Friday, July 26, 2019

33 ඔහු නුවන් කුලසේකර නම් විය | Tribute to Nuwan Kulasekara

ඒ 1999 වසරයි. ගම්පහ බණ්ඩාරනායකයේ උසස් පෙළ පන්ති  එම වසරට අලුතින් ආරම්භ වී ඒ වන විට වැඩි කාලයක් ගත වී තිබුනේ නැත. මේ  අවට වෙනත් පාසල් වලින් උසස් ප්‍ර‍තිඵල සහිතව සාමාන්‍ය පෙළ සමත් වී අප පාසලට නවකයන් ලෙස පැමිණි උන්, පාසලේ පැරණි සිසුන්ගෙන් යම් හිරිහැරයක් කරදරයක් වේදෝයි මෙන් භියෙන් සලිතව බිම බලාගෙන ගමන් කරන්නේ මේ කාලයේදී බව මා ඔබට කිව යුතුය. කොටින්ම සිරාගේ අතිජාත මිත්‍රයෙකුව සිටි නගා කොලුවාද පළවෙනි දවසේ පාසලට ආවේ සිරා කොලුවාගේ අතක එල්ලී බැව් මට හොඳින් මතකය. අමානුෂික නවක වදයක් කිසිසේත්ම නැතත් සින්දුවක් කියන්නට, බිස්කට් පැකට් එකක් ගෙනෙන්ට අලුත් උන්ට නියම වෙන මේ අපූරු කාල සීමාවේදී විදුහලේ 6 වසරේ සිටම අධ්‍යාපනය ලැබූ උන් ලෙස අප සිටියේ උදාරම් ලීලාවෙනි.

කාලය මාසය දෙක බැගින් ගත වෙද්දී, පරණ උන් අලුත් උන් එකට මුහු වෙද්දී,  සිරා කොලුවා අධ්‍යාපනය ලැබූ වාණිජ අංශයේ, සිරා කොලුවාගේ පන්තියේ සිට පන්ති කාමර දෙකක් එහායින් තිබෙන,  බඩපුබ්බා, දත්දිග දුමිතා, ඔටුවා,  වැනි නසරානි උන් වැඩිපුරම සිටි පන්තියක සිනාමුසු අහිංසක අලුත් මුහුණක් නිතර දෙවෙලේ පෙනෙන්නට වූවේය. පන්ති කාමරයෙන් ඔබ්බේ දකින හැම විටෙකම වාගේ ඔහුගේ හිස කැප් තොප්පියකින් ආවරණය වී තිබූ බැව් මට මතකය. 

සිරා කොලුවා ඒ කාලයේ විද්‍යාලයේ බටහිර තූර්ය වාදක කණ්ඩායමේ පැල පදියම් වී කටයුතු කල නිසා පාසල් වෙලාවෙන් වැඩි කාලයක් ගත කලේ විදුහලේ ක්‍රීඩා ගාරය තුලයි. බෑන්ඩ් කාමරයට යාබද අසල්වැසියන් වූයේ ක්‍රිකට් කාමරයයි. විවිධ වයස් කාණ්ඩායන්ට අයත් ක්‍රීඩකයන්ට සතියේ විවිධ දිනයන් පුහුණු වීම් සඳහා යොදා තිබුන එසමයෙහි, සිරා කොලුවා සමගම පෙර කී අහිංසකයාද එකම දිනෙක තම තමන්ගේ කණ්ඩායම් සමග පුහුණුවීම් පිණිස පාසල් වේලාවෙන් පසු පාසලේ රැදී සිටි නිසාම, එකම පන්තියක අධ්‍යාපනය නොලැබුවත් ඉන් එහා ගිය ශක්තිමත් මිත්‍ර‍ත්වයක අඩිතාලම දමන්නට පාසල් ක්‍රීඩා ගාරයේදී අපට හැකියාව ලැබුනි. මේ අලුත් මිත්‍ර‍යා නුවන් කුලසේකර නම් වූවේය. නිට්ටඹුවේ රන්පොකුණුගම සිට පාසලට පැමිණි ඔහුගේ පියා පොලිසියේ රාජකාරි කලේය. කිරිඳිවැල මධ්‍ය විද්‍යාලයෙන් ඔහු අපේ පාසලට පැමිණ තිබුනි.

ලොවක් දිනූ කුලේ

ක්‍රිකට් ක්‍රීඩාවට නවකයින් බඳවා ගන්නා බැව් ප්‍ර‍සිද්ධ කල පසු ඒ සඳහා සහභාගි වීමට කොල්ලන් බුරුතු පිටින් ක්‍රිකට් කාමරය සොයා ඒම එකල සුලභ දසුනකි. එහෙත් ක්‍රිකට් පුහුණුකරු කණිෂ්ක අයියා කාලයක් යන තුරු මේ උන්දලාට පිත්තක්, පන්දුවක් අල්ලන්ට දෙන්නේ නැත. ඒ වෙනුවට ඇත්තේ පිට්ටනියේ හැති වැටෙනකං දිවීමත්, තවත් අටෝරාශියක් ව්‍යායාමත් පමණකි. පන්දුවක්, පිත්තක් අල්ලන්නට නැති ක්‍රිකට් මොන ලබ්බකටදැයි සිතන මේ නවකයන් එකා දෙන්නා බැගින් එතැන් සිට ක්‍රිකට් ක්‍රීඩා පුහුණුවීම් වලට පැමිණීමෙන් වැලකී සිටින අතර මාසයකට දෙකකට කලියෙන් පිටිය පුරා දුවමින් සිටි ක්‍රිකට් ක්‍රීඩකයින් සිය ගණනක් අතරින්, ක්‍රිකට් උණ තදින් වැළදී ඇති 20 -30 පමණ තව දුරටත් පුහුණුවීම් සඳහා ඉතිරි වූ පසු කණිෂ්ක අයියා නිසි පුහුණුවීම් ආරම්භ කරයි. 

උසස් පෙළ කරනා සමයේදී ලෙදර් පන්දුව මුලින්ම අතට ගෙන වසර දෙකක කාලයක් තුල සීඝ්‍ර දියුණුවක් ලබන්නට එතෙක් කල් අප පාසලේ කිසිවෙකු සමත්ව නොසිටි නිසාම කුලේ අරභයා කණිෂ්ක අයියා සිටියේ උදාසීන ප්‍ර‍තිපත්තියක බැව්  පසුකලෙක කණිෂ්ක අයියා විසින්ම මා හට කියා තිබේ. උඩුගම්පලදී පැවති පාසල් ක්‍රිකට් තරගයකදී හා පුරා කියා කුලේ කඩුලු 5 ක් ලබා ගත්තේ මේ අතර තුරයි. තරගයේ විනිසුරුවරයෙකු තරගයෙන් පසු කණිෂ්ක අයියාට කියා ඇත්තේ මේ හාදයාගෙන් හැදෙන ලකුණු පේනවා...ඒ නිසා උනන්දුවෙන් බලන්න යනුවෙනි. අද ජාත්‍යන්තර තරුවක්ව බැබලුනත් එදා ඒ වදන් කීපය නොවෙන්නට අද නුවන් කුලසේකර කෙනෙකු සමහරවිටෙක බිහිනොවන්නට ඉඩ තිබුනි.

විනිසුරුවරයාගේ නිර්දේශයෙන් පසු පුහුණුකරුගේ වැඩි සැලකිල්ලට ලක් වූ කුලේගේ නිසග හැකියාවන් දිනෙන් දින ඔප් නැංවී ඔහු කදිම දක්ෂයෙකු වන්නට කාලයට සමාන්තරව ඔහුට හැකි වූවේය. අප පාසලේ පිටිය තුල ආරාධිත පාසලක් සමගින් පැවැත්වෙන ක්‍රිකට් තරගයක ප්‍ර‍තිවාදී පිතිකරුවන් දෙදෙනෙකු අතර ශක්තිමත් සම්බන්ධයක් බිද දමන්නට දග පන්දු යවන්නන් අසමත්ව සිටි බොහෝ අවස්ථා වල නැවත පන්දු යැවීමට කැඳවන කුලේ තම ප්‍ර‍ථම පන්දු වාරයෙන්ම ඒ කාරිය ඉටුකර දෙන්නේ මැට්න් එකේ පතිත වූ පසු පහළින් ඇඳී යන පන්දුවකට පිතිකරු කඩුල්ල මුවාකිරීමේ වරදට හසුකිරීමෙනි. වර්තමාන පන්දුයැවීමේ ඉරියව්වට ඉතාම සමාන ඉරියව්වකින් ඔහු පාසල් සමයේද පන්දු යැව්වේය.

වරක් කොළඹ ප්‍ර‍ධාන පාසලක ක්‍රිකට් කණ්ඩායමක් අප පාසල සමග තරගයකට සහභාගි වූවේය. මේ ප්‍ර‍තිවාදී කණ්ඩායම් නායකයා එම තරගයට කලියෙන් ක්‍රීඩා කල අවසන් ඉනිම 3 දීම පිට පිට ශතක රැස්කර මෙම තරගයට සහභාගී වූයේ පන්දු යවන්නන් තඹයකට මායිම් නොකරමින් උඩගු හැසිරීම් රටාවක් පෙන්වමිනි.

එහෙත් කුලේගේ දකුණතින් නිදහස් වූ භයංකාර යෝකර් පන්දුවක් ඔහුගේ කඩුල්ලේ කෙලින්ම වැදී ලකුණු රැස්කිරීමටත් පෙරම මේ පිතිකරුවා ක්‍රීඩාගාරයට හරවා යවන්නට එදා කටයුතු කළේය. 

මේ සීසන් එකේ මට වැටුන හොඳම බෝලෙ තමයි අද වැටුනෙ.. තරගයෙන් අනතුරුව ඔහු තම හිතවතුන්ට එසේ කියා තිබුනේය. කුලේ තම පාසල් ක්‍රිකට් ජීවිතය තුල විද්‍යා විදුහලට එරෙහිව එක් ඉනිමකදී කඩුලු 9ක් ලබා ගැනීම තම හොඳම පන්දු යැවීම ලෙස සටහන් කොට තිබේ.

විදුහලේ නිවාසාන්තර ක්‍රීඩා තරග වලදීද කැපී පෙනුන කුලේ ගැමුණු නිවාසය වෙනුවෙන් පදක්කම් දිනා දෙන්නට මීටර් 400, 200 සහ සහාය දිවීම ආදි ඉසව් වල ධාවනයේ යෙදෙන විට කුලේ සැබැවින්ම තවත් සුගත් තිලකරත්න කෙනෙකු වනු ඇතැයි අපි එදා සිතුවෙමු. බොහෝ අය නොදන්නවා වූවත් කුලේ යනු වේගවත් ධාවකයෙකි.

පන්තිකාමරය තුල ඉඳහිට දවසක දකින, ක්‍රීඩාගාරයේදී හෝ ක්‍රීඩාපිටියේදී නිතරම දකින කුලේ සහ ක්‍රිකට් ඒ වන විට දෙදෙනෙකු නොව එකෙකු බවට පත්ව සිටියහ. මිතුරෙකු ලෙස ඔහුගේ හැකියාවන් පිළිබඳ කදිම අවබෝධයක් තිබූ මා වැනි බොහෝ උන් එකල කුලේ හා දොඩමළු වන සෑම විටකම පැවසූවේ

උඹට සිලෝන් ටීම් එකට ගහන්න පුලුවන් උත්සාහ කරපං යනුවෙනි.

උසස් පෙළ විභාගයෙන් අනතුරුව පාසලෙන් මෙන්ම මිත්‍ර‍ සම්පත්තියෙන්ද  සමුගෙන එකිනෙකා තම තමන්ගේ අනාගත සිහින හඹායන්නට අර අදින කාලයේදී කුලේ මට මගහැරුනේය. නැවත අප එකිනෙකා මුණ ගැහෙන කාලය වන විට ඔහු නුගේගොඩ ක්‍රීඩා සමාජයට ක්‍රීඩා කරමින් සිටියේය. ඒ සඳහා ඔහුට උපකාර කලේ ෂම්මි ලියනගේ අයියාය.

ක්‍රිකට් ආම්පන්න සහිත විශාල බෑගයක් කරේ එල්ලාගෙන, කොළඹට යන්නට දුම්රියක් එනතුරු ගම්පහ දුම්රිය ස්ථානයේ රස්තියාදු වෙමින් සිටි කුලේ එවකට ගම්පහ වාසීන්ට සුලභ දසුනක්ම වූවේය. ක්‍රිකට් පුහුණුවීම් නැති දිනවල සැහැල්ලු පන්දුවෙන් සය සාමාජික ක්‍රිකට් තරග වල සහභාගි වූ කුලේ එම වර්ගයේ තරග වලට වි‍ශේෂඥයෙකු විය. සැහැල්ලු පන්දු තරග වලට සහභාගි වීමට ඒ කාලයේ ලංකාව වටේම වාගේ ඔහු ගමන් කොට තිබේ.

පළමුව ශ්‍රී ලංකා ඒ කණ්ඩායමට කැඳවීම් ලද කුලේ ඉන්පසු ජාතික කණ්ඩායමට එක්වීමට වැඩි කාලයක් ගත වූයේ නැත. එක් උදෑසනක ලංකාදීප ක්‍රීඩා පිටුවේ දම්පැහැති පසුබිමක කුලසේකර ජාතික කණ්ඩායමට කැදවයි යනුවෙන් ප්‍ර‍වෘතියක් දුටු සිරා කොලුවාගේ චිත්ත සන්තානයම ප්‍රීතියෙන් පිනා ගියේ අවංක මිත්‍ර‍ත්වය වෙනුවෙනි. පාසල් සමයේදී  මිතුරෙකු අරභයා අප නිතර නිතර තෙපලූ වදන් යථාර්තයක් වීම කෙතරම් ප්‍රීතියක්ද ?

කුලේ තම මංගල  එක්දින ජාත්‍යන්තර තරගය ලෙස එංගලන්තයට එරෙහිව දඹුල්ල ක්‍රීඩාංගනයේදී තරග වදින විට සිරා කොලුවා සිටියේ ඉගෙනීමට සමගාමීව පුංචි රැකියාවක නිරත වෙමිනි. රූපවාහිනියක් ළගපාත නොවූයෙන් තරගය සජීවීව නරඹන්නට හැකියාවක් ලැබුනේ නැති වුවත් ගුවන් විදුලි විස්තර ප්‍ර‍චාරය සමග මම ඒකාත්මිකව සිටියෙමි. ඔව් මේ දැන් නුවන් කුලසේකර තම ප්‍ර‍ථම එක්දින කඩුල්ල දවාගන්නවා යනුවෙන් ගුවන් විදුලි විස්තර විචාරකයා මොර දෙන විට, මමද සිතින් නුවන් කුලසේකර වී ඒ සතුට වින්දෙමි. එදා කුලේ සමග එකම තරගයකදී දිනූෂ ප්‍ර‍නාන්දු ද එක්දින වරම් හිමිකරගත්තත් ඔහුට කුලේට මෙන් දීර්ඝ කාලයක් කණ්ඩායමේ රැඳෙන්නට වරම් ලැබුනේ නැත

උඹ දන්නවද මචං...මම නුගේගොඩ ක්ලබ් එකට සෙල්ලං කරපු කාලෙ අවුරුදු එක හමාරක් විතර කලේ වතුර ඇදපු එක, ඒ කාලෙ එක මැච් එකක් වත් නෑ හැමදාම බංකුවෙ...අපේ කණ්ඩායමේ හොඳම බෝලර් ආබාධයකට ලක් වෙලා හිටිය දවසක තමයි නුගේගොඩ කණ්ඩායම වෙනුවෙන් මම මුලින්ම පන්දු යැව්වෙ.  ඔය ආසන්න කාලෙක නුගේගොඩ ක්‍රීඩා සමාජය සහ ගාලු ක්‍රීඩා සමාජය අතර වයස 23 න් පහළ තරගයක් විදියට පවත්වපු තරගයකදි මම ගත්ත හැට්‍රික් එකක්  දැකපු  ගාල්ල කණ්ඩායමේ ක්‍රීඩා කරපු හිරාන් ගුණසේකර  මාව ඒ කාලෙ ගාලු ක්‍රීඩා සමාජයෙ පුහුණුකරු විදියට කටයුතු කරපු අනූෂ සමරනායක මහතාට හඳුන්වා දුන්නා. නුගේගොඩ කණ්ඩායමෙන් පස්සෙ මම ගාලු ක්‍රීඩා සමාජයට එකතු උනා. ඒ කාලෙ ගාලු කණ්ඩායමේ නායකයා විදියට කටයුතු කලේ දිල්හාර ලොකුහෙට්ටි. ගාලු කණ්ඩායමට එකතු උන කාලෙ තමයි මාලිංගව මුලින්ම හමු උනේ.

චම්පක රාමනායක සර් ඒ වෙද්දි ජාතික කණ්ඩායමේ වේග පන්දු පුහුණුකරු. අනුෂ සමරනායක මහතා තමයි NCC එකේ නෙට් බෝලර් කෙනෙක් විදියට මාව අරගෙන ගිහින් චම්පක රාමනායක සර්ට මාව පෙන්නුවෙ. එදා නෙට් එකේදි මම බෝල දාන විදිය බලලා ඊට පස්සෙ මේ දෙන්නම පුහුණුකරුවො විදියට මගේ පිටිපස්සෙන් ඉදන් විශාල සහයෝගයක් දුන්නා. මම ජාතික කණ්ඩායමට මේ තරම් ඉක්මනට එන්න ඒ දෙන්නා අති විශාල දායකත්වයක් දුන්නා.

කුලේගේ ඉවසීම එබඳුය. සමවයසේ අනිත් උන් උසස් අධ්‍යාපනය හෝ රැකියාවක නිරත වන විට තමන්ගේ හැකියාවන් පිළිබඳ විශ්වාසයෙන් ක්‍රීඩා කරන්නට තරගයක් හෝ නොමැතිව සෙසු ක්‍රීඩකයන්ට සත්කාර කරමින් බංකුවක් මතට වී තරග නරඹන්නෙකුව සිටි කුලේගේ අධිෂ්ඨානශීලී බව නිසැකවම විශාල එකකි.

ජාත්‍යන්තර ක්‍රිකට් ක්‍රීඩක නුවන් කුලසේකර දැන් ජනප්‍රිය තරුවකි. සිරා කොලුවා ජාත්‍යන්තර ක්‍රිකට් තරග වල ප්‍රවේශපත්‍ර‍ නිකුත් කිරීමට ක්‍රීඩා පිටිවලදී දායක වූ සමයේද කුලේ නොයෙක් වර ක්‍රීඩා පිටිය තුලදී හමු වූවේය. ඒ සෑම විටෙකම ඔහු අතීත මිත්‍ර‍යා පමණක්ම වූවේය. රූපවාහිනී කැමරාව ඉදිරියේ ඔබ දුටු නිරහංකාර ක්‍රීඩකයා කැමරාවෙන් ඔබ්බෙහි වූ සාමාන්‍ය ජීවිතයේදී එවැනිම කෙනෙකු මිස ධනයෙන් බලයෙන් උඩගු වූයේ නැත. බොහෝ ක්‍රිකට් ක්‍රීඩකයින් පසුකාලීනව ලබන ජනප්‍රියත්වය හරහා ධනවත් පවුලක යුවතියක සිය බිරිඳ ලෙස සරණ පාවා ගත්තද, එදා නුගේගොඩ ක්‍රීඩා සමාජයේ පුහුණුවීම් වලට යන එන අතර තුර දුම්රියේදී හදුනාගත් යුවතියක හා පෙමින් බැදුන කුලේ අවසානයේ ඇය සිය පතිනිය කරගත්තේය.

පාසල් සමයේදී කුලේ සමග එතරම් මිත්‍ර‍ත්වයක් නොතිබූ සිරා කොලුවාගේ මිත්තරයෙකුට තම විවාහ මංගල්ලය පිණිස කුලේ වෙතද ආරාධනා කරනු රිසි වූවේය. ඒ වකවානුව වන විට ක්‍රිකට් ක්‍රීඩකයෙකු ලෙස ඉහළම තලයක වැජබෙමින් උන් හෙතෙම සහ මගුල් ගෙදර යා කරන පුරුක වන්නට මා හට සිදු වූවේය.

දිනක් දුරබණුවෙන් මම ඔහු ඇමතුවෙමි......

මචං මම ඩ්‍ර‍යිව් කරන ගමන්...පොඩ්ඩක් හිටහං අයින් කරලා නවත්තනකං..(පසුව කථා කරන්න යැයි කීවේ නැත)  

ඉතිං කියපං මොනවද විස්තර

අහවලාගෙ මගුල උඹට කියන්න ඕනෙලු...කොහොමද ඉන්විටේෂන් එක දෙන්නෙ..

ඉන්විටේෂන් ඕනෙ නෑ බං..මට දිනේ විතරක් කියහං..මම එන්නං...හැබැයි මැච් එකක් නැත්තං...

ඉන්විටේෂන් එක මගෙ ලග තියෙන්නෙ දැන්...ඒක දෙන්න පුලුවන් විදියක් කියහං..

උඹ වැඩ කරන පෑලියගොඩ තැනට අරන් වරෙන්...මම එතනට ඇවිත් ගන්නං...


එක් සැදෑවක එවකට මා සේවය කරමින් සිටි පෑලියගොඩ පිහිටි දැන්වීම් ප්‍ර‍චාරණ ආයතනයක් වෙත කුලේ පැමිණියේ රබර් සෙරෙප්පු දෙකක් පැලද ඉතාම සැහැල්ලුවෙනි. ආයතනයේ සේවය කල කොලු කුරුට්ටන් සියලුම දෙනා කුලේ වෙත හදුන්වා දුන්නේ ඉතාම කැමැත්තෙනි. හෙතෙම ඒ අය දැක්වූ ප්‍ර‍තිචාරයන් මැදිහත් සිතින් දරාගෙන ඔවුන් සමග ඉතාම කුලුපගව කථා බහ කළේය.

අයියා ටීවි එකේ පේන තරම් කලු නෑනෙ...වත්තල කක්කුට්ටා එසේ කියන විට කුලේගේ ප්‍ර‍තිචාරය වූයේ හැමදාම දකින අහිංසක සිනහවම වූවේය.

ආරාධනා පත්‍ර‍ය රැගෙන ගොස් සති දෙකකට පමණ පසු මගුල් රාත්‍රිය උදා වූවේය. රාත්‍රී 10 කණිසම පසුවී ඇතත් තවමත් කුලයා නැත. දුරකථනයට පිළිතුරු දෙන්නේද නැත, පොල්ලක්වත් තිබ්බද, මම දන්නා කුලේ එසේ නොවනා නිසා තවත් මොහොතක් බැලුවෙමි. එසැනින් ඔහුගේ රථය ප්‍ර‍ධාන ගේට්ටුවෙන් ඇතුලු වූවේය.

මේ මගුලේ අදුරු මුල්ලක බියර් වීදුරුවක් සමග මිතුරන් සියලු දෙනා එකදු පහදු වී සිටිනා කලෙක අවට මේස වල සිටි කිසිවෙකු කුලේ හඳුනාගත්තේ නැත. එහෙත් අප සිටි මේසය කරා පැමිණි විවාහක යුවලට පසුපසින් වීඩියෝ පිණිස එල්ල වූ අධි සැර ආලෝක ධාරාව නිසාම අවට පරිසරයට කුලේ නිරාවරණය වූවේය. ඒ සැනින් ක්‍රීඩා ලෝලීන් එක දෙන්නා බැගින් එහි පැමිණ ඔහු සමග ඡායාරූප ගැනීමත් කථා බහත් ඇරඹුනේය. ඒ ඒ ඇත්තන් සිටි ස්ථාන කරා ගොස් සුහද කථා බහේ නිරත වී නැවත අප කරා එන විට තවත් හෝරාවක් පමණ ගෙවී තිබුනේය. ඇතැම් කොලුවෙකු සිය පෙම්වතියට දුරකථන ඇමතුමක් ගෙන දුරබණුව කුලේ වෙත දික් කලේ අයියෙ මේ මගේ ගෑණු ළමයා ඔයා එක්ක කථා කරන්න ආසයි යනුවෙන් පවසමිනි.

මේ සියලු ප්‍ර‍තිචාර නිරහංකාරව දරාගත් කුලේ සැබැවින්ම මා හට පුදුමයක් වූවේය..

මම උඹ ඉන්න තැන හිටියා නම් ඔය තරම් නිරහංකාර වෙන එකක් නෑ කුලේ...මම එදා ඔහුගේ මුහුණටම කීවෙමි. සැබැවින්ම නුවන් කුලසේකර යනු නිරහංකාරකමේ ප්‍ර‍තිමූර්තියකි..

කුලේ තම හැකියාවෙන් ඉහළම තලයේ සිටි කාලයේ ප්‍ර‍කට කල දක්ෂතා යළි යළිත් ඔබට කියන්නට අවශ්‍ය නැත. පන්දුව දෙපසටම දෝලනය කරන්නට ඔහුට තිබුන හැකියාවත්, නිසි ඉලක්කට නිතරම පන්දු යැවීමත් පන්දුව පරණ වූ පසු ඔහු එල්ලකරන මරණීය යෝකර් පන්දුවත්, කල්යල් බලා එල්ල කරන වේගය අඩාල කල පන්දුවත් ඔහුගේ වත්කම් අතර වූවේය.

හරියට තැනට ස්ලෝ බෝලයක් දාන්න අවුරුදු දෙකක්වත් ප්‍රැක්ටිස් කරන්න ඕනෙ මචං...කුලේ දිනක් එසේ කීවා මතකය. ඒ අනුව ක්‍රිකට් ක්‍රීඩකයෙකු එම තත්වයට පැමිණීමට මොන තරම් මහන්සි විය යුතුද යන්න ඔබට අවබෝධ විය යුතුය.

මචං...උඹේ ක්‍රිකට් ජීවිතයෙදි හම්බඋනු පන්දුයවන්න අමාරුම පිතිකරුවා කවුද...සිරා කොලුවා දිනක් එවැනි ගැටලුවක් කුලේ වෙත යොමු කලේය.

එක්කෙනෙක් කියලා නෑ. දෙතුන් දෙනෙක් ඉන්නවා. විරේන්ද්‍ර ෂෙවාග්‍, ඇඩම් ගිල්ක්‍රිස්ට්, ක්‍රිස් ගේල් ඒ අතරින් ප්‍ර‍ධානයි. බෝලෙ එක දශමයක් එහා මෙහා උනා නම් මේ අයගෙන් සැරටම පාර වදිනවා කුලේගේ පිළිතුරු එවැනිය. කුලේ මා සමග කියා ඇති ආකාරයට විදේශ කණ්ඩායම් වලින් ඔහුගේ ඉතාම සමීපතම මිතුරන් වූයේ ඉන්දියානු කණ්ඩායමේ සුරේෂ් රයිනා සහ සහීර් ඛාන් දෙපලයි.

ජාතික කණ්ඩායමට එකතු වූ පසු තමාගේ ගමනට අඩිතාලම දැමූ පාසල අමතක නොකල කුලේ, අප පාසලේ දියුණුව පිණිස නිතරම කටයුතු කලේය. පාසලේ ක්‍රිකට් කණ්ඩායම වෙනුවෙන් නොයෙක් වර මුදලින් මෙන්ම ක්‍රිකට් උපාංග ප්‍ර‍දානයෙන්ද ඔහු දායක වී තිබේ. ආරාධනා ඇතත් නැතත් වාර්ෂික නිවාසාන්තර ක්‍රීඩා උලෙල නැරඹීමට ඒ කාලයේ ඔහු පැමිණියේ විශේෂයෙන්ම පැරණි මිතුරන් මුණගැසෙන්නට ඇති කැමැත්ත නිසාවෙන්මය. සැබැවින්ම ඔහු අපේ පාසලේ ගෞරවය දෙගුණ තෙගුණ කල සුජාත ආදි ශිෂ්‍යයෙක්ම වූවේය.

2014  පන්දුවාර 20 ලෝක කුසලානය ලංකාවට දිනා දීමට විශාල මෙහෙවරක් කල කුලේ වෙත අප පාසලෙන් උපහාර පුදනු ලැබූ අවස්ථාව. කුලේගේ දකුණු පසින් සිටින්නේ ඔහුගේ පාසල් පුහුණුකරු කණිෂ්ක අමරසිංහයි.



පාසලේ සහෝදර ක්‍රීඩකයන් සමග සුහද ක්‍රිකට් තරග පැවැත්වුන බොහෝ විටක කුලේ එම වටපිටාවේ සුලභ දසුනක් වූ අතර ජාත්‍යන්තර ක්‍රිකට් තරුවක් වන්නට පෙර සැහැල්ලු පන්දු ක්‍රීඩා කල පිත්ත තවමත් සුරැකිව එවැනි තරග වලට රැගෙන ඒමෙන්ම කුලේ යනු කුමන පුද්ගලයෙකුදැයි ඔබට වැටහෙනු ඇත. එවැනි තරගවලදී පුහුණුවීම් අතරතුර කීප වතාවක් කුලේගේ පන්දුවලට මා මුහුණදී ඇති අතර ඔහුගේ පන්දු පිතිකරු අපේක්ෂා කරනවාට වඩා වේගවත් බවට අත්දැකීම් ලැබුවෙමි. එවැනි තරග කීපයකදී කුලේ සමග එකම කණ්ඩායමක ක්‍රීඩා කිරීමට ලැබීමද මා ලද මහත් භාග්‍යයක් බැව් කිව යුතුමය.






පාසල් මිතුරෙකු සමාජ සත්කාරයක් කරනා සෑම විටෙකම නිහඩව ඒ සඳහා සිය මූල්‍ය දායකත්වය දැක්වූ කුලේ අප විසින් සංවිධානය කල අරුණළු වැඩසටහනත් සමග දිඹුලාගල ගිය ගමන සිරාගේ කාමරයට යන එන ඇතමෙකුට තවමත් මතකයේ තිබෙනවා වන්නට පුලුවන.

දිඹුලාගලදී දරුවන්ගේ දුක දැක සංවේදී වූ කුලේ







දිඹුලාගල දරුවන් සමග කුලේ සහ සචිත්‍ර‍ සේනානායක ක්‍රිකට් ක්‍රීඩා කල අයුරු


ක්‍රීඩකයෙකු ලෙස අප රටටත්, ලංකා ක්‍රිකට් කණ්ඩායමටත් අමිල මෙහෙයක් කල නුවන් කුලසේකර 2017 වසරේදී සිම්බාබ්වේ කණ්ඩායම සමග තරගවැදීමෙන් අනතුරුව නැවත ජාත්‍යන්තර පිටියේ දක්නට ලැබුනේ නැත. ඒ වන විට ඔහුගේ එක්දින කඩුලු මල්ල සටහන් වූයේ තරග 184 කදී කඩුලු 199 ක් ලෙසිනි. කුලේ පුද්ගලිකව කඩුලු 200 ක් ලබාගන්නට සිටියේ ඉතාම ආශාවෙනි. ඒ බැව් ඔහුගේ කථාබහෙන් අපට වැටහී තිබුනි. ජාත්‍යන්තර ක්‍රිකට් පිටියේ කුලේගේ හැකියාවන් පහත පරිදිය.


එහෙත් විවිධ න්‍යාය පත්‍ර‍වලට අනුව ක්‍රීඩකයන් තෝරන, ඇතැම් ක්‍රීඩකයන්ට වැඩි වරප්‍ර‍සාද ලැබෙන, දක්ෂයින් හිටිගමන් නොපෙනී යන රටක, ජාත්‍යන්තර ශ්‍රේණිගත කිරීම් වල අංක 1 ස්ථානයේ සිටි එකම ශ්‍රී ලාංකික පන්දු යවන්නාගේ වටිනාකමක් ක්‍රිකට් පරිපාලකයන්ට නොදැනී ගියේය. තේරීම් කමිටුවේ සභාපතිවරයා කුලසේකර යනු කවරෙක්දැයි මාධ්‍යයෙන් විමසන තරමට බුද්ධියෙන් හීන වී සිටියේය. එය සැබැවින්ම කණගාටුවට කරුණකි.

දේශීය ක්‍රීඩකයන් අතරින් කුලේගේ හොඳම මිතුරා වූයේ ලසිත් මාලිංගයි. ලසිත් මාලිංග සමගම  එකම තරගයකින් ක්‍රීඩාවෙන් සමුගන්නා බවට කුලේ අප සමග කියා සිටියේ මාස කීපයකට පෙර සිටයි.

ජාත්‍යන්තර ක්‍රිකට් ජීවිතයේ ඉස්සර දවසක ලස්සන මතකයක්

බුදු දහම නැමති සනාතන දහමට අනුව ඇතිවීම නැතිවීම, හමුවීම වෙන්වීම ලෝක ස්වභාවයයි. ඒ දහමට අනුව යමින් අපේ කුලයාද පෙරේදා දිනයේ (2019 අගෝස්තු 24) සිය වසර 15 ක ජාත්‍යන්තර ක්‍රිකට් ජීවිතයට සමු දුන්නේය. හෙතෙම වචනයේ පරිසමාප්ත අර්ථයෙන්ම කදිම මිතුරෙකි, උතුම් ගතිගුණ ඇති මිනිසෙකි. මෑත කාලීන ඉතිහාසයේ ලංකාවෙන් බිහිවූ ඉතාම නිහතමානී ක්‍රිකට් ක්‍රීඩකයාද ඔහුම වගට සාක්ෂි සපයන ක්‍රීඩා ලෝලීන් දහස් ගණනකි.

කුලේ නිසාම රූපවාහිනියෙක් ක්‍රිකට් තරග නැරඹු කාලය දැන් ඉතිං අහවරය. ජාත්‍යන්තර ක්‍රිකට් පිටිය තුල නැවතත් අංක 92 නැමති ජර්සි අංකය දකින්නට නැත. ඔහු ක්‍රීඩාකල කාලය ඉතිහාසය විසින් විසිතුරු සිත්තමක් කොට ඇත. සංගක්කාර දුවද්දී දැවී යාමෙන් බේරා ගැනීම, ඔස්ට්‍රේලියාවේදී කඩුලු 5ක් දවා ගැනීම, 20 යි 20 ලෝක කුසලානය දිනා ගැනීමට ඔහු දැක්වූ දායකත්වය, එංගලන්තයේදී චමින්ද වාස් සමග සම්පූර්ණ දිනයක් පිතිකරණයේ යෙදෙමින්, අර්ධ ශතකයක් රැස් කරමින් පරාජයෙන් ලංකා පිල ගලවා ගැනීම, බ්‍රෙට් ලී ඇතුලු කැංගරු දේශයේ පන්දු යවන්නන්ට පහර පිට පහර දෙමින් ඔහු රැස් කල ලකුණු 73. සහීඩ් අෆ්රීඩි නිදැල්ලේ හැරි පන්දුව කඩුල්ල වෙත දෝලනය වීම, අසාර් අලී ලකුණු 97ක් ලබා සිටියදී  කඩුල්ලේ වැදුන පන්දුවට විකට් කූරක් කැඩී යාම ආදී ඔහු විසින් නොයෙක් වර ප්‍ර‍කට කල දක්ෂතා, හෙට දවසේත් ඔහුට හිතැති සිත් වලින් මැකී නොයනු ඇත.

ගරා වැටෙමින් පවතින රටක, ලක්ෂ සංඛ්‍යාත ජනතාවකට එදිනෙදා ගැටලු අමතක කර සිතට සතුට ගෙන ආ ක්‍රිකට් ක්‍රීඩාවේ බලකනු එකිනෙක ගැලවෙමින් යන වටපිටාවක සිම්බාබ්වේ මෙන්ම ලංකාවද ටෙස්ට් තත්වයෙන් ඉවත් කලා යැයි හෙට දවසේ අසන්නට ලැබුනොත් එය පුදුමයට කාරණයක් නොවනු ඇත.

සිස්ටම් එකක් නැති රටක, ක්‍රිකට් ක්‍රීඩාව පමණක් සිස්ටම් ගත වනු ඇතැයි සිතීමම මොන තරම් විහිලුවක්ද ? 

කුලේ උඹට සුභ ගමන්....හෙට දවසේ වේග පන්දු පුහුණුකරුවෙකු ලෙස දෙවැනි ගමන අරඹමු...පණ අඳින ලංකාවේ ක්‍රිකට් ඔසවා තබමු.




මම කාමරේ අරින සිරා කොලුවා.




මවෙත ලැබුනු සමරුව

Sunday, March 31, 2019

26 සුදු මල්ලී  සමග මාවරැල්ලේ ගියෙමි

කෑගල්ල දිස්ත්‍රික්කයේ මාවනැල්ල නම් ඉසව්ව පිළිබඳ කාමරයට යන එන බොහෝ දනා දැන සිටියත් මාවරැල්ල පිළිබඳ අසා ඇත්තෝ අඩු බව මම දනිමි. මාවරැල්ල මෙතෙක් කල් කරළියට නොපැමිණ ඇති වටපිටාවක එය පුදුමයට කාරණයක් නොවන්නේය. සිරා කොලුවාද මාවරැල්ල පිළිබඳ අසා තවමත් වැඩි කාලයක් ගත වී නොමැත. මාවරැල්ලද  මාවනැල්ල මෙන් කෑගල්ල දිස්ත්‍රික්කය තුලම පිහිටා තිබේ.

සිරාගේ අතීත පුස්තකාල කථාවක කලබල යන නමින් සටහන් වූ, මාගේ අතීත පාසල් මිත්‍ර‍යා හෙවත් වර්තමාන යුධ හමුදා වෛද්‍ය මිත්‍ර‍යා, සිරා කොලුවා ඇතුලු මිත්‍ර සම්පත්තිය අරුණළු යන නමින් ආර්ථිකමය වශයෙන් අඩපණව තිබෙනා දුර ඈත පාසල් අරභයා සිදු කරන්නා වූ සමාජ සත්කාරයන් කෙරෙහි ආරම්භයේ සිටම උදව් උපකාර කල කෙනෙකි. හෙතෙම ඇතැම් විටෙක අදහස් දෙයි. ඇතැම් විටෙක වෛද්‍යවරයෙකු ලෙස තම සේවය ලබා දෙයි. ඒ නිසාම අරුණළු සෙවන යට ඔහු අතිශයින් වැදගත් චරිතයකි.

ගිය වසරේ දවසක හෙතෙම මවෙත සැලකලේ තම අනාගත භාර්යාව ලෙස තෝරාපත්කරගෙන ඇති යුවතිය ඉංග්‍රීසි ගුරුවරියක බවත්, ඇය සේවය කරන ගම්බද පාසලේ බොහෝ අඩුපාඩු ඇති බවත්, මීළග අරුණළු වැඩසටහනෙන් හැකි නම් මෙම පාසල වෙත යම් සහයෝගයක් ලබාදෙන ලෙසයි.

ඒ අනුව කරුණු සොයා බලා අප සියල්ලෝම මාවරැල්ල කණිෂ්ඨ විද්‍යාලයේදී අරුණළු සමාජ සත්කාරයක් පැවැත්වීමට තීරණය කලේ එහි අධ්‍යාපනය ලබන්නේ ආර්ථිකමය වශයෙන් බැටකන අහිංසක දෙමාපියන්ගේ දූ දරුවන් බැවිනි. කාලයක් වැසී ගිය පාසලක්ව තිබූ මෙය 2014 වසරේදී නැවත ජීවය ලබා  පවත්වාගෙන යාමද අප සැම පැසසිය යුතු කාරණයක් නිසාම ඒ ගමන් මගට අපේ දායකත්වය ලබාදීම වඩා වැදගත් වනු ඇතැයි යන්න අපගේ පොදු හැගීම වූවේය.

මෙම විද්‍යාලයේ 1 සිට 5 වසර දක්වා අධ්‍යාපනය ලබන දරු පිරිස ගණනින් 30 කට මඳක් වැඩි වූයෙන් ඔවුනට උපකාර කරන්නට මෙවර අපට විශාල මුදලක් අවැසි වූයේ නැත. ඒ නිසාම මිතුරන් කීප දෙනෙකුට පමණක් මෙවර සත්කාරය පිණිස දායක දායක වන ලෙස අපි ආරාධනා කළෙමු.

අරුණළු සමාජ සත්කාරයන් සමග නිබඳව කටයුතු කරන මෙල්බර්න් නුවර මධුසංඛ පියුමි යුවල,  සිරා කොලුවා සමග අතීතයේ දවසක බෑන්ඩ් කෙරුවාවේ යෙදුන  සිංගප්පූරුවේ ජනක අබේරත්න , සිරා කොලුවාගේ පන්ති සගයන් වන සිංගප්පූරුවේ චාමර, කොරියාවේ මධුරංග, සිරාගේ කාමරය හරහා සිරා කොලුවාගේ අතිජාතයෙකු වූ කැලිෆෝනියාවේ සමීර මෙවර වැඩසටහනේ වැඩිබරක් කරට ගත්තේ දේශීයව ඊට දායක වූ ව්‍යාපාරිකයන් දෙපළක් වන ජයන්ත අයියා සහ දසනායක අයියාට අමතරවය.  සිරා කොලුවාගේ අතිජාතයෙකු වන උදිත කොලුවා මෙවර පැමිණියේ සිය බිරිඳ ශ්‍යාමාද කැටුවය. මේ ඇගේ මෙන්ම සිරා කොලුවාගේ බිරිඳගේද  පළවෙනි අරුණළු සහභාගිත්වයයි.

කලබල පෙම්වතිය අපට පාසලට අවැසි දෑ මොනවාද යන්න විදුහල්පතිනිය සමග සාකච්ඡා කර වරින් වර පැවසුවාය.

ඇත්තටම අයියෙ අපේ පාසලට ගුරු පුටු තියෙන්නෙ තුනයි. පිටස්තර කෙනෙක් විදුහල්පති තුමිය මුණගැහෙන්න ආවම පන්තිකාමරයකින් පුටුවක් ගෙනිහින් තියන්න ඕනෙ. ඒ වගේම පාසලට ශබ්ද විකාශන උපකරණයක් නෑ. මේ පුංචි දරුවන්ට අපිට පුලුවන් විදියට අනිත් පාසල් වල දරුවො ලබන අත්දැකීම් ලබාදෙන්න අපි මහන්සි වෙනවා. මම මේ ඉස්කෝලෙට ආවට පස්සෙ අපි ගිය අවුරුද්දෙ ඉදන් ඉංග්‍රීසි දිනයක් පටන් ගත්තා. එදාට අපේ දරුවො ඉංග්‍රීසියෙන් විවිධ වැඩසටහන් ඉදිරිපත් කරනවා. ඉස්කෝලෙ දෙමාපියො වගේම අපිත් හතර අතේ ඇවිදලා තමයි ශබ්ද විකාශන පද්ධතියක් හොයාගෙන එන්නෙ. මේ දරුවො මයික් එකකින් කථා කරලම නෑ. ඒ නිසා ඒ අත්දැකීම දෙන්න අපිට ලොකු උවමනාවක් තිබුනා. ලබන අවුරුද්දෙ වැඩසටහන වෙද්දි පාසලට වරින් වර පරිත්‍යාගයන් කරපු කීප දෙනෙක් එක්ක කථා කරලා පාසලේම තියාගන්න පුලුවන් ශබ්ද විකාශන උපකරණයක් අරන් දෙන්නං කියලා විදුහල්පතිතුමිය මට පොරොන්දු උනා.

කලබල පෙම්වතිය දොඩමළුයි. ඇය මේ හෙළිකරන්නේ අපේ රටේ බොහෝ ග්‍රාමීය පාසල් වල පවතින අඩුපාඩු පිළිබඳ යථාර්තවාදී මුහුණුවරයි.

ගිය අවුරුද්දෙ ඉංග්‍රීසි දිනය දවසෙ මම  ඉංග්‍රීසි ටීටර්ට  පොරොන්දු උනා තමයි. ඒත් මට තවම ඒ පොරොන්දුව ඉටු කරගන්න ලැබුනෙ නෑ. පාසලේ ඉන්න දරුවො ගාන කීයද කියලා අහලා, ඉන්නෙ තිහකට ටිකක් වැඩියෙන් කිව්වම හැමදෙනාම කිව්වෙ මේ පොඩි පිරිසකට මොන ස්පීකර්ද මොන මයික්ද කියලා...ඒත් ඒ අයට තේරුම් ගන්න බෑ මයික් එකකින් සභාවක භය නැතුව කථා කරන්න පුලුවන් දරුවෙක් අපිට හදාගන්නයි මේ සම්පත් ඉල්ලන්නෙ කියලා...සිරා කොලුවා සමග විදුහල්පතිනිය අරුණළු වැඩසටහන සැලසුම් කරමින් කථා කරපු දවසක එහෙම කිව්වා. මේ සියලුම ගුරුදෙමාපියන් තමන්ගෙ දරුවො වගේම මේ අහිංසක දුවාදරුවන් ඇති දැඩි කරන්න නුවණින් පෝෂණය කරන්න දරනා මහන්සිය අපගේ සිත් ගත්තා. අපි කොහොම හරි මේ වැඩේ කරමු. මිත්‍ර‍යන් පිළිබඳ විශ්වාසයෙන් මම මගේ සහතිකය ලබා දුන්නා.

මහත්තුරු අපෙන් මොනවද ඕනෙ කියලා ඇහුවාම අපිට තියෙන අඩුපාඩු සියල්ලම කියන්න හිතෙන්නෙ නෑ. අපි දන්නවා හැමදෙනාම බොහොම අමාරුවෙන් තමයි මේවා අපට ලබාදෙන්නෙ කියලා. මමත්, අපේ ගුරු මණ්ඩලයත් හැකි හැම වෙලාවෙම මුදලින් අපේ දරුවන්ට උදව් කරලා තියෙනවා. අපිට ඉන්න දරුවො ප්‍ර‍මාණය සීමිත නිසා ගොඩාක් දෙනා උදව් කරන්න පෙළඹෙන්නෙ නෑ.

මේ දරුවන්ගෙ දෙමාපියන් අති මහත් බහුතරය උගත් අය නෙමෙයි. රබර් කිරි කැපීම, එහෙමත් නැත්තං කුලී වැඩක් කරලා තමයි ඒ ඇත්තො මේ දරුවො පෝෂණය කරන්නෙ. විශේෂයෙන්ම පිරිමි පාර්ශවය දැඩි ලෙස බීමට ඇබ්බැහිවෙලා තියෙන නිසාම මේ පවුල් වල ආර්ථික ගැටලු බොහොමයි. විදුහල්පතිනිය පාසල වගේම පාසල අවට සමාජය ගැනත් නිර්ලෝභීව අපව දැනුවත් කලා. 

මිත්‍ර‍ සම්පත්තියේ පිහිටෙන් නවීනතම ශබ්ද විකාශන උපකරණයක් වගේම එෆ් එම් මයික්‍ර‍ෆෝන දෙකක්, ප්‍රින්ටරයක්, ගුරු පුටු තුනක්, පුස්තකාලය සඳහා කියවීම් පොත්, හැම දරුවෙකුටම අලුත්ම පාසල් බෑගයක් සමග බෑගය පිරෙන්න පොත්, පෑන්, පැන්සල්, මකන කෑලි, පැන්සල් කටර්, වැනි දේවල් වගේම ශිෂ්‍යත්ව පන්තියේ ඉගෙන ගන්න අයට ශිෂ්‍යත්ව වැඩපොත් ආදිය ලබාදෙන්නත්, ඔවුන් ඊලග වසරෙ මේ පුංචි පාසලේ අධ්‍යාපනය හමාර කරලා වෙනත් පාසලක 6 වසරට ඇතුලත් විය යුතු නිසා අලුත් සපත්තු ගන්න වවුචර්, ආදියට අමතරව දරුවන්ට දෙමාපියන්ට ගම්වාසීන්ට හැමෝටම සහභාගි වීමට හැකි නොමිලේ බෙහෙත් සමග වෛද්‍ය සායනයක්  පවත්වන්නටත් අපට ලැබුන අරමුදල් ප්‍ර‍මාණවත් උනා. අප එහි යන්නට පෙර දවසෙ මගේ පන්ති සගයෙක් වන බේකරියෙ සාගර පොඩි උන්ගෙ පොඩි බඩගින්න පුරවන්න බනිස් පෙට්ටියක් දෙන්න පොරොන්දු උනා. බනිස් කාලා බොන්න මයිලෝ අරගෙන දුන්නෙ නිරෝන් අයියා.

මට එදාට රාජකාරි බොහොමයි...උඹලා එක්ක එන්න විදියක් නෑ. අනේ ඒ පොඩි උන්ට බනිස් කාලා බොන්න මගෙ ගානෙ මයිලෝ අරගෙන දෙන්නං...උඹලා ඒවා බෙදලා උන් ඒවා බිව්ව විදිය බලලා මටත් සතුටු වෙන්න පින්තූරයක් දෙකක් පෙන්නහං...ඒ හොදටම ඇති මල්ලි....නිරෝන් අයියා එහෙම කිව්වා.

අරුණළු වැඩ වලට කවදත් හොඳම තත්වයේ ලස්සන ලස්සන බෑග් මහලා, ඒවා සකසන්න ගිය මුදල පමණක් අයකරගෙන අපට ලබා දෙන්නෙ බෙන්තොට ඉන්න හර්ෂණී අක්කා. ඔයාලා කරන වැඩේ මම ඉතාමත්ම ඉහළින් අගය කරනවා මල්ලි...ඒවා තමයි අපි මේ සමාජයට කරන්න ඕනෙ යුතුකම්...මමත් පාරෙ ඉරිච්ච බෑග් එකක් එල්ලගෙන යන දරුවෙක් දැක්කොත් කථා කරලා නොමිලේම බෑග් දෙනවා. ඒක මට ලොකු සතුටක්...අලුත් බෑග් එකක් ලැබුනම ඒ පොඩි හිත්වලට ගොඩාක් සතුටුයි කියලා මම දන්නවා...ඒ නිසා මම ගිය අවුරුද්දෙ ඔයාලගෙන් ඉල්ලුවා වගේ මේ අවුරුද්දෙත් ඉල්ලන්නෙ මම හදපු බෑග් එල්ලගෙන සතුටෙන් ඉන්න පොඩි උන් දකින්න පින්තූරයක් දෙකක් මට එවන්න කියලා විතරයි.


වෙළඳපලේ අභ්‍යාස පොත් වල මිළ සෑහෙන්න ඉහළ ගිහින්, හොඳම තත්වයක් එක්ක, සාධාරණ මිළකුත් තිබ්බෙ රත්න පොත් වල විතරයි. ඒ ඇත්තන්ට දුරබණුවෙන් අපේ අරමුණ ගැන කිව්වම ඉතාම අඩුමුදලක් අයකරගෙන අපට උවමනා පොත් සියල්ලම ගෙදරටම ගෙනල්ලා දෙන්නත් රත්න පොත් බලධාරින් කටයුතු කලා.

අපේ සමාජය මොන තරම් දූෂණය වෙලා කිව්වත්, මිනිස් කම වෙනුවට නොමිනිස් කම හිස ඔසවලා තියෙනවා කිව්වත් ඒ ජරාජීරණය වෙච්ච සමාජය අස්සෙත් සුවඳ මල් තවමත් පිපෙන බවට මේවා තමයි සාක්ෂි.

වටින් ගොඩින් ටිකෙන් ටික අවශ්‍ය දේවල් අපේ නිවසෙ පැත්තක ගොඩගැහෙනවා. දන්න හඳුනන අපගේ හිතවතුන් තමන්ගෙ සේවා ස්ථානයටත් මේ පණිවිඩේ අරගෙන ගිහින්, ඒ අයගෙ මිතුරන්වත් මේ වැඩසටහනට දායක කරගෙන. නිවෙස් ඇතුලෙ තැන් තැන් වල තනිවෙලා හිටිය, තමන්ගෙ දරුවන් ඉස්සර දවසක කියවලා පැත්තකින් තියලා තියෙන කථා පොත් එක දෙක ඒ මනුස්සකමේ සුවඳ එක්ක ගුලිවෙලා දවසින් දවස සිරා කොලුවගෙ නිවස බලා ආවා. සිරා කොලුවගෙ හාමිනේ ඒ දේවල් ක්‍ර‍මානුකූලව තැන්පත් කලා.

කීපදෙනෙකුට කිව්වත් ගුරුපුටු  හොයාගන්න අපිට තවම බැරි උනා නේද ? සිරා හාමිනේ දවසක් සිරා කොලුවට යෝජනා කලේ මොරටුවට ගිහින් අපිම හොයාබලමු කියලා. එයින් පස්සෙ උදාවුන සතිඅන්තයක අපි දෙන්නා මොරටුවට ගියා. කඩයක් කඩයක් ගානෙ ඇවිදලා බැලුවත් අපට උවමනා මාදිලියෙ පුටු තිබුනෙ නෑ. ඒත් අතුරු මාර්ගයක කොනක තිබුන පුංචි කඩයක ගුරු පුටු කීපයක් අපි දෙන්නගෙ ආගමනය බලාපොරොත්තුවෙන් ඉදලා...

මගේ බිරින්දෑත් ගුරුවරියක් නිසා..ගුරුපුටුවෙ සුවපහසුව සහ අවශ්‍යතාව ගැන ඇයට තියෙන අවබෝධය සමග එතැන තිබුන මාදිලී කීපයක් අතරින් එකක් තෝරාගත්තා. ඒ මාදිලියෙන් පුටු තුනක ඇණවුමට මුදල් ගෙවලා ආයෙම නිවසට ආවට පස්සෙ මොරටුවේ ඉඳලා ගුරුපුටු ගම්පහට ප්‍ර‍වාහනය කරලා දෙන්න මාර්ග සංවර්ධන අධිකාරියෙ අසංක කැමති උනා.

මහත්තුරුන්ට පුලුවන් නම් මේ දරුවන්ගෙ තාත්තලට බීමේ ආදීනව ගැන දේශනයක් කරන්න. ඒ අය රබර් වතු වලදි බොහෝ වෙලාවට සර්ප දෂ්ඨන වලට ලක්වෙන නිසා අහුවෙන සර්පය මරලා දානවා. පුලුවන් නම් ඒ ගැනත් යමක් කරන්න. විදුහල්පතිතුමියගෙන් ලැබුන ඒ ඇරයුමත් පිලිගත්තට පස්සෙ මම කල්පනා කලේ එකම එක කෙනෙක් ගැන විතරයි...ඒ තමයි සුදු මල්ලි හෙවත් ජනක රණසිංහ. මගේම පාසලේ වැඩිහිටි සහෝදරයෙක්, නිහතමානී මිනිහෙක් ඒ වගේම තරුණ සත්වවේදීන්ගේ සංගමයේ සාමාජිකයෙක්.

සුදු මල්ලි ඉතාම ලෙංගතුව අපගේ ආරාධනය පිළිගත්තා වගේම, එදින වැඩසටහනට අදාළ ඉදිරිපත්කිරීම් සිදු කිරීමට අවශ්‍ය කරන තොරතුරු සකසාගෙන එන්නටත්  භාරගත්තා.

අමුතුවෙන් පිංකම් ඕනෙ නෑ මල්ලි...මේවා තමයි පිංකම්....මමත් රට වටේ යන මිනිහා නිසා ඉගෙනගන්න සම්පත් නැති උනත් ඉගෙනගන්න තියෙන ආශාව නිසාම දුක්විඳගෙන හරි ඉගෙනගන්න දරුවො ඕනෙ තරම් දකිනවා. ඒ අය ගැන ඇත්තටම දුකයි....ඒත් අපිට පුලුවන් දේ අපි කරමු.

මේ පුංචි හිත්වලට සතුට දෙන්න, ඒ අයගෙ අධ්‍යාපනයට ධෛර්යය දෙන්න, පුංචි තෑගි ලස්සනට ඔතාගෙන අපි ඒ අය බලන්න යන්න පිටත් උනේ අරුමැක්කෙමයි. ගමනට සහභාගි වන පිරිස කල්වේලා ඇතුවම පැමිණ තිබුන නිසා ප්‍ර‍මාදයක් නෑ. ගම්පහ අස්ගිරියෙන් සුදු මල්ලි, පල්ලියපාරෙන් ගීතා ටීචර්, විජය පාරෙ සාගර  බේකරියෙන් බනිස් පෙට්ටිය වගේම ඉහළගමින් කලබල වෛද්‍යතුමා සමග අරුණළු වෛද්‍ය සායන වලට උවමනා බෙහෙත් සැපයීම හැමදාමත් සිදුකරන මාතරයත් රථයට නැගුනට පස්සෙ නඩේ සම්පූර්ණයි.

මගේ වර්තමාන සේවා ස්ථානයේ  සේවකයන් ප්‍ර‍වාහනයේ නියුතුව තිබෙන පිටස්තර බස් රථයක හිමිකරු ඉතාම අඩුමුදලකට මේ රථය රියදුරු සමග ලබාදුන්නෙ...මේ වගේ වැඩ වලට අපිත් පුලුවන් විදියට උදව් කරන්න ඕනෙ කියන හැගීමෙන්. අපේ ගමන යන්නට නියමිතව ඇත්තේ ඉතාම කටුක මාර්ගයක, වල ගොඩැලි, වගේම පාර දෙපැත්තෙ කලුගල්කුළු තිබෙන මාර්ගයක වුවත් තමන් සතු නවතම සුඛෝපභෝගී බස් රථයක් ඔහු අපට ලබාදුන්නේ ඒ පිළිබඳ කිසිම තැකීමක් නැතුව.

නගර මැදින් ගිය රථය, ගමට සේන්දු උනා, රබර් වතු පහුකරමින්, ගමේ සුළඟ විඳිමින් ඉදිරියටම ඇඳිලා මහා මාර්ගයෙන් අතුරු මාර්ගයකට හැරෙන තැන විශාල පල්ලමක්...එතැනින් රථය ඉදිරියට ගියේ බොහොම අමාරුවෙන්, දැන් දැන් බස් රථයේ ප්‍ර‍මාණයටම මාර්ගයේ පලල පුංචි වෙලා...මේ ඉස්කෝලෙට මීට කලින් ගිහින් තියෙන්නෙ එකම එක බස් එකයිලු...ඒකත් තනි දොරේ බස් කොටයක්...ඉස්සර දවසක කලබල පෙම්වතිය සිරා කොලුවට කියපු හැටි මතක් උනා.

බස් රථය දැන් යන්නෙ අවධානම් සහගත ගමනක්...ඇතැම් වංගුවක තියෙන කොන්ක්‍රීට් ලෑල්ලෙන් එළියට පිටුපස එක රෝදයක් පනිනවා...මේ මොන අවධානම තිබුනත් මේ ගමන යන්නම ඕනෙ කියන හැගීම රියදුරු තැනට තිබුන නිසාම ඔහු අප සියල්ලන් එහි ගෙනගියේ තමන්ගෙ රියදුරු හැකියාවන් මොනවට ප්‍ර‍දර්ශනය කරමින්. සැබැවින්ම එය එතරම් අපහසු ගමනක්.

ඉතිහාසයේ මාවරැල්ල වහකුල කණිෂ්ඨ විද්‍යාලයට සේන්දු වූ දෙවැනි බස් රථය දුටුවනම එහි රැස්ව සිටි ගම්වාසීන්, සිසුදරුවන්, දෙමාපියන් ඇතුලු සියල්ලෝම ඉතාම ප්‍රබෝධයට පත් වුනා. අපේ ආගමනය දැනගත්ත දවසෙ ඉඳන් මේ පුංචි හිත් නොඉවසිල්ලෙන් අප එන පෙරමග බලාසිටි බව අපට කිව්වෙ කලබල පෙම්වතී. අයියලා ඇත්තටම එනවා නේද ? පවු අනේ මේ ළමයි...මට ලෝභ හිතෙනවා ඒ අය ඒ තරම් ආශාවෙන් මග බලා ඉන්නෙ...


අරුණළු අමුත්තන් හැමෝම තමන්ගෙ පාසලේ තූර්යවාදන කණ්ඩායමේ දායකත්වයෙන් පිළිඅරගෙන ඒ අයට තියෙන එකම ශාලාවට රැගෙන යන්න පිටත් උනා. මේ පුංචි දරුවන්ට වාදන භාණ්ඩ කිසිවක් නෑ. ආදේශන භාණ්ඩ වලින් තමයි සියලුම දෑ නිමවා තිබුනෙ. පුංචි බූලියක් බේස් ඩ්‍ර‍ම් එකක් විදියට වර්ණ ගන්වලා, එය වාදනය කරනවා දැක්කම බෑන්ඩ් කෙරුවාවේ නිරත උන එකෙක් විදියට මට දැනුනෙ පුදුමාකාර දුකක්. මගේ දෙඇස් ඒ වෙලාවෙ කදුලෙන් බොඳ උනා...ඒක අතිශෝක්තියක් නොවෙයි. ඒ හැගීමම සුදු මල්ලි අයියගෙ මුහුණෙත් තැවරිලා, ඒ දෙඇස් අගත් කඳුලක් මෝදු වෙලා තිබුන බව මම හොඳින් දැක්කා.



ජාතිය ධජය ඔසවලා, ජාතික ගීය ගායනා කරලා, අහවර උනාට පස්සෙ පුංචි අතකින් අපට ලැබුන බුලත් හුරුල්ලක් අතට අරගෙන උත්සවය පැවැත්වෙන ශාලාවට ඇතුලුවෙන්න අපිට හැකි උනා. ආගමික වතාවත් වලින් පස්සෙ උත්සවයෙ වැඩකටයුතු ආරම්භ උනේ අප විසින් එහි රැගෙන ගිය ශබ්ද විකාශන උපකරණ භාවිතයෙන්මයි.




බීමේ ආදීනව ගැන අහන්න තාත්තලා හිටියෙ දෙදෙනෙක් හෝ තුන්දෙනෙක් පමණයි...අනිත් සියල්ලෝම මව්වරුන්...පුංචි අය ඉතාම ප්‍රබෝධයෙන් සතියක දෙකක් ඉඳන් එයාලා පුරුදු පුහුණු උන නැටුම් අංග, සින්දු, නාට්‍ය හැමදේම ඩෙස්ක් යොදාගෙන නිර්මාණය කරපු පුංචිම පුංචි වේදිකාවක ඉදිරිපත්වෙනවා.





ඒ අතරතුර විවිධ දෑ අරගෙන එන්න වරින් වර බස් රථය වෙත යන්න අප කාට කාටත් සිදු උනා. තමන්ගෙ ගමට මීට කලින් බස් එකක් එනවා දැකලා නැති නිසාදෝ පාසල් යන වයසෙ පොඩි උන් රොත්තක් බස් එක ඇතුලෙ ආසන වල මගීන් වගේ ඉඳගෙන ඉන්න අමුතුම දර්ශනයක් අපේ සිත් ඔකඳ කලා...

ඉඳගෙන ඉන්නද ඇහුවා....මම හා කිව්වා...රියදුරු තෙමේ මන්දස්මිතියක් නැගුවා.

දිවා විවේකයට කලියෙන් සාගරගෙ බනිස් පෙට්ටිය, මයිලෝ සමග බෙදාදුන්නත් දරුවන් බොහොමයක් මයිලෝ පානය කරනවා දකින්න ලැබුනෙ නෑ. බනිස් ගෙඩිය අනුභව කර මයිලෝ ඇසුරුම තුරුලුකරගෙන ඉන්නා දරුවන් ඉතාම සුලභ උනා. අප සිතුවේ ගෙදර ගොස් පානය කරන්නට ඔවුන් මේවා තබාගෙන සිටිනවා කියා වුවත් අප පසුව දැනගත් පරිදි මයිලෝ පැකට්ටුවට අමුනා ඇති පුංචි ස්ට්‍රෝව ආධාරයෙන් මේවා පානය කරන ආකාරය ඔවුන් දැන සිටියේ නැත.


පාසලේ දෙමාපියන්ගේ අනුග්‍ර‍හයෙන් අපට ලැබුනේ ගම්මානය අවටින් සොයාගත හැකි දෑ උපයෝගී කරගනිමින් සකසන ලද කඳිම දිවා අහාරයක්. බත් වලට අමතරව කටට සැර කොච්චි එක්ක මයියොක්කා කෑල්ලක් දෙකක් ආමාශගත කරන්නත් අපි අමතක කලේ නෑ.  අපි නොදන්න ලයිව් ආයෙ ටීවී එකේ යන්නෙ නැද්ද ? දත් හැලුන ආච්චිලා දෙන්නෙක් සුදු මල්ලි අයියාගෙන් ඇහුවාම සුදු මල්ලි අයියා ඇහුවෙ ඔයාලා මාව අඳුනගත්තද කියලයි.


දිවා භෝජන සංග්‍ර‍හයෙන් පස්සෙ සුදු මල්ලි අයියා සර්පයො ගැන සභාව දැනුවත් කරන්න පටන් ගත්තා. පුංචි හිත් වලට දැනෙන විදියට ඉතාම නිර්මාණාත්මකව ඒ ඒ සර්පයාගේ පින්තූරයකුත් සමගම. ඒ පුංචි හිත් ඉතාම සතුටට පත් උනා. සභාව එකම රස ගුලාවක් උනා. ඒ පුංචි හිනාවට ඒ අයගෙ දෙමාපියන් වගේම ගුරුවරුනුත් එකතු උනාට පස්සෙ එතැන කඳිම මිහිරියාවක් මැවුනා.


සර්පයො ගැන කතාවෙන් පස්සෙ බොහොම සංවේදී කථාබහකට සුදුමල්ලි අයියා එළැඹුනා. අපි දන්න විකට නලුවා අතුරුදන් වෙලා, දුක දැනෙන සංවේදී මනුස්සයෙක් එහි ඉතිරිවෙලා හිටියා. තමන්ට මොන තරම් ආර්ථික ගැටලු තිබුනත් මේ පුංචි දරුවන්ට හැකි උපරිම ලෙස උගන්වන ලෙස ඔහු දෙමාපියන්ගෙන් අයැද සිටියා.

මේ කථා බහ අතරේ ඔහු තූර්ය වාදන කණ්ඩායම ගැන වචනයක් කියන්නත් අමතක කලේ නෑ. ඒත් ඒ මතකය ඔහු වඩාත් සංවේදී කල නිසාම සභාව මධ්‍යයේ කථා කරගන්නට වචන ගොණු කරනු නොහැකිව විනාඩි කීපයක් ගත කලේ දෙඇස් තෙත් කරන කදුලු වැල් දෙනෙතට සමු දී තමකොපුල් තල සිපගන්නා අන්දම ලොවින්  සගවන්නට කිසිදු නිරර්ථක උත්සාහයක නොයෙදෙමිනි. වචනයේ පරිසමාප්ත අර්ථයෙන්ම හෙතෙම අව්‍යාජ මිනිසෙකි.




සෑහෙන කාලයක සිට දන්නේ වුවද සුදු මල්ලි අයියා මෙතරම් සංවේදී මිනිසෙක් යැයි මම පළමු වරට ශපථ කරගත්තෙමි. අනුන්ගේ දරුවෙකු වෙනුවෙන් හලන්නට කඳුලක් ඉපදුන ඔහු කෙතරම් ශ්‍රේෂ්ඨයෙකුදැයි මට මේ අකුරු අමුණන මේ මොහොතේද සිතෙයි.

විදුහල්පතිතුමිය වෙත පරිත්‍යාගයන් ලබාදෙමින්


අවසානයේ ඔව්හු යුවතපතීන් වූහ

පාසලට ලබාදීමට රැගෙන ආ දෑ බෙදාදීලා අවසන් උනාට පස්සෙ පුංචි දරුවන්ට ත්‍යාග බෙදාදීම ආරම්භ උනා. සතියක දෙකක ඉඳන් කුතුහලයෙන් ඉන්න මේ පුංචි හිත් දැන් දැන් නොඉවසිලිමත් බව අපි දන්නවා.




ත්‍යාග ප්‍ර‍දානෝත්සවය අවසානයේ පුරුදු විදියට අරුණළු වෛද්‍ය සායනය ආරම්භ උනා. පුංචි දරුවන්ට අමතරව ගමේ වෙසෙන වැඩිහිටියොත් පේලි සැදී එහි ප්‍ර‍තිලාභ භුක්ති වින්දා. ගල්කඩවලදි වගේම මාවරැල්ලෙදිත් වෛද්‍යතුමා නියම කරන බෙහෙත් පෙති, ඖෂධවේදී මාතරගේ අධීක්ෂණය යටතේ පුංචි පුංචි පැකට් වලට ඇසුරුම් කරලා දුන්නෙ මගේ පාසල් මිත්‍ර‍යා උදිත.






ඔයින් මෙයින් මේ සියලුම කටයුතු අවසන් වෙලා අපි ආපහු ගම්බිම් බලා පිටත් උනේ ඒ ඇත්තන්ගෙන් ලැබුණ බෙලිමල්කෝප්පයක් බීලා හකුරු කෑල්ලක් හපන ගමන්. වෙහෙසකර වුවත් අද දවස ගැන හැම දෙනාම සතුටෙන්.

අප අපට හැකි දේ හැකි ප්‍ර‍මාණයෙන් කරන්නට උත්සුක වන්නේ නම් අප සමාජය මෙයට වඩා යහපත් එකක් වනු ඇත. අඳුරටම ශාප නොකොට එක් පහනක් හෝ දැල්වීමට ඔබත් අධිටන් කරනු මැනවි.

අප විසින් ලබා දුන් පුංචි තිළිණය සමග සුදු මල්ලි අයියා 




මම කාමරේ අරින සිරා කොලුවා.



ප.ලි

ගිය වසරේ සැප්තැම්බර් මස පැවැත්වුන සත්කාරයකි. අකුරු කරන්නට ඉසිඹුවක් ලැබූයේ අදයි.

මේ පුංචි තූර්යවාදන කණ්ඩායමට සැබෑ තූර්යවාදන උපකරණ ලබාදෙන්නට ඔබට හැකි නම් ඒවා ආදරයෙන් බාර ගන්නට ඒ පුංචි හිත් කැමතිය. සිරා කොලුවා විසින් එවැනි උත්සාහයන් සම්බන්ධීකරණය කරනු ඇත. 


මයික් එකෙන් කථා කරන්න තියෙන ආසාවට උදේ රැස්වීමේ කථා කරන්න දැන් ළමයි පොරකනවා. මීට කලින් අපි ළමයෙක් ඉස්සරහට යවාගත්තෙත් හරිම අමාරුවෙන්. හැමෝම කථා කරන්න පොරකන නිසාම අපි දැන් සතියකට උදෑසන රැස්වීම් දෙකක් තියනවා...පස්සෙ දවසක විදුහල්පතිතුමිය එහෙම කිව්වා.

Thursday, January 31, 2019

38 හිරමනේ සහ ලොකු සාදු

2018 වසර සිරාගේ කාමරයට උදා වූ අසික්කිතම වසර විය යුතුය. ගත වූ මාස 12 තුල සිරා කොලුවා ලියා ඇත්තේ යන්තම් ලිපි 3 කි. අතීතයේ දී බොලා වෙනුවෙන් ලියූ ලිපි ප්‍ර‍මාණය සමග සංසන්ධනය කොට බලන විට එය සැබැවින්ම ලැජ්ජා හිතෙන අගයකි. මේ ලැජ්ජාව නිසාවෙන් සසල වූ මාගේ භෞමික අඛණ්ඩතාවය නිසාම උදා වූ නව වසරේ හැකි තරමක් ලිපි ලියන්නේ යැයි මම අධිෂ්ඨාන කොලෙමි. ඒ නිසාම ගත වූ වසරට වඩා යමක් ඔබට මේ වසරේ සිරාගෙ කාමරයෙන් කියවන්නට හැකි වනු ඇත. අඩුම තරමේ මාසයකට එකක් හෝ ලියන්නට සිතමි.

සිරා කොලුවා නිවසේ සිටින්නේ නම් මෑණියන් ආහාර පිසින විට ඇගේ සහයෝගය පිණිස පොල් ගෑම නොවරදවා කරන්නේය. එය විටෙක මාගේ විනෝදාංශයක් වැනිය. අපේ හාමිනේ කැන්දාගෙන ආවා කියා මාගේ විනෝදාංශ බොහොමයක් වෙනස් වූයේ නැත. මම ඇගේ ආරාධනාවකින් තොරව බොහෝ විට පොල් ගෑවෙමි. මෑතක සිට හිරමන තලයේ මුවහත බොහෝ සේ අඩපණව තිබූ නිසා ගෙදර බුදුන් අම්මා කිව්වේ මේ තලය මුවහත් කල යුතු බවකි. 

පාර අයිනෙ සුකුරුත්තං බඩු විකුණන වෙළෙන්දෙක් හිටියොත් පීරක් අරගෙන ඇවිත් මේ හිරමනේ මුව තියන්න.

ඇගේ ඉල්ලීම එලෙසින් ඉටු නොවී ගත වූ මාස කීපයකි. මේ මොට්ට හිරමනේ පොල් ගාලා මගෙ අතත් රිදෙනවා මෑණියන් දෑ මැසිවිලි නැගුවාය. දිනෙන් දින  අඩපණව පොල් ගෑම බොහෝ අපහසු කාරියක් වී තිබෙන වකවානුවක එක් ඉරිදා දිනයක උදෑසන,

කතුරු මුවාත්, පිහිය මුවාත් 

යන හඬ මගේ කන් බෙරය කම්පොනය කර අක්මාවට කිඳා බැස්සේය. මට වහ වහා හිරමනය මතක් වූවේය. යතුරු පැදියක නැගුන තරමක් මහත නමුත් එතරම් උස නැති පුද්ගලයෙකුගේ රූප කායක් මගේ යුග දෙනෙතට සම්මුඛ වූයේ සිරා කොලුවා හඬ ආ දෙසට ඇවිද ගිය නිසාවෙනි.

ඔයා හිරමනත් මුව තියනවද ?

මගේ පැණයට අහිංසක සිනහවක් සමගින් පිළිතුරු දුන් හෙතෙම ඔව් මහත්තයා යනුවෙන් තෙපළේය.

මුහුණ පුරා වැවුන රැවුලකින් යුතු, කොටු සරමක් කොටට හැඳ සිටි ඔහු මුස්ලිම් ජාතිකයෙකු බැව් මම ඉක්මනින් හඳුනා ගත්තෙමි.

හෙතෙම සිටියේ CT 100 වර්ගයේ බයිසිමොටෝවකට තම පශ්චාත් කලාපයේ බර මෙන්ම ජීවන බරද එක සේ  මුදාහරිමිනි. බයිසිමොටෝවේ පිටුපස ලෑලි වලින් සැකසූ පෙට්ටියකි. එහි ඉහළින් ග්‍රයින්ඩරයක හැඩ තල පෙනෙයි. පැත්තකින් තණකොළ කපන මැෂිමකි. තණකොළ කපන මැෂින් දණ්ඩේ ඔහුගේ සේවාවන් සහ ඔහුව සම්බන්ධ කරගත හැකි දුරකථන අංකය සහිත දැන්වීමකි. පිහිය, කතුරු මුවහත් කිරීම සහ තණකොළ කපනු ලැබේ යනුවෙන් එහි සඳහන් වී තිබේ. බයිසිමොටෝවේ පදාසයක් ඉරී ගිය ආසනයෙන් ඔහුගේ ජීවන තත්වය පිළිබඳ සියුම් තතු අවට සමාජයට සන්නිවේදනය වෙයි.


අපේ හිරමනයක් මුව තියාගන්න තියෙනවා. කොහොමද ගාස්තුව ?

හිරමනේ බලන්නෙ නැතුව කියන්න බෑ මහත්තයා. 

හෙතෙම බුලත් කහටින් දුර්වර්ණ වූ දත් පෙළ පෙන්වා දසන් දක්වා සිනාසෙයි. අහිංසක කමේ ප්‍රතිමූර්තියක් බදු මේ මිනිසා කෙටි කලෙකින්ම මා සිත දිනා අහවරය.

මුළුතැන් ගෙයට දිව ගිය මා හිරමනය රැගෙන නැවත ඔහුට සම්මුඛ වූයෙමි.

මේකට රුපියල් 220 ක් දෙන්න මහත්තයා..ග්‍රයින්ඩරෙන් අල්ලලා, පීරි ගාලා හොදට මුව තියලා දෙන්නං.

හරි. වැඩේ කරමු එහෙනම්..මම තීන්දුව දුන්නෙමි.

ඒ අවසරයෙන් මුවාත් කරු තම අඩුවැඩිය තිබූ ලෑලි පෙට්ටියෙන් ග්‍රයින්ඩරය හා තවත් උපාංග කීපයක් අප නිවසට සමීප කරවා කොටු වැටුන සරම සකසාගෙන බිම ඉඳගත්තේ ග්‍ර‍යින්ඩරය විදුලියට සම්බන්ධ කරන ලෙස සිරා කොලුවාගෙන් ඉල්ලා සිටිමිනි.


යටි හනුව සහ උඩු හනුව අතර එහා මෙහා යමින් තැලී පොඩිවෙන බුලත් විටක් අතරේ අපේ කථානායකයා සීරුවට මාරුවට හිරමනය මුව තියනා අරුමය මම බලා සිටියෙමි. ඔහු සැබැවින්ම ඒ කාරියට හපනෙකි. දැති නොමැතිව ලතැ වුන හිරමන තලයට නොබෝ වේලාවකින්ම යෝධ බල සහ විරිය ඔහු නිසා ලැබුනි. ග්‍ර‍යින්ඩරයෙන් සුමට කොට පීරි තලයක් මගින් දැති අතර ගැඹුර සකස් කොට මේ කාරිය මනාලෙස ඉටු කිරීමට ඔහුට විනාඩි 15 ක පමණ කාලයක් යන්නට ඇත.

වතුර වීදුරුවක් දෙන්න පුලුවන්ද ? ඔහුගේ සිනහව සැබැවින්ම අව්‍යාජ එකක් විය යුතුය.

එතෙක් වේලා මුඛය තුල ඒ මේ අතට දෝලනය වූ බුලත් හපය අප මිදුලේ කොණකට  වන්නට මුදා හැරි ඔහු ඉතාම අහිංසක ලෙස නැවත නැවතත් සිනාසෙයි.

වැඩේ ඔන්න හොඳටම කලා. දැන් හොඳට පොල් ගෑවෙයි. අහළ පහළ තව වැඩ තියෙනවද දන්නෙ නෑ නේද මහත්තයො...

කොහෙ ඉඳන්ද ඔයා එන්නෙ..මම විමසුවෙමි.

සීදුවෙ ඉදන්... 

සීදූවේ සිට අව් කාෂ්ඨකයේ පිච්චෙමින් මුව තියන්නට සොයමින් පැමිණි ඔහුගේ අද දිනයේ පළමු ගණුදෙනුව මෙය බැව් මම ඔහුගේ අංග චලනයන් ඔස්සේ හඳුනාගතිමි. ඒ නිසාම අප අවට හිතවතුන්ගේ මුවතියන්නට ඇත්තේ මොනවාදැයි දුරබණුව ඔස්සේ විමසා බැලුවෙමි.

මාමා ගිය සතියෙ මුව තිබ්බනෙ...

ඒ පිහිය අයින් කලා අපි අලුත් පිහියක් ගෙනාවා..

නෑ නෑ මුව තියන්න මොකුත් නෑ..

විවිධ අය විවිධ දෑ කියූහ. දුරබණුව අතට ගෙන ඔහුට තවත් රාජකාරියක් සොයාදෙන්නට මම පටන් ගන්නා විට විකසිතව තිබූ ඔහුගේ මුව කමල, මුව තියන්නට කාටවත් මොකුත් නෑලු...යනුවෙන් පවසනාවත් සමග අඳුරු වන අන්දම මම පැහැදිලිව දුටුවෙමි.

මහත්තයා ලග පරණ ෂර්ට් එහෙම නැද්ද...වැඩකට යද්දි අදින්න හරිහාමන් ඇඳුමක් නෑ.  

හිරමනය මුව තැබීමේ ගාස්තුව ගෙවා දැමීමටත් පෙර ඔහු තවත් ඉල්ලීමක් කරයි. එතෙක් වෙලා ඔහුගේ කමිසයේ අත් යටට වන්නට සැගව තිබූ විශාල පැලැස්තරයක් මම දුටුවෙමි.

එයට පෙර මාසයක විදේශගත ඥාතියෙකුගෙන් මා හට ලැබුන මගේ ප්‍ර‍මාණයට වඩා බෙහෙවින් විශාල අලුත්ම ෂර්ට් දෙකක් මා සතුව තිබුනි. මම කිසිම පැකිලීමකින් තොරව ඒවා ඔහුට දුන්නේ සතුටිනි.

ඒවායේ ඇසුරුමේ වූ රට සුවඳ ගැඹුරු හුස්මකින් විඳගත් මේ අමුත්තා, බොහොම ස්තූතියි යැයි මිමිනුවේය.

ඔහුගේ ගාස්තුව  සුරතේ තැබූ කල මුදල් නෝට්ටු දෑතින්ම අල්ලාගෙන මා දෙස  ස්තූතිපූර්වකව බලා සිටි ඔහුගේ දෑසේ සතුටක සේයා මම දුටුවෙමි.  ඉන් අනතුරුව තවත් වැඩ දෙක තුනක් සොයාගත හැකි අසළ ගම්මානයක තතු පවසා මම ඔහු පිටත් කර හැරියේ තෘප්තිමත් සිතිනි.

දැන් මේ කථාවට සම්බන්ධ නැති තවත් අතුරු කථාවෙකි.

අප කුඩා කල සිට අප පන්සලේ සහ එහි පැවැත්වෙන පිරිවෙන් පාසලේ නායක හිමිපාණන් ලෙස වැඩසිටි  සිවුරු කරු තම බිරිඳ සමග නිවසක සිටියදී දායකයන් පිරිසකට කොටු වූයේ දැන් මාස හතරකට පමණ කලියෙනි.

මේ පැවිදි පුද්ගලයාගේ චර්යාවන් කෙරෙහි කළකිරුණ ඇතැම් දායකයෙක් කාලයක සිට පන්සල වර්ජනය කරමින් ඔහුගේ වරදක් අතට හසු කරගන්නට මාන බලමින් සිටිනා විටෙක තවත් දායක ඇත්තෙක් නායක හිමිට ඉහළම පුද සත්කාර පවත්වමින්, ඔහුගේ අඩුපාඩු සැළ කරනා අයට බනිමින්, පන්සලේ අඩුපාඩු සකසාලමින් දෙලොව යහපත සලසා ගනිමින් සිටියෝය.

සිරා කොලුවාගේ ඇති හැකි ඥාතීන් ඇතමෙක් මුළුතැන්ගෙයි උපකරණ, ශබ්ද විකාශන උපකරණ මෙන්ම පන්සලට අවැසි යැයි ඒ අයට දන්වා තිබූ විවිධ වර්ගයේ විදුලි උපාංග නායක හිමිපානෝ වෙත පූජාකලේ බැති සිතිනි. මේ කිසිවෙකුත් සිරා කොලුවා අහිංසක පාසල් දරුවන් අරභයා කරනා කිසිදු වැඩ කටයුත්තකට ශත පහකින් හෝ තම දායකත්වය දුන්නේද නැත.

දුස්සීල සිවුරු කරුට හදිසියේ වූ අභාග්‍යය  හෙවත් එතෙක් කල් හොරෙන් පවුල් කෑ බිරිඳගේ නිවසේ සැගව සිටියදී මාට්ටු වීමෙන් පසු මේ කාගෙ කාගෙත් ඇස් ඇරුනු අතර ඔවුන් ඒ වන තෙක් පන්සලට පූජා කල බොහෝ දෑ පන්සලේ නොමැති බැව් වැටහෙන විට අස්පයා ඉස්තාලයෙන් පැනගොස් හමාරය. ඒ බොහෝ දෑ ඔහුගේ පුද්ගලික ප්‍රයෝජනය පිණිස නිවස වෙත රැගෙන ගොස් තිබිණි.

අප ප්‍ර‍දේශයේ වෛද්‍යවරයෙක් දිනක් ඔහු රැකියාව කරනා රෝහලේ ගැබිණි මව්වරුන් සිටිනා වාට්ටුවේ රාජකාරිය කරනා කලෙක ගිහි ඇඳුමින් සැරසුනු නායක හිමි හමු වී ඇත්තේ බොහෝ කාලයකට පෙරදීය. ඒ අවස්ථාවේ සිට සිවුරු කරු දායක දැලට හසුවන තුරා මේ හමුවීම පිළිබඳ රහස ගැන කිසිවක් කිසිවෙකුට නොකී මේ වෛද්‍යවරයා පන්සල සමග එතෙක් පැවති සම්බන්ධය විසන්ධි කලේ ඉහත හමුවීම සිදු වූ දවසේම යැයි තම හිතවතුන්ට කියා තිබුනි.

නව දෙමහල් නිවසක, අන්තර්ජාතික පාසලක අධ්‍යාපනය ලබනා දරුවෙකු සහ බිරිඳ සමග තම ජීවිකාව ගෙන යන්නට මේ දුස්සීල සිවුරුකරු තම චීවරයේ ආනුභාවය යොදාගෙන තිබුනි. අවට සමාජයට ඇය සැල කර තිබුනේ තම සැමියා විශ්ව විද්‍යාල ආචාර්ය වරයෙකු බවයි. ඔහුගේ සන්සුන් බසට රැවටුන දායක කාරකාදීන් සිව්පසයෙන් උපස්ථානයට අමතරව මුදලින් සහ තවත් බොහෝ දෑ වලින් ඔහුගේ හිත එතෙක් කල් පිනවා තිබුනේය. ඇතැම් උපාසිකාවන් එයට වඩා දෑද හොර රහසේ තැන් තැන් වල දන් දී ඇති බැව් දැන් ප්‍ර‍සිද්ධ රහසකි.

දැන් අප මේ සිදුවීම් දෙකම එක සිදුවීමකට ගලපා ගමු.

මිනිසුන් ලෙස මේ සමාජය තුල කුටුම්භ පෝෂණය පිණිස අප සිදු කරනා විවිධ ආර්ථික ක්‍ර‍ියාකාරකම් හෙවත් රැකියාවන්හි  උස් පහත් භේදයක් අප සමාජය තුල දකින්නට ඇත්තේ බොහෝ කාලයක සිට බැව් රහසක් නොවේ. සනීපාරක්ෂක කම්කරුවා මෙන්ම වෛද්‍යවරයාද අප සමාජයට සිදුකරන්නේ වටිනා සේවයකි.

එහෙත් මේ දෙදනා අතරින් වෛද්‍යවරයා ඉහළ අත්තක තැබීමටත්, කම්කරුවා පහළම අඩියක රඳවා පාගා දමන්නටත් ආකල්පමය අතින් අපේ සමාජය ඉතාමත් දුර්වල තැනක තිබේ. ඔහුද මනුෂ්‍යයෙකු බවත්, ඔහුගේ අවශ්‍යතාවයන්ද අනෙක් මිනිසුන්ගේම වැනි යැයි බොහෝ විට බොහෝ අය සිතන්නේ නැත. මෙවැනි පුද්ගලයෙකුගේ සේවය ලබාගෙන ඔවුන් වෙත ස්තූතිවන්ත වූ බොහෝ විට ඔවුන් සංවේදී වූ අවස්ථා සිරා කොලුවාගේ ජීවිතය තුල ආගන්තුක නැත.

සිය පවුල නඩත්තුව පිණිස හිරමන මුවාත් කරමින්, අනුන්ගේ තණකොළ කපමින්, සමාජයට හිතකර සේවාවක, නිරතවන ඒ සහෝදරයා කෙරෙහි පිළිගැනීමක් අප සමාජයේ නැත. බැලූ බැල්මට හෙතෙම පොෂ් නැත. විශාල මිළ ගනන් වල යාන වාහන නැත. ඒ නිසාම සමාජ පිළිගැනීමක්ද නැත.

එහෙත් සමාජයට හොඳ මුහුණ පෙන්වමින්, විනය විරෝධීව මෙන්ම වංචාසහගතව ජීවත් වන, සමාජයට යහපත වෙනුවට අයහපත දායාද කරන දුස්ශීල සිවුරු කරු වැනි චරිත උදෙසා පුද දෙන්නට ඕනෑ තරම් ගෞරවය මේ ගිලන් වූ සමාජයට තිබේ. අවසානයේ මේ චරිත දෙකම අඩු වැඩි වශයෙන් තම තමන්ගේ කුටුම්භ ජීවත් කරවන්නට වෙහෙස වූවෝ බැව් පෙනෙනු ඇත.

නව වසරේ හෝ ආකල්පමය වෙනසක් අරඹමු. එසේ නොමැතිව ජරා ජීරණව පණ අඳිනා ශ්‍රී ලාංකික ජන සමාජයට අලුත් හුස්මක් ගන්නට ක්‍ර‍මයක් නොමැතිව ප්‍ර‍ත්‍යක්ෂ වෙමින් පවතී. ධනයට බලයට ලොල්ව ගෞරවය සහ පිළිගැනීම පුදනා මේ මජර ක්‍ර‍මය වෙනස් කරමු.

2019 නව වසරේ  සිරාගේ කාමරයට පැමිණෙන ඔබේ අවධානය පිණිසයි..




මම කාමරේ අරින සිරා කොලුවා.

Tuesday, July 31, 2018

118 බිරිඳ මගේ ඔබ...

සිරා කොලුවා දැන් ප්‍රිය සැමියෙකු වගත්, නුවර මැණිකේ මුලිච්චි වීමෙන් පසු ඇති වූ තත්වයත් මෙයට පෙර ලිපියේදී බොලාට කීවෙමි. තනිකඩ කොලුවෙකුට ගැලපෙන කෙලියක් යෝජනාවකින් සොයායාම සැබැවින්ම අගක් මුලක් නැති නූල් බෝලයක් දිග හරින්නට තැත් කරනවාක් වැනි යැයි නිවී සැනසිල්ලේ හිතන විටෙක මට සිතෙයි. කාලය, ධනය, ශ්‍ර‍මය ආදී සියල්ලම සම සමව වියදම් කල යුතු, ස්ථිරව ප්‍ර‍තිඵලයක් ලැබෙන්නේ කවදාදැයි කිව නොහැකි අපූරු ගමනක් වේ නම් ඒ යෝජනාවකින් යුවතියක් බලන්නට යන ගමනයි.

ඇතැම් කෙලියක් පොදුවේ පුරුෂ පරාණ කිසිවකට කැමති නැත, එය පුරුෂ ෆෝබියාව යනුවෙන් නම් තැබිය හැකිය. ඇතැම් විටෙක කෙලී කැමතිය...එහෙත් වැඩිහිටියන් අකමැතිය...ඒ දෑවැද්දේ බර පිළිබඳ සෑහීමකට පත්විය නොහැකි විටෙකය...නැති නම් කුල මල භේද පිළිබඳ ගැටලුවකි. මේ සියල්ලම ගැලපුන තැනක කේන්දරයේ කොටුවක මාරක පිහිටීමකි. කසාද බැන්දොත් දෙදෙනාගෙන් කෙනෙකු නොඑන ගමන් යන දවස වැඩි ඈතක නොවේය. එසේත් නැති නම් අධි කාම යෝගයකි. බඩු ෂුවර් නෑ පුතේ...එවන් විටෙක කේන්දර කරුවා කසාද බඳින්නට තැත් කරන අහිංසකයාගේ හිස අතගා ආදරයෙන් පවසා හිත සනසයි.

නුවර මැණිකේ බැහැදැකීමෙන් පසු ගත වූ කාල සීමාව තුලදී මේ මගුල කෙරෙන්නේ නැති වග සහසුද්දයෙන් දැන ගත් ගෙදර බුදුන් අම්මා, සිරා කොලුවා කෙසේ හෝ අමාරුවේ දමන්නේයැයි දැඩි අධිෂ්ඨානයකින් සිටි හෙයින්දෝ එයින් පසු එළැඹුන සති අන්තයක ජාතික පුවත් පතක, මංගල තීරුවේ සිරා කොලුවාගේ ගුණ උච්ච ස්වරයෙන් වයා දැන්වීමක් පළ කලාය. ඒ ගුණ දැකීමෙන් අමන්දානන්දයට පත් ජනී ජනයා..තම තමන්ගේ දූ වරුන්ගේ රූ සොභා අඩු වැඩි වශයෙන් විස්තර කරමින් පත්තර කන්තෝරුවට එවූ ලිපි සතියකට දෙකකට වරක්  අප සොයා පැමිණියෝය. 

නවීන පන්නයේ මෝටර් රථයක් දායාද වශයෙන්, අලුතින් ඉඳිකල නිවසක් හිමි දියණිය, රජයේ රැකියාවැති දියණිය, සුදු පැහැපත් රූමත් දියණිය ආදී වශයෙන් දියණියන්ගේ ගති සොභා සමග මාපියන් හිත සතුටින් දෙන්නට කැමති දෑද ඒ ලිපි වල අඩංගු වූහ. එහෙත් සෑම ලිපියකම අවසන කේන්දර සටහන මෙන්ම කේන්දර ගැලපීම අනිවාර්යය බැව් ද සඳහන් කර තිබූ නිසාවෙන් තෝරාගන්නා සෑම යෝජනාවක්ම කේන්දර මාමාට යොමු කොට ගැලපීම සොයාගත යුතුව තිබේ. මා පියාණන් ලිපි එවූ සෑම කෙනෙකුටම දුරබණුවෙන් අමතා ස්තූති කොට, කේන්දර ආදිය ගලපාගෙන යථා කාලයේ තථා අයුරින් කථා කරන බැව් පවසා දුරබණුව පසෙකින් තැබුවේය.

සිරා කොලුවාගේ අසරණ පසුම්බියේ අසරණ මුදල් කේන්දර මාමා සොයා යන විට මාමා පැවසුවේ සියලුම යෝජනා අතරින් තරමක් හෝ ගැලපෙන්නේ දෙකක් බවකි. ඒ යෝජනා ද්විත්වයට සිරා කොලුවාගේ අකමැත්තත් එක් වූ  විට මංගල කිංකිණි හඬන්නේ නැතිවම නිහඬ වූවේය. යෝජනාවකින් දැරිවියක් සෙවීම කාලය, ධනය මෙන්ම කසාද බඳින්නට හදිස්සි උන් හට මානසික අවපීඩනයද ඇති කරන භයානක තත්වයකි.

පත්තරේ දැන්වීමෙන් පලක් නැති තැන කෙලියක් නැතිව ලතැවුන මගේ මිතුරෙකුට අති සුන්දර ලලනාවක් සොයා දුන් කපු සීයා කෙනෙකුගේ සරණ යන්නට  සිරා කොලුවා වන මම ඉටා ගතිමි. දුරබණුවෙන් ඇමතූ දිනෙක, ඔයාගෙම ගෙයක් තියෙනවද , වාහන මොනවද තියෙන්නෙ, කොහෙද වැඩ කරන්නෙ, පඩිය කීයද, මොනවා කරන කෙල්ලෙක්ටද කැමති, ආදී වශයෙන් ප්‍ර‍්‍ර‍ශ්න පත්තරයකට පිළිතුරු දුන් පසු අප නිවසට පැමිණ කරුණු සොයා බලන බැව් හෙතෙම කීවේය. එහෙත් ඒ දිනවල නිවසේ සිදුවූ අලුත් වැඩියා කටයුතු නිසා ගේ හදලා ඉවර උනාම මම එන්නම් යනුවෙන්  අවසානයේ හෙතෙම ශපථ කලේය.

කලින් කලට තැනින් තැනට පුංචි පුංචි ආදර කථා දෙක තුනක් ඇති වූවා මිසක සිරා කොලුවා අනංගයෙකු වූයේ නැත. මේ අතරින් අපේ ගම් පියසේම දිවි ගෙවූ ඇගේත් මගේත් ආදර කථාවට තිත තබා වසර 8 ක් ඉක්ම ගොසින් තිබුනත්...ඇගේ සිත් අහසින් මා බැස ගොස් තිබුනේ නැත. සිරා කොලුවාගේ ඇතැම් අතීත බ්ලොග් ලිපියක පුරාවිද්‍යා උපාධිධාරී පැරණි පෙම්වතී යනුවෙන් මම ඇයව හඳුන්වා තිබේ.

පුරාවිද්‍යා උපාධිධාරිනිය ගත වූ වසර 8 පුරාම වරින් වර අපගේ සබඳතාව යලිත් අරඹන්නට උත්සුක වුවත්...ඒ සෑම අවස්ථාවකම මම ඇයව මග හැරියෙමි. කුඩා කල සිට මා ඇයව දුටු නිසාත්...එකම ගම් පියසේ නිසාත්...ඇගේ වටිනාකමක් එවකට මට දැනෙන්නට නැත. සරසවියේ අවසන් වසරේ ඈ සිටිද්දී අපේ පෙම නතර වූවේය. ඇය එදා නතර වූ තැනම නතර වී සිටියත් මම බොහෝ තැන්හි ඇවිද ගියෙමි. හරියට ලෝකයේ ලස්සනම මල සොයන්නට නිවෙසින් පිටත් වූ මිනිසෙක් බොහෝ දුරු කතර ගෙවා මාස ගණනාවකට පසු යලි නිවසට එන විට අල්ලපු වත්තේ ලස්සනම මල පිපී තිබුනාක් වැනිය.

වසර 8 කට පෙර මම ඇයට වඩා රුවැත්තියකට පෙම් බඳින අටියෙන් ද්වේශසහගත ලෙස ඇයව හැරගියෙමි. ඒ අපේ සබඳතාව නවතන්නට දාහක් හේතු දක්වමිනි. ඇය වචනයේ පරිසමාප්ත අර්ථයෙන්ම ඉතාමත් අහිංසක දැරිවියකි. අපේ ආදර වියෝවෙන් පසු ගතවූ වසර 8 ඇය මහත් සෝ තැවුලෙන් ගත කල බව නොරහසකි. වරින් වර ඇගේ වේදනාව ඇය මවෙත අකුරු කලාය, නැතහොත් අන්තර්ජාලය හරහා ගන්නා ඇමතුමක සටහන් කලාය. මා ඇයටද නොකියා හොර රහසේ රටින් පිටවූ කලෙක ඇයට කෙතරම් වේදනාවක් දැනෙන්නට ඇතිද ? සිරා කොලුවා වන මට එවකට ඇගේ වේදනාව දැනුනේ නැත. මම සිරිත් පරිදි නොරටක සිට රැකියාව කලෙමි.

ඇය වේදනාව මතින් හෝ තම අධිෂ්ඨානය වෙත ගමන් කලාය. ඉතිහාසය ගුරුවරියක ලෙස රජයේ පත්වීමක් ලබා, ඉන් පසු ශාස්ත්‍ර‍පති උපාධියද සම්පූර්ණ කලාය. එහෙත් ඇය තවමත් එදා මා පෙම්කල තරුණියමය. මගෙන් ආදරය අයඳින ඇයමය.

ඇගෙන් වෙන් වී විවිධ අත ගිය මට පැතූ ලෙසම සුන්දර යුවතියක මුණ ගැසුනේය. මා ඇමතූ දිනක පැරණි පෙම්වතියට මා නැවතත් පෙම්වතෙකු බව සැළ කලෙමි. අලුත් පෙම්වතියගේ රූපයක්ද යැව්වෙමි. එය බලා ඇය තෙපලූවේ නව පෙම්වතිය බොහෝ සේ රූමත් බවකි. මට දුකයි...ඇය එසේ තෙපලුවත්...ඇය පිළිබඳ මා හට දුකක් දැනුනේ නැත.

නව පෙම්වතියගේ රූ සොභාවෙන් මන්මත් වී සිටි මට ඇය ඇතුලතින් තනිකර හිස් බව හඳුනාගන්නා විට, ඇය මා හැරගොස්, මවිසින්ම හඳුන්වා දුන් මගේ එවකට හොඳම මිතුරෙකුගේ තුරුලට වූවාය. විරහවේ වේදනාව කෙතරම්දැයි එකල මා යලි යලිත් අත් දුටුවෙමි.

කාලයේ අැවෑමෙන් මම සියරට පැමිණියෙමි. පුරාවිද්‍යා උපාධිධාරිණිය මගේ ආගමනයෙන් මහත් සතුටට පත් වූවාය. අපි බඳිමුද ? ඇය කීප වරක් මාගෙන් විමසුවාය. එහෙත් මම උදාසීනව සිටියෙමි. වසර 8 කට පෙර දිනයක ඇගේ මව්පියන්ගෙන්  ඇය හා විවාහ වීමට අවසර ගෙන තිබූ  මට ඇගේ නිවස දැන් තහනම් කලාපයකි.

මාව බලන්න කෙනෙක් එනවා ඊශ්‍රායලයෙ ඉඳන්...ඔයා මොකද කියන්නෙ...ඇය දිනක් මගෙන් විමසුවාය. මම බොහෝ සැහැල්ලුවෙන් ඔහුට කැමති වෙන ලෙස පැවසුවෙමි. මෙයට පෙරද නොයෙක් වර ඇගේ දෙමාපියන් ඇයට යෝජනා පිණිස තරුණයන් රැගෙන ආවත් ඇගේ කේන්දර සටහන සමග ඒවා සමපාත නොවූයෙන් ඒවා සියල්ලම බැහැර වූවේය. ඇගේ කේන්දරය ගලපන්නට අපහසු එකකි. එහෙත් ඇයත් මමත් කේන්දරයෙන් මනාව ගැලපෙන බැව් අතීතයේ දිණයක අපි ශපත කරගෙන සිටියෙමු.

අපි බඳිමුද ? ඇය අවසන් වතාවටත් මගෙන් විමසුවාය. මා දිහා බලාන ඉන්න එපා ඔයාට ඔය ගේන හොඳ යෝජනාවකට කැමති වෙලා එයාව බඳින්න. මම සැහැල්ලුවෙන් යුතුව නැවතත් පැවසුවෙමි.

එතැනින් පසු ඇය මට නැවත කථා නොකලත් එක් සැඳෑවක එවූ කෙටි පණිවිඩයක සටහන් වූයේ ඇය බලන්නට පැමිණි තරුණයා ඇයට කැමති වූ වගත්, ඒ දෙපළගේ කේන්දරද මනාව ගැලපෙන බවත්, ඉතා ඉක්මනින් කසාදය සිදු කොට ඇය ඊශ්‍රායලයට හෝ ඔහු සමග ඔස්ට්‍රේලියාවට යන බවත්ය.

සත්‍ය ලෙසම වසර 8 ක් මගේ පැරණි පෙම්වතිය අරභයා නිද්‍රාශීලී ප්‍ර‍තිපත්තියක සිටි මගේ දෙනෙත් විවර කලේ ඒ කුඩා පණිවිඩයයි. වසර 8 ක් පුරාවට මා දෙස බලා හිඳිමින් නිහඬවම ආදරය කල ඇගේ වටිනාකමක් මට ඒ වන තෙක් දැනුනේ නැත. මගේ ලඟම මිතුරියක මෙන් හිඳිමින් අවවාද අනුශාසනා කල ඇය අන් අයෙකුගේ අතගෙන රටින් පිටවී යන්නට ඇත්තේ තවත් මඳ කාලයක් බැව් මම යළි යලිත් සිහිපත් කළෙමි.

උඹට ආදරය නැති උන්ට ආදරය කරන්න ගිහින් හිත රිද්දගන්නෙ...මෙච්චර ආදරය කරන කෙල්ලෙක් ඉද්දි...උඹට නම් පින නෑ බොල....මිතුරන් නොයෙක් වර එලෙස කීවත් සිරා කොලුවාට ඇගේ වටිනාකම දැනුනේම නැත.

එහෙත් ඇගේ වෙන්වයාමටත් පෙර සිටම ඇගේ වෙන්වීම පිළිගන්නට දැන් මගේ සිත වෙහෙසෙයි. එහි ප්‍ර‍තිඵලය ලෙස මගේ චිත්ත සන්තානයම මහත් වූ වේදනාවකින් පිරී යන්නට ගත් වූයේ දින දෙක තුනකි. කාර්යාලයේ එදිනෙදා රාජකාරි ඉටු කරන්නට අපහසු තරමට මම මානසික මට්ටමෙන් පිරිහුනේ පුදුම සහගත අන්දමිනි. මගේ ආයතන ප්‍ර‍ධානියන් මගේ ගැටලුව ගැන දැනුවත් වූ පසු එයින් ගොඩ එන්නට අනුශාසනා කළෝය. එහෙත් තව තවත් වේදනා පතුලේ ගිලී ගියා මිස මා ලැබූ සහනයක් නැත.

වසර 8 ක් පුරා ඇය විඳි වේදනාව දැන් ක්‍රම ක්‍රමයෙන් මා ගිලගනිමින් සිටියි. දින දෙක තුනක් විඳ දරාගෙන සිටින්නට බැරි තරම් වූ එය ඇය එතරම් කාලයක් නිහඩවම වින්දේ කෙසේදැයි මම පුදුමයෙන් මෙන් සිතුවෙමි. ඇගෙන් තොරව ජීවත් වන්නට බැරි බැව් මා තේරුම් ගන්නා විට අශ්වයා පැන යන්නට ඔන්න මෙන්නය.

ඇය තවමත් විවාහක නැත. එහෙයින් නැවත කෙසේ හෝ ඇයව ලබාගනිමියි මම අධිෂ්ඨාන කළෙමි. ඇයව දුරබණුවෙන් ඇමතුවෙමි. ඇය වෙනදා මෙන්ම සන්සුන්ය දයාබරය. වෙනසක් නැත. 

අපි බඳිමු...මම කීවෙමි.

ඇය සිහින් හඬින් ඉකිබිඳින බවක් ඇසේ...ඇයි ඔයා ඕක කියන්න ඔය තරම් පරක්කු උනේ...මම අවුරුදු 8 ක් තිස්සෙම උත්සාහ කලේ ඔය වචනෙ ඔයාගෙ කටින් කියව ගන්න. ඒත් දැන් ඔයා හොඳටම පරක්කුයි අයියෙ. මට ආපහු හැරෙන්න බෑ. ගෙවල් දෙකේම අය මුණ ගැහිලා කේන්දර ගලපගෙන දැන් ඉතිරි වෙලා තියෙන්නෙ කසාදෙට දින යොදාගන්න විතරයි.

මම නොයෙක් වර ඇවිටිලි කලත්...ඇගේ සිත වෙනස් කරන්නට නොහැකිය. මා පෙලන වේදනාව දිනෙන් දින දැඩි වේ. ඇය වේදනා විඳින කල හැඟීමක් නැත්තෙකු ලෙස සිටි මට කාලයේ ඇවෑමෙන් ඒ වේදනාවම උරුම වී ඇත්තේ දෛවයේ සරදමක් පරිද්දෙනි. ලෝකයේ සෑම ක්‍රියාකාරකමකටම සාධාරණ වූ ප්‍ර‍තිවිරුද්ධ ක්‍රිියාවක් ඇති වග මම දැන් විශ්වාස කරමි.

මම දිනපතා ඇයව දිනාගන්නට නොයෙක් වර ඇමතුම් ලබා ගත්තද ඇය සෑම විටෙකම කීවේ දැන් මා ප්‍ර‍මාද බවයි. අවුරුදු 8 ක් ඔයා එක්ක හිටිය මට වඩා මාස දෙකක් ආශ්‍ර‍ය කරපු කෙනාද ඔයාට ලොකු...මම අසාධාරණ ගැටලුවක් නැගුවෙමි. ඒකට මට දෙන්න උත්තර නෑ...ඇය එසේ පැවසුවාය.

මට ආපහු හැරෙන්න බෑ....ඇගේ වදන් මගේ දෙසවනේ දෝංකාර දෙයි....එක් දිනක් සවස කාර්යාලයේ මිතුරන් සමග මධු සාදයකි. මගේ චිත්ත සන්තානයම මේ වේදනාවේ ගිලී මම පුදුමාකාර පීඩාවකින් යුතුව සිටියෙමි. මා ගැන සොයාබලන්නට ගෙදර ඇත්තන්ට අමතරව සිටි එකම තැනැත්තියත් මට සමුදෙන්නට ඇත්තේ තවත් සුළු කාලයක් බැව් මම මටම කියා ගනිමින් සිටියෙමි. මම ඇයව ඇමතුවෙමි. 

මම අවුරුදු 8 ක් ඔයා වෙනුවෙන් බලා හිටියා. ඔයාට කිසිම හැගීමක් තිබුනෙ නෑ මා ගැන...මේ කෙනා මාව බලන්න එන්න කලිනුත් මම ඔයාට කිව්වා...ඔයා එතකොටවත් ඒක වලක්වන්න හැදුවෙ නෑ. දැන් පරක්කුයි. හොඳටම පරක්කුයි.

අද මම හොඳටම බොනවා...ගෙදර එයිද, අතරමග හැප්පිලා මැරෙයිද මම දන්නෙ නෑ... 

අනේ එහෙම බොන්න එපා...ඔයාට මොනවා හරි උනොත් මටත් දුකයි...පිස්සු නැතුව ගෙදර එන්න පරිස්සමෙන් ඇය එසේ පැවසුවාය.

එදින මම ජීවිතයේ ප්‍ර‍ථම වතාවට පියවි සිහිය නොමැති වනතෙක්ම මධු පානය කළෙමි. ෂැන්ඩි නොමැතිව වේදනාව කැපෙන්නට කියා  අමුවෙන්ම බිව්වෙමි. කාර්යාල සගයන් මහත් වූ වෙහෙසක් ගෙන මා වත්තම් කරගෙන පැමිණි ආකාරය මට කිසි ලෙසකින් මතක නැත. නිවෙසට පැමිණ පැය ගණනාවක් යන තුරාවට මට සිහියක් නැත. මේ ළමයා ඇයි මේ තරම් බිව්වෙ...දෙමාපියන් විස්සෝපයෙනි.

මම පසුදා ඇය අමතා මගේ වේදනාවේ තරමත් පෙරදා රාත්‍රියේ අරුමයත් ඇයට පැවසීමි. ඇය නිහඩවම සිටියාය.

ඔයා ඔහොම ගිහින් බේබද්දෙක් වෙලා ජීවිතේ නාස්ති කරගත්තොත් මගෙ ජීවිතේ සතුටින් ගෙවුනට වැඩක් නෑ. 

එතැන් සිට මම නැවත නැවතත් ඇගේ සිත දිනාගන්නට වෑයම් කළෙමි. ඇයව නොපමාව කැන්දාගෙන යන බැව් පැවසුවෙමි. අවසානයේ මාස දෙකකට වඩා වසර 8  බලවත් බැව් ඇය පිළිගත්තාය.

ගෙදර ඇවිත් අහන්න...එයාලා ඔයාව එලවගනීද මන්දා...මට තේරෙන්නෙ නෑ අනේ...මාවත් ගෙදරින් එලවලා දායි අම්මා...ඇගේ ස්වරය හැඬුම්බරය.

ඇගේ සහෝදරයා කලකට කලින් මගේ හොඳම මිතුරෙකි. අපේ ආදර සබඳතාව බිඳ වැටුන දා ඔහු අපේ මිත්‍ර‍ත්වයෙන් ඈතට ගියේය.

මම අයියව මුණ ගැහෙන්නද ? එයා හරහා දෙමාපියන්ට දන්වමු....

ඇය එයට කැමැති වූවාය.


එයින් අනතුරුව දවසක මම හොර රහසේම ඇගේ සහෝදරයාව ඔහුගේ සේවා ස්ථානයේදී මුණ ගැසුනෙමි. ඔහුගේ නැගණිය වැනිව ගතිගුණ ඇති තරුණියක වර්තමානයේ සොයාගැනීමට ඇති අපහසුතාව මෙන්ම, ඇගේ වටිනාකම මා හට දැනෙන්නට ප්‍ර‍මාද වීම පිළිබඳවද මම ඔහු සමග කථා කලෙමි. ඔහු බොහෝ සංවේදී වී ඇත.

අවුරුදු 8 ක් නංගි විඳපු දුක මම දන්නවා. අපේ තාත්තා එක්ක ඔය ගැටලුව ගැන කථා කරන්නෙ කොහොමද කියලා මම කල්පනා කරන්නෙ. එයාලා කවුරුවත් ඔයාව ආපහු පිළිගන්න කැමති නෑ. තමන්ගෙ දුවව එක වතාවක් ප්‍ර‍තික්ෂේප කරපු මිනිහෙක්ට එයාලා මොන වගේ ප්‍ර‍තිචාරයක් දක්වයිද...මගේ නම් අකමැත්තක් නෑ...මම උත්සාහ කරන්නම් එයාලා එක්ක කථා කරන්න. 

එයින් පසු උදා වූ සති අන්තයේ දවසක උදෑසනම ඇගේ පියාණන් අප නිවසට පැමිණියේ හදිසියෙනි. මා පියාත් ඇගේ පියාත් පැරණි මිතුරන්ය. මව්වරුන්ද එසේමය. මේ සියලු බැඳීම් වසර 8කට පෙර මොට වූවේ මගේ තීරණයෙනි.

ඔයාගෙ පුතා අපේ දුව එක්ක ආයෙ පැටලෙන්න හදනවලු...දැන් එයාට මනමාලයෙක් හොයලා කේන්දර ගැලපිලා ඔක්කොම ඉවරයි. එක සැරයක් දාලා ගිය කෙනෙක්ට අපි කොහොමවත් කැමති වෙන්නෙ නෑ. ඔය ගැන කථා කරන්න පොඩ්ඩක් අපේ ගෙදර එන්න.

අමුතුවෙන් වෙලාවක් ඕනෙ නෑ...මම දැන්මම එන්නම්...මා පියාණන් මේ සිදුවීම පිළිබඳ සියලුම තතු දැන සිටි නිසා ඒ වේලාවෙම ඇගේ නිවස බලා පිටත්ව ගියේය.

දෙමාපියො කැමති නෑ කියලම කියයි. ඒත් ගෑණු ළමයගෙ කැමැත්ත අහලා බලමු කියලා ඔයා කියන්න. මම එයාට ඒ ගැන කියලා ලෑස්ති කරලා තියෙන්නෙ. එපරිද්දෙන් සිදු වීමට යන කාරණය ගැන මා පියාණන් මෙන්ම ඇයද දැනුවත් කළෙමි.

පියාණන් එහි යන විට ඇගේ නිවසේ සභා තොමෝ රැස්වී සිටි බවත්...විවිධ කථා බහ අතරේ මේ කාරණය ගැන නැවත කථා කරන්නට දෙයක් නැති වග ඇගේ පියා පවසනාවත් සමගම, දුවගේ තීරණය එයාගෙන්ම අහලා බලමු යයි මා පියාණන් පැවසූ නිසාම ඒ ගැන විමසන්නට කටයුතු යෙදුන බවත්, ඇගේ තීරණය නිර්භීතව හෙළි කල පසු ඇගේ දෙමාපියන් අසරණ වූ අන්දමත්, ඕක කලින් කිව්වා නම් අපි මනමාලයො ගේන්නෙ නෑ නේද මේ ගෙදරට යනුවෙන් ඇගේ මව ඇයට සැර කල බවත්, පසුව මා හට දැනගන්නට ලැබුනි.

කාලය වෙනදා මෙන් ටික් ටික් හඬින් ගලා ගියේය. සියලු නොහොඳ නෝක්කඩු කෙමෙන් කෙමෙන් සමනය වූවේය. ඇගේ දෙමාපියන් ක්‍ර‍ම ක්‍ර‍මයෙන් යථා තත්වයට පත් වූහ. ඊශ්‍රායලයෙන් පැමිණි විවාහ අපේක්ෂකයා අපේක්ෂා භංගත්වයෙන් නැවතත් විදේශගත වූවේය.

පසුගිය බක් මාසයේදී ඈ වසර 8 ක් පුරාවට පැතූ ලෝකය මම ඇයට හිමි කර දුන්නෙමි. මෙයින් මතු සිරාගේ කාමරය තුල සිරාගේ බූට් කථා ලියවෙන්නේ නැත. ඒ සමය දැන් අතීතයට එක් වී හමාරය. අප දැන් ඉතාම ප්‍රීතිමත් විවාහක යුවලකි. අපට අහිමි වූ වසර 8 ගැන දුක් නොවී අපි වර්තමානය ගෙවාදමමින් සිටින්නෙමු.

වචනයේ පරිසමාප්ත අර්ථයෙන්ම ඇය කඳිම බිරිඳකි. සිරා කොලුවාගේ සමාජ සත්කාර උදෙසා, විශේෂයෙන් ඈත පළාත් වල අසරණ පාසල් දරුවන් වෙනුවෙන් සිදු කරනා සත්කාර උදෙසා ඇගේ දායකත්වයද දැන් නොඅඩුව ලැබේ. ඉතිහාසය ගුරුවරුන් නොමැතිව ලතැවෙන පිටිසර පාසල් වලට ඇගේ දායකත්වය නිවාඩු සමයේ ලබා දීමටද ඇය කැමතිය.

ලෝකයේ සුන්දරම කුසුම සොයා ඉබා ගාතේ යන, තමා ආසන්නයේම ඒ මල විකසිත වී ඇති බැව් නොදන්නා සිරා කොලුවා වැනි බොහෝ දෙනා මේ සමාජයේ තවත් සිටිති. ඒ ඇත්තන්ට මේ ලියමන දකින්නට ලැබේවායි පතමි!!!





මම කාමරේ අරින සිරා කොලුවා.






ප.ලි

ඇගේ ජීවිතයට අදාළ කොටස් මෙම ලිපියේ අන්තර්ගත නිසාම, ප්‍ර‍ථමයෙන් මා ප්‍රිය බිරිඳට කියවන්නට ලබා දුනිමි. ඇගේ අවසරය ලැබුන පසු මෙසේ පබ්ලිෂ් බටනය එබුවෙමි.

Wednesday, June 13, 2018

61 නුවර මැණිකේ

කලකට පසු කාමරයේ දොර විවර කරමි. සිරා කොලුවා සහ කාමරය අතර අතීතයේ දිනක තිබුනේ ගහට පොත්ත බඳු ඉතාම සමීප සබඳතාවයක් වුවද කාලයේ ඇවෑමෙන් ඒ සියලු දෑ වෙනස් වී තිබේ. ඇතැම් විටෙක ඇතැම් සිදුවීම් දෙස නිවී සැනසිල්ලේ බලන විට ඇතිවන්නේ විශ්මයකි. ඒවා කෙසේ සිදු වීදැයි සිතෙන තරමට පුදුම සහගතය. 

මැලේසියාවෙන් ලංකාවට ආනයනය වූ සිරා කොලුවා සිරි ලංකාවේදී අභිනවයෙන් ආරම්භ කල ව්‍යාපාරික කටයුතු මාස කීපයකට සීමා වෙද්දී, එයින් පසු මගේ නවාතැන වූයේ සිරිලංකාවේ සුප්‍රසිද්ධ සමාගමකි. ව්‍යාපාර හිමියාගේ තත්වයේ සිට නැවතත් මා වැටුප් ලබන සේවකයෙකුගේ තත්වයට පත් වූයෙමි. දන්නා හඳුනන කොල්ලාගේ  සිට බල්ලා දක්වා උන් යාලු ෆිට් එකට ඇතැම් රාජකාරි මට පැවරීමත් ඒවා ඉටු කර දුන් පසු ගාස්තු අයකර ගැනීම ඉබ්බාගෙන් පිහාටු ඉල්ලනවාට සමාන වීමත්, මගේ සේවාව ලබාගත් ඇතැම් මහා පරිමාණ කර්මාන්ත කරුවන්, තානාපති කාර්යාල, නැති බැරි උන්සේ මාස දෙක තුන ණයට ඉල්ලා සිටින විට සිරිලංකාවේ බිස්නස් සිරා කොලුවාට තිත්ත වූවේය. සැබැවින්ම මෙවැනි උන් සමග බිස්නස් කරනවාට වඩා වැටුපකට සේවය කිරීම අනවශ්‍ය හිසරද රාශියකින් ගැලවී යාමක් බැවින් මේ අලුත් වෙනසට මම ප්‍රිය වීමි. අවසානයේ මම තෘප්තිමත් සේවකයෙක් වූයෙමි.

සිරා කොලුවා මෑත වකවානුවේ දෙපයින් සමබරව  හිටගන්නා අයුරු දුටු ගෙදර බුදුන් අම්මා, කසාදය යන වචනය මිහිරි දැවටුමක ඔතා මා වෙත නිතර නිතර පෑයෙන් මම මහනුවර පළාතේ සුදු මැණිකේ කෙනෙකු බැහැ දකින්නට යාමට මුලින්ම එකඟ වූයෙමි. මේ ගමන පංගරාර්තු කරන්නට මා මිත්‍ර අයියා බඩා වින්දේ නොවිදිනා දුකකි. නිතර දෙවේලේ ඇගේ නිවසට මා ගැන තොරතුරු ඡායාරූප  ආදිය සපයමින් සිරා කොලුවා විවාහකයෙකු කරන්නට ඒකා දර දිය ඇද්දේ පරම මිත්‍ර  චේතාවෙන්දැයි, තමන් වැටුන වලේ අහිංසක සිරා කොලුවාද වට්ටන්නෙමියි යන උදාර සිතුවිල්ලෙන්දැයි තවමත් පැහැදිලි නැත.

ඡායාරූප වල පෙනෙන ඈ මට වඩා උසැති තැනැත්තියකැයි මට සිතෙන විට අයිය බඩා ඇගේ උස නිවැරදිව මැන මාවෙත සන්නිවේදනය කරන්නේය. ජායාරූප වල මා දකින ඈ සෙල්ලක්කාර යැයි මට සිතෙන විට වටෙන් පිටෙන් ඇගේ ජාතකය සොයා අයියබඩා මා වෙත සැලකරන්නේය. එවන් විටෙක මෙවන් මිතුරන් වාසනාවක් යැයි මට සිතුනේය.  

වැඩේ දැනටම හරි වගේ මචං, උඹලගෙ කේන්දරත් හොඳට ගැලපෙනවලු...කෙල්ලගෙ අම්මා උඹලට දවල්ට කාලම යන්න එන්න කිව්වෙ ඒ අය කැමතියි වගේ නැත්තං එකපාර කෑමකට ආරාධනා කරන්නෙ නෑනෙ... නේද ? ජංගම දුරබණුවෙන් ඇමතූ දිනයක අයියා බඩා එසේ කීවේය.

නුවර පළාතේ ඈත ඉසව්වක පිහිටි මේ ඇත්තීගේ නිවසට දෙමාපියන් සමග මා ගිය ගමනේ රථාචාර්ය තනතුර උසුලන ලද්දේ ඊයෙ පෙරේදා දවසක කැන්ගරු දේශයට අපනයනය වූ මා මිත්‍ර අතුකෝරල ගොයියාය. අතුරු මාර්ගයට හැරෙන තැනදී අප පිළිගත් අයිය බඩා පෙන්වූ දිශාවන් ඔස්සේ ඇදී ගිය මෝටර් රථය අවසානයේ ගම් නියම් ගම් පසුකරමින් ගොස් රථ වාහන දෙකකට එකිනෙකා පරයා යා නොහැකි තරමේ කෙසඟ මාර්ගයක නතර වූවේය. අපේ ගමනට තවමත් නැවතීමක් නැත. අතුකෝරල ගොයියා සීරුවට පදවන රථය දැන් දැඩි ආනතියක කන්දක් තරණය කරයි. වාහනයේ ඉදිරිපස වීදුරුවෙන් අහස මිස වෙනත් කිසිවක් පෙනෙන්නට නැත. ඒ තරම් ආනතියක අපි දැන් සිරවී සිටින්නෙමු.

වාහනේ අදියිද බං....රථාචාර්ය අතුකෝරල මගෙන් විමසයි.

ට්‍රයි එකක් දෙමු...දවල්ට කාලා යන්නත් එක්කනෙ එන්න කිව්වෙ. මගේ වදනින් ඔද වැඩුන හෙතෙම ඇක්ස්ලේටර් ලෑල්ල අඩියටම පාගා කටුක මග තරණය කොට අවසානයේ මනමාලි කෙල්ලගේ මිදුලටම රථය පදවා ඉසිඹු ලෑවේය.

රථය මිදුලට පිවිසෙන විටම වටෙන් පිටෙන් මතුවූයේ නැදෑයින්ද, පවුලේ අයද, අසල්වාසීන්දැයි මා හට නිනව්වක් නොවීය. මමත් අතුකෝරල ගොයියත් සම වයසේ උන් නිසා අප දෙදෙනාගෙන් මනමාලයා කොයි එකාදැයි වටහා ගත නොහැකිව නරඹන්නන් වල්මත් වූ කලෙක අයිය බඩා අතින් සංඥා කලේ මා මනාලයා බවයි. එයින් ඔවුන්ගේ සැකය දුරු වී දෙකට තුනට පහත් වී ඉතාමත් උණුසුම් අන්දමින් මා පිළිගත්තෝය. සැබැවින්ම ඔව්හු හිත හොඳ මිනිසුන්ය.

මේ නිවස පිහිටා තිබුනේ මනරම් හෙල්මැළි කුඹුරු යායකට මායිම්ව වට පිටාවේ තිබුන අවශේෂ නිවාස වලින් හුදෙකලාවය. නිවස වට පිටාවේ විවිධ ආර්ථික භෝග හොඳින් වැඩී තිබුන අතර ඒ අතරින් සාදික්කා සහ මැංගුස් ප්‍රමුඛ වූ බැව් මට හොඳින් මතකය. 

අතින් කටින් ගෙන ගිය දෑ එහෙන් මෙහෙන් තබා, සාලයේ කොනක වූ සැප පුටුවකට බර දුන් පසු සභාව මඳක් නිශ්චල වූවේය.  දැරිවියක බලන්නට මේ ආකාරයේ නිළ ගමනක් කුළුදුලේම ගිය නිසාදෝ සිරා කොලුවාගේ චිත්ත සන්තානය සමග භෞමික අඛණ්ඩතාවයද ප්‍රකම්පනය වී තිබුන හෙයින් මම මගේ ආසන්නයේම අතුකෝරල ගොයියාව හිඳුවා ගත්තෙමි.

එහෙත් වැස්සද ? ඕගොල්ලන්ට දැන් මහන්සිත් ඇති නේද සෑහෙන දුරක් ආවනෙ, කීයටද පිටත් වුනේ, ගේ හොයාගන්න අමාරු උනාද ? නානාප්‍රකාර ගැටලු එහෙන් මෙහෙටත්, මෙහෙන් එහෙටත් හුවමාරු වන වට පිටාවක සභාවේ ප්‍රධානියා වූයේ මනමාලි කෙල්ලගේ පියතුමායි.

ජීවිතයේ 70 දශකය පසුකර සිටි හෙතෙම ඉඩම් හිමි වැවිලිකරුවෙකි. ඔහුගේ දෑතේ පහස ලැබූ නිවස වටා වූ ගස් කොලන් සමූහය ඔහුගේ වැවිලිකාරකම පිළිබඳ දෙස් දෙයි. සාදික්කා තමයි මම ප්‍රධානව වවන්නෙ. ගිය අවුරුද්දෙ විතරක් සාදික්කා වලින් ලක්ෂ ...........ආදායමක් ලැබුනා. ඔහු වට පිටා බලා සැහැල්ලුවෙන් තෙපලුවේය.

තේ ටිකක් බීලා ඉමු...මහන්සිත් ඇතිනෙ...මනමාලි කෙල්ලගේ සහෝදරියන් කැළ පිරිවරා සිටි ඇගේ මැණියන් අප වෙත ලෙංගතු සිතින් ආරාධනා කළාය. නුවර මැණිකෙලාගේ දෑතින් හැදුන රස කැවිල්ලක් දෙකක් ආමාශගත කොට උණුසුම් තේ කෝප්පයකින් සන්තර්පණය වූ පසු ඒ උත්කර්ශවත් මොහොත උදා වූවේය.

දුවේ මෙහෙ එන්න.



මෑණියන්ගේ ආරාධනයෙන් එතෙක් වේලා නිවසේ ඇතුලත කාමරයක සිරවී සිටි මනමාලි කෙලී මවෙත පැමිණියේ බුලත් හෙප්පුවක් දෑතේ දරා ගනිමින් කඩිසර ගමනිනි. ඇය ඉතාම පැහැපත්, එමෙන්ම දිගු වරලසක් හිමි රුවැත්තියකි, ඇය රෙදිකඩකින් ආවරණය කල බුලත් හෙප්පුව මවෙත පෑවාය.

බුලත් හෙප්පුව දුන්නම මොකද කරන්නෙ...මම බුලත් කොළයක් අරගෙන හෙප්පුව පැත්තකින් තියනවද ? එහෙම නැත්තං හෙප්පුව විතරක් පැත්තකින් තියනවද...එහෙමත් නැත්තං බුලතයක් කනවද ? මෙවැනි ගමන් ගොස් පළපුරුදු මිත්තරයන් අමතා වේලාසනින් මේ චාරිත්‍රය ගැන තතු විත්ති දැන ගත් නිසාම සිරා කොලුවාට චකිතයක් නැත. 

බුලත් හෙප්පුව මවෙත දිගු කල ඇය එකෙනෙහිම දණහිසෙන් මඳක් පහත් වී ආයුබෝවන් කීවාය. හෙප්පුව ආවරණය කල  රෙදිකඩ ඉවත් කොට එය එතැන වූ මේසය මත තැබීමෙන් බුලත් සහ මා අතර වූ සබඳතාවය විසන්ධි කරන්නට මා හට හැකි වූවේය.

නුවර මැණිකෙලා ඔසරිය අදින්නේ ඔවුනටම ආවේණික ක්‍රමයකට බැව් මා හට ප්‍රත්‍යක්ෂ වූයේ මා ඉදිරිපිට හිඳගෙන සිටින ඈ දෙස හොරෙන් බලනා විටදීය. අප ප්‍රදේශයේ එකියක් ඔසරිය අඳිනවාට වඩා අමුත්තක් එතැන තිබුනේය. එහි අමුතුම අලංකාරයක් තිබේ. ඔසරියෙන් එපිට තිබෙන ඇගේ පාදයේ ඇගිලි යන්තමින් පෙනෙයි. ඒවා කුඩා දරුවෙකුගේ මෙන් රෝස පැහැතිය.

මේ දෙන්නට කථා කරගන්න ඉඩ දීලා අපි ටිකක් ඈතට යමු.

ඒ බසට අවනත වූ අයියා බඩා සහ අතුකෝරල ගොයියා ඇසකින් තලු මරමින් ඉවත ගියෝය. ඇගේ මෑණියන් අප වටා සිටි ඇත්තන් සමග එතැනින් පිටව ගියෙන් හා පුරා කියා පැමිණි ගමනක උපරිම ඵල නෙලාගන්නට අවකාශය සැලසී තිබේ.

මේ ඔයාගෙ පළවෙනි වතාවද ?

මටත් කලියෙන් ඇය හඩ අවදි කලාය...ඔව් යනුවෙන් මම මුනිවත බින්දෙමි.

බොරු කියන්න එපා හොඳ පුරුදු කාරයෙක් වගේනෙ...

ඇත්තමයි...පළවෙනි වතාව....ඔයාගෙ ?

ඔයා 9 වෙනියා....මා සිතූ ලෙසම ඈ පුරුදු කාරියකි.

මෙච්චර කාලයක් ආපු අය ගැලපුනේ නැද්ද ?

සමහර ඒවගෙ කේන්දර ගැලපුනේ නෑ. සමහර අයට මම කැමති උනේ නෑ.

එතැනින් පසු ඇගේ රුචි අරුචිකම් දැනගන්නට තවත් ප්‍රශ්න දෙක තුනක් විමසන්නට ඇත. ආරූඩකරගත් කෘතිම ලැජ්ජාශීලී භාවයක් පෙන්වූ ඇය තවත් මොහොතකට පසු දැන් ඇති නේද කථා කලා යැයි මා හට පැවසුවාය.

දුර බැහැර ගෙවාගෙන, කාලය, මුදල් කැපකරගෙන ඇගේ නිවසට පැමිණි මා සමග කථා කරන්නට ඇයට ඇවැසි නැත්තේ ඇය විවාහයකයට අකමැති තැනැත්තියක නිසා බැව් මම සිතුවෙමි. ගෙදර අයවලුන්ගේ කරදරයෙන් මිදෙන්නට ඇය සමහර විටෙක මනාලයන් එනවාට කැමති වන්නට ඇත. මෙවැනි වයසක තැනැත්තියක් කුඩා දැරිවියක මෙන් හැසිරීම ප්‍රහේලිකාවකි. ඒ සිතුවිල්ල නිසාම ඇය රූපයෙන් සුන්දර වුවත් මගේ හිත් ගත්තේ නැත.

අනේ මගෙ කෙල්ල ලැජ්ජාවෙන් රතු වෙලා...

මොහොතකින් පැමිණි ඇගේ මෑණියන්ගේ අතිශෝක්ති වර්ණනාවෙන් අනතුරුව දහවල් බතට කාලය එළඹුනේය. මනමාල කෙලීගේ සහෝදරියන් විසින් වැරවීරියෙන් සකසන ලද විවිධ ව්‍යංජන සහිත සරු කෑම මේසයක් එහි වූවේය. හෙල්මැළි කුඹුරෙන් ලද බත ඒවා සමග මැනවින් මුසුකොට ආමාශය කරා යොමුකොට, අවසානයේ නුවර මී කිරිවලින්ද, ගෙවත්තෙන් නෙලා ගත් නැවුම් පළතුරු වලින්ද සප්පායම් වූ පසු භෝජන සංග්‍ර‍හය අවසන් වූවේය.

එයින් පසු පැවති පිළිසඳරේදී ඔවුන්ගේ අකමැත්තක් නැති බවත්, තරුණිය කැමති නම් විවාහය සිදුකල හැකි බවත් සැළ කෙරිණි. එයටම එක්වූ මගේ මාතාවද ඇගේ අකමැත්තක් නැති බවද කීවාය. මගේ තීරණය මෙන්ම ඇගේ තීරණයද එළඹෙන සතියේ ප්‍ර‍කාශයට පත් කරන අටියෙන් අපි නැවතත් ගම්බිම් බලා ආවෙමු. ඒ එන ගමනේදී මග දෙපස වූ දූරියන් අළෙවිසැල් දුටු විට මට මතක් වූයේ මැලේසියාවේදී අප දූරියන් අනුභව කල ආකාරයයි.

දූරියන් පුරුෂ ශක්තිය වර්ධනය කරන්න හොඳ කෑමක් ගොයියො...

මම අතුකෝරල ගොයියාට කිව්වා පමණි. ඒකා රථය නවතා ගෙඩි දෙකක්ම මිළට ගත්තේය. ඔයින් මෙයින් කාලය ටික් ටික් හඬින් ගලා ගියේය.

මොකද කියන්නෙ උඹ කෙල්ලට කැමතිද ?

දින කීපයක ඇවෑමෙන් අයිය බඩා ඇසුවේය.

අපි කෙල්ලට මුලින් කියන්න කියමු....කොහොමත් මගෙ හිතට ෆිට් එකක් නෑ. මම නොවලහා කීවෙමි.

එයින් අනතුරුව තවත් දින කීපයක් ගත වෙන්නට ඇත.

දිනක් තකහනියේ දුරබණුවෙන් මා ආමන්ත්‍ර‍ණය කල අයිය බඩා කීවේ මෙවැනි කථාවකි.

එදා බලන්න ගිය කෙල්ල මේ කසාදෙට කැමති නෑ කිව්වලු. ඒක අහලා ගෙදර උන්ට යකා නැගලා...ඒකිට ආයෙ කිසිම මනමාලයෙක් ගේන්නෙ නෑ කියලා තර්ජනය කරලා. කිසිම හේතුවක් නැතුව එන හැමෝටම ඒකි අකමැති වෙනවලු.

අකමැති වෙන්න හේතුව ඇහුවම හේතුවක් නෑ කියනවලු. මම හිතන්නෙ කෙල්ලට බඳින්න කැමැත්තක් නැතුව ඇති. ඒකයි ඒ වගේ උත්තර දෙන්නෙ. ඇරත් ඔය වගේ සීනි බෝල ගෑණු එක්ක මොන කසාදද  බං. තව හොඳ කෑලි දෙක තුනක් ඉන්නවා අපි එයාලව බලමු ඊලගට, එසේ කියූ අයිය බඩා දුරබණුව විසන්ධි කලේය.


කරුණු එසේ වුවත් සිරා කොලුවා දැන් ප්‍රිය සැමියෙකි. ඒ කෙසේද, කවුරුන්ද යන වග මීළග ලිපියෙන් කියමි.



මම කාමරේ අරින සිරා කොලුවා.




ප.ලි

ඊයේ දිනයට සිරාගේ කාමරය අටවා වසර 6 කි. වර්තමානයේ නිතරම නොලිව්වාට, අතීතයේ සිරා කොලුවා කැපවීමෙන් ලියූ හොඳ ස්පෝට්මීට් කොලුවෙකි. 


Related Posts Plugin for WordPress, Blogger...