගොඩනැගිලි ද්‍රව්‍ය අළෙවිසැලක නතර වූයෙමි. උදළු මිටක් මේ කාරියට ගැලපෙන බව මගේ අක්මාව මට පැවසූවෙන් උදළු මිටක් ඉල්ලුවෙමි. උදැල්ලට ඉංග්‍රීසියෙන් කියන නම කියූවද ඔවුන් උදැල්ල හදුනන්නේ නැත. මම අභිරූපන ආකාරයෙන් කුඹුරු කොටා පෙන්නුවෙමි. එහෙත් වෙනසක් නැත. අවසානයේ එම ස්ථානයේ සේවයේ නිරතව සිටි හින්දි දන්නා තැනැත්තෙකු සොයා උදළු මිටක් සොයා දෙන්නට තාහීර් සමත් විය.


අවසානයටම බනිස් කෑමේ තරගයට බනිස් සහ පැමිණෙන පිරිසට ජලය සම්පාදනය අපේ ලැයිස්තුවේ ඉතිරි විය. ලංකාවේ මෙන් ටී බනිස් සෙව්වද ඒ කලබලයේ ඒවා සොයාගත නොහැකි තැන පාර අයිනේ බර්ගර් කඩයක බර්ගර් සකසමින්  සිටි මැලේ නංගියෙකුට කාරණය පවසා බර්ගර් බනිස් මිළදී ගන්නට හැකි වූ අතර අප සෙවූ ආකාරයේ පානීය ජලය අඩංගු පෙට්ටි සොයාගැනීමට සෑහෙන වෙහෙසක් දරන්නට විය. ආයතන ප්‍රධානියාගේ සැප රිය මා කියන කියන තැනට පැදවූ තාහීර් අවසානයේ මගේ එකම තුරුප්පුව වූ අතීතයේ දිනෙක එදිනෙදා ද්‍රව්‍ය මිළදී ගත් තොග වෙළඳසැල ඉදිරියේ රථය නතර කලේය. අපේ වාසනාවට මෙන් එහි අවැසි දෑ තිබූ අතර මා ඇනවුම් කලේ පානිය ජල බෝතල් අඩංගු පෙට්ටි 23 කි. එහෙත් එහි අයකැමි මැලේ යුවතියන්ගේ ඉංග්‍රීසි දැනුම ඉතාම අවම මට්ටමක තිබීම නිසා ගණක යන්ත්‍රයක 23 සටහන් කර පෙන්වීමට මා හට සිදු විය.

බර්ගර් බනිස් කන්නට සැරසෙන අපේ පැටව්

අවැසි දෑ මිළදී ගැනීමට සමගාමීව පිටියේ කටයුතු අධීක්ෂණයට ඉහත සඳහන් සංවිධාන වල නිළදරුවන් සෙනසුරාදා සවස් වරුව වන විට පැමිණ සිටිියේය. ඒ අතර මැලේසියාවේ ශ්‍රී ලංකා තානාපති තුමාද මම දුටුවෙමි. එතුමා බොහෝ නිහතමානී පුද්ගලයෙකි. තැනක කොට්ටාපොර අට්ටාලය ඉදිවෙයි. තවත් තැනක පැමිණෙන ජනතාවට සෙවන සදන්නට විවිධ දෑ සැකසෙයි. සෙනසුරාදා රාත්‍රිය වන විට ප්‍රීතිමත් ඉරිදාවකට සියල්ල සූජානම් වී අහවරය.

ඉරිදා උදෑසන අවදි වී මගේ කාමරයේ කවුළුවෙන් බැලූ විට අවුරුදු උත්සවය පැවැත්වුන බ්‍රික්ෆීල්ඩ් නුවර නගර සභා ක්‍රීඩාංගනයට ඇදෙන අපේ සහෝදර සහෝදරියන් මගේ නෙතට හසු විය. ඒ දසුන බලා සිටින්නට ආශා සිතෙන එකකි. ක්‍රීඩා පිටියට ඇතුලු වෙද්දීම තමන් තරඟ කරන්නට බලාපෙ‍ාරොත්තු වන තරග ඉසව් සඳහා ලියාපදිංචි වීමට අවස්ථාව සලසා තිබූ අතර ඉන් පසු නොමිලේ සැපයෙන උදෑසන අාහාරය භුක්ති විඳින්නට කාට කාටත් ඉඩ ලැබුනි.

ලියාපදිංචිය


පිටියේ ශ්‍රී ලංකා හා මැලේසියානු ජාතික ධජ ඔසවා ජාතික ගීත ගායනා කිරීමෙන් පසු උත්සවයේ වැඩකටයුතු ආරම්භ වූයේ මැලේසියාවේ ශ්‍රී ලංකා තානාපති ඊබ්‍රාහිම් අන්සාර් මහතාගේ ප්‍රධානත්වයෙන්. මේ අවස්ථාවට බ්‍රික්ෆීල්ඩ් බෞද්ධ විහාරවාසී සිරිධම්ම හිමියන්ද වැඩම කර සිටි සේක. එයට අමතරව බක්මහ උළෙල සංවිධානය පිටුපස සිටින සංවිධාන 6 ට අයත් පිරිසත් එක්ව සිටියහ. ශ්‍රී ලාංකික ප්‍රජාව වෙනුවෙන් ඉතා විිශාල වැඩ කොටසක් කරන සිරිධම්ම හිමියන් මැලේසියාවේ වෙසෙන ශ්‍රී ලාංකිකයන්ගේ නොමඳ ගෞරවයට පාත්‍ර වූ හිමිනමකි.

මැලේසියාවේ ශ්‍රී ලංකා තානාපති තුමා ජාතික ධජය එසවීමට සූදානමෙන්

සිරිධම්ම හිමියන් සමග සම්භාවනීය අමුත්තන්

උන් වහන්සේගේ සංඥාවෙන් පිටියේ මුලින්ම ආරම්භ උනේ පිරිමි මැරතන් තරගය. ක්‍රීඩා පිටියක් තුල මැරතන් දිවීම පහසු නැති නිසාම තරග කරුවන්ට ලැබී තිබුනෙ බොහොම පහසු ඉලක්කයක්. පිටියේ වට 10 කින් තරගය සම්පූර්ණ වුවත් ජයග්‍රාහකයාට රු 40000 කට ආසන්න මුදල් ත්‍යාගයක් ලබා දෙන්නට සංවිධායකයින් කටයුතු කොට තිබුනා.

පිරිමි මැරතන් තරගය ආරම්භයට සිරිධම්ම හිමි සූදානමෙන්

මැරතන් තරගයේ ජයග්‍රාහකයන්
මේ තරගයෙන් අනතුරුව බන්දුල වර්ණපුර මහතාගේ ආරම්භක සංඥාවට කාන්තා මැරතන් තරඟය ආරම්භ උනා. මේ තරග ද්විත්වයම මුල සිටම ඉතාම තරඟකාරී වූයේ තම තමන්ගේ හිතවතුන් දිරිමත් කරමින් හඩනැගූ ඔවුන්ගේ හිතවතුන් නිසාමයි.

කාන්තා මැරතන් තරගයේ ආරම්භය


මැලේසියාවේ බක්මහ උළෙලේ තෙවැනි වතාවටත් නිවේදකයා ලෙස කටයුතු කලේ තරුණ රංගන ශිල්පියෙක් වන චින්තක පීරිස්. ඔහුගේ කථන හැකියාවත්, විටින් විට එකතු වූ හාස්‍යමය බස් වහරත් පැමිණ සිටි ජනතාව සිනා සයුරේ ගිල්වන්නට සමත් උනා.

චින්තක


තරග එකින් එක ඉදිරියට යද්දි බක්මහ උළෙල මැද්දට හදිසියේම අමුත්තො කීප දෙනෙක් කඩා පාත් උනා. බැලූ බැල්මට මේ අයගෙ මුහුණු බොහොම සුපුරුදු ඒවා. සමහර මුහුණු දුටු පමණින් සිනා යනවා. මෙවර බක්මහ උළෙලින් ඇතැම් ක්‍රීඩා අංග ඉවත් කරලා. ඒ වෙනුවට හවස් යාමයේ සරත් කොතලාවයන්ගෙ නරි බුරති වේදිකා නාට්‍ය බෞද්ධ මහා විහාර ශාලාවේදී වේදිකාගත කරවන්න සංවිධායකයො තීරණය කරලා තිබුනා. ඒ නාටකේ රඟපාන නළුවො තමයි මේ පැමිණි ඇත්තො.

අවුරුදු උත්සවයට පැමිණි ජනතාව එක්ක ආගිය තොරතුරු කථා කරමින්, ඡායාරූප වලට පෙනී සිටිමින් මේ අය කොයිතරම් නිහතමානී පිරිසක්දැයි පසක් කලා. තමන් නළුවො කියලා මවාගත්ත ප්‍රතිරූප නඩත්තු නොකල නිසාම මැලේසියාවෙ බක්මහ උළෙලට මේ අයගෙන් ලැබුනෙ කදිම කල එළියක්. ඔවුන්ගේ ගීත ගායනා, රස කථා නිසාම අපේ ජනතාව බොහෝ සේ කුල්මත් උනා.




සරත් කොතලාවල , සරත් චන්ද්‍රසිරි, මිහිර සිරිතිලක, ජනක රණසිංහ, ‍හේමන්ත ඊරියගම, වජිර කොඩිතුවක්කු, පුබුදු චතුරංග මේ නාටක කණ්ඩායමට අයත් උනා. ඡායාරූපයක් ගන්න එන්න කියලා ලැබුන සෑම ආරාධනාවකටම මේ හැමෝම ඉතාම නිහතමානීව පෙනී සිටියා.

ජනක රණසිංහ හෙවත් සුදු මල්ලි මගේ පාසලේම වැඩිහිටි සහෝදරයෙක්. සෑහෙන කාලෙක ඉදන් අපි අතර තියෙන සුහදතාව යලිත් අලුත් උනේ අලුත් අවුරුදු උත්සවයෙදි කෙරුන කථා බහත් එක්කයි. අපි කොහෙද බං අන්තිමට හමුවුනේ... ඔහුගේ කථාව ඇරඹුනේ එහෙමයි.

සුදු මල්ලි සමග සිරා කොලුවා




මිහිර අයියට අවුරුදු උත්සවයට ආපු ගැහැණු දරුවෙක් මුලිච්චි වෙලා. මේ හාදයා කට පියාන ඉන්නෙ නැතුව කෙල්ලගෙන් කැමතිම ක්‍රිකට් ක්‍රීඩකයා කවුද කියලා අහලා. එතනින් පස්සෙ කෙල්ල දුන්න උත්තර ඉතින් අපි එයාගෙම හඬින් අහලා බලමු.


බක්මහ උළෙලෙ සිත් ගත් තරග ඉසව්වක් උනේ බිත්තර ඇල්ලීමේ තරගය. මේ තරගය ගිය වතාවෙ වගේම මේ වතාවෙත් ජයග්‍රහණය කලේ එකම යුවලක් විසින්.

බිත්තර ජෝඩුව

උදේ වරුවෙ තරඟ පවත්වලා අවසන් උනාම නොමිලයේම ලැබුන දිවා ආහාරය භුක්ති විඳලා බක්මහ උළෙලට සහභාගි වෙන්න ක්‍රීඩාපිටියට පැමිණි ජනතාවට පා ගමනින් ආසන්නයේ පිහිටා තිබෙන බ්‍රික්ෆීල්ඩ් මහා විහාරයට යන්න සිදු උනා. සංවිධායකයින් බක්මහ උළෙල කොටස් දෙකක් ලෙස පවත්වන්නට ගත් තීරණය තමයි එයට හේතුව උනේ.



විකට ඇඳුම් තරගයේ අවස්ථා


මහා විහාර ශාලාවෙදි ගායනා තරගයත්, අවුරුදු කුමරිය තේරීමේ තරගයත්, විකට ඇඳුම් තරගයත් පැවැත්වුනා. අන්න එතැනදි තමයි මට මැලේ රාළව මුණ ගැහුනෙ. ගිය වතාවෙ වැදි නැටුමක් ඉදිරිපත් කරලා තෑගි භෝග දිනාගන්න ලැබුන හින්දා මැලේ රාළගෙ වැදි පෙනුම වෙන කෙනෙක් මේ වතාවෙ අරගෙන තිබුනා. අසරණ රාළට සිද්ධ උනේ තංගච්චි කෙනෙක් විදියට වෙස් වලාන තේ දළු නෙලන්න. මැලේසියාවෙ ඈත කඳුකර පළාතක වයසක චීන සීයා කෙනෙකු සමග නයි මිරිස් වවන මැලේ රාළ උන්දැ මට හමුවෙන්නෙ බක් මහ උළෙලෙදි පමණයි.

ඔබ මෙතෙක් නොදුටු මැලේ රාළගෙ රූ සොභා
බක්මහ උළෙලකදි කාගෙ කාගෙත් ඇස් යොමුවෙන ඉසව්ව තමයි අවුරුදු කුමරිය. මැලේසියාවෙ අවුරුදු උත්සවයෙත් තත්වය එලෙසමයි. සුන්දර යුවතියො 10 දෙනෙක් මෙවර තරගයට ඉදිරිපත් වෙලා හිටියා. ඒ අතර පහුගිය වතාවෙ තරග කරලා ජයගත්ත මුහුණුත් මම දැක්කා. සභාවෙ උන්න තරුණ පිරිසට කරන සහයෝගයක් විදියට මේ ඇත්තියො ලංකාවෙ ජීවත් වන පළාතත්, මැලේසියාවෙ ජීවත් වන පෙදෙසත් චින්තක පීරිස් ගොයියා ඒ ඇත්තියන්ගෙන්ම අහලා ප්‍රකාශ කොලා.


ජයග්‍රාහිකාවන්



විනිශ්චය මණ්ඩලය
මේ සියලු තරග අහවර වෙලා, ජයග්‍රාහකයන්ට ත්‍යාග ප්‍රදානෝත්සවයත් සිදුකරලා අවසන් උනාට පස්සෙ කාගෙ කාගෙත් බලාපොරොත්තුව වෙච්ච නරි බුරති නාටකේ වේදිකා ගත උනා. සිරා කොලුවා වේදිකා නාට්‍යයක් කරඹන්නෙ වසර 10 කට පමණ පස්සෙ. ඒ නිසාම මේ නාටකයෙන් දැනුන චමත්කාරය අති මහත්. මහා විහාර ශාලාව පිරී ඉතිරී යන්න රැස් වෙලා උන්න අපේ ජනතාව මේ නාට්‍ය නිසා ඉතාම සතුටක් ලැබුවා. මෙතෙක් වේලා නිවේදකයා ලෙස කටයුතු කොරාපු චින්තක ගොයියත් ගවුම් පොඩියක් ඇඳගෙන කෙලි පොඩිත්තක් වෙලා උන්නා නරි බුරති නාටකේ.

නරි බුරති නරඹන්නට මහා විහාරයට රැස්වූ ජනතාව
මැරතන් තරගයේ ජයග්‍රාහිකාව
මැරතන් තරගයේ තෙවැනි ස්ථානය
නරි බුරති දර්ශන


නරි බුරති අවසන් වෙද්දි අමතක නොවන දවසක නිමාව සටහන් කරමින් හිරු සැඟවී ගිහින්. තැන් තැන් වල සතුටු සාමිචියේ යෙදෙමින් තමන් විඳි සතුට තමන්ගේ හිතවතුන් සමග බෙදාගනිමින් සිටි ලාංකික මුහුණු බලන බලන අත දකින්න ලැබුනා. මැලේසියාවේ අගනුවරට ඈතින් රැකියාව කරන ඇතමෙකුට තමන්ගේ හිතවතුන් මුණ ගැහෙන්නෙත් මේ උත්සවය දවසට නිසා ඒ අයට එක්වරම වෙන්වී යන්නට අපහසු වන්නට ඇති.

‍මේ ලස්සන දවස අපට තිළිණ කරමින්, තමන්ගෙ පුද්ගලික කටයුතු පවා කැප කරමින්, වෙහෙසකර දින, සති, මාස ගෙවමින්, මේ හැමදේම අපූරුවට සංවිධානය කරන්නට වෙහෙසුන, තමන්ගෙ ධනය, කාලය කැපකල සැමටම හිතෙන් ස්තූති කරමින් සිරා කොලුවා යලි නිවෙසට ආවෙ හිත පුරා දැනුන සතුටක් තුරුලු කරගෙන.

නොරටක සිට රැකියාවන් සමග ඔට්ටු වෙමින් මුදල් උපයන්නට වෙහෙසෙන ලාංකික ජනතාවට මැලේසියාවේ බක්මහ උළෙල සිතට මහත් අස්වැසිල්ලක්. ඒ අස්වැසිල්ල ලබන වසරේත් මේ අයුරින්ම විඳින්නට හැකියාව ලැබේවා කියලා ඔන්න මම අක්මාවෙන්ම ප්‍රාර්ථනා කොලා.



මම කාමරේ අරින සිරා කොලුවා.


ප.ලි

වීඩියෝ දර්ශන වල හඬ ඇතැම් තැනෙක දුර්වල වී තිබේ. එයට කමා කරත්වා.

54 comments:

  1. /* එහෙත් එහි අයකැමි මැලේ යුවතියන්ගේ ඉංග්‍රීසි දැනුම ඉතාම අවම මට්ටමක තිබීම නිසා ගණක යන්ත්‍රයක 23 සටහන් කර පෙන්වීමට මා හට සිදු විය. */

    ටික දවසක් මැලේසියාවේ ජීවත් වෙන කොට මැලේ භාෂාවේ වචනයක් දෙකක් ඉගෙන ගන්න අවස්ථාවක් හෝ අවශ්‍යතාවයක් එන්නේ ම නැද්ද?

    ReplyDelete
    Replies
    1. මැලේ භාෂාව ඉගෙන ගන්න ආසයි. එය කථා කරන්න හැකි නම් මෙහි ජන ජීවිතය හරිම පහසුයි. ඒත් මගේ කාර්යාල පරිසරය තුල කිසිවෙකු මැලේ භාෂාව කථා කරන්නෙ නෑ. මැලේසියානුවන් පවා ඉංග්‍රීසි පමණයි භාවිතා කරන්නෙ. ඉතිං සිරා කොලුවා වසර 10 ක් මැලේසියාවෙ හිටියත් මේ විදියට භාෂාව ඉගෙන ගන්න නම් ලැබෙන්නෙ නෑ. මම 1 ඉදන් 10 ට ගනින්න දන්නවා.

      Delete
    2. මැලේ භාෂාව ඉගෙන ගන්න ලේසි භාෂාවක් කියල තමයි කියන්නේ ...
      හැබැයි මට නම් නම් එච්චර ආස හිතෙන්නේ නෑ .. යන්තම් වචනයක් දෙකක් තමයි අවුරුදු 2ක් ඉඳලත් තාම දන්නේ ..

      Delete
  2. සිරා කවුද බන් අර අවුරුදු කුමාරි....හික්ස්...සිරා සිරා...ආ....

    සුභ අලුත් අවුරුද්දක් වේවා....!!

    ReplyDelete
    Replies
    1. මෙහෙ ඉන්න දැරිවියො තමයි ඉතිං...මොකෝ කියන්නෙ ලස්සනයිද...

      බොටත් සුභ අලුත් අවුරුද්දක් වේවා !

      Delete
  3. නියමෙට තිබිල තියනව වගේ. ඔක්කෝටම හපං අපේ මැලේ ගොයිය.

    ReplyDelete
    Replies
    1. තැන්කිව් රාජ්!!!!!!!!!!

      Delete
    2. ඔන්න මම මැලේ ගොයියගෙ ඇත්ත තත්වය පෙන්නුවා..කොල්ලෙක් වගේ සද්දෙ දැම්මට පේනවනෙ...සීයා කෙනෙක්ගෙ වයසෙ ඩයල් එකක්...

      Delete
    3. අම්මප මාත් හිතුවෙ සුට්ටං කොල්ලෙක් කියල.

      Delete
    4. මම හිතාගෙන උන්නු මැලේ ගොයියගේ වයසයි මේ රුපෙයි දැක්කම මට හිතුන මුන්දට ඒ වයසෙ දරුවොත් ඇති කියල...හෙක් හෙක්..

      Delete
  4. වැඩේ නැගල ගිහින් නේද. පෝටෛා් ටික නම් බුකියෙන් දැක්කා...

    ReplyDelete
    Replies
    1. ඔව් මචෝ...කියන්න කිසිම අඩුපාඩුවක් නෑ වැඩේ හොදට ගියා..මම ගෙනාපු බර්ගර් බනිස් ටිකත් පොඩි උන් බැරි බැරිගාතෙ ගිල්ලා.

      Delete
  5. ජයටම තිබිල තියන බව පේනවා.අනෙ අර බබාල බර්ගර් බන්ස් කොහොම කෑවද? එයාල හරි සතුටක් ලබපු බව මූණු වලින් පේනවා.

    ReplyDelete
    Replies
    1. කොහෙද ඉතින් මේ සන්විධායකයොත් දැනගන්න ඕනනේ වැඩක් කරන්න උළුවන් එකෙකුට වැඩේ බාර දෙන්න......... මැලේසියාවේ අවුරුදු 2ක් එත් බනිසක් හොයාගන්න දන්නේ නෑ

      Delete
    2. බාබාලා නම් ගොඩාක් සතුටු උනා. බබාලට වඩා බර්ගර් බනිස් කන්න එයාලගෙ අම්මලා තමයි එයාලට උදව් කලේ.

      සංවිධායකයන්ට සහාය දෙන්න වේලාසන එන්න එපායැ රාළෙ...මොකද කොලේ සෙනසුරාදා මිරිස් කැඩුවද සීයත් එක්ක...

      Delete
  6. ඔය තිබිලා තියෙන්නේ ශෝක් අවුරුදු උත්සවයක්...

    ReplyDelete
    Replies
    1. ඉතාම හොඳ සංවිධානයක් ඇති නිසාම සුන්දර වැඩක්..

      Delete
  7. පොහ්......................මල් හතයි ඈ. අම්මප සිරෝ වැඩේ සුපිරියටම තිබිලා තියන බව පොටෝ වලින් ඉතා හොඳින් පෙනෙනවා.

    අම්මපා මැලේ රාලයා මම හිතුව තරං කැත නැහැනේ.

    අර කෑම බෙදන තැන ඉනට අත්දෙක ගහගෙන ඉන්න නෝනා කවුද සිරෝ? දැක්කම බයේ බෑ. 'වරකෝ දෙන්නං තොට කණ්ඩ' කියලා බලාගෙන ඉන්නේ.

    ඉතිං ඔය උත්සවයෙන් පස්සේ රෑ මොකුත් කලේ එහෙම නැතෙයි?

    ReplyDelete
    Replies
    1. මොකෑ බොල ඔයපැත්තේ බනිස් හතරැස් වෙලා?

      Delete
    2. //අම්මපා මැලේ රාලයා මම හිතුව තරං කැත නැහැනේ. //
      ඉතින් මාමේ දැන්වත් දුව දෙනවැයි???

      Delete
    3. මැලේ රාළ ඉතින් දැකුම්කළු හාදයා..පේනවනෙ...දත් ටික නම් සුදුවට අපූරුවට පේනවා. වැඩේ නම් සුපිරියටම ගියා...ආයෙ කියන්න වරදක් නෑ. ඒ අත තියාන බලාන ඉන්නෙ ලංකාවෙ තානාපති කාර්යාලයේ සේවය කරන නෝනලා. එයාලා තමයි ජනතාවගේ කුසගින්න නැති කරගන්න උදව් කලේ.

      වැඩේ ඉවරවෙලා මම නම් ඉතින් ගෙදර ගියා...ඔයා මැලේ රාළලා නම් මොනවා හරි කොරන්න ඇති. ස්ටේජ් එකට නගින්න ලං වෙලා කාලක් අමුවෙන්ම බස්සනවා මම බලාන උන්නෙ.

      Delete
  8. ඔය තියෙන්නෙ මල් හතට වැඩේ කෙරිල.
    මොනව නැතත් කෑමනං අඩුපාඩුවක් නැතුව තිබිල තියෙනව.
    අර විචා කිව්ව වගේ බීම තිබ්බෙ නැද්ද රෑ වෙලාවත්.

    ReplyDelete
    Replies
    1. වැඩේ ලස්සනට කෙරුනා. පොඩියක් අනුමත වෙන්න ඇති ඉතින් සංවිධායක මණ්ඩලයෙ ඇත්තො. මම ඉතින් ඒවට අදාළ නැති නිසා නාට්‍ය ඉවර උනාම ගෙදර ගියා.

      Delete
    2. අනේ...මෙයා බබා..

      Delete
  9. සිරා කිසි සෙල්ලමකට හිටියේ නැතිද ?
    නරි බුරති හොඳයිද?'හොරු සමග හෙලුවෙන්'පෙන්වනවා මෙහෙනම්.

    ReplyDelete
    Replies
    1. මම ඉතිං ඔය ඡායාරූපයක් දෙකක් අරගෙන පිට්ටනිය වටේට කැරකි කැරකි උන්නා. බොලා ඉන්නෙ අරාබි රටකද ?

      Delete
  10. අවුරුදු කුමාරිනම් කුජීතයි. එයිට වැඩිය ඉටිකිරිස් කෙල්ලො ෆොටෝ එකේ පේනව. මැලයට මේ පාර කප් එක දිනන්න බැරිඋනාද ?

    ReplyDelete
    Replies
    1. එක යකෝ එක රුපියල් හතලිස් දාහක්

      Delete
    2. අවුරුදු කුමාරිය විදියට අපි හිතින් තෝරපු කුමාරියො දිනුවෙ නෑ. දුක තමා ඉතින්..මැලයා කාලක් ගහලා ස්ටේජ් නැග්ගෙ ඒ උනාට අතර මැද පොඩි වේව්ලීමක් ආවා. ඒ නිසා ලකුණු කැපුනා.

      Delete
  11. අඩෝ උබ කාගෙන් අහලද මගේ පොටෝ එකක් මෙහෙම පොරසිද්ද කරේ ..... උබ නිකන් පොටෝ ගගහා ඉන්දැද්දී මම පළවෙනියා වෙලා රිංගිට් දාහකුත් හොයා ගත්තා.........
    අඩේ මට නම් අවරුදු කුමාර්ට වැඩිය ලස්සනයි විනිශ්චය් මණ්ඩලේ කට්ටිය අර වම් පැත්තේ ඉඳන් දෙවනියා එහෙම ...........

    ReplyDelete
    Replies
    1. අනේ මට කීයක් හරි දියං රා‍ළෙ මේ වගේ කුජීත ඡායාරුපයක් මේ ලිපියට අැතුලු කොලාට. බොලා 1000 ක් දිනුවා කියලා මටත් ආරංචිය ආවා. වම් පැත්තෙ ඉදන් දෙවැනියට ඉන්න ළමයා මොකද..දරු කමටවත් හදාගන්නද...

      Delete
  12. නියමයි..නියමාායි... කොහොමද අවුරුදු කුමාරයාට මැලේ රාල ඉන්දුවානම් ....

    ReplyDelete
    Replies
    1. හිටියනම් ඉතින් එක තමයි අපි ඉතින් ඔය සිරාලා වගේ බඩ දාපු අංකල්ලා නෙවෙයිනේ

      Delete
    2. මැලේ රාළ ඉන්දුවා නම් අවුරුදු උත්සවය මෙලෝ රහක් නැතුව යනවා...

      Delete
  13. අව්වුරුදු කුමාරියන්ගෙ බඩවල් ටික විතරනෙ බං, මෙහෙම තප්පදෝරු කෙල්ලො විතරද ඔහෙ ඉන්නෙ? මැලේ ආච්චි ලස්සනයි ඊටවඩා.

    අර මැලේ ආච්චිගෙ නිපල් එකත් පේනව...චීයා..මෙන්ඩට කිව්වනං හොඳ පුෂප්බ්‍රා එකක් ඉල්ලගන්න තිබ්බනෙව.

    ReplyDelete
    Replies
    1. මම හිතන්නෙ කුමාරියො ටික බඩවල් ඉස්සරහට දාලා ගැම්මෙන් ඉන්න ඇති ඒ වෙලාවෙ. මැලේ ආච්චිලා ඉන්නවා තනියම වාහනේ එලවගෙන යන ලස්සන උදවිය.

      මෙන්ඩා මේ දවස් වල පේන්න නෑ...ගමේ ගිය නංගිලා තවම එන්න නැතුව ඇති වැඩපලේ...ඒ හින්දා කොල්ලා තනියෙන් වැඩ ඇති.

      Delete
  14. සුභ අලුත් අවුරුද්දක් වේවා සිරා.. අර කොට්ටපොර පොල්ලට අමුතු ජිල්මාට් එකක් දාල හදල තියෙන්නෙ. බටයක් බස්සලද? වැඩේ සුපිරියටම කෙරිලා තියනවා..

    ReplyDelete
    Replies
    1. බොටත් එසේම වේවා සජ්ජො. කොට්ටා පොර අට්ටාලෙ තිබ්බ ලී දඬු හතරැස් ඒවා...හතරැස් පොල්ලක් මත ඉඳගන්න ගියාම පුක නැති නිසා තමයි ඒ බටයක් ඔබලා තියෙන්නෙ.

      Delete
  15. මමත් අහන්න හිටියේ කොට්ටපොර ගහපු අයට කරදරයක් නෑ නේද කියලා. යකෝ මැලේ රාළව මම දැකලා තියෙන පාටයි. බ්ලොග් අවුරුදු උත්සවයේත් උදලු මිටක් තමයි කණා මුට්ටි පොල්ලට අරන් තිබුනේ. හැබැයි සිරා කොලුවට මතක් උණා නම්, උණ බටයක් ගන්න තිබ්බා පහසුවෙන්ම. අර එල්ලේ ගහන පොල්ල වගේ. සැහැල්ලුයි. විදෙස් රටක මෙහෙම හරි අවුරුදු උත්සවයක් කරන එක ආඩම්බරයක්.

    ReplyDelete
    Replies
    1. ඔය කොට්ට පොර අට්ටාලය හැම වතාවකම පාවිච්චි කරන එකක්. කාටවත් හානියක් නෑ. මැලේ රාළ ලස්සන කොල්ලා නේද..උණ බට මෙහෙ දකින්නත් නෑ ලොකු අයියෙ අගනුවර කිට්ටුව. ඕවා හොයාඇවිදිනවට වඩා අතට අහුවෙන දේ සල්ලි දීලා හරි ගන්න එක තමයි කරන්න පුලුවන් පහසුම වැඩේ. අනෙකුත් රටවල අවුරුදු උත්සව බැලුවාම මැලේසියාවෙ අවුරුදු උත්සවය බොහොම සංවිධානාත්මක එකක් බව පින්තූර වලින්ම වැටහෙයි.

      Delete
  16. නියම විස්තරයක් එක්ක නියම ජායාරුප ටිකක් සිරා. සිරා ඉතිං ලිපියක් දාද්දි බොහොම මහින්සි වෙලා විස්තර,ජායාරුප එහෙම සකසාගෙන ගෙන නේ ඒක දාන්නේ.

    අනික අපි ගොඩක් වෙලාවට විදේශ රටවල ඉන්න ශ්‍රී ලාංකිකයන්ගේ එකමුතුවක් දකින්නේ නෑ. ඒ ඒ රටවල තියෙන ලංකාවට සම්බන්ධ සංවිධාන, තනාපතිකාර්යාල උනත් එකිනෙක රුස්සන්නේ නෑ. බොහෝ විට ගැටුම් තමයි ඒ ඒ උදවිය අතර පවතින්නේ. මෙවැනි උත්සවයක් කරන්න ගියත් බොහෝ විට කතාවෙන්නේ එකේ තියෙන අඩුපාඩු, එකිනෙකාගේ වැරදි/මඩ ගැසීම් එහෙම තමයි. අන්න එව්වා ගැන නං කියවීමත් මහා අප්‍රසන්න දෙයක්.

    ඒත් මැලේසියාවේ වෙසෙන ලංකාවේ අය ඒ වගේ නැතුව මෙහෙම එකතුවෙලා ඉන්න එකනං ලොකු දෙයක්. මෙහෙම විස්තරයක් කියවද්දිත් ආසයි. මැලේසියාවේ වෙසෙන ලාංකික ජනතාවට, තානාතිපතිතුමාට ආචාරය.

    ReplyDelete
    Replies
    1. ස්තූතියි ඇනෝ මිත්‍රයා ඔබේ අදහසට. ඇත්ත වශයෙන්ම මැලේසියාවෙ ජීවත් වන ලාංකික ප්‍රජාවේ එකමුතුවට බොහොම රුකුලක් වෙලා තියෙනවා මෙහි අගනුවර තිබෙන බෞද්ධ පන්සල් ද්විත්වය. ඒවායේ වැඩ වසන්නේ ලංකාවේ හිමිවරු, ඊට අමතරව බොහොම නිහතමානී තානාපති වරයෙක් මේ රටට ලංකාවෙන් පත් කර තිබෙන්නෙ. එවැනි කාරණාත් මේ එකමුතුවට බලපා තිබෙනවා.

      Delete
  17. අපේ අය්ය ඩෑල් එකත් අවුරුදු උස්සවේ දවසේ ගහපු පොටෝ ටිකක් දාල තිබ්බ හිහි
    මරු ඈ..
    කොලුවාට කොලුවෙක් නොවෙන සිරාත්
    රාළ රාළ කීවට සීය කියන්න හිතෙන මැලේ රාලත් දැක්කෙ අදම නෙව
    හිහි
    ජයවේවා....

    (අහ් මේ බුකි ඉන්නව නේහ් රික්කෙස්ට් එකක් එවකො යකෝ සෙද්ද)

    ReplyDelete
    Replies
    1. මැලේ රාළ නිකං අවුරුදු කුමාරයා වගේ නේද..බුකියෙ බොලාව මම හොයලා බලන්නං.

      Delete
  18. එල ද බ්‍රා..
    අර රෝස පාට බ්‍රා එක 36B ෆෝම් කප් එකක්ද බලපිය

    ReplyDelete
    Replies
    1. එලද බ්‍රා මෙන්ඩා යකෝ ඇගේ තියෙද්දි සයිස් එක කියනවනෙ...ඒක තමයි ඇක්ස්පීරියන්ස් එක කියන්නෙ නේද...හැබෑටම 36 A නොවී B උනේ මක්කෙයි.

      Delete
  19. Replies
    1. ඔය ‍මේ වතාවෙ පමණක් පැවැත්වෙන එකක්...ඔතන තියෙනවා පොඩි කාරණාවක්..මම ඒ ගැන කියන්න යන්නෙ නෑ. නමුත් ඔය අවුරුදු උත්සවය සංවිධානය කරන අයම තමයි අපේ අවුරුදු උත්සවයෙත් දිවා ආහාරයට අනුග්‍රහය දැක්වූවෙ.

      Delete
  20. "මම අභිරූපන ආකාරයෙන් කුඹුරු කොටා පෙන්නුවෙමි" එහෙම පෙන්නලත් තේරුනේ නැත්තෙ උබ පෙන්නුවේ හරි කුබුරු කොටන විදිහ නේද ?

    දැක්කම ආසයි. උබ මොනවටද බන් හිටියෙ. පේන්නවත් නෑනේ..

    ReplyDelete
    Replies
    1. කුඹුරු කොටන විදිය පෙන්නුවාම කඩේ චීනට හිතෙන්න ඇති මේ සතෙක් මරන විදිය කියලා...මම ෆොටෝ ගත්ත එක විතරයි කලේ..තරග වලට සහභාගි වෙන්න ඇති තරම් කස්ටිය උන්නා.

      Delete
  21. සිරා මැරතන් එහෙම දිවුවෙ නැද්ද..............?? ;-)

    ReplyDelete
    Replies
    1. දොස්තර නෝනා කෙනෙක් මට උපදෙස් දෙන්නං කියලා උපදෙස් නොදුන් නිසා මම දිව්වෙ නෑ..පපුව පැලිලා මැරෙයි කියන භයට.

      Delete
  22. මම අවුරුදු උත්සවේට ආවේ නෑ .. සිංදු වල අවසාන වටේ ඉඳන් නාට්ටිය ඉවර වෙනකම් හිටියා .. සිරාව , මැලේ රාලයව දැන්නේ ඉතින් මේ ෆොටෝ වලින් දැක්කේ ..

    ReplyDelete

සිරාගෙ කාමරයට පැමිණියාට ස්තූතියි...

නැවත දිනයක ආයෙත් එන්න..... ඔබට ජය !

Related Posts Plugin for WordPress, Blogger...